বৗইসি লেকাতে "আতো বাড় সে দিশম বাড় দ শুধরৗও রেনাঃ মিৎ হরা" অৗগিল হাপড়াম কোওয়াঃ সাঁওতা অৗরি লেকাতে নংকান বাড় রেনাঃ লৗগতি মেনাঃ আ সে লৗগতি বৗনুঃ আ-

 

অল তালাতে কাথা রাপাচাঃ-

সাতাম-  বৗইসি লেকাতে  "আতো বাড় সে দিশম বাড় দ শুধরৗও রেনাঃ মিৎ হরা"  অৗগিল হাপড়াম কোওয়াঃ সাঁওতা অৗরি লেকাতে নংকান বাড় রেনাঃ লৗগতি মেনাঃ আ সে লৗগতি বৗনুঃ আ-

পাহটা- লৗগতি মেনাঃ আ

সমরলাল  টুডু

 

আয়ো বাবা   আর  গিদরৗ পিদরৗ নুকুওয়া তেগে  মিৎটাং সংসার সে ঘারঁঞ্জ বেনাও রাকাব আকানা । নংকানাঃ কয়েকটি সে আডি গটাং ঘারঁঞ্জ নিয়ৗ মিৎটাং আতু আর নংকানাঃ আডি জৗসতি আতু-টোলা নিয়ৗ সাঁওতা সে সমাজ ডিগ্ ডিগ্ তিঁগু কেটেজ মেনাঃআ। সানতাড় সাঁওতারেন হাপড়াম  কোওয়াঃ বহঃ হাতাং তাংহাঁডি খনহঁ  আডি লাসের্ তাঁহে কানতে হানে আডি সেদায় সাসাং বেডারেবন তাঁহেকান খনগে জৗনিজ আবোওয়াঃ ঘারঞ্জ আবোওয়াঃ সাঁওতা নায়তে নাপায়তে নৗই দাঃ লেকা লেগেম লেগেম লিঁগিঁনঃমা খৗতির অৗরি চৗলিদক তেয়ার হটোওয়াকাৎবনা।  অনা অৗরি চৗলিক  মানাও বাতাও কাতেগে আব খেরোওয়ালকদ হানে উন সেদায়খন  আব চেতান আবোওয়াঃ ধরম,  অৗরি চৗলি, ভাষা, হাসা চেতান বিদেশিক যে লেকা- পাঠান, হুন, শক, মোঘল, ইংরেজ কোওয়াঃ রডচ্ কচলন্ কাতেরেহঁ ধিরি লেকা ঠুন ঠুন কেটেজ্ মেনাঃ বনা বাংক আৎ চাবা দাড়েয়াকাৎবনা । জানাম খন গুজুঃ ধৗবিজ্ আডি গটাং বিঞ্জান ভিত্তিক  অৗরি চৗলি আবোওয়াঃ সমাজরে চল্ মেনাঃআ যাঁহাকদ এটাঃহড়াঃ লাদে  অৗরি চৗলিদ বাং খারশালাঃ জিউয়ী ভিতরিখন মানাও বাতাও লেকানাঃগে কানা ।

     ঘারঞ্জরেন মুড়হুৎদ আয়ো বাবা, সংসার সে ঘারঁঞ্জ রেনাঃ আঁগিভারদ নুকিন চেতান লাদে মেনাঃআ । আকিনাঃ ঘারঁঞ্জ রৗস্কৗ চেকাতেয় পাস্কা ঞামা, চেকালেকারে নায়তে নাপায়তেক তাঁহেনা অনা ঞেলরেন হড়গে আয়ো-বাবাদ । অড়াঃরেন বারয়া গিদৗরদ আয়ো বাবাওয়াঃ কাথালেকাতে পাড়হাঃকিন দুড়ুব আকানা মেনখান আর মিৎটাংদ আয়ো বাবাওয়াঃ কাথায় লহে বঠেয়াঃ কানতে বাবাদ দাল দালতে অড়াঃখনে বাহের কাদেয়া আরে মেতাদেয়া-“ ইঞাঃ অড়াঃখন বাহেরঃমে, আমদ জমাঃহঁ বাম ঞামা ।

“ আদ বাপধনক গজে লেকা দাল দালতেদয় বাহের্ কাদেয়া আর জমাঃ ঞুঁওয়াঃহঁ বাংক এমায়া সে চেতা ? বাং বতর হচয়েলেকা যাতে আয়ো বাবাওয়াঃ কাথায় আঁজম আর অলঃ পাড়হাও সেঁড়া কাতে হড় লেকান হড়ে তেয়ার লেনখান ঘাঁরঞ্জ রেনাঃ ভৗলৗই, হাপেন দিন্ আচ্ হঁ নায়তে নাপায়তে জিয়নে খাঁডাও দাড়েয়াঃমা খৗতির দাল তলদ । আরহঁ ঞেঁলঃআ আতু অড়াঃরেনাঃ  অৗরি লেকাতে মিৎটাং ঘারঁঞ্জরেন গিদরৗ এটাঃ ঘারঁঞ্জরেনাঃ যাঁহানাএ কোঁবড়ো সে যাঁহানাঃএ দায়নাস্ লেখান্ গিদরৗদ বাক সাবেয়া অড়াঃরেন্ গৗলিমক সাবেয়া আর কাঁচ্ ডাঁডম সে ডাঁড় ফুরৗন হঁক হাতাও গেয়া, আতু হড় পৗউরৗ হাঁডি ঞুঁ লৗগিৎতেদ বাং উনি গিদরৗ অনকান ডাহারখন সাহা কাতে ভাগে ডাহারতে চাচো কেটেজ কাতে  হাপেন আপনার সংসার নাপায় লেনখান আতু সে সাঁওতা হঁ বাড়ে উৎনৗও ডাহারতে চাচো কেটেজ্ কাতে সেরমা চাঁদয় জটেদ দাড়েয়ায়া মেনতে ।

    

 হাপড়ামকক মেন আকাদা ' হড়খানগে পেড়া ' হড় মানেদ সানতাড় আর যাঁহায় কোওয়াঃ মানবিকতা সে মনুষ্যত্ববোধ মেনাঃআ উনকুগে  হড় । হানে সেদায় খন  নিত্ ইনটারনেট যুগরেহঁ অনা গুন হেনাঃখান আব সানতাড় কঠেনগে মেনাঃআ মেনতে ইঞাঃ পৗতয়ৗও।  আয়ো  বাবা  গিদৗর  পিদৗরক  নিয়ৗ  যেলেকা  মিৎটাং  ঘারঞ্জ  অনকাগে  আতুরে  যাঁহাতিনাঃ  ঘারঞ্জরেন  হড়  মেনাঃ কোওয়া  সানামক  নিয়েগে   মাঝারি  সে  মাঝি  ঘারঁঞ্জ  আর  দিশোম  তল্লাটরে  যাঁহাতিনাঃ  আতুরেন  হড়  মেনাঃ  কোওয়া  উনকু  সানামকোওয়াতে  মিৎ মারাং ঘারঁঞ্জ সে  সাঁওতাদ  তেয়ারাকান  তাবনা ।  নোওয়া  লাপ লাপা  সাঁওতারেন  সানাম  কগে  আব বয়হা বুহিন  অনা লেকাতে '  হড়  খানগে  পেড়াদ ।‘ সমাজরেন  গৗলিমদ  আচরেন্  হপনক  নাপায়  হরতে  চাচোক  লৗগিৎ্   অৗরি লেকাতেয়  শাসন  কোওয়া  ভিতৗর  অড়াঃরে  আসনক  ঞাঁমমা  মেনতে,  নিশড়ৗও  চাডরাক  লৗগিৎতেদ  বাং  ।  অনা লেকাতে  আতু বাড় সে দিশম  বাড়দ  শুধরৗও  রেনাঃ  আডি যথাৎ  মিৎ্  সাঁওতা  অৗরিগে  কানা  । 

1 পুঁথিগত  শিক্ষা ব্যবস্থারেদ  যাঁহা  তিনাঃ  বই  মুখস্থ  কাতেম  পাসা  উনাঃ মারাংগে  পুন্ডিতেম  হুয়ুঃআ । আবোওয়াঃ  সাঁওতাহঁ  নেবেতারদ  অলঃ  পাড়হাওতে  আডি গানবন  লাহা  আকানা,  ব্ই  মুখস্থ  কাতে  লৗটু  লৗটু  পুন্ডিতবন  তেয়ারাকানা,  যাঁহা  বইকরেদ  দিকু পুসি  কোওয়াঃ  সমাজ্,  ভাষা,  ধরম  করেনাঃ  কাথাগে  অল  মেনাঃআ  আবোওয়াঃ  লায়  লাকচার,  ধরম্  করমদ  তেরমক  চপজ্  শিঠৗ  আকাদ  লেকা  অনা  বইকদ  শিঠৗ মেরাগে  । 

আবরেন  মিৎ বার  অনকান  পুন্ডিতকদবন  মেমেন  কানা -  ‘সসনঃ  যুগ  সাঁও  তাল  মিলৗওকাতে  তাড়াম  লাগাঃখান  সাঁওতারেনাঃ   অৗরি চৗলি  ধরম  করম  লায়  লাকচার  আরু ফেরাও  হুয়ুঃআ  ।‘   উনকুক  মেনেদা  -  “   বিচৗর  আচার  , ডাঁড়  ফুরৗন  সে  ডাঁডমদ  বৗগি  হুয়ুঃআ ,  অনাকদ  সেদায়রেন  অসভ্য  মুখ্যু  হড়  কোওয়াঃ   অৗরিচৗলি,-   আবদ  সুট্  বুট্  হরঃ  সভ্য  মৗনমি   আবদ  অনাক বৗগিকাতে  কোট  কাছারিরে  বিচৗর  আচার  হড় ।”  আদ  বাপধন  দিশমরেন  হড়  মাসে  লৗই  তাবনপে  মাঝি  অৗরি  বিচৗর  আচার করেদ  সানাম হড়াঃ  কাথা  আঁজম কাতে  যাঁহায়দ  সৗরিনিজ্  দুষি  উনিদ  চেতাওনায়  ঞামলেকা  যাউডিচ্  মিৎধাও  ডাঁডম  হাতাও কাতে বন  সুধরাওয়ে  কানা  মেনখান  কোট কাছারিরেদ  বছর বছর  হিজুঃ  সেনঃ  আডিধাও  ডাঁডম  এমঃ  হুয়ুঃআ  দুষি  রেহঁ  আর  বেগর  দুষিরেহঁ,  মা আদ  আরুঃমে ।  অনাতে  ইঞাঃ  উইহৗর  আগিল হাপড়ামক  যাঁহাক  সাঁওতা  অৗরি  সামাং  থৗরিরেক  গৗরি  সুর  আকাওয়াৎবন  অনাদ  আলবন  ঢাকা  সাহায়মা  অনাকরেনাঃদ  সাঁওতা  লেগেম  লেগেম  উৎনৗওরে  আডি  লৗগতি  মেনাঃআ ।    

-জোহার