সিঁগি মাহা রেনাঃ সাকাম ‘চেরেচ্ আড়াং’ লেখা- ৮৮

 

 “আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com 

 

তেহেঞাঃ আখড়ারে যাঁহায় কো সেলেদ্‌ আকান- বিমলা কিস্কু, ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵᱩᱫᱤᱭᱟᱹᱢᱩᱨᱢᱩ, ᱨᱟᱢᱞᱟᱞ ᱴᱩᱰᱩ, ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ,  সুচাঁদ হাসদা, দুগাই টুডু,  সিতেন মান্ডি,  নিকোলাস মারান্ডি।

  

বিমলা কিস্কু, ক্লাস-LKG
জেলা - পূর্ব সিংভূম

১।।

ᱱᱟᱞᱦᱟ ᱛᱩᱢᱟᱹᱞ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

ᱟᱹᱯᱩᱧ ᱦᱟᱱᱤᱭ ᱥᱮᱱ ᱟᱠᱟᱱᱟ
        ᱵᱟᱹᱨᱩ ᱵᱟᱹᱭᱦᱟᱹᱲ ᱥᱤᱭᱚᱜ,
ᱟᱭᱳ ᱦᱟᱹᱱᱤᱭ ᱪᱟᱞᱟᱣ ᱟᱠᱟᱱ
            ᱛᱮᱨᱮᱞ ᱵᱮᱞᱮ ᱛᱤᱭᱳᱜ ᱾

ᱥᱮᱛᱟᱜ ᱟᱹᱭᱳᱵᱽ ᱠᱟᱹᱢᱤ ᱭᱟᱠᱤᱱ
            ᱵᱟᱹᱠᱤᱱ ᱛᱟᱸᱦᱮᱱ ᱠᱚᱭᱚᱜ,
ᱦᱳᱲᱳ ᱪᱟᱹᱣᱞᱮ ᱦᱳᱭᱳᱜ ᱛᱟᱞᱮ
            ᱦᱟᱯᱮᱱ ᱫᱚ ᱞᱟᱡ ᱵᱤᱭᱚᱜ ᱾

ᱟᱭᱳ ᱢᱟᱛᱚᱭ ᱜᱮᱹᱡᱽ ᱜᱩᱨᱤᱡ
             ᱴᱷᱚᱱᱚᱠ ᱪᱤᱸᱠᱟᱬ ᱞᱮᱠᱟ,
ᱥᱚᱸᱜᱮ ᱟᱨᱦᱚᱸᱭ ᱤᱥᱤᱱ ᱟᱨᱳᱭ
             ᱞᱚᱞᱚ ᱞᱟᱹᱵᱤᱫ ᱫᱟᱠᱟ ᱾

                  (২)

ᱠᱷᱟᱸᱴᱤ ᱦᱚᱨ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

ᱵᱟᱲᱜᱮ ᱥᱤᱸᱭᱟᱬ ᱦᱚᱨ ᱫᱚ ᱥᱮᱱᱮᱱ
               ᱜᱚᱰᱟ ᱩᱜᱟᱹᱲ ᱟᱦᱟᱨ,
ᱦᱟᱱᱟ ᱟᱛᱳ ᱱᱚᱣᱟ ᱟᱛᱳ
            ᱛᱚᱞᱮᱱ ᱛᱟᱲᱟᱢ ᱰᱟᱦᱟᱨ ᱾

ᱦᱤᱡᱩᱜ ᱥᱮᱱᱚᱜ ᱦᱚᱨ ᱫᱚ ᱛᱤᱡ ᱮᱱ
             ᱥᱟᱢᱟᱝ ᱨᱮ ᱫᱚᱻᱵᱟᱹᱴᱤ,
ᱚᱰᱮ ᱜᱮᱪᱚ ᱯᱟᱸᱡᱟ ᱧᱟᱢᱚᱜ
             ᱦᱚᱨ ᱫᱚ ᱚᱠᱟ ᱠᱷᱟᱸᱴᱤ ?

 

=O=O=O=OO=O=O=O=

২।। 

ᱵᱩᱨᱩ- ᱰᱩᱸᱝᱨᱤ

ᱥᱩᱵᱩᱫᱤᱭᱟᱹ  ᱢᱩᱨᱢᱩ

ᱪᱩᱲᱱᱤ ᱰᱩᱸᱝᱨᱤ ᱞᱚᱜ
ᱥᱟᱺᱜᱤᱧ ᱠᱷᱚᱱ ᱧᱮᱞᱚᱜ ᱾
ᱫᱷᱤᱨᱤ ᱫᱟᱨᱮᱹ ᱞᱚᱞᱚᱜ
ᱚᱠᱟᱦᱚᱸ ᱵᱟᱝ  ᱨᱚᱞᱚᱜ ᱾

ᱵᱟᱭᱠᱟ ᱡᱷᱟᱸᱰᱟ ᱛᱷᱤᱨ ᱛᱷᱟᱨ
ᱞᱮᱠᱷᱟᱭ  ᱜᱮᱭᱟᱢ  ᱢᱤᱫ  ᱵᱟᱨ ᱾
ᱩᱥᱩᱞ ᱜᱮᱭᱟ ᱵᱟᱥᱟ ᱰᱩᱸᱝᱨᱤ
ᱵᱟᱝ ᱠᱟᱱᱟᱦᱳ  ᱛᱳᱭᱳ ᱢᱩᱸᱝᱨᱤ ᱾
ᱛᱤᱪ  ᱪᱟᱞᱟᱜ ᱡᱮᱞᱮᱧ   ᱰᱩᱸᱝᱨᱤ
ᱯᱟᱱᱛᱮ ᱯᱟᱱᱛᱮ  ᱡᱤᱨᱤ   ᱦᱤᱨᱤ ᱾

ᱵᱟᱥᱟ ᱩᱞ
ᱚᱠᱮᱭᱮ ᱛᱩᱞ ᱾
ᱟᱹᱰᱤ  ᱩᱥᱩᱞ
ᱢᱚᱡ  ᱩᱢᱩᱞ ᱾

ᱩᱥᱩᱞ ᱜᱮᱭᱟ ᱵᱟᱥᱟ ᱰᱩᱸᱝᱨᱤ
ᱵᱟᱝ ᱠᱟᱱᱟᱦᱳ  ᱛᱳᱭᱳ ᱢᱩᱸᱝᱨᱤ ᱾
ᱛᱤᱪ  ᱪᱟᱞᱟᱜ ᱡᱮᱞᱮᱧ   ᱰᱩᱸᱝᱨᱤ
ᱯᱟᱱᱛᱮ ᱯᱟᱱᱛᱮ  ᱡᱤᱨᱤ   ᱦᱤᱨᱤ ᱾


ᱵᱟᱥᱟ ᱩᱞ
ᱚᱠᱮᱭᱮ ᱛᱩᱞ ᱾
ᱟᱹᱰᱤ  ᱩᱥᱩᱞ
ᱢᱚᱡ  ᱩᱢᱩᱞ ᱾

=O=O=O=OO=O=O=O=

৩।।

ᱯᱷᱩᱞ ᱯᱮᱲᱟ

ᱨᱟᱢᱞᱟᱞ ᱴᱩᱰᱩ

 

  ᱟᱞᱮ ᱚᱲᱟᱜ ᱦᱤᱡᱩᱜ ᱢᱮ ᱯᱷᱩᱞ
              ᱮᱢᱟ ᱢᱟᱞᱮ ᱯᱤᱴᱷᱟᱹ
  ᱢᱮᱱᱟᱭ ᱛᱟᱞᱮ ᱵᱷᱩᱞᱤ ᱥᱮᱛᱟ
           ᱟᱞᱚᱢ ᱦᱤᱡᱩᱜ ᱨᱤᱴᱷᱟᱹ ᱿

 

  ᱜᱚᱡᱮᱭᱟᱞᱮ  ᱮᱸᱜᱟ  ᱢᱮᱨᱚᱢ

        ᱧᱟᱢᱟᱢ ᱢᱟᱭᱟᱝ ᱵᱷᱟᱹᱡᱤ

  ᱟᱹᱰᱤ ᱪᱮᱦᱨᱟᱭ ᱤᱥᱤᱱ ᱠᱮᱭᱟ

         ᱦᱩᱰᱤᱧ ᱠᱚᱭᱤᱡ ᱥᱟᱺᱡᱤ ᱿

 

  ᱱᱟᱱᱟ ᱦᱩᱱᱟᱹᱨ ᱫᱟᱨᱮ ᱢᱮᱱᱟᱜ

             ᱪᱷᱟᱴᱠᱟ ᱨᱮᱜᱮ ᱚᱱᱮ

  ᱥᱟᱠᱟᱢ ᱛᱮᱠᱚ ᱮᱣᱮᱨ ᱢᱮᱭᱟ

            ᱨᱮᱭᱟᱲᱚᱜ ᱛᱟᱢ ᱢᱚᱱᱮ ᱿

 

  ᱠᱤᱫᱩᱜ ᱵᱮᱲᱟ ᱦᱟᱹᱠᱩ ᱠᱩᱴᱤ

         ᱢᱩᱨᱩᱫ ᱥᱟᱠᱟᱢ ᱵᱟᱹᱴᱤ

  ᱜᱤᱛᱤᱡ ᱢᱮᱞᱮ ᱪᱷᱟᱴᱠᱟ ᱯᱤᱸᱰᱟᱹ

            ᱟᱴᱮᱫ ᱵᱩᱥᱩᱵ ᱟᱹᱴᱤ ᱿

 

  ᱵᱤᱛᱠᱤᱞ ᱫᱩᱸᱦᱟᱹᱣ ᱟᱸᱡᱚᱢ ᱛᱮᱫᱚ

            ᱮᱵᱷᱮᱱᱢᱮ ᱥᱮᱛᱟᱜ ᱵᱮᱲᱟ

   ᱵᱟᱥᱟᱝ   ᱛᱚᱣᱟ   ᱮᱢᱟ   ᱢᱟᱞᱮ

             ᱤᱧᱨᱮᱱ ᱯᱷᱩᱞ ᱯᱮᱲᱟ ᱿

 

=O=O=O=OO=O=O=O=

৪।।

ᱦᱟᱴᱤᱧ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

ᱵᱟᱵᱟᱭ ᱟᱜᱩᱭ ᱯᱟᱛᱟ ᱠᱷᱚᱱᱟᱜ
ᱦᱮᱲᱮᱢ ᱦᱮᱲᱮᱢ ᱪᱤᱱᱤ ᱞᱟᱹᱰᱩ ;
ᱠᱩᱥᱤᱜ ᱠᱟᱱᱟᱭ ᱵᱟᱵᱩ ᱛᱟᱞᱮ
ᱞᱚᱜᱚᱱ ᱥᱟᱱᱟᱢ ᱦᱟᱴᱤᱧ ᱟᱞᱮ ।


ᱜᱚᱜ ᱟᱜᱩᱭ ᱵᱤᱨ ᱵᱩᱨᱩ ᱠᱷᱚᱱᱟᱜ
ᱥᱚᱥ ᱵᱷᱩᱰᱨᱩ ᱛᱮᱨᱮᱞ ᱛᱟᱨᱚᱯ ;
ᱨᱟᱹᱥᱠᱟᱹ ᱟᱛᱮᱭ ᱩᱫᱩᱜ ᱟᱞᱮ
ᱡᱚ ᱵᱤᱞᱤ ᱡᱚᱢ ᱦᱟᱴᱤᱧᱟᱞᱮ ।

ᱫᱟᱫᱟᱭ ᱟᱜᱩᱭ ᱥᱮᱸᱫᱨᱟ ᱠᱷᱚᱱᱟᱜ
ᱞᱩᱛᱤ ᱛᱮᱨᱚᱢ ᱦᱟᱣ ᱯᱚᱴᱚᱢ ;
ᱥᱤᱵᱤᱞ ᱟᱰᱤ ᱥᱤᱲᱩᱯ ᱪᱮᱯᱮᱪ
ᱮᱱ  ᱦᱚ  ᱚᱠᱚᱭ  ᱵᱟᱠ ᱨᱮᱯᱮᱪ ।

ᱦᱟᱴ ᱯᱟᱛᱟ ᱪᱷᱟᱛᱟ ᱠᱷᱚᱱᱟᱜ
ᱡᱟᱸᱦᱟᱭ ᱡᱟᱸᱦᱟᱱᱟᱜ ᱫᱚᱠ ᱟᱜᱩᱭ ;
ᱵᱟᱵᱩᱛᱟᱞᱮ ᱵᱟᱝᱜᱮᱭ ᱪᱩᱠᱩᱭ
ᱦᱟᱴᱤᱧ ᱮᱢᱟᱞᱮ ᱡᱚᱛᱴᱷᱮᱱᱮ ᱨᱩᱪᱩᱭ ᱾

 

=O=O=O=OO=O=O=O=

৫।।

ᱠᱷᱟᱢ ᱠᱷᱩᱱᱴᱤ

ᱜᱳᱯᱮᱥᱣᱚᱨ ᱢᱟ.ᱱᱰᱤ

 

ᱚᱲᱟᱜ ᱨᱮᱱᱟᱜ "ᱢᱳᱫᱷᱳᱱ" ᱠᱷᱩᱱᱴᱤ

ᱥᱮᱱᱮᱨ ᱩᱨᱤᱡ ᱫᱚᱦᱚᱭ ᱠᱷᱟ.ᱴᱤ ।

 

"ᱟᱭᱳ ᱵᱟᱵᱟ" ᱜᱷᱟ'ᱨᱚᱡᱷ ᱠᱷᱩᱱᱴᱤ

ᱚᱲᱟᱜ ᱫᱩᱣᱟ.ᱨ ᱫᱚᱦᱚᱭ ᱠᱷᱟ.ᱴᱤ ।

 

ᱟᱛᱳ 'ᱢᱟ.ᱡᱷᱤ' ᱠᱷᱟᱢ ᱠᱷᱩᱱᱴᱤ

ᱱᱟᱯᱟᱭ ᱵᱤᱪᱟ.ᱨ ᱞᱟᱦᱟᱭ ᱠᱷᱟ.ᱴᱤ ।

=O=O=O=OO=O=O=O=

৬।। 

ইপিল

সুচাঁদ হাঁসদা

 

ইপিল  ইপিল  ইপিল ,
সেরমা রে আমিল ঝামিল ,
ঘানেম উকুঃ আ ঘানেম সদরঃ ,
খিলোড মে রাহলা রিমিল ৷

 

আম লেকাগে আলে বিটি ,
কয়গায়  মিটি  মিটি ,
ঘানেয় উকুঃ আ ঘানেয় সদরঃ ,
লাঁদায়ায়  খিটি  খিটি  ৷

 

হুডিঞ হুডিঞ  গিদৗ ,
বায় বাডায়া বুগি জুদৗ ,
আডি গে সাদা সিদৗ ,
এমায় পে দে গুন বিরদৗ ৷

 

=O=O=O=OO=O=O=O=

৭।।

রামদুলাল মুরমু

দুগাই টুডু

 

দিশম হড়কো লৗইয়ৗ কাথায়
         অনলিয়ৗ কানে,
নেতার অনে বেবাক গেথ
       বাড়ায় গেকো হানে।

 

ঞুতুম তায়দ রামদুলাল মুরমু
            সানাম গেকো মেনা,
আপাৎ ঞুতুম ভাজু মুরমু
          এঁগাৎ দেগে কানা।

 

জানাম আতো কামার বাঁদি
           পি.ও. শিলদা গেদ,
নাহাঃ ঝাড়গ্রাম জেলা অনা
       জতকো লৗই আদ।

 

শিলদৗ আর. সি. ইন্সটিউট খনাঃ
         ইরৗল চানাচ্‌ আনা,
কোলকাতা পুলিশ রেদ অনে
         চৗকরিয় বল লেনা।

 

সাঁওতা লাকচার দিশৗ কাতে
       দমে উইহৗর কেদায়,
‘পছিম বাংলা’ পত্রিকা তালা
      অল বাড়া লেদায়।

 

উনরে গেচো আচ্‌গে ভালা
           গাঁডন আনগে মনে,
‘হুদিশ’ ঞুতুম পাথাম হানে
      উছৗন সদর আনে।

 

নাওয়া নাওয়া অলঃ কোদ
      অৗডিয় উৎগৗও কেৎকো,
সাঁওহেৎ চারচালাহায় লৗগিৎ
           ধুরৗও দহ লেৎকো।

 

কৗমি জিরৗও কাতেদ্‌ উনি
       অড়াঃ রুওয়ৗড় লেনায়,
অন্তর সালাঃ ভৗলৗই করে
       জপড়াও তাঁহে কানায়।

 

সাঁওহেৎ চারচাও খৗতির তেগে
     এনেম দহ লেদে,
অনা তেড়ং সাঁওতা তালা
       একাল দিশৗয় এদে।

=O=O=O=OO=O=O=O=

৮।।

বুরধি দাড়ে

সীতেন মাণ্ডি

 

নিরণ সিতুং জারাল জারাল
  দাঃ তেতাং জ্বালা
    হেঁদে কৗহু কাঃ কাঃ
দায়া গেচয় রাগা।

 

হাঁডে উডৗও নাডে উডৗও
  দাঃ দয়ে পাঁজায়
দাঃ এ ঞাম রেসে আয়াঃ
তেতাং তায়ে মেটাও।

 
উডৗও মাত বাং সানায়ে
তেতাং জ্বালায় উডৗঃ
আশ কায়তে ঞেল ঞামানা
মিৎটান হাসা টুকুচ্ দড়ম মেনাঃ।

 
তেতাং মেটাও আপ্ এনায়
টুকুচ্ খাংকা চেতান
আডি কৗটিচ্ দাঃ দ মেনাঃ
টুকুচ্ লাতার বায় লাফাও আনা।

 
চিকৗ কাতে তেতাং এ মেটাও
কয়ঃ কয়ঃ গুনি ভৗবিঃ কানা
টুকুচ্ রেনাঃ সুর করে ঞেলায়
হুডিং হুডিঞধিরি আয়মা মেনাঃ গিডি।

 
ঠণ্ঠাতে গের কাতে মিৎ মিৎ তে
টুকুচ্ রেনাঃ দাঃ তালারে গিডি।

 
বৗই বৗইতে দাঃ মা রাকাপ এন
টুকুচ্ খাংকা সামাং
বুরধি দাড়ে জোর তে কৗহু
মেটাও কেদায় দাঃ তেতাং।

 

=O=O=O=OO=O=O=O=

৯।।

মুচ্ 

নিকোলাস মারাণ্ডি 

 

অড়াঃরে দাকাঞ জম 
     হিজুঃ আকো মুচ্ , 
জজম লৗগিৎ  খিলডুঃ আকো
      ইঞ তুলুচ্ ।

 
হিরিচ্ পৗসির অৗয়ঠৗ 
     দাকা সিকড়ি , 
লৗইন কাতে হিজুঃ আকো 
     মিৎ মিৎ তে হিরি  । 

 
ধেদরা ধেদরি ইদিয়াকো 
     বাসারেকো বায় , 
জিরৗউঃ অকতে জতকো 
    ওডোক্ বলঃকো চাখায় । 

 

=O=O=O মুচৗৎ O=O=O=