মৗতি মৗই আঃ ঘারঞ্জ বনদল

 (হুডিঞ কৗহ্‌নি)

মৗতি মৗই আঃ ঘারঞ্জ বনদল

   বাবলু সরেন

বিচৗর ক দুড়ুপ আকানা৷ আতো মৗজহি, পাড়া-পুড়সি সাঁওতে মঁড়ে মাপাজি ক ৷ বিরাম হঁ অনা বিচৗর আখড়া রে সেলেদ মেনায়া ৷ এনখান, অকয়াঃ বিচৗর হুয়ুঃ আ ? চেদ বিচৗর হুয়ুঃ আ ? অনা দ বায় বাডায় আন তাঁহে কানা ৷ আজ দ অঁডে গে মেনায়া যাঁহা দ আজ রেন কলেজ জটাও গাতে কুড়ি মৗতি মৗই তাকওয়াঃ আতোরে ৷ মেনদ, বাড়েডি হানাসা জজডি আতোরে ৷ মাপাজি কওয়াঃ গালমারাও তালা তেগে বাডায় ঞাম কেদা বাংমা মৗতি মৗই দ সাকামে অড়েজ লাগাদ ৷ নআ কাথা আঁজম তরগে বিরাম দয় হাহাড়া উতৗর এনায় ৷

 

মনেরে কুকলি সেটের আদেয়া চেদাঃ ? চেদ লৗগিদ সাকামে অড়েজ লাগাদ ? উনি মাত নংকা দ বায় তাঁহে কানা ৷ আচার, বেওহার কতে হঁ নাপায়ে আয় উমৗন লেদে তাঁহেনা ৷ চেদাঃ বাংমা দিনগে কলেজ হিজুঃ সেনঃ বাস গৗডিরে ঞাপাম রপড় তৗকিন ৷ অনা বেগর বিরাম দ সাঁওহেৎ দরদিয়ৗ হঁ কানায় ৷ অনা লেকাতে মৗতি মৗই হঁ সাঁওহেৎ রেনাঃ আতাসে তারসে আদে তাঁহেনা ৷ এনখান, নআ দ বায় গুনি ভৗবি কাওনা জে উনিয়াঃ মনেরে উনৗঃ পাপ মেনাঃ তায়া মেনতে ৷

 

নতে আতো রেন আয়ো হড়ক নংকা ক রড়ে কান দ উনৗঃ এম পাড়হাও এনা, নআ গেম চেদ আনা ৷ সৗরি গেত, কাথা কান গেয়া ৷ মাতি মৗই দ কলেজ অলঃ কুড়ি কানায় ৷ বেস, বৗড়িজ বুঝৗও রেনাঃ আকিল দয় আরজাও আন তাঁহে কানা ৷ ইখৗন, তেহেঞ জাহায় কৗমি কেদা অনা দ বাং ঠিক গিঞ মনেয়া ৷ চেদাঃ সে বক বয়হা কাথা বায় উইহৗর লেদা আর বায় দিশৗ লেদ আতো টলা রেন গাতে কুড়ি কওয়াঃ কাথা ৷ আজ কার মতন গেয় কৗমি কেদা ৷ অকা হঁ বায় উইহৗর ভাবনা লেনা ৷

 

           

 মৗতি মৗই আঃ বাপলা দ হুয় লেন তায়া খড়কাটা আতো রেন জগন মৗজহি হপন দৗসু সালাঃ ৷ দৗসু দ মুরুক কড়া ৷ চেদ হঁ বায় বুজৗ ৷ জমায়, ঞুয়া আরে সাঁডাং কঃ আ ৷ হানহার তেদ দ আডিয় রগড় গেয়া ৷ হানা নাওয়া গেয় এগে রেয়া ৷ অনা মন দুকতে মিৎ দিন নাহাঃ মৗতি মৗই দ আডি হিজুঃ সানা লেদেয়া আপা বারে অড়াঃ তে ৷ জাঁওয়ায় কড়া বায় অৗগু লেদেরে ঞিদৗ বার বাজাঃ অকত জহঃ এ দৗড় লেদা ৷ বাংদ আয়ো উইহৗর তে বাংদ অকয় সালাঃ তে ৷ এন রেহঁ দৗসু অনা কৗই বাং মনে কাতে দহ রুওয়ৗড় লেদেয়া ৷ আকিন তালারে এপেড় হেড়েজ দ তাঁহেয়েন গেয়া ৷ নংকা কাতে আয়মা দিন পলম এনা ৷

 

নাহাঃ আষাড় বঁগা আম্বাবুতি রেকিন হেজ লেনা ৷ কান্ঠাড়, খৗজৗড়ি জম ৷ এনখান, বাং হুয় লেন নাপায় সুকতে জম ৷ জাঁওয়ায় কড়া দ চা ঞু ঞুতুম তেয় দৗড় কেদা ৷ মৗতি হঁ আদ বায় চালাও লেনা সে বায় পানতে লেদেয়া ৷ আপা বারে অড়াঃ রেগেয় তাঁহেয়েনা ৷ নংকা লেকাতে কিছু দিন তায়ম মিৎ দরবার ক দহ কেদা ৷ অনা দরবার রে মৗতি মৗই বাংদ হড় সিকৗও কাথাতে, বাংদ মারে দুলৗড় তায়াঃ কাথা লেকাতে বাপলা পুন, মঁড়ে চাঁদো ভিতির রেগে সাকাম অড়েজ রেনাঃ আরজিয় দহ কেদা ৷ কাথা দ নআগে বাংমা জাওয়ায় অড়াঃ রে আডি ক নাহাচারে কান তাঁহেন ৷ মেনদ, গৗডি মটর ক খঁজ কান তাঁহেনা ৷ নআ কগে বাডায় আকান ৷ আরহঁ বাংমা দৗসু দ মুরুক কড়া হতেতে মৗতি দ উনি ঠেন তাঁহেন বাং সানায়ে কানা সে সংসার বাং সানায়ে কানা ৷ তবে চেৎ মারে দুলৗড় রবিনাঃ কাথা তেয় এনেচ কানা ? আঁজেদ আকান কুঞ তিনৗঃ এম ঝালাও আ, উনৗঃ গে ঝারনাঃ আ ৷ দুলৗড় তিনৗঃ মারেঃ আ, উনৗ গে সিবিলা ৷ বাপলা আকান বাহুড়িয়ৗ হয় দৗড় উতৗরা ৷

 

ঠিক অনকা গে মৗতি মৗই আঃ হঁ দশা হুয় আকানা ৷ রবিনাঃ উইহৗর ভাবনা দ উনি সালাঃ সংসার দ বাং বরং উনি হালে ডালে কায় রেনাঃ ৷ অজে দ আম সাকাম অড়েজ মে ইঞিঞ ইদি মেয়া ৷ মেনখান, মৗতি দ অনা বায় বুঝৗও আনা জে ইঞ দুঞ ছুওয়ৗত আকানা মেনতে ৷ অকয় আদয় ইদিঞা ৷ পালেন উনি হঁ বাং ৷ আজ দ আচ্ছা রৗস্কৗ তেয় উনুম আকানা ৷ ইদিঞ আয় মেনতে ৷ অনা লেকাতে যাঁহায় কৗমিয়েদা ঠিকে কৗমিয়েদা সে বাং অনা উইহৗর রেগে বৗনুঃ আন তায়া ৷

 

বিচৗর রে দুড়ুপ আকান হড়ক আচকা গে হৗউ রৗউ ক গোল গদ কেদা ৷ বিরাম হয় চমকাও গদ এনা ! চেদ চেকায়েনা ? নতে পুলিশ হক হেজ আকানা ৷ সানামাঃ ঠিক গেয়া ঞেল কাতে ওনকো দক রুওয়ৗড় চালাও এনা ৷ খানগে উনকু দরবার রে দুড়ুপ আকান আতো মৗজহি, পাড়া-পুড়সি সাঁওতে মঁড়ে মাপাজি ক মৗতি মৗই ঠেন খন দশ হাজার ফুরৗন টাকা ক হাতাও কেদা ৷ ইনৗ তায়ম সানাম কৗমি ক ছিডৗও পুরৗও কেদা ৷