(হুডিঞ কৗহনি)
উদ্ হালাং
দুর্গাচরণ মুরমু
সান বঙ্গা পারোম কাতেৎ ভাদরে বলঃ লৗগিদঃ কানা এনহঁ চাষ-বাস হুয়ুঃ লেকা জমর জৗপুৎ জৗড়ি দ বায় ঞেল লেনা। হড় যাঁহা তিনাঃ গান গেক দাড়ে আদা ইনৗঃগান হুড়ু রহয় কৗমি কদো ক মুচৗৎ বাড়া আকাদা। দাঃজৗড়ি ভৗগি লেকা বাংতে বৗইদ খেত কদো নেসদ্ খিলগে তাঁহেয়েনা।
তালা কুলহি প্রাইমারী স্কুল নলকূপ রে দাঃ আগু ক চালাও লেখান সুরজমণি,মায়নো,পুটি,চাম্পা মৗই আর অনা আড়ে পাসেরেন মারাং গ,হপন গ,হাতাম সালাঃ সেতাঃ আয়ুব ঞাপাম হুয়ুগ তাকোওয়া।
তেহেঞ সেতাঃ রে সুরজ মণি দাঃ আগুই চালাও লেন রেয় জত হড় সালাঃ রপড় ঞাপাম হুয়েন জখাচ্ সুরজমণি লৗই গদ কেদা-"হে হপন গ নেসদ্ মিৎ দিনহঁ উদ্ হালাং দ বাংবন চালাও লেন দ। "
-- হৌয়,সৗরি গেত্"! সুরজমণি আক্ কাথা আজম কাতে মিৎ সাঁওতে তেক মেন কেদা।
মায়নো আচ্ হপন গ দয় মেন গদ্ কেদা-"ইঞদ আডিদিন খন গিঞ মনেয়েৎ তাহেৎ উদ্ হালাং চালাঃ লৗগিৎ। কৗমি খনেম অবসরঃ আম তবে সেম চালাঃআ।"
আরহঁ সুরজমণি-য় মেন কেদা -"রাহামদাঃ আতু ইঞ কাকি ঠেনিঞ ফোন লেদা রাকাব বিররে দমে পুটকৗ উদ,খাড়াং উদ,চাতম উদ,কামার উদ্,অটেচ্ উদ,অরতুৎ বুনুম উদ্ জানামোঃ কানা ক লৗই আদিঞা আর ক মেন কেদা আঙ্গা তরা গেপে হিজুঃ আ আর বাংখান দিকু-কুড়বী এরা গেকো হালাং চাবায়া সুর-সুপুর রেনাঃদ; উনদো বির ভিতির বাগাহী সেন বলঃ হুয়ুঃ তাপেয়া। "
যে লেকা ক রপড় এনা অনকা গে কাথা ক গটা কেদা; গাপা সেতাঃ আঙ্গা তরা রাকাব বির উদ্ হালাং বন চালাঃআ। সারজম ঘুটু আতু খন উতর নাখা মিৎটান কুড়বী আতু পারোম লেখান গে কাঁসাই নৗই ঞেল ঞামোঃআ। ভৗগি লেকা দাঃ জৗড়ি বাংতে নেসদ্ কাঁসাই নৗই তালারে মেনাঃ হেঁদে ধিরি কহো দাঃতে বাং ডুবুচ আকানা; হড়াঃ ডাঁডা বারাবারিহঁ দাঃ বাং আতোঃ কানা। নৗই চেতান রেগে রাকাব বির। পৗহিল লেকা বির বাহাগী বৗনুঃ রেহঁ সারজম-মাতকম আর নানা হুনৗর দারে লাটা করেনাঃ কমতি দ বৗনুঃ আকাদা।
দশার হিলোঃ এভেন তরা সুরজমণি খৗজলাঃ হেরমেৎ কাতে মায়নো তাকো অড়াঃসেনে চালাও এনা; মিৎ মিদতে জতোকিন হহ গুটিয়ৗও কেৎ কতে আপান-আপিন ঠেকা-খৌজলাঃ হেরমেৎ -দিপিল কাতে বাড়গে লাতার খেত আড়ে আড়েতে মোবাইল রেনাঃ সেরেঞ আজোম আজোমতে,থুতি তামাসা রমজ কৗহনী লৗই-লৗপৗইতে রাকাব বির উদ্ হালাং ক হেলাও এনা। বেড়া আউরী রাকাব তেগে কাঁসাই নৗই পারোম কাতে জতো ক হান্তে নাতে ঝুড়-গাজাড় করে উদ্ ক সেন্দরা বাড়ায়দা। হাঁডে-নাঁডে মিৎ বার গান্ডা পুটকৗ,অরতুৎ,মুচিছুরি,বতাম উদ,তুবৗ উদ্ কদো ঞামো কান গেয়া। দাঁড়া দাঁড়াতে আধোম কদো তালা খৗজলাঃ, আধোম মিৎ চেলাং,মিৎ উতু লেকা উদ্ ক হালাং আকাদা।
মায়নো মৗই হঁ মিৎ উতু লেকা উদ্ দয় আলাং লেৎ গেয়া-মেনখান মিৎটান-বারয়া হঁ পুটকা আর অরতুৎ উদ বায় পাঁজা ঞাম আকাৎতে অনা ক তলাস লৗগিৎ লাটা ভিতির ঝুড়-গাজাড় করেই ঞেলেৎ তাহে আচ্কা গেয় ঞেল ঞাম কেদা- কুড়িৎ রামা গঁডা গাজাড়রে আডিগান থেরে থপে অরতুৎ উদ্ সাড় আকানা। থির-থার চাড়-মাড় সাড় আকান অরতুৎ উদ্ তুদ্ কাতে ;ঞুরু সাকাম কতে এসেৎ আকান বুটুঃ অরতুৎ উদ্ হালাং লেওয়া সে উদ্রে লাটে আকান সাকাম কয় অচোএৎ তাহেৎ আচকাগে তিরে বিঞে থগাক্ কেদেয়া। বতর জালা মায়নো মাই আডি জোরে কিক্য়ৗউ এনা--বানচাও ইঞপে! বানচাও ইঞপে! ইঞ দকো গচ্ কিদিঞা!
উনিয়া বতর আনা কিক্য়ৗউ আড়াং আজম কাতে জতকো দৗড় সুরেনা। ঞেলে কানা ক তিরে গের আকানে আয়াং বিঞে অর্ ছাডাও কেদেয়ায়; জিউয়ী বতর জালা উনি বিঞে লিন গচ্ কেদেয়া। বতরতে হড়মো আডি জোর থার-থারা:কান তায়া।
জত্ হড় কতে মায়নো মৗই দ লাটা গাজাড় খন ক তুল উডুক কেদেয়া আর গামছাতে তি ক তল কেৎ তায়া-- জাহা তিরে বিঞে গের লেদে। আকো অড়াঃ হড়কো ফোনাৎ কোওয়া ,অনা বির সুর রাহামদা আতো রে মায়নো মৗই রেন হাতম কুমাং ক ফোনাৎ কিনা। মায়নো মৗই আচ্ কুমাং অড়াঃ রেগেয় তাহেকানা। নোওয়া কাথা আজম তরা বাইক উডুক কাতে সজে বির ভিতির কিন বলয়েনা মায়নো ঠেন।
অন্ডে খন গে আচ্ হাতম-কুমাং তৗকিন মায়নো দ হাসপাতালরে ভরতি লৗগিৎ কিন ইদি কেদেয়া। মেনখান ভাংড়া মোড় সেটের তেগে মায়নো মৗই দয় লাতাওয়া এনা, আদো রড় হঁ বায় রড়দা-তি জাঁগা হঁ বায় লাড়াওদা। রাঃআ: মেৎ আহা এনাকিন--দাড়ে ক রৗপুৎ এন লেকা কিন আয়কাউ কেদা। লগন ধারা ইদি কাতেৎ পুরুলিয়া সদর হাসপাতাল এমারজেন্সী বিভাগ রেকিন ভরতি কেদেয়া। ডাকত্র ক রোগী ঞেল কাতেৎ তুরুৎ আই.সি.ইউ ওয়ার্ড রে উচৗড় কাতে ইনজাকশন স্যালাইল রান কক এমাদেয়া।
মায়নো মৗই আচ্ আয়ো-বাবা দৗই-দাদা অড়াঃরেন জতো হড়গে হাসপাতাল রেক হেজ্ সেটের কাতে আচ্ হাতম-কুমাং ঠেন খবর ক হাতাও কেদা-আর ক ঞেলে কানা।
তিকিন তারাসিং খন বেড়ায় লাডেয়েনা সিং চান্দোয় হাসুরেনা, সের্মা পুরীরে ইপিল ক ঞেলঃ কানা। জতো হড়াঃ মনে আকুট-বাকুটঃ কানা। তিরে মায়নো মৗই এ কয়ঃ রুয়ৗড়া-ঘানে ঘানে নার্স-ডাকত্র কক কুলিয়েৎ কোওয়া।
ঞিদৗ আরে টাড়াং অক্তে উনি ডাকত্রে হেজ্ এনা,মায়নো মৗই এ তুনুম বাড়া কাতেৎ রানে অল কেদা আর মেন কেদা নিতগে নওয়া ইনজাকশন কিরিঞ আগুয়পে।
ডাকত্র বাবু ইনজাকশন এম কাতেয় মেন কেদা --"বাগে পুন টাড়াং বাং পারোম লেনখান চেৎহঁ বাং মেন গানোঃ কানা-- রোগী আঃ নাপায় খবর দ।"
.webp)
.webp)
