(হুডিঞ কৗহ্নি)
সৗরি সারনা আড়েতে কৗশিবাহা
যুগ জীয়ন মুরমু
এনেগে উরমা দাঁশায় খন রুওয়ৗড় হেচ্ কাতে আরহঁ আতোরেনাঃ রিজার্ভ বাসতে কৗশিনাথ পাটাবিঁধৗ পাতা চালাঃ লৗগিৎ এ সাপড়াও এনা। মাড়াং খনগে টিকিট কাটাও গে তাঁহেকান তায়া। কাথাহঁ তাঁহেকান তায়া চেতান কুলহি বাহা মৗই সালাঃ। মিৎ তেলাং চালাঃ আ। মিৎ সিট রেলাং দুড়ুপ আ জুরি জুরি। মিৎ তেগেলাং জমা। মিৎ তেগে গটা পাটাবিঁধৗ পাতা লাং দাঁড়ানা। মিৎ তেগেলাং তাঁহেনা সুপুর সুপুর, মালা পতাম লেকা…। মিৎ তেগে লাং….। নংকা আয়মা জেলেঞ কুকমু আতে কৗশি লগনে সাপড়াঃ কানা। উন অক্তেগে আচ্ আয়ো হেচ্ কাতেৎ এ মেতা দেয়া- বাবু নাসেনাঃ হেচ্ লেনমে আম বাবায় হহও আম কানা। আচ্কাগে নৗডরি রহড় গৎ এনা তায়া। বার-পে ঢকচ্ দাঃ ঞু কাতেৎ উডুক হেচ্ এনায়। একাল বিলম বাং গানঃ আ। বাস আড়াঃ রেনাঃ অক্ত হুয় হেচ্ আকানা। যাঁহানাঃ গে মেন কাতে চালাঃ তেগে হোয়োঃআ। বাংখান বাহা!
বাবা ঠেন তিঁগু কাতে কৗশিয় মেন কেদা- চেৎ এম মেন এদা বাবা? আরহঁ কাথায় শিলদৗ পাতাম চালাঃ কানা- কিষুন পারগানা গৗহির আড়াংতেয় কুলি কেদেয়া। চেৎ আদয় লৗইয়ৗ বাং বিলম বাং উকু কাতেৎ সৗরি কাথা গেয় লৗই কেদা। ঝত তুৎ রুওয়ৗড় তাম। আদ চালাও বাং হোয় আমা- আরহঁ গৗহির আড়াংতেয় মেন কেদা পারগানা। কৗশি কাঁদু মাঁদু আডি নেঁহর কাতেয় মেন রুওয়ৗড় কেদা- বাবা নিয়ৗবারতেৎ চালাও অচোওয়াঞ মে। আর তিসহঁ বাঞ মেন বাডায়া,তিসহঁ পাতা চালাঃ বাঞ ঞুম বাডায়া বাবা। খৗলি নিয়ৗবারতেৎ বাবা, নিয়ৗবারতেৎ….। কিষুন পারগানা নংকান চেতান রিমিল রেনাঃ দাঃদ আডি ধাও এ ঞেল পারম আকাদা। নাসে পুরুয় দাঃ তেদ নাসেনাঃ গেম পুরমুঃআ।
নঁতে বাস গৗডি নে আড়াঃ নে বাং খৗলি হড়ক লেখায়েৎ কোওয়া। হিসৗব বাং মিলৗঃ কানা। বারয়া সিট অকালেকাতেহঁ বাং পটাঃ কানা। অকয় চয় মেন গদ্ কেদা অনাদ কৗশিবাহা তৗকিনৗঃ কানা। কৗশিনাথ গে অনাকিন সিট দয় বুক আকাদা। বাস ভিতরিরে ভিড়তে পেরেজ। ঠেলাঠেলি। যাঁহায় বায় চালাঃ কানা উনিহঁ মিৎ ঘৗড়িচ্ এ দেজ্ দেজাঃ কানা। পাটাবিঁধৗ পাতা মেনতে কাথা! সানাম হড়কো কৗউয়ৗ রৗউয়ৗঃ কানা। আদম কদক মেন এদা অকায়েনাকিন? বাস আড়াঃ অক্তদ বৗকিন বাডায়তে ? আদম কদক মেন এদা বাখান হহ অৗকিনপে।
নঁতে বাহা হঁ ঘানে ঘানে আচ্ মারাং দাদা ঠেনে নেঁহরঃ কানা নিয়ৗবারতেৎ চালাঃ আঞ দাদা। আর অকা পাতাগে বৗঞ চালাঃ আ। নিয়ৗবারতেৎ…। মেনখান বলরামপুর তল্লাট সারনা কমান্ডার জিতু ঝারনা দাঃ তেদ বায় অৗতুঃ আ। উরমা দাঁশায় রেজে কৗশিবাহা তিকিন বিয়ল-বয়ল তি-তি সাপাপ্ কাতে গটা পাতা টাঁডি কিন দাঁড়া আকাদা। নোওয়া ডগর দ জিতু বায় ফোনতে লাহা খনগে বাডায় আকাদায়। অনাতে লাহা খনগে রৗগি মনেতে তাঁগিরে তাঁহেলেনায় খৗলি বাহা অড়াঃ হেচ্তে হেচ্ লেনগে। কিষুন পারগানা হঁ পাতা টাঁডি খনগে কৗশিবাহা তিকিনাঃ খবর এ ঞাম আকাদা। অনাতে উনাঃ জেরা।
নেবেতার শশডি আতো হড় বাহা-সহরায় পরব পৗলি করেগে বাংকো গাপানা। চেতান কুলহি চেতান মত, লাতার কুলহি হঁ লাতার মত। সেদায় লেকা চেতান কুলহি দাঁড়া রাকাব, দাঁড়া আঁড়গন নেতার বৗনুঃ আন। যুগ বদল সাঁওতে অৗরি হঁ বদলঃ কানা। সমাজ হৗটিঞঃ কান। জাহের থান, জাহের গাড় লৗইতেহঁ হাপাটিঞ হোয়োঃ কান। মেনখান দুলৗড় ত সেদায় লেকাগে নিছরা গেয়া। তিনরে অকয় অকয়ে কুশিয়ায়া সে শিবিলায়া, অনাদ অকয়ে লৗই কেয়া? এনখান তেহেঞ কৗশিবাহা তিকিনাঃ কৗইদ অকারে? অৗতু সৗগৗই কান্ঠাড় বাহা পারগানা বাবা সে সারনা কমান্ডার তৗকিন বৗকিন মানাও দাড়েয়াঃআ কানা? নোওয়া কুকলি দ পালেন সানাম হড়াঃ মনেরেগে জাদ্গ তরায়েদায়।
নঁতে বাস রেনাঃ হরন ঘানে ঘানে সাডে আঁজমঃ কানা। বাস আড়াঃতে পলমঃ কানা। আয়মা হড়গে আদ গৗডি আড়াঃ রেনাঃ কাথাকো লৗই এদা। নঁতে খবর হঁ সেটের এনা কৗশিবাহা বৗকিন চালাঃ আ। কাথায় অড়াঃরেগে বৗনুঃ কিনৗ। অড়াঃ হড়কো পাঁজায়েৎ কিনৗ। লৗই এদাকো কাথায় বানা হড়াঃ গে মোবাইল রেনাঃ সুইচ্ অফ্। তিন করেচং কৗশি বাহা ফোন কাতেয় লৗই আকাদেয়া অড়াঃ খন উডুক কাতে কুঁওয়ৗরি গাডা ধারে কৗশি গাজাড় রেলাং উকু তাঁহেনা। বাহায় মেন কেদা আদ তিনৗদিন? কৗশিয় মেন রুওয়ৗড় কেদা যাঁহা তিনৗদিন সাঁওতারে সৗরি সারনা রেনাঃ রাপাচাঃ তাঁহেনা উনদিন…।
নঁতে মিৎ বার হড়াঃ আর তাঁগি সাহাও দাড়ে বাং কুলৗও লেনতে গৗডি আড়াঃ লৗগিৎ কো লগন এনা। বারয়া ফাঁকা সিট্ সেনগে আয়মা হড়াঃ নজর তাঁহেয়েনা। বৗই বৗইতে গৗডি লাড়াও এনা। ভিতরিরে বাস রেনাঃ সাউন্ড বক্স খন রৗস্কৗগে সেরেঞ আঁজমঃ কানা- লিরিল সৗবুন না…..পিরিল পিরিল শিলদৗ পাতাম চালাঃ আসে বাং……।
.webp)
.webp)
