সিঁগি মাহা রেনাঃ সাকাম ‘চেরেচ্ আড়াং’ লেখা- ১২৪

 

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com ।    

 

তেহেঞাঃ আখড়ারে যাঁহায় কো সেলেদ্‌ আকান- ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵᱩᱫᱤᱭᱟ. ᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ, ᱱᱰᱤ, ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ,, ᱨᱟ ᱢᱯᱚᱫᱚ ᱠᱤᱥᱠᱩ,   বাড়তাং  সরেন,  সিতেন মান্ডি, দুগাই টুডু,   দুর্গাচরণ মুরমু।

  

১।।

ᱡᱟᱹᱨᱤ

(ᱞᱟᱸᱫᱟᱛᱮᱱᱟᱜ ᱜᱤᱫᱨᱟᱹ ᱵᱟᱹᱣᱞᱤ) 

   ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

  

ᱵᱩᱞᱟᱹᱱ ᱰᱤ ᱨᱮᱱ ᱨᱚᱠᱚᱡᱽ
ᱯᱷᱟᱹᱠᱩᱜ ᱢᱚᱪᱟ ᱪᱚᱠᱚᱡᱽ,
ᱢᱩᱰᱩ ᱠᱷᱚᱱᱮ ᱨᱟᱠᱟᱵ ᱦᱮᱡ ᱮᱱ
ᱦᱚᱲᱢᱚ ᱡᱚᱨᱚᱡᱽ ᱡᱚᱨᱚᱡᱽ ᱾

 
ᱥᱟᱶᱛᱮᱼ ᱫᱷᱤᱨᱤ ᱠᱟᱴᱠᱚᱢ
ᱥᱚᱭᱠᱟᱼ ᱞᱟᱨᱮᱨ ᱰᱟᱴᱚᱢ,
ᱜᱚᱴᱟ ᱵᱮᱲᱦᱟᱭ ᱜᱟᱲᱨᱮ ᱢᱮᱱᱟᱭ
ᱥᱟᱵᱨᱮ ᱵᱩᱪᱟᱹ ᱫᱟᱛᱨᱚᱢ ᱾

 
ᱵᱟᱸᱲᱠᱟᱹ ᱦᱟᱠᱳ ᱯᱩᱴᱷᱤ
ᱞᱟᱸᱫᱟᱭᱼ ᱠᱷᱤᱴᱤ ᱠᱷᱤᱴᱤ,
ᱥᱤᱢᱟᱹ ᱜᱟᱲ ᱠᱚ ᱳᱛᱳᱲ ᱯᱟᱨᱚᱢ
ᱠᱷᱟᱹᱴᱤ ᱠᱚ ᱩᱫᱩᱜᱽ ᱪᱟᱹᱴᱤ ᱾

 

"᱿᱿᱿᱿᱿ᱞ ᱧ᱿᱿᱿᱿᱿᱿"

২।।

ᱠᱟᱬᱩᱝ ᱰᱟᱵᱩᱝ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱠᱟᱸᱛ ᱠᱩᱱᱨᱮ
ᱚᱰᱟᱣ ᱡᱟᱞᱟᱢ
ᱠᱟᱬᱩᱝ ᱰᱟᱵᱩᱝ ᱮᱸᱜᱟ ।

ᱠᱚᱭᱚᱜ ᱠᱟᱜᱼᱟᱭ
ᱫᱤᱥᱟᱹ ᱠᱟᱜᱼᱟᱭ
ᱥᱮᱛᱟᱜ ᱟᱹᱭᱩᱵᱽ ᱟᱸᱜᱟ ।

ᱠᱮᱣᱮ  ᱰᱮᱰᱮ
ᱞᱮᱠᱮ ᱞᱮᱠᱮ
ᱠᱮᱣᱻᱮᱞ ᱠᱮᱣᱻᱮᱞ ᱰᱟᱸᱰᱟ ।

ᱥᱩᱛᱟᱹᱢ ᱪᱮᱛᱟᱱ
ᱞᱤᱵᱽ ᱞᱤᱵᱟᱹᱜ
ᱛᱟᱲᱟᱢ ᱯᱷᱟᱸᱰᱟ ᱯᱷᱟᱸᱰᱟ ।

ᱦᱚᱲᱢᱚ ᱵᱚᱦᱚᱜ
ᱠᱟᱲᱵᱟᱝ ᱠᱩᱲᱵᱩᱝ
ᱩᱥᱩᱞ ᱩᱥᱩᱞ  ᱡᱟᱸᱜᱟ।

ᱡᱟᱞᱟᱢ ᱡᱷᱹᱟᱞᱤ
ᱦᱩᱰᱤᱧ ᱡᱤᱭᱟᱹᱞᱤ
ᱵᱟᱝ ᱞᱟᱜᱟᱣᱮ ᱴᱷᱮᱸᱜᱟ ।

"᱿᱿᱿᱿᱿ᱞ ᱧ᱿᱿᱿᱿᱿᱿"

৩।।

ᱢᱮᱨᱚᱢ ᱦᱚᱯᱚᱱ

ᱜᱳᱯᱮᱥᱣᱚᱨ ᱢᱟᱹᱱᱰᱤ

  
ᱯᱩᱥ ᱢᱟᱜᱽ ᱨᱟᱵᱟᱝ ᱨᱤᱛᱩ
ᱪᱩᱞᱦᱟᱹ ᱠᱩᱰᱟᱹᱢ ᱟᱲᱮ,
ᱢᱮᱨᱚᱢ ᱦᱚᱯᱚᱱ ᱦᱮᱡ ᱟᱠᱟᱱ
ᱡᱳᱨᱳᱜ ᱞᱟᱹᱜᱤᱫ ᱵᱟᱲᱮ ᱾

 
ᱜᱚᱲᱚᱢ ᱵᱟᱵᱟ ᱧᱮᱞ ᱛᱚᱨᱟ
ᱞᱟᱜᱟ ᱠᱮᱫᱮᱭ ᱟᱹᱰᱤ,
ᱦᱟᱯᱮᱱ ᱫᱤᱱ ᱵᱟᱯᱞᱟ ᱨᱮ
ᱮᱢᱚᱜ ᱞᱟᱹᱜᱤᱫ ᱪᱟᱹᱰᱤ ᱾

 
ᱞᱟᱜᱟ ᱠᱟᱛᱮ ᱵᱟᱭ ᱵᱩᱡᱽ
ᱵᱟᱨ ᱵᱟᱨᱮ ᱦᱤᱡᱩᱜ,
ᱦᱟᱯᱮᱱ ᱫᱤᱱ ᱡᱩᱨᱩ ᱯᱩᱴᱩ
ᱠᱟᱛᱮ ᱮ ᱞᱩᱡᱩᱜ ᱾

 

"᱿᱿᱿᱿᱿ᱞ ᱧ᱿᱿᱿᱿᱿᱿"

৪।।

ᱨᱟᱹᱥᱠᱟᱹᱡᱚᱝ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

 

 ᱟᱵᱳ ᱥᱟᱱᱟᱢ ᱢᱟᱨᱟᱝ ᱦᱩᱰᱤᱧ

    ᱥᱮᱛᱟᱜ ᱥᱤᱸᱜᱟᱲ ᱠᱷᱮᱞᱟ ,

ᱜᱟᱛᱮ ᱯᱮᱭᱟᱞᱮ ᱟᱯᱮ ᱜᱟᱛᱤᱧ

   ᱦᱤᱡᱩᱜ ᱯᱮᱥᱮ ᱫᱮᱞᱟ   ᱾

 

ᱨᱟᱹᱥᱠᱟᱹ ᱡᱚᱝ-ᱟ ᱟᱵᱳ ᱛᱟᱞᱟᱨᱮ

   ᱵᱟᱵᱚᱱ ᱠᱟᱹᱭ ᱡᱚᱝ-ᱟ ,

ᱵᱟᱲᱤᱪ ᱠᱟᱹᱢᱤ ᱠᱷᱚᱱ ᱥᱟᱦᱟᱨᱮ

   ᱱᱟᱯᱟᱭ ᱵᱷᱟᱵᱤ ᱡᱚᱝ-ᱟ  ᱾

 

ᱚᱠᱚᱭ ᱦᱚᱲᱟᱜ ᱵᱟᱵᱚᱱ ᱠᱷᱩᱛᱤ

   ᱱᱟᱯᱟᱭ ᱜᱮᱵᱚ ᱠᱷᱚᱡᱟ ,

ᱟᱹᱛᱷᱟᱹᱲᱤ ᱚᱠᱟ  ᱠᱟᱴᱤᱪ ᱨᱩᱛᱤ

   ᱢᱚᱴᱷᱮ ᱵᱟᱵᱚᱱ ᱚᱡᱟ  ᱾

 

ᱦᱤᱥᱟ ᱥᱩᱭᱟᱹ ᱡᱟᱦᱟᱭ ᱮᱦᱚᱵ

   ᱩᱱᱤ ᱵᱷᱮᱜᱟᱨ ᱠᱟᱭᱟ ,

ᱱᱟᱯᱟᱭ ᱠᱟᱛᱮ ᱛᱟᱦᱮᱱ ᱫᱟᱞᱚᱵ

   ᱥᱟᱢᱟᱝᱛᱮ ᱦᱚᱦᱚ ᱟᱭᱟ  ᱾

 

ᱠᱩᱥᱤ ᱨᱟᱹᱥᱠᱟᱹ ᱛᱟᱦᱮᱱ ᱪᱮᱫᱟ

   ᱵᱮᱡᱟᱨ ᱵᱟᱵ ᱩᱫᱩᱜ ,

ᱟᱵᱳ ᱟᱵᱳᱛᱮ  ᱦᱮᱣᱭᱟ ᱦᱚᱫᱟ

   ᱱᱟᱯᱟᱭ ᱦᱚᱨ ᱡᱩᱛᱩᱜ  ᱾

 

"᱿᱿᱿᱿᱿ᱞ ᱧ᱿᱿᱿᱿᱿᱿" 

৫।।

ᱜᱤᱫᱨᱟᱹ ᱵ ᱟ ᱣ ᱞᱤ

ᱨᱟ ᱢᱯᱚᱫᱚ  ᱠᱤᱥᱠᱩ

  

                 (   ᱑  )

ᱢᱮᱱᱟᱜ    ᱛᱟᱞᱮ  ᱯᱟᱨᱠᱚᱢ

ᱟᱰᱤ ᱫᱤᱱ   ᱠᱷᱚᱱ ᱜᱷᱟᱸᱡᱞᱚᱝ

ᱦᱟᱲᱟᱢ  ᱯᱩᱥᱤ  ᱫᱩᱲᱩᱵ  ᱠᱚ ᱟ

ᱛᱟᱵᱽ  ᱠᱚ ᱛᱟᱭ  ᱪᱟᱸᱰᱞᱚᱢ  ᱿

 

               (᱒)

ᱢᱮᱱᱟᱭ   ᱛᱟᱞᱮ  ᱦᱟᱲᱟᱢ  ᱥᱮᱛᱟ

 ᱨᱤᱯᱚ  ᱨᱚᱯᱚᱭ   ᱛᱟᱲᱟᱢ

ᱫᱟᱜ  ᱢᱟᱰᱤ ᱠᱚ  ᱫᱩᱞᱟᱭ ᱯᱮ

ᱞᱟᱹᱭᱟᱭ  ᱜᱚᱲᱚᱢ   ᱦᱟᱲᱟᱢ   ᱿

"᱿᱿᱿᱿᱿ᱞ ᱧ᱿᱿᱿᱿᱿᱿"

৬।।

হরোবঙ্গা

বাড়তাং সরেন

 

হড়মো তায় দ চাকতি লেকা
                     মিৎ নাখা দ দাড়াং 
ধিবৗধাবে তাড়াম যখান 
                  বৗনুঃ সাবাদ আড়াং ।

 
বহঃ তায় দ সামাং রেগে 
                       কাটা মা পুন নাখা
হুডিঞ হুডিঞ চাড়বল মেনাঃ 
                       হানা তায়ম নাখা।

 
দাঃ রেহঁকো তাঁহেন গেয়া 
                    আর হঁ লসৎ  ঘুটু
বিলি অক্তে ডাঙ্গা তেয়ে
                          হিজু‌ঃ কুরুমুটু ।

 
মেনায় উনি ধিরি লেকা 
                   ঞেলতে বাঙে বুজুঃ
কুটৗম কাতেঃ সামাঃ রেহঁ 
                  একাল বাঙে গুজুঃ ।

 
বিন্তী  রেকো মেনে কাথায় 
                 আবো ধৗরতী পুরী 
হরো বঙ্গায় গুগু  আকাৎ 
                        গোটা মঞ্চ পুরী ।

 
সেদায় হড়কো মেনা কাথায় 
                  হরো গেগের রাবুড়
উন রেগেয়ে আড়াঃ মেয়া
                  সেরমা যুদিয় হুডুর  ।  

        
মৗনমী দবোন দৗনমী কানা 
                   গচ কোওয়াবন হরো
অনা তেড়ং মৗনমী নিতং
                        হায়রে হরোবরো  !

 

"᱿᱿᱿᱿᱿ᱞ ᱧ᱿᱿᱿᱿᱿᱿" 

৭।। 

আলম রৗগিঃ

সীতেন মাণ্ডি

 
রেল চেতান রেল গৗডি
সেরমা চেতান উডাঃ জাহাজ
দাঃ চেতান লৗউকা চালাঃ
পিচ রোড রে মটর গৗডি।

 
রেল গৗডি ঝক্ পক্ ঝক্ পক্
   উডাঃ জাহাজ ছুঁ--
মটর গৗডি পঁ পঁ সাডে
লেগেম লেগেম লাউকা।

 
সাঁগিন হর সুরঃ আ
নৗই গাডা পারমঃ
কম অক্ত তে ধৗরতিম দাড়ান
নোওয়া ক দ মেতাঃ আক যান।

 
লাসের হাতাং মৗনমি
উদুগ্ আয়াঃ কারধৗনি
অত লাতার সেরমা লাফাং
ঞেলায় বায় তাহেন দানাং।

 
হড় গেক বেনাও আকাদ্
উনকু গেক চালাও দাড়েঃ
অনা কুকমু আমাঃ হঁ সৗরিঃ
কৗমিরে দুলৗড়, বৗগি আড়িশ আলম রৗগিঃ।

 

"᱿᱿᱿᱿᱿ᱞ ᱧ᱿᱿᱿᱿᱿᱿"

৮।।

রেভারেন্ড এইচ্‌.পি. বোরেসন

দুগাই টুডু

 
ডেনমার্ক খনাঃ ভারত তেদ
       উনি হেচ্‌লেন আদ,
বিহার পনৎ সান্তাল পরগনা
      বেনাগৗড়িয়ৗ রেদ।

 
অঁডে মীসিন বেরেৎ অক্‌ত
       গড়য় এম লেনা,
 অকা ঠেন অনাঃ তেয়ারঃ
      চেদ্‌কো লাগাঃ অনা।

 
জত গেথো ঞেল সামটাও
    আচ্‌গে তাঁহে কানে,
ধরম পারশাল বাবত ভালা
    অৗডি দাঁড়াও আনে।

 
অনা লৗগিদ্‌ সান্তাড় আতো
 সেন বাড়া লেনা,
উনরে গেচো হড়াঃ পৗরসি
  মঁজগে সেঁড়াও আনা।

 
সান্তাড় জৗতি লাহায় ভাকরা
  গৗহির হুদিশ গেতায়,
অনে উনখন সানাম কোগে
  পাপা সাহেব মেতায়।

 
ভৗলৗই লাহান্তি কৗমি খৗতির
     এনেম তায়গে হানে,
হড়কো নেতার দিশৗ ইদি
     একাল মনে মনে।

  "᱿᱿᱿᱿᱿ᱞ ᱧ᱿᱿᱿᱿᱿᱿"

৯।। 

খিজুর দারে

দুর্গাচরণ মুরমু

 
বৗইহৗড় আড়ে ডুংরী ধারে
সাংগে খিজুর দারে,
কৗটুব রামা লেকা সাকাম
জৗনুম ডগ ধারে।

 
খিজুর সাকাম হিপিড় হিপিড়
হৗড়য়ৗর গেলবার চাঁদো,
হাদার হাদার হয় রেহঁ
বাংগে ঞুরু আদো।

 
খিজুর সাকাম রহড় কাতে
বেনাও আকো পৗটিয়ৗ,
নানা হুনার খেল পৗতি
টুপি বাহা চৗটিয়ৗ।

 
অড়াঃ ভিত সাজাও সামানম
শৌখিন বাহা ঝলা,
আডি লেকান আকা চিতৗর
টুপলৗ জনঃতলা।

 
খিজুর দারে হোয়ো হিসিৎ
আকাই আকো টুমাং,
সেতাঃ তরা তাঁড়ি রাসা
আড়গয় আতো কুমাং।

 
বেনাও আকো খিজুর গুড়
ঘানটা কাতে ডৗডু,
তেয়ার আকো নাপায় নাপায়
সিবিল সড়ম লৗডু।

 

"᱿᱿᱿᱿᱿মুচৗৎ᱿᱿᱿᱿᱿᱿"