সিঁগি মাহা রেনাঃ সাকাম ‘চেরেচ্ আড়াং’ লেখা- ১১৩

 

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।

 

তেহেঞাঃ আখড়ারে যাঁহায় কো সেলেদ্‌ আকান-   ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵ ᱩᱫᱤᱭᱟᱹᱢ ᱩᱨᱢᱩ, ᱨᱟᱢᱯᱚᱫᱚ ᱠᱤᱥᱠᱩ, ᱠ ᱤ ᱥ ᱠ ᱤ ᱱ ᱫ ᱷ ᱟ   ᱢ ᱩ ᱨ ᱢ ᱩ,  ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ, ᱥᱩᱪᱤᱛᱨᱟ  ᱦᱟᱸᱥᱫᱟ, বাড়তাং সরেন,  সনাতন টুডু, সুচাঁদ হাঁসদা, সিতেন মান্ডি,  দুগাই টুডু,  দুর্গাচরণ মুরমু, পি সি কিসকু রাপাজ।

  

১।।

ᱵ ᱳᱜᱮ ᱫᱤᱥᱟᱹ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 
ᱚᱞᱚᱜ ᱯᱟᱲᱦᱟᱣ ᱥᱮᱬᱟᱭ ᱞᱟᱹᱜᱚᱫ
         ᱥᱟᱱᱟᱢ ᱫᱮᱵᱚᱱ ᱫᱷᱩᱨᱟᱹᱜ,
ᱛᱚᱵᱮ ᱨᱮᱥᱮ ᱟᱹᱠᱤᱞ ᱜᱮᱭᱟᱱ
           ᱵᱩᱨᱫᱷᱤ ᱫᱤᱥᱟᱹ ᱯᱩᱨᱟᱹᱜ᱾

  
ᱮᱯᱮᱢᱟ ᱵᱚᱱ ᱪᱟᱯᱟᱞᱟ ᱵᱚᱱ
             ᱢᱮᱞᱮ ᱜᱩᱴᱤ ᱥᱟᱹᱜᱟᱹᱭ,
ᱚᱠᱟ ᱵᱳᱜᱮ ᱚᱠᱟ ᱵᱟᱹᱰᱤᱡ
             ᱚᱱᱟ ᱵᱚ ᱧᱮᱞ ᱵᱷᱤᱱᱟᱹᱭ᱾

 
ᱦᱟᱨᱟᱭᱟ ᱵᱚᱱ ᱵᱩᱨᱩᱭᱟ ᱵᱚᱱ
            ᱡᱤᱣᱤ ᱦᱚᱲᱢᱚ ᱫᱟᱲᱮ,
ᱥᱚᱛ ᱥᱩᱢᱮᱱ ᱥᱟᱹᱨᱤ ᱵᱮᱜᱚᱨ
          ᱵᱟᱝ ᱵᱚ ᱨᱚᱲᱟ ᱮᱲᱮ ᱾

 

                 (2)

 

ᱟᱞᱮ ᱚᱲᱟᱜ
ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 
ᱠᱩᱰᱟᱹᱢ ᱥᱟᱛᱮᱼ ᱪᱷᱟᱴᱠᱟ ᱜᱚᱲᱟ
              ᱠᱟᱸᱛ ᱢᱮᱞᱟ ᱯᱟᱲᱟᱜ,
ᱢᱩᱫᱷᱩᱱ ᱥᱮᱱᱮᱨᱼ ᱵᱩᱥᱩᱵ ᱥᱟᱹᱲᱤᱢ
             ᱱᱚᱣᱟ ᱛᱟᱞᱮ ᱚᱲᱟᱜ ᱾

 
ᱢᱟᱨᱮ ᱫᱟᱞᱚᱵᱼ ᱫᱷᱟᱫᱨᱟ ᱥᱟᱹᱲᱤᱢ
             ᱪᱤᱨᱟᱹᱜᱼᱟ ᱯᱷᱟᱨ ᱯᱷᱟᱨ,
ᱟᱥᱟᱲ ᱨᱤᱢᱤᱞᱼ ᱫᱟᱜ ᱫᱚ ᱡᱷᱟᱨᱟᱜ
          ᱯᱷᱟᱫᱟ ᱛᱮ ᱡᱷᱟᱨ ᱡᱷᱟᱨ ᱾

======= ᱞ ᱧ =======

২।। 

ᱵᱷᱮᱱᱛᱟ

 ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱫᱟᱜ  ᱫᱚᱨᱮ ᱨᱚᱴᱮ ᱢᱟᱲᱚᱢ
ᱵᱟᱺᱬᱭᱟᱹ  ᱵᱩᱲᱦᱤ  ᱵᱩᱞᱩᱝ ᱾
ᱫᱟᱠᱟ ᱩᱛᱩ ᱡᱚᱢ ᱡᱩᱠᱷᱟ.ᱱ
ᱤᱢᱟᱹᱧᱢᱮ  - ᱠᱟᱹᱴᱤᱪ  ᱪᱩᱞᱩᱝ ᱾

ᱛᱤᱨᱭᱳ ᱚᱨᱚᱝ ᱢᱮᱨᱚᱢ ᱜᱩᱯᱤ
ᱛᱩᱭᱩ ᱫᱮᱨᱮᱧ ᱢᱟᱹᱨᱤᱪ ᱾
ᱨᱚᱴᱮ ᱢᱟᱲᱚᱢ ᱠᱚᱭ ᱜᱮᱭᱟᱢ
ᱢᱮᱫᱜᱮ   ᱟᱹᱨᱤᱫᱽ  ᱠᱩᱨᱤᱫᱽ ᱾

ᱥᱤᱢ ᱜᱚᱛᱚᱢ ᱪᱮᱫᱠᱚ ᱢᱮᱛᱟᱜ
ᱡᱩᱸᱡᱩᱦᱩᱸᱪ     ᱟᱜ     ᱤᱱ ᱾
ᱵᱷᱮᱱᱛᱟ ᱠᱟᱛᱷᱟ  ᱛᱚᱞ ᱢᱮᱱᱟᱜ-ᱟ
ᱥᱟᱱᱟᱢ   ᱞᱮᱠᱟᱱ   ᱡᱷᱤᱱ ᱾

======= ᱞ ᱧ =======

৩।। 

ᱫᱮᱵᱚᱱ ᱛᱟᱸᱦᱮᱱ ᱪᱷᱩᱴᱟᱹᱣ ᱟᱠᱟ

ᱨᱟᱢᱯᱚᱫᱚ ᱠᱤᱥᱠᱩ

 

ᱥᱮᱨᱢᱟ ᱪᱮᱛᱟᱱ ᱥᱟᱸᱜᱮ ᱤᱯᱤᱞ
ᱞᱟᱛᱟᱨᱨᱮ ᱵᱚᱥᱢᱚᱛᱟ ᱾
ᱛᱤᱥ ᱠᱷᱚᱱ ᱪᱚ ᱢᱮᱱᱟᱜ ᱠᱚ ᱣᱟ
ᱱᱚᱝᱠᱟ ᱡᱩᱨᱤᱡᱚᱛᱟ ।

ᱵᱮᱲᱟᱭ  ᱦᱟᱸᱥᱩᱨᱚᱜ ᱪᱟᱸᱫᱳᱭ ᱨᱟᱠᱟᱵᱽ
ᱧᱤᱫᱟᱸ ᱦᱤᱡᱩᱜ ᱥᱤᱧ ᱫᱚ ᱪᱟᱵᱟᱜ
ᱱᱚᱝᱠᱟ ᱠᱟᱛᱮ ᱚᱠᱛᱚ ᱞᱟᱦᱟᱜ
ᱫᱤᱱᱟᱸᱢ ᱫᱤᱱ ᱢᱤᱛᱽ ᱢᱟᱦᱟ।

 
ᱜᱤᱫᱨᱟᱹ ᱟᱵᱚᱱ ᱱᱩᱠᱩ ᱞᱮᱠᱟ
ᱫᱮᱵᱚᱱ ᱛᱟᱸᱦᱮᱱ ᱪᱷᱩᱴᱟᱹᱣ ᱟᱠᱟ
ᱢᱤᱫ ᱥᱟᱸᱣᱛᱮ ᱛᱟᱸᱦᱮ ᱠᱟᱛᱮ
ᱞᱟᱦᱟᱜ ᱟᱵᱚᱱ ᱡᱩᱢᱤᱫᱽ ᱠᱟᱛᱮ।

======= ᱞ ᱧ =======

৪।। 

ᱜᱤᱫᱽᱨᱟᱹ  ᱢᱚᱱᱮ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

 
ᱵᱟᱞᱮ ᱥᱟᱠᱟᱢ ᱞᱟᱵᱤᱹᱫ ᱢᱚᱱᱮ
   ᱫᱟᱹᱲᱟᱭ ᱜᱷᱟᱱᱮ ᱜᱷᱟᱱᱮ ;
ᱱᱤᱛᱜᱮ ᱱᱚᱜᱚᱭ ᱢᱮᱱᱟᱜ ᱚᱱᱮ
   ᱢᱤᱫ ᱜᱷᱟᱲᱤᱛᱮ ᱪᱷᱟᱱᱮ  ।

  
ᱜᱤᱫᱽᱨᱟᱹ ᱢᱚᱱᱮ ᱚᱴᱟᱝ ᱨᱤᱢᱤᱞ
   ᱠᱩᱠᱞᱤ ᱛᱤᱱᱟᱜ ᱦᱤᱡᱩᱜ ;
ᱦᱤᱱᱟᱹ ᱱᱤᱭᱟᱨᱮ ᱰᱷᱟᱝ ᱵᱟᱲᱟᱭᱟ
   ᱛᱷᱟᱹᱣᱭᱤ ᱜᱮᱵᱟᱝ ᱵᱩᱡᱩᱜ  ।

  
ᱠᱩᱥᱤ ᱨᱟᱹᱥᱠᱟᱹ ᱨᱚᱲ ᱮᱜᱮᱨ
    ᱠᱷᱤᱞᱰᱩ ᱥᱩᱞᱟᱝ ᱥᱟᱞᱟᱜ ;
ᱜᱤᱫᱽᱨᱟᱹ ᱵᱮᱲᱟ ᱨᱟᱹᱥᱠᱟᱹ ᱛᱤᱱᱟᱜ
   ᱨᱟᱹᱥᱠᱟᱹ ᱜᱮᱵᱟᱝ ᱦᱟᱞᱟᱜ  ।

  
ᱦᱟᱞᱚ ᱵᱟᱛᱚᱜ-ᱟ ᱪᱷᱟᱴ ᱯᱟᱴᱟᱜ
   ᱵᱟᱲᱟᱭ ᱞᱟᱜᱤᱫ ᱚᱱᱮ ;
ᱚᱠᱟ ᱵᱚᱛᱚᱨ ᱚᱠᱟ ᱵᱟᱲᱤᱪ
   ᱵᱟᱭ ᱵᱟᱲᱟᱭ ᱢᱚᱱᱮ   ।

  
ᱠᱩᱠᱞᱤ ᱛᱤᱱᱟᱜ ᱦᱤᱡᱩᱜ ᱥᱮᱱᱚᱜ-ᱟ
   ᱦᱩᱰᱤᱧ ᱢᱚᱱᱮ ᱚᱲᱟᱜ ;
ᱵᱟᱲᱟᱭ ᱵᱟᱱᱩᱜ  ᱚᱠᱟ ᱪᱤᱠᱟᱹᱜ-ᱟ
   ᱛᱩᱱᱩᱢ ᱪᱟᱯᱚ ᱥᱮᱸᱲᱟᱜ। 

======= ᱞ ᱧ =======

৫।। 

ᱨᱤᱡᱷᱟᱹᱣ ᱢᱚᱱᱮ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

 
ᱪᱟᱪᱳ ᱰᱤᱰᱤ ᱠᱟᱛᱮ ᱟᱭᱳᱧ
ᱦᱟᱨᱟ ᱤᱫᱤᱜ ᱠᱟᱱ ᱾
ᱤᱛᱩᱱ ᱟᱥᱲᱟ ᱥᱮᱱᱚᱜ ᱞᱟᱹᱜᱤᱫ
ᱢᱚᱱᱫᱚ ᱚᱨᱚᱜ ᱠᱟᱱ ᱿

  
ᱫᱟᱫᱟ ᱛᱟᱠᱚ ᱫᱤᱫᱤ ᱛᱟᱠᱚ
ᱟᱥᱲᱟᱠᱚ ᱥᱮᱱᱚᱜ ᱠᱟᱱ ᱾
ᱩᱱᱠᱩ ᱧᱮᱞᱛᱮ ᱤᱧᱟᱜᱦᱚᱸ ᱟᱭᱳ
ᱢᱚᱱᱮᱛᱤᱧ ᱨᱤᱡᱷᱟᱹᱣ ᱟᱠᱟᱱ ᱿

 
ᱛᱮᱦᱮᱧ ᱢᱟᱛᱚ ᱚᱛᱮ ᱢᱟᱦᱟ
ᱟᱥᱲᱟ ᱥᱮᱱᱚᱜ ᱫᱤᱱ ᱾
ᱵᱟᱝᱤᱧ ᱠᱷᱮᱞᱳᱸᱰ ᱤᱧᱫᱚ ᱟᱭᱳ
ᱚᱲᱟᱜᱨᱮ ᱥᱟᱨᱟᱫᱤᱱ ᱿

 
ᱥᱮᱱᱚᱜ ᱜᱤᱭᱟᱹᱧ ᱤᱧᱫᱚ ᱟᱭᱳ
ᱤᱛᱩᱱ ᱟᱥᱲᱟ ᱛᱮ ᱾
ᱪᱮᱢᱮᱫ ᱜᱤᱭᱟᱹᱧ ᱚᱞᱚᱜ ᱯᱚᱲᱦᱚᱱ
ᱦᱟᱯᱮ ᱦᱟᱯᱮ ᱛᱮ ᱿

 
ᱤᱫᱤᱧ ᱢᱮᱭᱩ ᱤᱛᱩᱱ ᱟᱥᱲᱟ
ᱟᱹᱠᱤᱞ ᱜᱮᱭᱟᱱ ᱞᱟᱹᱜᱤᱫ ᱾
ᱦᱟᱯᱮᱱ ᱫᱤᱱᱨᱤᱧ ᱛᱮᱭᱟᱨ ᱜᱮᱭᱟ
ᱱᱟᱯᱟᱭ ᱞᱮᱠᱟᱱ ᱥᱟᱵᱤᱫ ᱿

 
ᱠᱟᱛᱷᱟᱧ ᱮᱢᱟᱢ ᱠᱟᱱᱟᱭᱩ
ᱚᱞᱚᱜ ᱤᱧ ᱥᱮᱬᱟᱭ ᱜᱮᱭᱟ ᱾
ᱫᱤᱱᱟᱹᱢ ᱦᱤᱞᱳᱜ ᱟᱭᱳ ᱵᱟᱵᱟᱧ
ᱡᱳᱦᱟᱨ ᱟᱵᱤᱱᱟ ᱿᱾

======= ᱞ ᱧ =======

৬।। 

ᱵᱟᱡᱟᱨᱤᱭᱟ.  ᱵᱟ.ᱵᱩ

ᱥᱩᱪᱤᱛᱨᱟ  ᱦᱟᱸᱥᱫᱟ

 
ᱟᱛᱳ  ᱫᱤᱥᱚᱢ  ᱵᱟ.ᱜᱤ  ᱠᱟᱛᱮ
       ᱵᱟᱡᱟᱨᱤᱭᱟ.  ᱦᱚᱯᱚᱱ  ᱵᱟ.ᱵᱩ
ᱥᱟᱱᱛᱟᱲ  ᱛᱮᱢ  ᱨᱚᱲ  ᱟᱭ  ᱠᱷᱟᱱ
       ᱟ.ᱰᱤ  ᱜᱮᱪᱚᱭ  ᱠᱟ.ᱵᱩ  ᱾

 
ᱟᱡ  ᱵᱟᱵᱟ-ᱫᱚ  ᱯᱟᱯᱟᱭ  ᱢᱮᱛᱟᱭ
       ᱟᱭᱳ  ᱛᱟᱭ-ᱫᱚ  ᱢᱟᱢᱢᱤ
ᱢᱚᱱᱮ  ᱢᱚᱱᱮ  ᱵᱷᱟ.ᱵᱤᱭᱟ
       ᱟᱡ-ᱫᱚ  ᱟ.ᱰᱤᱭ  ᱫᱟ.ᱢᱤ  ᱾

 
ᱟᱭᱳ  ᱟᱲᱟᱝ  ᱛᱮ  ᱨᱚᱲ  ᱠᱚ  ᱢᱟ
        ᱪᱮᱫ  ᱜᱮ  ᱵᱟᱝ -ᱮ  ᱵᱟᱲᱟᱭ
ᱜᱚᱨᱚᱡ  ᱫᱩᱞᱟ.ᱲ  ᱵᱟᱝ  ᱛᱟᱸᱦᱮᱱ  ᱠᱷᱟᱱ
       ᱪᱤᱠᱟ.  ᱟᱫᱚᱢ  ᱥᱮᱸᱲᱟᱭ  ᱾

 
ᱚᱱᱟ  ᱛᱮᱜᱮ  ᱟᱛᱳ  ᱫᱤᱥᱚᱢ
       ᱪᱟᱞᱟᱜ  ᱜᱮ  ᱵᱟᱝ  ᱥᱟᱱᱟᱭ
ᱪᱟᱞᱟᱜ  ᱠᱟᱛᱷᱟᱭ  ᱟᱸᱡᱚᱢ  ᱞᱮᱠᱷᱟᱱ
        ᱟ.ᱰᱤ  ᱜᱮ-ᱪᱚᱭ  ᱢᱟᱱᱟᱭ  ᱾

 
ᱜᱚᱲᱚᱢ  ᱦᱟᱲᱟᱢ  ᱫᱤᱱᱮ  ᱞᱮᱭᱟ
        ᱥᱮᱸᱲᱟᱭ  ᱛᱟᱢ  ᱟᱢᱟᱜ  ᱡᱟᱱᱟᱢ  ᱟᱲᱟᱝ
ᱵᱟᱝᱠᱷᱟᱱ  ᱫᱚ  ᱟ.ᱠᱷᱤᱨ  ᱟᱢᱟᱜ
         ᱧᱩᱛᱟ.ᱛ  ᱠᱟᱲᱟᱝ  ᱠᱟᱲᱟᱝ  ᱾

======= ᱞ ᱧ =======

৭।। 

রড়মে টাড়াং টাড়াং

বাড়তাং সরেন

  
মাচেৎ গড়ম লৗই তালেয়ায়
                          আঁজম সৗরি কাথা
 নাপায় নাপায় পাড়হাও লৗগিৎ
                          মেনাঃ মান্তার কাথা ।

 
পাড়হাও অক্তে রড়মে কাথা 
                       একাল টাড়াং টাড়াং
কুংকাল রাপাঃ কাণ্ডা লেকা
                       একাল রাড়াং রাড়াং ।

 
টাড়াং টাড়াং পাড়হাও রেদ
                     দিশৗ তাঁহেন কাথা
বাং দাঁড়ানা মনে জিউয়ী
                     খিলোড ছাতা পাতা  ।

 
পুঁথি রেগে মন দ তাঁহেন
                    বাংগে ছিতির বিতির
মনে রেয়াঃ সেচেৎ কাথা
                    একাল বাচো পৗসির ।

 
যাঁহা সাতাম ঞেল তরা দ
                    একাল আডি কেটেচ্
আড়াং আতেম পাড়হাও রে দ
                       উসৗরাতেম সেটেচ্ ।

 
যথাথ কাথা , সৗরি শাবাদ
                        রড়ঃ আডি সাঁহিচ্‌ 
নাপায় কাথা মজ গে আঁজম 
                    বাংগে আঁজম বৗড়িচ্  ।

 
জাঁম্বি ডাটা লাতার কেওয়া 
                       গোটা গেচো লাড়াঃ
 জাং জিল কো তগজ রে দ 
                      একাল বাচো হাঁড়াঃ ।

 
 মোচা কাথা হড়মো সাঁওয়ার
                      তাঁহেন আডি নাপায়
   সৗরি মৗনমী তেয়ার লৗগিৎ
                      সানাম গিদম সেঁড়ায় ।

 
মাচেৎ গড়ম কাথা লেকা
                        সেঁড়ায়ালে 'বানাম'
টাড়াং টাড়াং পাড়হাও আলে 
                         কড়া কুড়ি সানাম ।

======= ᱞ ᱧ =======

৮।।

শিবু  হাড়াম

সনাতন টুডু

 
শিবু  হাড়াম  তাঁহে  কানায়
মিৎটাং  মারে  হাড়াম ,
আতো  রেনাঃ বুগি বৗড়িজ রে
আটেৎ  তায়ায়  কড়াম ।

 
সেঁদরা কারকা তাপাম  খৗপৗরি
আয়মা  লেকান  খবর ,
বাং   তাঁহেনা  উকু  দানাং
হিজুঃ হবর  হবর ।

 
জাঁহা  লেকান  এটকে  টঁড়ে
সামাং  হিজুঃ  রেহঁ ,
রেয়াড়  গদায়  শিবু  হাড়াম
লল  তিনৗঃ  রেহঁ  ।

 
রাপাচাঃ সে  আনাট  তেহেঞ
আরহঁ  বৗড়তিঃ  কানা ,
শিবু  হাড়াম  নিতহঁ  মেনায়
এনহঁয়, দানাং-অঃ  কানা ।

======= ᱞ ᱧ =======

৯।।

গেডে

সুচাঁদ হাঁসদা

 
এ  গেডে গেডে ,
দাঃ পে সেডে বেডে ৷
পাঁজা কপে রটে ,
দাঃ পে সেটে সেটে ৷

 
ঞাঁম লেক খান রকচ ,
জম কপে আডি অকচ ৷
বিঃ পে উকু সুরু ,
উকুত কুরু কুরু ৷

 
থেপলে কাটা তাপে ,
অতরে থিয়ৗ থাপে ৷
দাঃ রে জেমন লৗওকৗ ,
বাং গেপে ঠৗওকৗঃ ৷

======= ᱞ ᱧ =======

১০।। 

গুলৗচি

সীতেন মাণ্ডি

 
মেনায় তালে গুলৗচি
আলে গড়ম কুড়ি
হেরমেৎ দিপিল দাঃ এ আগুয়
ছেমেক ছেমেক সাডে তিরে চুড়ি।

 
পেড়া ক ক হিজুঃ রে
লটা দাঃ এ অডক
হটঃ ডম্বঃ গড জহার
বিল আয় পারকম রাচারে।

 
লাঁদা লাঁদা রড় আমায়
কুলি লেখান বুগি বাড়িচ্
সিলপিঞ কুনরে তিঙ্গু তিঙ্গু
উয়ুং চিঁডুঃ আডি ঘৗড়িচ্।

 
বাহা লেকা অড়াঃ সভা
বালে রড় তে আঁধোড়
মিৎ ডঁডেক বায় তাহেন রে
বুজুঃ একাল নিঝুম নিঝুম।

 
ঝত কোওয়াঃ দু দেলা
গুলৗচি মৗই আজম
কুশি রৗস্কৗ থুম ক এমায়
হারা কঃ মে বুরু লেকা।

======= ᱞ ᱧ =======

১১।। 

গুরুচরণ সরেন

দুগাই টুডু

 
আঁজম গদঃ কাথায় উনি
    অনলিয়ৗ কানায়,
আয়মা অনড়হেঁ অল কাতে
    অনড়হিঁয়ৗ এনায়।

 
ঞুতুম গুরুচরণ সরেন
     আপাৎ রতন কো মেতায়,
সানাম গেকো তেবাঃ আকাদ্‌
    এঁগাৎ আরসু গেতায়।

 
জানাম গুঁডুরিয়া আতো গেথ
     লৗইকো জত আদ,
ময়ূরভঞ্জ জেলা হেনাঃ আনা
    উড়িষ্যা পনৎ রেদ।

 
রায়রংপুর রেয়াঃ কলেজ খনাঃ
     পি.ইউ. পাস আনায়,
হানডে নাডে থোড়া দিনগে
     কাম কাজরে বল লেনায়।

 
তায়ম তেদ বিজলি বিভাগ
    হানে চৗকরি কেদায়,
অঁডে খনগে মঁজতে আদ
    কৗমি মুচৗৎ লেদায়।

 
‘সাগেন সাকাম’ ‘কিয়ৗ সিঁদুর’
     সাঁওহেৎ সাকাম করে,
অনড়হেঁ অনল দমে আজাঃ
    ছাপাও এন দরে।

 
‘ভঞ্জ আড়াং’ পাথাম রেগে
    সাপড়েৎ তাঁহে কানে,
উনখন আদ বাডায় কেদে
    একাল তেদ অনে।

 
‘চৗই আখড়া’ ‘গুরু কুনৗমি’
      মেনাঃ পুঁথি ভাগে,
পাড়হাও জোখান বেবাক অনা
       নাপায় আইকাগে।

 
সাঁওহেৎ চারচা খৗতির তেগে
     এনেম দহ লেদে,
সাঁওতা তালা হড়কো নেতার
     বেজায় উইহৗর এদে।

======= ᱞ ᱧ =======

১২।।

পাইড়ে

দুর্গাচরণ মুরমু

            
কুলহি মুচৗৎ বির গৗডিয়া
দমেয় জৗপুৎ জৗড়ি লেখান,
গৗডিয়া খনাঃ বুলৗন উডুগঃ
হাকো ক দৗড় উনজখান।

 
আলে আতো বাড়গে লাতারতে
লিঙ্গিন বির গৗডিয়া পাইড়ে,
মটা মটা রুই কাতলা
ঢয়লাং চালাঃ সয়ড় সয়ড়ে।

 
ডৗড়কা পুঠি লুলহি হাকো
বুমড়ুচ চড়গচ দদন ঘুটুরে,
সিয়ৗড়া টরডাং মশারী ঝালি
আতো হড়কো অডাও পাইড়েরে।

 
সিঞ ঞিদৗ পাতা লেকা
হাকো সাব হড় পাইড়েরে,
সাব হাকো দহয়েৎ কক
টোল টুকুচ ঠেকা করে।

 
গটা আতো জতো অড়াঃ
হুয়ুঃ হাকো উতু রাসে,
হাকো ভাঝি চটপটি পিঠৗ
আডি সিবিল সড়ম মাসে।

 
আদম দকো রহড় কোওয়া
ধিরি চাটানী অড়াঃ সৗড়িমরে,
 কহডা মেশা রহড় হাকো
উতু সিড়ুব চাটঃ জমরে।

======= ᱞ ᱧ =======

১৩।। 

রায় কাকাড় বাঙ

পি সি কিসকু রাপাজ

 
বতরেনায় রায় কাকাড় বাঙ
ঞিরৗদায় ঠামপা ঠাড়াঙ
ঞুরেনায় দিমপৗ দাড়াঙ
বানোঃরাঃ হমর আড়াঙ।

 
পেড়া পৗরভৗ হিজুঃ মাড়াঙ
ঞুত ঞিদৗ কাড়াঙ কুচৗঙ
গিতিজ আকাদেয়া কো রামপা চাড়াঙ
তপাঃ পারকম সিমপৗ সাড়াঙ।

 
রাঃ হমর রাড়াঙ রাড়াঙ
আজম হিজুঃ টাড়াঙ টাড়াঙ
ঞুতৗৎ ঞিদৗ খারাঙ দাড়াঙ
তিয়োঃকেৎ কো মাড়ঘৗটি মাড়াঙ।

 
সারা সেঙেল গারাঙ গারাঙ
ঞেল ঞেলতে রায় কাকাড় বাঙ
সেঙেল চেতান কাড়চাঙ কুড়চুঙ
বতর তে ঞির কেৎ চুইলু ভুচুঙ ।

======= মুচৗৎ =======