আবোওয়াঃ ডিজিটাল ডেস্ক- কুঁড়বি মাহাত আদিবাসী বাং কানাকো মেনতে রড়দারাম আর এদরে সদর তালাতে ১৭ গটাং জেলারে ডি.এম. ডেপুটেশন-এ এম কেদা পশ্চিমবঙ্গ আদিবাসী কল্যান সমিতি। আদিবাসী কল্যান সমিতি বেগর নোওয়া ডেপুটেশন রে পশ্চিমবঙ্গ ভূমিজ কল্যান সমিতি, মাহালী, লোধা, শবর কল্যান সমিতি, ভারত জাকাত মাঝি পারগানা মহল, জেগেত জাকাত মাঝি পারগানা মহল এমান আরহঁ আয়মা সংগঠন কো সেলেদ্ লেনা।
নঁডে লৗই দহ লেগ কানা বাংমা নে-হালেগে কুঁড়বি মাহাত কো আদিবাসী লৗগিদঃ লৗগিৎতে ডহর ছেঁকা রেল টেকা কাতেৎ খবর রেনাঃ শিরোনাম রেকো হেচ্ গৎ লেনা। পনত্ আর তালমা সরকার বানা হড়গে মঁড়ে মাহা রেনাঃ কুঁড়বি মাহাত কোওয়াঃ ডহর ছেঁকা রেল টেকা ঞেল কাতেৎহঁ বাং ঞেল রেনাঃ ভান কিন উদুঃ কেদা। নোওয়া ঞেল কাতে আয়মা সেন খন কুকলি রাকাব হেচ্ এনা- তবে চেৎ সরকার দ রাজঅৗরি খেলোড রেকিন আঁড়গঁওয়াকানা? অক্ত বাং বিলম কাতেৎ সাঁও সাঁওতেগে পশ্চিমবঙ্গ আদিবাসী কল্যান সমিতি কুঁড়বি মাহাত আদিবাসী বাং কানাকো আর বাংকো হুয় দাড়েয়াঃআ মেনতে ডি.এম. ডেপুটেশন তালাতে সরকার বাডায় অচোয় লৗগিৎ তেগে রড়দারাম সাঁওতে আদিবাসী কোওয়াঃ এদ্রেয় সদর তরা কেদা।সমিতি কুঁড়বি মাহাত কো অকালেকাতেহঁ আদিবাসি লেকাতে আলকো সেনেলেদ্ঃমা নওয়া দৗবি হঁয় দহ কেদা ।
নোওয়া ডি.এম. ডেপুটেশনরে আয়মা আদিবাসী গাঁতাত রেন হড় আকোওয়াঃ অৗইদৗর বাঞ্চাও দহয় আর লাচ্ দাকা বাঞ্চাও লৗগিৎতে ধরম আর রাজঅৗরি সাঁওতে সানাম লেকান এপের হেঁডের হিড়িঞ কাতেৎ দোমেল দোমেল কো সহর সেটের লেনা। দিশম জাকাত অ-আদিবাসী কো আর মিৎ ধাও আদিবাসী কোওয়া জুমিদ দাড়ে কো ঞেল তরা কেদা।
আয়মা গটাং জেলা কো লেকাগে পুরুবমিদিনপুর জেলা রেহঁ আদিবাসীকো অৗডি কাজাগ সাঁহিচ্ ডি. এম. ডেপুটেশন কো এম কেদা।আদিবাসী কল্যান সমিতি বেগরহঁ পশ্চিমবঙ্গ ভূমিজ কল্যান সমিতি, আসেকা,ভারত জাকাত মাঝি পারগানা মহল, জেগেত জাকাত মাঝি পারগানা মহল, রৗস্কৗ মহল তমলুক, কাঁথি আরশাল সিরজৗও গাঁওতা এমান সংগঠন কো সেটের তাঁহেকানা।
ডি. এম. ঠেন ডেপুটেশন রেনাঃ মুড়ুৎ দৗবি কো সামাং লৗগিৎ মাড়তে কো সেন এন তায়ম-জাওরাও আকান হড় তালারে ভূবন চন্দ্র হাঁসদা, রাজু সিং, মালতী মুরমু, দাশ হাঁসদা, বিনোদ সিং, কুনারাম টুডু আর লক্ষীকান্ত বাস্কে এমান অৗডি দামান কাথাকো বাঁখেড় কেদা।মানতান রাজু সিং আঃ বাঁখেড় তালারে মিৎ লেতাড়গে আঁতেনিয়ৗ কোওয়াঃ তি থায়ো ঞেল এনা।
পুরুবমিদিনপুর ডি. এম. ডেপুটেশন রে মুড়ুৎ চাচালাওয়িচ্ লেকাতে সেটের তাঁহেকানায় পশ্চিমবঙ্গ আদিবাসী কল্যান সমিতি বাং হৗটিঞ মিদিনপুর জেলা সভাপতি মানতান বিনয় কুমার মান্ডি।অনাবেগর দেবেন্দ্রনাথ হেম্ব্রম, প্রফেশর নিতাই টডু, গনেশ সিং, রূপচাঁদ মান্ডি এমান গৗখুড়িয়ৗ গোমকেকো সেটের তাঁহেকানা।
মুচৗৎ রে জেলা সভাপতি মানতান বিনয় কুমার মান্ডি ডেপুটেশন রেনাঃ মুড়ুৎ কাথা আর হাপেন দিন রেনাঃ সমিতিয়াঃ যঁশ ইদিকাতে অড়ে অড়পাৎ এ লৗই তরা কেদা সাঁওতে সেটেরলেন সানাম কো গুনমারাও সারহাও এ চাল আৎ কোওয়া।
.webp)
.webp)
