সিঁগি মাহা রেনাঃ সাকাম ‘চেরেচ্ আড়াং’ লেখা- ৯৪

 

 “আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com 

 

তেহেঞাঃ আখড়ারে যাঁহায় কো সেলেদ্‌ আকান- রিলৗমালা মুরমু,  ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵᱩᱫᱤᱭᱟᱹᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ, ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ,, বাড়াতাং সরেন, সুচাঁদ হাঁসদা, গাতে টুওয়ৗর,  দুর্গাচরণ মুরমু,  সিতেন মান্ডি, দুগাই টুডু।

 

রিলৗমালা মুরুমু, ক্লাস- V
জেলা - পুরুলিয়া

১।।

ᱵᱟᱹᱲᱤᱡ ᱟᱞᱚᱢ ᱥᱟᱨᱥᱟᱣᱼᱟ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 
ᱮᱲᱮ ᱡᱩᱫᱤᱢ ᱥᱟᱹᱭ ᱥᱟᱹᱨᱤᱭᱟᱜ
           ᱜᱟᱯᱟ ᱟᱢᱨᱮ ᱦᱳᱭᱳᱜ,
ᱦᱚᱲᱟᱜ ᱠᱩᱰᱟᱹᱢ ᱥᱟᱛᱮ ᱩᱱ ᱫᱚ
           ᱨᱟᱜᱟᱢ ᱢᱟᱭᱟᱜ ᱢᱳᱭᱳᱜ ᱾

 
ᱵᱟᱹᱲᱤᱡ ᱚᱠᱟ? ᱵᱟᱢ ᱫᱟᱨᱟᱢᱟ?
            ᱧᱮᱞᱛᱮ ᱠᱳᱪᱳᱲ ᱵᱟᱲᱟᱭ,
ᱜᱟᱯᱟ ᱦᱤᱞᱚᱜ ᱵᱟᱱᱮ ᱵᱷᱟᱥᱟᱣ
            ᱥᱟᱱᱟᱢ ᱳᱛᱳᱲ ᱪᱟᱵᱟᱭ ᱾

 
ᱟᱢᱟᱜ ᱫᱚᱭᱮᱢ ᱫᱟᱱᱟᱝ ᱵᱟᱲᱟᱭ
            ᱦᱚᱲᱨᱮ ᱜᱟᱸᱫᱟᱨ ᱜᱩᱸᱫᱩᱨ,
ᱵᱳᱜᱮᱭᱟᱜᱼᱨᱮ ᱨᱚᱨᱚᱲ ᱛᱩᱞᱩᱡ
             ᱩᱱ ᱫᱚ ᱯᱷᱤᱪᱟᱹᱢ ᱜᱟᱹᱫᱩᱨ ᱾

 
ᱜᱮᱭᱟᱱ ᱛᱮᱜᱮᱢ ᱴᱷᱤᱠᱟᱹ ᱧᱟᱢᱟ
             ᱵᱳᱜᱮ ᱵᱟᱹᱲᱤᱡ 'ᱪᱤᱠᱟᱹ',
ᱥᱚᱦᱚᱫ ᱛᱮᱜᱮᱢ ᱨᱟᱠᱟᱵ ᱞᱟᱯᱷᱟᱝ
            ᱚᱠᱟ ᱢᱮᱱᱟᱜ ᱨᱤᱠᱟᱹ ᱾

 

--=======O========--

২।।  

ᱪᱟᱜ

 ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱟᱸᱥᱩᱬ  ᱛᱟᱭᱚᱢ
          ᱫᱟᱜ ᱾
ᱧᱮᱞᱚᱜ      ᱞᱤᱴᱟᱹ
           ᱟᱜ ᱾
ᱡᱚᱢ          ᱛᱟᱭᱚᱢ
         ᱠᱟᱜ ᱾
ᱧᱩᱭᱟᱢ      ᱵᱮᱨᱮᱞ
          ᱫᱟᱜ ᱾
ᱡᱚᱡᱚᱢ       ᱞᱟᱹᱜᱤᱫ
           ᱯᱟᱜ ᱾
ᱦᱚᱯᱚᱱ        ᱵᱟᱵᱩᱭ
           ᱨᱟᱜ ᱾
ᱜᱤᱛᱤᱞ         ᱥᱮᱛᱮᱧ
           ᱫᱟᱜ ᱾
ᱦᱮᱲᱮᱢ         ᱱᱩᱱᱟ.ᱜ
             ᱪᱟᱜ ᱾

--=======O========--

৩।। 

ᱦᱟ.ᱲᱩ ᱵᱟᱯᱞᱟ ᱫᱟᱜ

ᱜᱳᱯᱮᱥᱣᱚᱨ ᱢᱟ.ᱱᱰᱤ

  

ᱦᱟᱱᱮ ᱛᱚᱨᱟ ᱥᱤᱛᱩᱝ ᱛᱩᱞᱩᱡ
ᱫᱟᱜ ᱧᱩᱨᱩᱜ ᱠᱟᱱ,
ᱫᱟᱨᱮ ᱞᱟᱯᱷᱟᱝ ᱪᱮᱬᱮ ᱠᱚᱠᱚ
ᱪᱮᱨᱮᱡ ᱡᱚᱝ ᱠᱟᱱ ।

 

ᱦᱟ.ᱲᱭᱟ.ᱨ ᱥᱟᱠᱟᱢ ᱪᱮᱛᱟᱱ ᱨᱮ
ᱥᱤᱛᱩᱝ ᱴᱷᱤᱞᱠᱟ.ᱜ ᱠᱟᱱ,
ᱫᱷᱟ.ᱨᱛᱤ ᱚᱛ ᱦᱟᱥᱟ ᱨᱮ
ᱫᱟᱜ ᱧᱩᱨᱩᱜ ᱠᱟᱱ ।

 
ᱰᱩ'ᱰᱨᱩᱜ,ᱥᱤᱛᱩᱝ ᱟ.ᱰᱤ ᱱᱟᱯᱟᱭ
ᱟ.ᱞᱤ ᱯᱟ.ᱞᱤᱜ ᱠᱟᱱ,
ᱜᱤᱫᱟ.ᱨ ᱯᱤᱫᱟ.ᱨ ᱨᱟ.ᱥᱠᱟ. ᱛᱮᱠᱚ
ᱮᱱᱮᱪ ᱡᱚᱝ ᱠᱟᱱ ।

 
ᱜᱚᱲᱚᱢ ᱦᱟᱲᱟᱢ ᱞᱟ.ᱞᱟ.ᱭ ᱠᱟᱱᱟᱭ
ᱦᱟ.ᱲᱩ ᱵᱟᱯᱞᱟ ᱫᱟᱜ,
ᱦᱚᱲᱢᱚ ᱪᱮᱛᱟᱱ ᱛᱤᱨᱯᱤ ᱞᱮᱠᱟ
ᱞᱚᱦᱚᱫ ᱦᱩᱭᱩᱜ ᱪᱟᱜ ?

--=======O========--

৪।।

ᱡᱚ  ᱵᱤᱞᱤ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

  

ᱥᱮᱨᱢᱟ ᱵᱷᱳᱨ ᱟᱰᱤ ᱞᱮᱠᱟᱱ
      ᱡᱚ ᱡᱟᱞᱤ ᱫᱚ ᱧᱟᱢᱚᱜ ,
ᱦᱮᱲᱮᱢ ᱠᱟᱥᱟ ᱡᱚᱢ ᱥᱤᱵᱤᱞ
       ᱫᱟᱨᱮ ᱱᱟᱹᱲᱤᱭ ᱮᱢᱚᱜ  ᱾

  
ᱥᱤᱛᱩᱝ ᱫᱤᱱᱨᱮ ᱨᱟᱵᱟᱝ ᱫᱤᱱᱨᱮ
    ᱵᱤᱨ ᱵᱩᱨᱩᱨᱮ ᱛᱤᱱᱟᱹᱜ ,
ᱡᱩᱫᱟᱹᱜᱮ ᱨᱟᱥᱟ ᱡᱩᱫᱟᱹᱜᱮ ᱠᱟᱥᱟ
    ᱡᱚ ᱡᱟᱹᱞᱤ ᱨᱮᱜᱮ ᱵᱷᱤᱱᱟᱹ ᱾

  
ᱥᱤᱵᱤᱞ ᱜᱮᱭᱟ ᱠᱟᱥᱟ ᱢᱮᱭᱟ
     ᱟᱫᱚᱢ ᱠᱚᱫᱚ ᱡᱚᱡᱚ ,
ᱦᱩᱰᱤᱧ ᱜᱮᱭᱟ ᱱᱤᱱᱤᱪ ᱜᱮᱭᱟ
   ᱟᱫᱚᱢ ᱠᱚᱫᱚ ᱜᱚᱡᱚ  ᱾

  
ᱡᱟᱹᱞᱤᱜᱮ ᱨᱮᱦᱚᱸ ᱥᱤᱵᱤᱞ ᱢᱮᱭᱟ
    ᱵᱟᱢ ᱦᱤᱲᱤᱧ ᱠᱮᱭᱟ ,
ᱯᱟᱱᱡᱟ ᱠᱟᱛᱮ ᱟᱜᱩᱭ ᱟᱫᱚ
    ᱥᱩᱨᱨᱮ ᱧᱟᱢᱚᱜ ᱜᱮᱭᱟ ᱾

  
ᱥᱮᱨᱢᱟ ᱨᱮᱱᱟᱜ ᱡᱚ ᱡᱟᱹᱞᱤ ᱵᱤᱞᱤ
    ᱢᱤᱫ ᱫᱷᱟᱣ ᱡᱚᱢᱜᱮ ᱞᱟᱜᱟᱜ ,  
       ᱟᱡᱟᱨ  ᱨᱮᱫ ᱨᱟᱱ ᱞᱮᱠᱟᱜᱮ
          ᱡᱚᱢᱛᱮ ᱵᱟᱢ ᱵᱷᱟᱜᱟᱜ ᱾᱾

 

--=======O========--

৫।।

তাড়াম

বাড়তাং সরেন

 
তাড়াম তাড়াম তাড়াম মেসে
                    তাড়াম লা- লাহান্তি
তাড়াম রেদ  কেটেচ কাটা
                      হামাল ধিরি জান্তি।

 
তাড়াম রেদ বাচো লাগাঃ
                 সাদম গৗডি হৗতি
মনে জিউয়ী দিল দাড়েতে
                জেরেৎ মেসে বৗতি।

 
বীর মা গাজাড় হর তালাতে
                 তাড়াম তাড়াম থুতি
সাঙ্গিঞ হরতে তাড়াম  রেদ
                   রেবেৎ মেসে ধুতি।

 
দিশম দিশম সাঁঘাঁর  লৗগিৎ
                     কৗউডি বাচো লৗগতি
 চাম্পা দিশম সাসাং বেডা
                    আর হঁ আডি বৗড়তি।

 
হেমাল বুরু আরেল চূড়ৗ
                     ঞেলঃ সোনা মতি
দিশম হড়কো টুঁডৗং লেনা
                  তাড়াম সাপাপ্ তি-তি।

         
সেদায় হড়কো দাঁড়াঁ লেদা
                সানাম গোটা ধৗরতি
তাড়াম রেগে তাঁহেকানা
               রৗস্কৗ আডি জৗসতি।

 

দিনৗম দিনৗম যাঁহাঁয় তাড়াম
                          নাশে রুতি রুতি
হড়মো সাঁওয়ার তেয়ার রেদ
                    গড়য় ঞামা আড়তি।

--=======O========--

৬।।

মিরু  আড়াং

সুচাঁদ হাঁসদা

 
আলে অড়াঃরে মেনাঃ কোওয়া ,
আয়মা মিরু  চেঁড়ে ৷
দাকা-দ কাঃ উতু-দ পাঃ ,
রড়- ক কেড়ে বেড়ে ৷

 
খেল এনেচ গে কৗমি তাকো ,
উনকু আঃ সারা বেড়া ৷
রাগ আকো লাঁদায় আকো ,
এড়ে  বাকো  রড়া ৷

 
এনেচ আকো সেরেঞ আকো ,
রুয় আকো রাড়াং রাড়াং ৷
হিজুঃ পে দেলা আঁজম খানপে ,
নুকু আঃ মিরু  আড়াং  ৷

--=======O========--

৭।।

দিনৗম গাতে

গাতে টুওয়ৗর

 
গড়ম হাড়াম
ঠাকেৎ তাড়াম
অকাম চালাঃ
হাপা সালাঃ ?

 
লৗইমে থুতি
সাবমে তি তি
ইঞ হুঞ চালাঃ
আম সালাঃ ।

 

লৗইমে গড়ম
থুতি সড়ম
কুদুম কৗহনি
বৗউলি রৗহনি।

 
পুথি পাড়হাও
গাতেক সাঁও
উনিঞ থুথি
আমাঃ পুথি ।

 
কৗহনি কুদুম
আলম থুকুম
দিনিঞ গাতেঃ
আম সাঁওতে ।

 
আলম উইহৗর
টাপার টুওয়ৗর
মিনৗঞ গাতে
দিনৗম গাতে ।

--=======O========--

৮।।

সিম সাঁডি

দুর্গাচরণ মুরমু

 
বুসাঃ রেদো চিয়ৗপ চিয়ৗপ
এগাঁৎ সংগে সারা বেড়া,
বাড়গে ঝাড়গে পাস্‌কা আতিঞ
 ইল হারাঃ রে তুপুদ সেড়া।

 
হারা পাকট চুরকু আবট
তুপুদ লৗগিৎ রৗগি তৗপিস,
খেনচের আতে আচুর আতে
উডৗও লেবেৎ উটাং হৗবিস।

 
কুকড়ু কু  কুকড়ু  কু
সিমরাঃ ভোর তারাসিং সিগাঁড়,
অড়াঃ ছাটকা কুলহি গডা
কামসাও বাড়ায় উডৗও ভিদাঁড়।

--=======O========--

৯।।

চাঁদ সিরজন

সীতেন মাণ্ডি

 
কুকমু কাতে ঞেল মেসে
   আলম জৗপিদা
তাড়াম কাতে লাহাঃ মেসে
  আলম তিঙ্গুনা।
মৗনমি ভৗলৗই কৗমি যাঁহা
সানায় মেসে অনা
মনে মুরুক কাতে আমাঃ
দিশৗ দহয় মে সানা।
অকা মনে খজ্ লেদায়
বাম ঞামলেৎ উন রে
বৗড়িচ্ আলম উইহৗর ভাবনাঃ
মনে এমাঃ মে কৗমি রে।
আমঠেন আম আলম হুডিঞঃ
হড় ক মেন হচঃ
দিনৗম দিন গে অকয় লৗগিৎ
 বৗড়িচ্ দ বাং হুয়ুঃ।
 আমাঃ পৗতিয়ৗও আমাঃসানা
  আমগে লাহা মেয়া
মৗনমি রুপ তে চাঁদ সিরজন
আমাঃ কুকমু রুপে ঞাম গেয়া ‌।

--=======O========--

১০।।

শ্রবন টুডু

দুগাই টুডু

 
লৗইকো কাথায় জত কোগে
    অনলিয়ৗ কানায়,
আঁজম আকান একাল সৗরি
     সুসৗরিয়ৗ লেনায়।

 
ঞুতুম তায়দ শ্রবন টুডু
       বাডায় গেকো সৗরি,
কালিপাহাড়ী আতো রেদ
        বুকৗ তপা পৗরি।

 
সানাম গেকো মেন এদা
       কাথায় সাঁতুড়ী থানা,
পুরুলিয়ৗ জেলা গেথ হানে
      একাল গেকো মেনা।

 
প্রাইমারী মাচেৎ মঁজতে উনি
      চৗকরি বাড়া কেদা,
সমাজ লাহায় লৗগিৎ তেদ
      আয়মা হুদিশ লেদা।

 
হড়াঃ ভৗলৗই বাবদ করে
      আডি গাঁডন লেনা,
‘ঝারনা’ পাথাম রেগে আদ
       সাপড়েৎ তাঁহে কানা।

 
পুরুলিয়া রেয়াঃ সাঁওহেৎ সাকাম
     পাসেচ্‌ পৗহিল তেনাঃ,
নওয়া কাথা রাঁওয়া গেয়া
      গোটা টৗন্ডি অনা।

 
অলঃ চরচা সাঁওতা কৗমি
        আচগে সেলেৎ অৗনিচ্‌,
লাকচার শাসতর এমান তেদ
     বেজায় গৗখুড় তেনিচ্‌।

 
তেহেঞ গাপা হড়কো নেতার
      একাল উইহৗর ভালা,
গৗহির সালাঃ দিসৗয় ইদি
       মনে অন্তর তালা।

 

ঁঁঁঁঁ=মুচৗৎ= ঁঁঁঁঁ