সিঁগি মাহা রেনাঃ সাকাম ‘চেরেচ্ আড়াং’ লেখা- ১৩০

 

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান-   ᱥᱩᱵᱩᱫᱤᱭᱟ. ᱢᱩᱨᱢᱩ, ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ,, ᱜᱳᱯᱮᱥᱣᱚᱨ ᱢᱟ, ᱱᱰᱤ, ᱨᱟᱢᱞᱟᱞ ᱴᱩᱰᱩ,  বাড়তাং  সরেন, সুচাঁদ  হাঁসদা, সিতেন মান্ডি, ঠ্যেন্টা  মুর্মু, দুর্গাচরণ মুরমু, সমরলাল টুডু, দুগাই টুডু, বাবলু সরেন।

 

১।। 

ᱦᱚᱭ

 ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱡᱷᱤᱨᱤ ᱡᱷᱤᱨᱤ ᱦᱚᱭ
ᱫᱟᱨᱮ ᱱᱟᱹᱬᱤᱭ  ᱚᱦᱚᱭ ।

ᱦᱩᱞᱩᱭ ᱦᱩᱞᱩᱭ ᱦᱚᱭ
ᱱᱟᱶᱟ  ᱥᱟᱠᱟᱢᱮ ᱛᱷᱟᱭᱳᱭ ।

ᱦᱟᱫᱟᱨ ᱦᱟᱫᱟᱨ ᱦᱚᱭ
ᱥᱟᱺᱜᱤᱧ ᱠᱷᱚᱱᱮ ᱦᱚᱦᱚᱭ ।

ᱦᱚᱭ ᱵᱷᱟᱱᱰᱚ ᱜᱩᱨᱞᱟᱹᱜ
ᱛᱤᱸᱜᱩ  ᱫᱟᱨᱮ  ᱦᱩᱨᱞᱟᱹᱜ ।

ᱦᱮᱸᱫᱮ ᱨᱤᱢᱤᱞᱮ ᱨᱟᱠᱟᱵᱽ
ᱢᱚᱱᱮᱭ ᱟᱠᱟᱵᱽ ᱥᱟᱠᱟᱵᱽ  ।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

২।।

ᱯᱩᱛᱷᱤ ᱢᱮᱞᱟ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

  

ᱱᱟᱱᱟ ᱦᱩᱱᱟᱨ  ᱯᱩᱛᱷᱤ  ᱟᱛᱮᱜᱮ
   ᱦᱚᱭᱳᱜ-ᱟ ᱯᱩᱛᱷᱤ  ᱢᱮᱞᱟ ;
ᱯᱟᱹᱴᱷᱩᱣᱟᱹ  ᱠᱚ ᱥᱟᱸᱜᱮ ᱢᱤᱫᱛᱮᱜᱮ
   ᱠᱩᱥᱤ ᱢᱚᱱᱮᱛᱮ ᱧᱮᱞᱟ  ᱾

  

ᱡᱟᱦᱟᱢ ᱠᱷᱚᱡᱚᱜ ᱪᱮᱫᱚᱜ ᱞᱟᱜᱤᱫ
    ᱵᱟᱪᱷᱟᱣ ᱡᱚᱝᱢᱮ ᱚᱱᱟ ;
ᱯᱩᱛᱷᱤ ᱢᱮᱞᱟ ᱫᱚ ᱧᱮᱞ ᱞᱟᱠᱚᱛᱤ
    ᱚᱠᱟᱨᱮ ᱦᱩᱭᱳᱜ ᱠᱟᱱᱟ  ᱾

  

ᱠᱚᱲᱟ ᱜᱤᱫᱽᱨᱟᱹ  ᱠᱩᱲᱤ ᱜᱤᱫᱽᱨᱟᱹ
   ᱧᱮᱞ ᱟᱜᱩᱭ ᱟᱥᱮ  ;
ᱯᱩᱛᱷᱤ ᱛᱟᱞᱟᱨᱮ ᱚᱞ ᱢᱮᱱᱟᱜ-ᱟ
   ᱯᱟᱲᱟᱦᱟᱣ ᱡᱚᱝ ᱯᱮᱥᱮ  ᱾

  

ᱟᱠᱤᱞ ᱫᱟᱲᱮ ᱦᱟᱨᱟ ᱵᱩᱨᱩᱜ
   ᱧᱮᱞᱟᱢ ᱯᱩᱛᱷᱤ ᱜᱮᱛᱚ  ;
ᱵᱮᱥ ᱦᱮᱣᱭᱟ ᱵᱮᱱᱟᱜ ᱥᱟᱨᱤᱜᱮ
   ᱢᱚᱡᱽᱜ ᱡᱤᱭᱚᱱ ᱜᱮᱛᱚ ᱾

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৩।।

ᱦᱟᱸᱥ ᱦᱟᱸᱥᱞᱤ

ᱜᱳᱯᱮᱥᱣᱚᱨ ᱢᱟᱹᱱᱰᱤ

  

ᱦᱟᱸᱥ ᱦᱟᱸᱥᱞᱤ ᱪᱮᱬᱮ

ᱵᱤᱞᱤ ᱞᱮᱫ ᱠᱤᱱ ᱵᱟᱲᱮ ᱾

 

ᱵᱟᱨᱭᱟ ᱢᱟᱱᱣᱟ ᱦᱚᱯᱚᱱ

ᱡᱟᱱᱟᱢ ᱞᱮᱱ ᱠᱤᱱ ᱟᱯᱚᱱ  ᱾

 

ᱯᱤᱞᱪᱩ ᱦᱟᱲᱟᱢ ᱵᱩᱰᱷᱤ ᱾

ᱧᱩᱛᱩᱢ ᱵᱟᱰᱟᱭ ᱟᱹᱰᱤ ᱾

 

ᱢᱟᱱᱣᱟ ᱦᱚᱯᱚᱱ ᱥᱟᱸᱜᱮ

ᱱᱟᱜᱟᱢ ᱢᱮᱱᱟᱜ ᱟᱸᱜᱮ ᱾

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৪।।

ᱦᱚᱯᱚᱱ ᱵᱟᱹᱵᱩ

ᱨᱟᱢᱞᱟᱞ ᱴᱩᱰᱩ

 

ᱦᱟᱹᱠᱩᱭ  ᱵᱟᱸᱬᱥᱤ  ᱦᱚᱯᱚᱱ  ᱵᱟᱹᱵᱩ
          ᱵᱟᱲᱜᱮ  ᱞᱟᱛᱟᱨ  ᱯᱩᱠᱷᱨᱤ ,
ᱵᱷᱮᱵᱮᱨᱚᱴᱮᱭ  ᱵᱟᱸᱬᱥᱤ  ᱟᱠᱟᱱ
          ᱴᱳᱯ  ᱞᱮᱫᱮᱭᱟᱭ  ᱜᱷᱩᱜᱽᱨᱤ ᱾
ᱨᱚᱴᱮᱭ  ᱟᱹᱛᱠᱤᱨᱮ  ᱰᱷᱚᱸᱬ  ᱵᱤᱧ
          ᱵᱟᱹᱬᱥᱤᱭ  ᱤᱫᱤ  ᱠᱟᱺᱦᱩ ,
ᱚᱱᱟ  ᱧᱮᱞᱛᱮ  ᱦᱟᱹᱱᱤᱭ  ᱞᱟᱸᱫᱟᱭ
          ᱜᱚᱰᱮᱛ  ᱠᱚᱨᱮᱱ  ᱵᱟᱹᱦᱩ ᱾
ᱵᱟᱹᱵᱩᱭ  ᱨᱟᱜ  ᱮᱫ  ᱩᱨᱩ  ᱠᱩᱸᱰᱟᱹᱞ
          ᱮᱰᱦᱮ  ᱠᱟᱛᱮᱭ  ᱯᱷᱟᱸᱫᱟᱭ ,
ᱚᱱᱟ  ᱧᱮᱞᱛᱮ  ᱫᱟᱱᱟᱝ  ᱠᱷᱚᱱᱜᱮ
          ᱯᱚᱠᱚᱜ  ᱨᱚᱴᱮᱭ  ᱞᱟᱸᱫᱟᱭ ᱾
ᱵᱮᱨᱮᱫ  ᱠᱟᱛᱮ  ᱮᱰᱦᱮ  ᱠᱷᱚᱱ  ᱫᱚ
          ᱚᱲᱟᱜ  ᱥᱮᱫ ᱼ ᱮ  ᱛᱟᱲᱟᱢ ,
ᱵᱮᱱᱟᱣ  ᱟᱹᱢᱟᱹᱧ  ᱮᱴᱟᱜ  ᱵᱟᱸᱬᱥᱤ
          ᱞᱟᱹᱭᱟᱭ  ᱵᱟᱯᱩ  ᱦᱟᱲᱟᱢ ᱾᱾

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৫।।

রাওয়াল মন

বাড়তাং সরেন

         

রাবাং তেহেঞ সাহায়েনা 
                   বাহা বঙ্গা সেটের এন,
কুড়হৗ পটম অচঃ এনা 
                 মন দ অটাং আফিরেন।

 

রহড় সাকাম রাগাম রুগুম 
         ডৗরখন ঝাড়গাও ঞুঁরুয়েন
বীর করেন জিয়ৗলীকোওয়াঃ
               সানাম মনে রিঞ্ঝৌও এন ।

 
এদেল মুরুৎ আরাঃ বাহা 
              নাপায় নায় কো সাপড়াও এন
অনা ঞেলতে ঞেলে দুমুর
                    হায় আডিকো রৗস্কৗয়েন ।

 
অকয় দকো গৗদুজিঞা
               অকয়কো সেরেঞ আতেন,
হিপিড় হিসিৎ হয় আতে মা
                      তিরয়ো বানাম সাডেয়েন ।

 

কোহল চেঁড়েঁ কুহু কুহু 
                  হানে সেরেঞ এহপ এন
রিপি রিপি ইঞাঃ মনে 
                  রৗস্কৗ তেয়ে অটাং এন ।

 

বাহা বঙ্গা সাগেন সাকাম 
                 দিশম ধৗরতী সাজাওএন 
হালবৗলিয়ৗ ইঞাঃ মনে 
                  তল তাঁহেন বাচয় রেবেন ।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৬।।

ফারচায়

সুচাঁদ হাঁসদা

 
সাপড়াও কেত মিঞ গড়ম কুড়ি ,
হাপেন আলম লসদঃ আলম ধুড়ি ৷
কিরিঞাঁত মিয়ৗঞ বই খাতা কলম ,
সাজ পসাক অলম ঝলম ৷
বাং বাং পাতা পরব দ বাড় ,
সেচেদঃ লৗগিত চালাঃমে বিরদৗ গাড় ৷
আম চেতান আয়মা আস ইঞৗঃ ,
পৗতয়ৗও মেনাঃ আসেম পুরুন তিঞৗ ৷
মিত দিন হাপেন হড় লেকাম হড়ঃ ,
লিচৗড়ঃ কান সাঁওতা সুসৗরেম গড়ঃ ৷
ইসিনাম আরয়াম জঃ রাচায় ,
সাঁওতা খনাঃ অজরা জবরাম ফারচায় ৷

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৭।। 

আলম নাসাও

সীতেন মাণ্ডি

  

বুরু লঃ দারে গুজুঃ
জীব জিয়ৗলি চেঁড়ে চিপরুৎ
বিঞ কিদিঞ ক আতারঃ।
রান রেহেদ্ দারে ইতৗ
রাপাঃ রঙ্গ চাবাঃ।

 
জ বিলি আড়াঃ সাকাম
রহড় সাহান এমান এমান
লেখাতে বাং চাবাঃ।
বাঞ্চাঃ লৗগিৎ উনি গে এমঃ
হয় মেশা অক্সিজেন রাসা।

 
নোওয়া কৗমি দ আলম করাও
দারে নৗড়িরে সেঙ্গেল ধরাও
  ধৗরতি আলম নাসাও।
দারে নৗড়ি বাম বাঞ্চাও এ
  বাঞ্চাঃ হরেম আদা।

 

দারে দয় সিরজৗও, বাঞ্চাও
  ‌সেঙ্গেলেম জুঁডি
জিউয়ি বৗতিম ডুগি।
দাঃ বেগর হৗকু লেকা
ছাটপাট কাতেম গুজুঃ।

 

আম তে রহয় দারে নৗড়ি
দাড়েয়াঃ‌‌ আম তুদ্ গিডি
আপনার তিতে সেঙ্গেল জুঁডি?
বায় রড়া বায় তাড়াম বৗনুঃ মনে রৗগি
জানাম খন গুজুঃ আমাঃ গে কৗমি।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৮।।

চেমেদ্ আখ্-ড়া

ঠ্যেন্টা মুর্মূ

 

অ অত্ অঃগ্ অং অল্
অলঃ ইঞ দঞ চেমেদা
বাংইঞ সা-বা  চাঁড়বল্ ।
আ আঃক্ আজ্ আম্ আউ
রিকিড়্ কাতেঞ চিদ্ আ
আথৗড়ি বাঞ কৗউমৗউ ।
ই ইস্ ইহ্ ইঞ ইর্
পিপিড় জাং এ উডৗঃ হৗনি
ফির্ ফির্  ফির্  ।
উ উচ্ উদ্ উঁড়্ ঊয়্
রাবাং জালা সেতা হপন
কুঁয়্ কুঁয়্ কুঁয়্ ।
এ এ্যপ্ এড্ এন্ এড়্
সিম সাঁডিয় কুকড়ু কেদা
কুক্কু  কুকূড়্ কুড়্ ।
ও ওট্ ওব্ ওং ওহ্
যত চিকিঞ চেমেদ কেদা
আডি রৗস্কৗ ও হো হো হো ।
মু -টুডৗঃ গাহলা টুডৗঃ
রেলা  ফারকা অহদ্
দেলাং যত হুডিঞ হাপড়াঃ
চিকি দেবন চেমেদ্  হদ্ ।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

৯।।

মাগ সিম বঙ্গাবুরু

দুর্গাচরণ মুরমু

 
পুস বঙ্গারে সেরমা পুরৗও এন
মাগ বঙ্গা চাঁদো নাওয়াই উপেলেন।
গোডেৎ বাবা আতো গটায় হহকেৎ
মাগ সিম বঙ্গাবুরু ক নেডাকেৎ।
গিদরৗ হাড়াম জতো দাড়ে সেড়া
উডুক এনা ক তারাসিং বেড়া।
অড়াঃ অড়াঃ চুরুচ চাওলে পান্তে 
টরডাং রে সিম সাব এনতে।
সেটের এনকো গড টাঁডিতে
নাওয়া পাঞ্চি ধুতি ডেংগা কাতে।

 
পারানিক বাবায় মেন কেদা-
সেদায় নেমাচার ধরম করম আরিচৗলি
জিয়ৗড় দহয় আবোন আবো পৗলি।
মারে নাংলে বন বদল আ,
দেনা পাওনা বন চুকৗও আ।
ধিরি হালাং পে কড়া ক
লেখা কোওয়া বন আতো হড়কো।
মাঝি জগ্‌মাঝি পারানিক নায়কে গডেৎ
বাছনাও কোওয়া বন নাওয়া গেৎ।

 
মারেন নায়কে বঙ্গা মান্তারে মেন
নাওয়ান নায়কে বাখেড় বঙ্গাবুরু ঠেন।
সিদুর টিডৗঃ কাতে সিম বুসৗ
আদওয়াও চাওলে রেয় আতিঞ বুসৗ।
জহার গসাই মারাং বুরু হিরলৗ
নেহর জহার জাহের আয়ো হিরলৌ।
নায়কে আঃ বঙ্গাবুরু মুচৗৎ কাতে
খড়রে জহার আকো নেহর আতে।
জম আকো জতকো বঙ্গা শোড়ে
অকয়হঁ বাং ক তাহেন এড়ে।
অড়াঃ অড়াঃ শোড়ে মিৎ  সাকাম
বাংগে হিড়িঞ গডেৎ ইদি তাম।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

১০।। 

গাং গিরু নৗই

সমরলাল টুডু

 
কাঁসাই কুঁওয়ৗরি গাং গিরু নৗই
অকাপে দুকানা কামসাও আতে ভাই,
চেলেদ কানাপে বাবু দৗই মৗই
চেৎদ কৗমি চেদাঃদ বাংপে লাই ?

 
আলেয়াঃ জানাম বির বুরু চড়াং
আঁড়গ হিজুঃ বুরু ঢিপ দাঁড়াং,
আঁজমঃ সৗরি ঞিঁর সেনঃ আড়াং
সেটেরঃ লৗগিৎ সৗমুদ গাডা মাড়াং।

 
অকত উকুর আলেয়াঃ তিঁগুন রেনাঃ
ছুড়য়ৗও ছুড়য়ৗওতে জমাঃ বারতি রেনাঃ,
তিনৗ আতু মেনাঃ নোওয়া ধৗরতি রেনাঃ
ভারয়ালে গঃআকাদা যতক জমহচ করেনাঃ।

 
বৗনুঃ তালে লাঁগা গিতিচ জৗপিৎ
বাংলে তাঁহেন থির থার হৗপিৎ,
সারা ঘৗড়িগে কৗমি গুজুঃ নৗপিৎ
পালেন বৗনুঃ তালে আলেয়াঃ পিৎ।

 
ঘানে হাবাক ডাবাক কামসাও আতে
জিউন লৗউকা পারমঃআ চেকা লেকাতে,
উইহৗর ভাবনাঃ আলে অনা ইকৗতে
ঘানেদ তাড়ামালে গুন্ঠি চাপ কাতে।

 

ইঁড়িজ লেনখান হড়াঃ জিউই বৗতি
উম ফারচাঃ লৗগিদ খেরোওয়াল জৗতি,
বোহেলাক জাংবাহা পিলচুহাড়াম লৗতি পুতি
সেটেরালে সরগপুরী সামুদগাডা বালে খুতি।

 
পিলচু মৗনমি আমাঃ দাঃরেগে  জানাম
সের চাওলে চাবা কাতে সানাম
লৗউকা ডঁবল ডঁবল বাংক  মানাম
সৗমুদ গাডা তালা সোপরোদঃ কানাম।

 
এহোবাবু আলেয়াঃ কৗমিদ আডিগে দামান
আলেঠেনগে মেনাঃ বঁগাবুরু কোওয়াঃ সামান
তাড়োওয়ারে আঃসার কৗপি সাঁকোওয়া এমান
সেটের কাতে সরগপুরি সানামাঃলে নেমাম।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

 ১১।।

মঙ্গলা হেম্ব্রম

দুগাই টুডু

 

লৗইকো কাথায় তাঁহে কানায়
      উনিদ সমাজ সুসৗ্রিয়ৗ,
আডি অকচ্‌ হুদিশ লেদায়
     উনি সমাজ দরদিয়ৗ।

 

ঞুতুম তায়দ মঙ্গলা হেম্ব্রম
      দে পাড়ারে জানাম,
পান্ডুয়া থানা হুগলী জেলা
      বাডায় গেকো সানাম।

 
খন্যান সোর সরডিয়ৗ আতো
    আচ্‌এ উচৗড় লেনা,
হড়কো সাঁও উনরে আদ
    ঞাপাম বাড়ায় এনা।

 
আকাশবানী কোলকাতা রেগে
     কেরানী চৗকরি লেদায়,
সান্তাড়ী আখড়া এহপ লাহা
     হানেয় বৗগি আদায়।

 

কামার পাড়া হাইস্কুল রে
     হোস্টেল সুপার লেনে,
 সাঁওতা বাবত তেদ উনগে
     দমেয় হুদিশ আনে।

হুগলী বর্ধমান সান্তাড় আতে
     সংস্থা বেনাও আকাত,
হুবৗঃ সুসৗ্র গাঁওতা তেগে
     উরুম গোটা জাকাত।

 
নামাল দিশম রেন হড়গে
     সুসৗ্রিয়ৗকো লেখা কেদে,
হড় হপনাঃ ভৗলৗই বাখরা
     নাপায় কৗমি লেদে।

 
সনৎ জৗতি উৎনৗও লাহায়
     এনেম দহ আনা
নেতার হঁচো বেবাক উনি
      উইহৗর ইদিয় কানা।

᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

 

১২।।

উমুল সাঁও উমুলরে

বাবলু সরেন

  

আয়োয় হহয় হপনবেটা 
আলম খেলঃ সিতুংরে , 
হপন বাবুয় তেলা রুয়ৗড় 
খেলঃ কৗনৗঞ উমুল সাঁও উমুলরে ।

 ᱿᱿᱿᱿᱿᱿ ᱞ ᱧ ᱿᱿᱿᱿᱿᱿ 

১৩।। 

মেমেঃ হপন

দুলৗড় বিটি

 

কুলহি কুলহিতে মেমেঃ হপন
  পিঁডৗ পিঁডৗতেক দন।
হবরকো লৗগিৎ গিদ্‌রৗ মাথ
  আঁড়গোনাক হেও খন।

 
 মেমে হপন পিড্‌গৗ পিড্‌গি
    ধুড়ি লোসো পোঁডো,
কুলহি পিঁডৗরে গিদ্‌রৗ মাসে
    কয়ঃকাঃকো লোঁডো লোঁডো।

 
পোঁড হেঁদে গুলি মেমেঃ
   মেঁ মেঁকো রাগ্‌,
কুশি রৗস্কৗতে গিদ্‌রৗ মাকো
   লাঁদায় খাগ্‌ খাগ্‌।

᱿᱿᱿᱿᱿᱿মুচৗৎ ᱿᱿᱿᱿᱿᱿