সিঁগি মাহা রেনাঃ সাকাম ‘চেরেচ্ আড়াং’ লেখা- ১১৯

 

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান-    ᱥᱩᱵᱩᱫᱤᱭᱟᱹᱢᱩᱨᱢᱩ, ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ,,  ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ, ᱨᱟᱢᱯᱚᱫᱚ ᱠᱤᱥᱠᱩ, ᱜᱳᱯᱮᱥᱣᱚᱨ ᱢᱟᱹᱱᱰᱤ, বাড়তাং  সরেন,  দুর্গাচরণ মুরমু, সিতেন মান্ডি, সুচাঁদ হাঁসদা, বিরসা কিস্কু, দুগাই টুডু,  সনাতন টুডু।

 

১।।

ᱵᱤᱧ

ᱥᱩᱵᱩᱫᱤᱭᱟ.  ᱢᱩᱨᱢᱩ

ᱫᱷᱤᱨᱤ ᱰᱩᱸᱝᱨᱤ ᱵᱤᱧ
ᱚᱰᱚᱠ ᱞᱮᱱᱟᱭ  ᱥᱤᱧ ᱾
ᱧᱮᱞ ᱞᱮᱫᱮᱭᱟᱹᱧ  ᱤᱧ
ᱵᱚᱛᱚᱨ ᱛᱮᱭᱮᱧ  ᱛᱤᱧ ᱾
ᱫᱷᱤᱨᱤ  ᱛᱤᱧ  ᱛᱤᱧ
ᱨᱩᱣᱟᱹᱲ  ᱮᱱᱟᱭ ᱵᱤᱧ ᱾
ᱵᱷᱩᱜᱟᱹᱜ ᱵᱚᱞᱚᱜ ᱢᱟᱲᱟᱝ
ᱥᱳᱸᱭ   ᱥᱳᱸᱭ  ᱟᱲᱟᱝ ᱾
ᱠᱤᱛᱟᱹᱨ ᱠᱟᱵᱟᱨ ᱨᱚᱝ
ᱢᱚᱡᱜᱮ    ᱧᱮᱞ    ᱡᱚᱝ ᱾
ᱵᱟᱝᱠᱟᱱᱟᱭ ᱥᱟᱲ ᱵᱤᱧ
ᱵᱚᱛᱚᱨ ᱞᱤᱱᱟᱹᱧ  ᱤᱧ ᱾

======᱿᱿᱿ ᱞ ᱧ ᱿᱿᱿======

২।।

ᱠᱟᱠᱟᱜ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

  

ᱵᱟᱵᱩ ᱛᱟᱞᱮᱭ ᱦᱚᱦᱚ ᱟᱞᱮᱭ

ᱦᱮᱢᱮ ᱠᱟᱭᱟᱞᱮ ᱩᱱ ,

ᱪᱟᱪᱳ ᱵᱤᱵᱤᱭ ᱛᱤᱜᱩᱜ ᱛᱟᱞᱮᱭ

ᱞᱟᱹᱭ ᱠᱟᱛᱮᱭ ᱟᱱ ᱾

  

ᱠᱟᱠᱟᱜ ᱢᱮᱱᱟ ᱜᱷᱟᱲᱤ ᱜᱷᱟᱲᱤᱜᱮ

ᱵᱟᱭ ᱦᱤᱲᱤᱧ ᱛᱟᱞᱮ ,

ᱠᱟᱠᱟᱜ ᱮᱢᱟᱭ ᱟᱰᱤ ᱠᱩᱥᱤᱜᱮ

ᱞᱟᱱᱫᱟ ᱩᱫᱩᱜ ᱟᱞᱮ  ᱾

  

ᱠᱷᱤᱞᱰᱩ ᱠᱟᱛᱮ ᱟᱫᱚ ᱡᱚᱢᱟᱭ

ᱦᱟᱞᱟᱝ ᱢᱤᱫ ᱢᱤᱫᱛᱮ ,

ᱞᱚᱞᱚ ᱠᱟᱠᱟᱜ ᱦᱟᱹᱨ ᱪᱟᱵᱟᱭ

ᱵᱟᱨ ᱯᱮ ᱫᱷᱟᱣᱛᱮ ᱾

  

ᱥᱮᱛᱟᱜ ᱵᱮᱲᱟ ᱟᱭᱩᱵ ᱵᱮᱲᱟ

ᱠᱚᱠᱚᱭ ᱜᱮᱭᱟ ᱟᱰᱤ ,

ᱠᱟᱠᱟᱜ ᱪᱷᱟᱰᱟ ᱮᱴᱟᱜ ᱟᱫᱚ

ᱵᱟᱱᱩᱜ ᱛᱟᱭᱟ ᱟᱲᱤ ᱾

======᱿᱿᱿ ᱞ ᱧ ᱿᱿᱿======

৩।।

ᱠᱩᱠᱢᱩ ᱡᱤᱭᱚᱱ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

  

ᱠᱩᱠᱢᱩ ᱡᱤᱭᱚᱱ ᱟᱹᱰᱤ ᱪᱚᱨᱚᱠ
ᱟᱹᱰᱤ ᱱᱟᱯᱟᱭᱟ ᱾
ᱜᱷᱟᱱᱮ ᱜᱷᱟᱱᱮ ᱥᱚᱨᱚᱜ ᱥᱮᱨᱢᱟ
ᱯᱟᱹᱨᱤᱢ ᱵᱮᱱᱟᱜᱼᱟ ᱾

 

ᱠᱷᱮᱞᱳᱸᱰ ᱟ ᱠᱷᱲᱟ ᱨᱮᱦᱚᱸ
ᱚᱞᱚᱜ ᱟ ᱥᱲᱟ ᱨᱮᱦᱚᱸ ᱾
ᱟ ᱢᱜᱮ ᱫᱤᱱᱟᱹᱢ ᱦᱤᱞᱳᱜ
ᱨᱟᱹᱱᱤᱢ ᱵᱮᱱᱟ ᱜᱼᱟ ᱿

======᱿᱿᱿ ᱞ ᱧ ᱿᱿᱿======

৪।।

ᱚᱠᱛᱚ

ᱨᱟᱢᱯᱚᱫᱚ ᱠᱤᱥᱠᱩ

 

ᱯᱟᱨᱚᱢ  ᱟ ᱠᱟᱱ   ᱚᱠᱛᱚ ᱡᱟᱸᱦᱟ

ᱜᱚᱥᱚ   ᱟ ᱠᱟᱱ   ᱚᱠᱟ  ᱵᱟᱦᱟ

ᱛᱮᱨᱟᱝ ᱟᱠᱟᱱ  ᱡᱟᱸᱦᱟ ᱥᱟᱨ

ᱵᱟᱝ  ᱨᱩᱣᱟᱹᱲᱟ   ᱵᱟᱨ  ᱵᱟᱨ ᱿

 

ᱚᱠᱛᱚ  ᱨᱮᱱᱟᱜ ᱡᱟᱸᱦᱟ ᱱ ᱠᱟᱢᱤ

ᱚᱠᱛᱚ ᱨᱮᱜᱮ ᱯᱩᱨᱟᱹᱣ  ᱦᱳᱭᱳᱜ

ᱵᱟᱝ ᱠᱷᱟᱱ ᱫᱚ ᱛᱟᱭᱚᱢ ᱨᱮᱜᱮ

ᱢᱟ ᱭᱟ ᱜ  ᱢᱳᱭᱳᱜ ᱛᱟᱸᱦᱮᱱ ᱦᱳᱭᱳᱜ ᱿

 

======᱿᱿᱿ ᱞ ᱧ ᱿᱿᱿======

৫।।

ᱵᱤᱪᱟᱹᱨ

ᱜᱳᱯᱮᱥᱣᱚᱨ ᱢᱟᱹᱱᱰᱤ

  

ᱟᱞᱮ ᱟᱛᱳ ᱢᱟᱹᱡᱷᱤ ᱦᱚᱲᱟᱜ

"ᱵᱤᱪᱟᱹᱨ" ᱟᱪᱟᱨ ᱱᱟᱯᱟᱭ,

ᱵᱩᱜᱤ ᱵᱟᱹᱲᱤᱡ ᱛᱩᱞᱟ. ᱡᱚᱠᱷᱟ

ᱵᱩᱡᱷᱟᱹᱣ ᱠᱟᱛᱮ ᱥᱟᱯᱟᱭ ᱾

 

ᱨᱮᱸᱜᱮᱡ ᱚᱨᱮᱡ ᱡᱚᱛᱚ ᱦᱚᱲᱟᱜ

ᱥᱚᱢᱟᱱ ᱛᱮᱭᱮ ᱵᱤᱪᱟᱹᱨ,

ᱟᱛᱳ ᱨᱮᱱ ᱚᱠᱚᱭ ᱜᱮ

ᱵᱟᱠᱚ ᱢᱮᱱ ᱞᱤᱪᱟᱹᱲ ᱾

 

ᱚᱱᱟ ᱛᱮᱜᱮ ᱟᱛᱳ ᱦᱚᱲ

ᱢᱮᱱᱟᱜ ᱞᱮᱭᱟ ᱱᱟᱯᱟᱭ,

ᱥᱩᱠᱷ ᱫᱩᱠᱷ ᱦᱟᱹᱴᱤᱧ ᱛᱟᱞᱟ

ᱛᱟᱲᱟᱢ ᱞᱟᱹᱜᱤᱫ ᱥᱟᱯᱟᱭ ᱾

======᱿᱿᱿ ᱞ ᱧ ᱿᱿᱿======

৬।।

ছটে

বাড়তাং সরেন 

         

গডেৎ করেন হুডিঞ কড়া
                     ঞুতুম তায় দ ছটে । 
লাচ্ দ ঞেলঃ টেবে টেবে 
                        একাল বুঢী রটে ।

 

সেতাঃ তরা বেরেৎ কাতে 
                  বাস্কে দাকায় সাবাড়
থড়া তে দ বায় হিঁতঃআ 
                    টুকুচ্ টুকুচ্ আবাড় ।

 
ইসিন পিঠৗ বাংঙে জমা 
                      একেন লাঠে লাঠে 
ঢের দ একাল বাঙে খজঃ 
                        তুরুয় গাণ্ডা মঠে ।

 
খৗজৗড়ি সাঁও তোওয়া তাবেন 
                         একাল বাংগে কুশি 
শুকরি লেটো জজম লৗগিৎ 
                         সারা ঘৗড়িচ্ শুসি ।

 
উতু কোদ বায় বাছাওয়া 
                           সানাম গিয়ে জমা 
খিঁকড়িঁ রুণ্ডৗ তুয়ু জেল দ
                        হাঁম্বুড় আতেয় জমা।

 
কৗমি কাথা মেতায় লেরে
                      মেনায় "আডি রাবাং"
খান্তা আটেৎ হবর কাতে
                        আডি গিচয় গেরাং ।

 
বাপলা ভাণ্ডান অড়াঃ কোরে 
                     কৗমি আডিয় ঝুকৗড়
কৗমি মুচৗৎ চাবাঃ রেহঁ 
                        বাঙে খজঃ রুয়ৗড় ।

 
হাতম-গড়ম ভাণ্ডান অড়াঃ 
                      চালাও লেনায় ছটে
ঠৗবু জাং কো হাঁম্বুড় লেদায় 
                      দিচ্ তরা কেটকেটে ।

======᱿᱿᱿ ᱞ ᱧ ᱿᱿᱿======

৭।।

উরগুম আংরব

দুর্গাচরণ মুরমু

 

সহরায়-আঘাড় খন হুলুয় হয়
রেয়াড় রাবাং আউকৗঃ ভর সেতাঃ,
আতো বাড়গে ধুয়ৗ লেকা ঞুতৗৎ
ঞেলঃ অনাগে কুয়াশ ক মেতাঃ।

 

পুরুব নাখা সোনা থৗরি লেকা
বেরে রাকাব আরাঃ জরং জরং,
সেতাঃ তরা কলরে টুকুচ চেলাং
বৗটি ঘাসা মাজাও খরং খরং।

 
বায় জতন দহ  পিছৗড়ী কম্বল
উডুকঃ জতকো রাবাং জালা,
সুইটার টুপি জাকিট মাফলার
উল উরগুম জামা হরঃ ভালা।

 
বাকো হরঃ জাহায় উরগুম জামা
রাবাং রেক তাহেন একেন কুটু,
খুউ মাঁদা রুয়ৗ বহঃ হাসো
রাবাংতে উনকু দ ঠুটু ঠুটু।

 
আতো কুলহি ঝুড় বুটৗ করে
আংগা তরা জুলুঃ সেঁগেল পাঁজা,
আটু পৗটু রহড় সাকাম ঝুরি
হালাং গুটিয়ৗও জুরুব মাঁজা।

 
রাবাং কেট কেটে হাড়াম বুডহি
পারকম লাতার ক বুরসি আকো,
লঃলঃ জডরা বাজড়া বাদাম
সঁধাড় গে কুটুর কুটুর মাতো।

======᱿᱿᱿ ᱞ ᱧ ᱿᱿᱿======

৮।। 

মেৎ দাঃ

 সীতেন মাণ্ডি

 
হপন বেটা
বৗনুঃ ডাটা
জম তালে
তোওয়া দাকা।

 
গিতিচ ক আয়
হপন পারকম
জিল হৗকু
বায় জম।

 
জাঙ্গা ফাঁদা
বহঃ চাঁদা
লুঁডু মেৎ
উরুমে চেৎ।

 
লুবুঃ মুচ্
বাং ক বুজ
বেটা  ক গেরে
তালা লাচরে।

 
আয়ো ঠেন গে
তোওয়া দাকা
জম লৗগিৎ
বেটায় অজা।

 
আয়ো বেগর
বায় থিরঃ
আটেৎ চেতান
মেৎ দাঃ জরঃ।।

======᱿᱿᱿ ᱞ ᱧ ᱿᱿᱿======

৯।।

সারহাও

সুচাঁদ হাঁসদা

 
হাপে হাপে ,
ঞেঁল লেপে ,
আলেরেন ছলোক ছঁদোরি ৷

 
সুনুচ থকড়ে ,
মচা বেকড়ে ,
সক রেনিচ সাদোরি ৷

 
থর বক ,
ডিক ডক ,
দাঁড়ানায় হানতে নাতে ৷

 
নেনে পেতে ,
কেনে কতে ,
আর বাংখান মচায় গতে ৷

 
অলঃ মেতায় ,
বাং আতায় ,
খৗলি গেয়ে ফেরাম ৷

 
খেল উতু ,
সুতু পুতু ,
কৗমি তায়ে অরাম ৷

 
কর খল ,
র- হঁ- ল ,
অনে অনকায় পাড়হাও ৷

 
আড় পুড়সি ,
দমে কুসি ,
জত হড়গে সারহাও ৷

======᱿᱿᱿ ᱞ ᱧ ᱿᱿᱿======

১০।।

 বৗতি

বিরসা কিস্কু

 

ঞুতৗত কাঁড়াং কাঁড়াং
বাংবুঝৗ উসুল দাড়াং
ঞুড়ু ঞুড়ু ডিবৗ বৗতিতে

 

দাঃ জৗড়ি অক্তে
হেঁদে রিমিলরে ঝালকা
বতরগে হুডুর বিজলি

 
আতো ডিহৗ বাজার
শাহার নাগাররে মালকাঃ
বিলিত বালাত বিজলি বাতি

 
গৗই কাডা গড়া
বঙ্গাবুরু চির চুমৗড়া
 দেওহে মৗলি সুলতৗ বৗতিতে

 
মৗনমি তাড়াম ডাহারে
কাড়াং ঞুতৗতে মারশাল
সেচেদ বৗতিতে।

======᱿᱿᱿ ᱞ ᱧ ᱿᱿᱿======

১১।।

রেভারেন্ড ওটিস বেচ্‌লার

দুগাই টুডু

 

আমেরিকান ব্যাপটিস মিশন রেন
      পৗদরি তাঁহে কানে,
ঞুতুম তায়দ ওটিস বেচ্‌লার
   সানামকো বাডায় অনে।

 
ভারত তেদ সেটের লেনায়
      হানে মিদনীপুর তেদ,
কৗমি ঠাঁওদ তাঁহেকান তায়া
    অনডে গেচো আদ।

 
মিদনীপুর জেলা সেচেদ লাহায়
     গঃগে লেদায় ভারগে,
সান্তাড় আতো সেন কাতে
    হড়তে সেঁড়ায় রড়গে।

 
দায়া দুলৗড় অন্তর রেদ
    উনি গাঁডন আনগে,
আডি অক্‌ত মৗনমি সালাঃ
   অনে সেলেদ্‌ লেনগে।

 
সান্তাড় গিদ্‌রৗ পাড়হাঃ লৗগিৎ
   হুদিস কেদা তোড়া,
উনকো বাবত ইস্কুল গেথ
   উনরে বেনাও বাড়া।

 
কুড়ি গিদ্‌রৗ মুরুখ সাহায়
     লাহা লেনে আচ্‌গে,
নোওয়া কাথা বেবাক ভালা
   একাল দিসৗ হেচ্‌গে।

 
সাঁওতা ভৗ্লৗই জৗতি উৎনৗও
    এনেম দহ আনায়,
নেতার হড়কো তালা মালা
   উইহৗর রেগে হেনায়।

======᱿᱿᱿ ᱞ ᱧ ᱿᱿᱿======

১২।। 

সান্তালি  লিমেরিক

সনাতন টুডু

(১০)

চেঁড়ে  কক  রুয়ৗড়  আয়ুব বেড়া
আয়ুব  হিজুঃ সিঁগৗড় তায়ম  বেড়া
                ঞিঁদৗ  হিজুঃ
               জৗপিদ  হিজুঃ
মনেয়  রিঝৗও  তালা  ঞিঁদৗ  বেড়া ।

  

(১১)

নওয়া   অত   হাসা
তিসহঁ  বাচোঃ  কাসা
    হেমাল  হিঁসিদ  হয়
   বাং  হোয়োঃ তাম কয়
মনেয়  রিঝৗও  ধৗরতি  নওয়া  হাসা ।

 

======᱿᱿᱿মুচৗৎ ᱿᱿᱿======