(হুডিঞ কৗহ্নি)
যুগ জিয়ন মুরমু
উনদ
এনেগে কলেজ ইঞ লেবেদ্ আকাদা। পোয়লো সেরমা। ইস্কুল রেনাঃ বাউন্ডারি খন অডক কাতে, কলেজ
রেনাঃ যুওয়ৗন হয় গটা হড়ম-মনে-জিউয়িরে হিঁসিদ্ হিঁসিদ্ অটাং অঃ কানা। আর মনেরে মিৎ
টাং গে কুকমু যুদি ইঞরেন হঁ আর কো লেকা মিৎ টাং দুলৗড়িয়ৗয় তাঁহেকঃ। এনখান মনে হয় কলেজ
রেনাঃ উন মারাং মারাং পুঁথি কো নাসেনাঃ হলও রাওয়াল ঞঃ কঃআ। মেনখান আলে ডিপার্টমেন্ট
রেমাঃ মিৎটাং হঁ হড় কুড়ি বৗনুঃ কোওয়া। তাঁগি-তাড়াঃরিঞ তাঁহেয়েনা আয়মা দিন।
আডিদিন তায়ম বাডায় কেদাঞ আলে ডিপার্টমেন্ট রেমাঃ
বাংগে গটা কলেজ রেগে হড় কুড়ি গে বৗনুঃ কোওয়া। উনদ ১৯৯২ সাল। হড় কড়াঃ গে গটা কলেজ তে
লেখা ঠঃ লে তাঁহে কানা। অনারে আরহঁ হড় কুড়ি! যাঁহাসেন গেম কয়ঃ ছৗতিক কুড়িগেম ঞেল ঞাম
কোওয়া। আদ চেৎ এম চিকৗয়া? আঁশ মনে আশায়েন বাসা রেগে তাঁহেয়েন। ছৗতিক কুড়ি ঞেল কাতেৎ
উলিদাঃ উৎ বাড়া কাতেগে অড়াঃ ক রুওয়ৗড় হিজুঃ হোয়ো কান তাঁহেকানা। সানাম ব্যাচ ত আর সমান
বাং তাঁহেনা। নঁতে ছৗতিক কুড়ি ঠেন দুলৗড় কাথা লৗই মানেগে লাহাতে মুঁ-রেগে বোল্ড আউট
মেয়ায়। অনা তায়ম রং আর ড্রেশ মা আরহঁ তায়ম কাথা।
ফার্স্ট ইয়ার মুচৗৎ মুচৗৎ সেকেন্ড ইয়ার বলন বলন,
খবর ঞাম কেদাঞ বাংমা আলে আতো সোর ইস্কুলরে অনা সালরেগে এইচ্ এস রে মিৎ হড় কুড়ি ভুরতি
আকানায়। আর ইঞ হঁ অনা ইস্কুল খনগে অনা সাল রেগিঞ অডক এনা। হায়রে চাপড়া মলং ! তিনাঃ
এম চেটাগা ? খবরিঞ ভেজা কেদা তলাশ রেনাঃ। মিৎ-হাপ্তা ভিতরি তেগে উনিয়াঃ ভিতরি খবরিঞ
বাডায় ঞাম কেদা। আডি স্মার্ট কূড়ি কানায় কাথায়। বাংলা তেগে বৗড়তি রড়ায়। ছৗতিক কড়া সাঁওগে
বৗড়তি গাতে তায়। সাড়বাহা লেকাগে রূপ তায়। নোওয়া হঁঞ বাডায় ঞাম কেদা বাংমা অকা অকা হিলোঃদ
ছুটি তায়নম অকয় অকয় সাঁও চং মোটর সাইকেল তেঁহ অড়াঃ এ রুওয়ৗড় আ। তলাশ হাতাও বাম সানামেরেহঁ
তলাশ হাতাও তেগে হোয়োঃ তামা। দুলৗড় মনে আরহঁ সারসাও এনা।
মিৎ হাপতাগান কলেজ চালাঃ গিঞ বন্দ কেদা। মেৎতে
ঞেল হোয়োঃ আ, নাশেনাঃ হলও নাংসা কাতে রপড় হোয়োঃআ উনি সাঁও। বাংখান কলেজ কড়া গেবাং চিকৗতেঞ
হোয় এনা। কলেজ কুড়ি ঠেন রিজেক্ট কড়া খান চেৎ হুয় এনতে, ইস্কুল কুড়ি ঠেন ত হান্ড্রেড
পারসেন্ট এক্সেপ্ট আঁশ গান আ। হড় কুড়ি মেনতে কাথা- হিসৗব বাং হান্তে নাতে আ।
উনদ সিতুং দিন পাড়াও আকানা। ইনৗ অকতে ইস্কুল কঁহ
মোরনিং শেষন চালাঃ কানা। ইনৗ হিলঃ দ আরহঁ ঢেরতেৎ গে সিতুং কান তাঁহেকানা। ইস্কুল ছুটি
কাতে গিদৗর কো আপান আপিন ধাওড়া ধৗওড়ি অড়াঃ রুওয়ৗড় কো মঁহডায়েনা। তোয়ো লেকা কায়া কোয়ো
ইঞমা তাঁগি তাড়ারিঞ তাঁহেলেন। ঞেল কেদেয়াঞ ইস্কুল গেট অডক কাতে রোড ধারেরে মিৎ কৃষ্ণ
চূড়ৗ দারে উমুল রে তিগুঁ আকানায়। হোয়ত জাঁহায় হিজুঃ তাঁগিরে। বায় ভিনৗঃ কানা কৃষ্ণ
চূড়ৗ দারে ডৗর পেরেচ্ বাহা সাঁও। রূপ ঞেলতে নোওয়া ধৗরতি রেন লেকাগে বায় ঞেলঃ কানা।
নুনৗ সিতুং রেহঁ হড়ম নাসেহঁ বাং ঝিমরৗও আকান তায়া। তবে মনে দ অটাং অটাং অঃ ভাব ইঞ আয়কাও
কেৎ তায়া। বৗই বৗইতিঞ সোর এনা। কড়াম কড়াম ঢায় ঢায়ঃ কান তিঞৗ। কলেজ রিঞ পাড়হা কান রেহঁ-
যাঁহায় লৗইতে সংসার রেনাঃ কুকমুঞ ঞেল এদ্ অনালেকাতেদ নোওয়াগে ইঞাঃ জিয়ন রে পোয়লো মিৎ
আনাড়ি কুড়ি সাঁও ইঞ রপড় লৗগিদঃ কানা। মনে মনেতে কড়ামরে বার-পে ধাওয়িঞ থু-থু জং আনা।
সাঁহাস কাতে লাহা হেচ্ এনাঞ আয়াঃ সোরতে। কুলি কেদেয়াঞ- মৗই, অড়াদ অকারে তাপে ? তেলা
বাং এম কাতে, আচ্গে দহড়ায় কুলি রুওয়ৗড় কিদিঞায় চেদা ? চেদাঃ মানে….. জাস্ট বাডায় সানাঞ
কানা, মেতাদেয়াঞ। লৗইকেদায়- বাড়েডি। দহড়াঞ কুলি কেদেয়া- মৗই আমাঃ ঞুতুম। ঞুতুম বাডায়
কাতে আমাঃ দ চেৎ- নাসেনাঃ এদ্রে মাছায় রড় রুওয়ৗড় কেদা। বাং বাং অনকা কাতেৎ দ চেদাঃ
এম মেন এদা- জাস্ট, আমাঃ ঞুতুম বাডায় সানাঞ কান তাঁহেকানা। আর ঞুতুম ত বাডায় লৗগিৎ
গে। আর হঁঞ তঁগে কেদা- মঁজ বাহা ঞেলতে সানাম হড়গে সিসিদ্ সানা কোওয়া। সাড়বাহা রেগে
ভাঁওয়ার দ আবোঃ সানা কোওয়া। নংকান মিৎ বার কাথা মেন মেনতেগে তায়ম সেন খন লেবেদ্ কিদিঞ
লেকা কাথাঞ আঁজম কেদা- আরে! লেবেল ক্রশিং এ এতো জ্যাম, কোন মতেই তাড়াতাড়ি বেরুতে পারলাম
না। প্লিজ, এক্সকিউজ মি। তায়ম সেন বৗই বৗইতে নাসেনাঃ টেরা টেরা তিঞ ঞেল কেদেয়া- নাসে
নাসে… ওরোম ওরোম… মিৎ ছৗতিক কড়া ইঞ তায়ম রে হিরো হুন্ডা চেতানরে দুড়ুব আকানায়। মেৎরে
সিতুং এসেদ্ চশমা। ঞেলতে ছিম্ ছাম্। উনিয়াঃ বডি স্প্রে রেনাঃ শ হঁ ফ্রি তেগে মুঁরে
বলওয়াদিঞা। উনরে ইঞদ আদ পাবলিক-প্যাসেঞ্জার লেকা মিৎ আড়ে রিঞ তিঁগুয়েনা। মেৎ সামাংরে
ঞেল কেৎ কিনৗঞ অক্ত বৗকিন পলম লেদা। মিৎ ঘৗড়িচ্ তে অঁডে খন হয় দাঃ লেকা কিন অটাং
এনা।
নঁতে ইঞদ চাহাপ্ রে চাহাপ্ গিঞ তাঁহেয়েনা। কলেজ
কড়া হুয় কাতে গৗড়ি লেকা মিরলুং কাতে অড়া ইঞ রুওয়ৗড় এনা। ঞিদৗ জৗপিৎ অক্তে শায় শায় ধাওয়িচ্
উলৗট কাছাড় এনা। অনা ঞিদৗ গিঞ গটা কেদা। নংকান কৗমিরেদ আদ তিসহঁ বাং। অলঃপাড়হাও রে
মনেঞ গৗডিয়ৗও কেদা। বি.এ., এম.এ. পাশ কাতেগে সরকারেন গুতি কড়াঞ হুয় এনা। আরহঁ বার সেরমাতে
সংসার ইঞ গালাং কেদা। নিৎ উনৗ নাপায় বাং রেহঁ বৗড়িচ রেদ বৗনুঃ আকাদিঞা।
অনা তায়ম আয়মা দিন পারম আকানা। তেহেঞ সেতাঃ বেড়া
আচকাগে খবর সাকাম রেনাঃ মিৎ ঠেন মেৎ ঢাং গৎ এৎ এন তিঞৗ- বীরভূম রেন মিৎ সান্তাড় তিরলৗ
ছৗতিক কড়া সাঁও দুলৗড়তে নিশড়ৗও অচোয়েনতে আধা দিনরে আয়াঃ জিউয়ি বৗতি যায়যুগ লৗগিৎ রহড়
জৗনুম দারেরেয় আকা কাদা। হায়রে দুলৗড়!
মনে সানা বাং তাঁহেলেনরেহঁ দশার দিনগে দশারতে তলাসিঞ হাতাও কেদা- ইঞাঃ কুকমু রেনাঃ সাড়বাহা চেৎ লেকা মেনাঃআ। ইন্টারনেট যুগরে সাঁও সাঁওতেগে খবরিঞ ঞাম কেদা। বাডায় কেদাঞ অনাদ যাঁহা কচা-কঁড়রে বাহা লেনা, অঁডেগে কাথায় বাইতে বৗইতে গস-মসদঃ কানা……।
.webp)
.webp)
