হুদুড় দূর্গা দ চেৎ সৗরিগে সানতাড় রেন কানায় ?

 

মিৎ ঘৗড়িচ্‌ রেনাঃ বাঁখেড়

সাতাম- হুদুড় দূর্গা দ চেৎ সৗরিগে সানতাড় রেন কানায় ?

হুদুড় দূর্গাদ আবোরেন রাজা দয় বাং কানা

সমরলাল   টুডু

 

 

 “ হিহিড়ি পিপিড়িরেবন জানামনেন,
           খোজ কামানরেবন খোজলেন,
              হারাতারেবন হারালেনা,
          সাসাং  বেডারেবন জৗত এনাহো ।”

 

নোওয়া সেরেঞ খন বাডায়ঃ কানা পিলচু হপন গাঁড়া আব, আবোওয়াঃ জানামদ পুরুব নাখা হিহিড়ি পিপিড়িরে মেনখান আবোদ আবোওয়াঃ জানাম ভিটৗ বৗগি কাতে খোজ কামান রেবন উচৗড়লেনা ।  হড় কোরেন মারে হাপড়ামকো রেয়াঃ কাথা খন বাডায়ঃআ  বাংমা খোজকামান রেদ আব খেরোওয়ালকদ আডিগেবন সাঁগেয়েনতে আডিবন বৗড়িজ এনা, কাডা বিতকিল লেকাবন বেওহার লেৎতে ঠৗকুর জিউদ মিৎটাং সনত জুরি হারাতা বুরু দাঁধেররে উকু হচ কাতে  এয়ায় সিঞ এয়ায় ঞিঁদৗ সেঁগেলদাঃ জৗড়ি কাতেয় মারাও চাবালেৎ কোওয়া ।  দাঃ  অৗসুড় কাতে উনকিন সনত জুরিদ হারাতা বুরু ফেডরেকিন অড়াঃ দুওয়ৗর কেৎতে মৗনমিবন সাঁগেয়েনা ।   অঁডেখন সাসাংবেডারে উচৗড় কাতে আডি দিনবন তাঁহেয়েনখান উনকিন হাড়াম বুড়িদ এয়ায় গটা্ং আদ পৗরিশ সাঁও আরহঁ মড়ে গটাং  পৗরিশ মেনদ গেলবার্ গটাং পৗরিশ তেকিন পৗরিশ কেৎবনা । 

এলান মেলান হৗড়য়ৗর  বিরবুরুতে পেরেজ  ধৗরতিরে যাঁহামান তাঁহা দাঁড়ান সে তাঁহেরেনাঃ যাঁহান বাধাগে বাং তাঁহেকানতে পালেন  জৗরপি দিশোমতেক বললেনা অঁডেখন  সিঁঞ দুওয়ৗর বৗই দুওয়ৗরতে পারমকাতে  আয়রে দিশোম অঁডেখন কাঁয়ডে দিশোম আর কাঁয়ডে দিশোমখন চায় দিশোমহেজ্ কাতে আডি দিন রৗস্কৗ রমজতেক তাঁহে কানা।  চায় দিশোম রেহঁ বাংক টারহাও দাড়েয়াৎতে এয়ায় নৗই চাম্পাতেক হেচ্ লেনা। চাম্পা দিশোমরে চাষ আবাদরেয়াঃ ভৗলি আওতান  ঞাঁমকাতে আডি রৗস্কৗ  সালাঃ আডিদিনক তাঁহেয়েনখান দালান কঠা তেয়ার কাতে আডি গটাং লিখন  গড়হন গাড়দক বেরেদ আন তাঁহেকানা  হড়ম দাড়েতে গাডা মুডু মাঃসতেল কাতে নানাহুনৗর দুরিব  আরজাওক এতহব্ কেৎখান ককর মেৎ বিদেশী আর্য্য কোওয়াঃ মেৎদ ঢাং লেন তাকোওয়া চাম্পাদিশোমরে।  ছল্ চাতুরি দিকু চেকাতে নুকু সানতাড়ক ভুলৗও কাতে আকোওয়াঃ দিশোম চাম্পাক হাতাও সে দখল দাড়েয়াঃ নংকা কুরুমুটুক এহবলেদা আর আবকমুদরে বিভেদক সিরজৗও দাড়েয়াৎতেগে পালে আব আবহঁ লৗড়হৗই কৗইজা কৗফৗরিদ হুয়লেন তাঁহেয়া। 

উন অক্ত আবোওয়াঃ মনে জিউয়ী আডি নিরড় আডি সতয়া তাঁহেকানতে আবরেন বঁগাবুরুক আব সাঁওক ঞেপেল রপড় কান তাঁহেয়া।  ইতিহাসে মেমেন কানা  আবদ সেদায় খনগে স্বাধিনচেতা মৗনমি কানাব  অকয়াঃ গবলরেহঁ তাঁহেন হড়দ বাংকানাব।  চাম্পা দিশোমরে আডিগান সসনঃ গাড় তেয়ার কাতে আডিদিন গিরৗবৗসি কাতেবন তাঁহেলেনরেহঁ রাজতন্ত্র সে যাঁহায় রাজাওয়াঃ অধিনরেদ পালে বাংগেবন তাঁহেকানা।  আবোওয়াঃ  সাঁওতা  অৗরি  মাঝি  অৗরিলেকাতেগে  জৗনিচ্‌  অনাক  গাড়দ  হাড় বাড় সসনঃ  ডাহারতে  , পৗউড়িয়  লাহায়েৎ তাঁহেকান অক্তগে উনকু আর্য্যক সাঁও আবোওয়াঃ লৗড়হৗইদ  এহব্  লেনা ।  সরকার  নিতঃ যাঁহা  সম অধিকারে  লৗলৗই কানা  আবদ  আডি  সেদায়  খনগে  কড়া কুড়ি  সমান গেয়াবন  অনাদ  কৗমি  তালাতেগে  ফোটেলঃ  কানা ।  অনাতে  আর্য্যক  সাঁও  লৗড়হৗইরে  তিরলৗকরেন  আয়ুরতেনকিনদ  আয়নম  আর  কাজল  অনকাগে  কড়াকরেন দ  দেবী  আর  দূর্গা ।  বঁগাবুরু  কোওয়াঃ  দাড়েতে  আয়নম  কাজল  সার কিন  আড়াগরে  সারতে   ধৗরতিপুরি  ঞুঁত  উতৗরঃআ  উনখানগে  দেবী  দূর্গাওয়াঃ  তেরাং  সার  সেরমারে  তৗকিজ্  কাতে   হুডুর  বিজলি  লেকা  জোলরাকাবঃআ  আর  আকরেন  বৗইরিকক   হেলেজ্  ছিঞ  ছৗতুর  কোওয়া।  বৗইরিদক বুঝৗও তেয়োঃকেদা  তিরলৗক লৗড়হৗইরেক সেলেদঃ কানতে বঁগা দাড়েতেক পাঁডু হচঃ কানা। 

কাথারেগে মেনাঃআ কুড়িঠেনগে ধরম করম সে বঁগা দাড়েদ দড়ম মেনাঃআ, সামাং লৗড়হৗইরে (সম্মুখ সমর) উনকু দিকু বাংক দাড়েলেনরে উকু উকু মিৎদিন ঝাম ঝাম জৗড়ি অক্ত আয়নম আর কাজলদ তুপুনৗই ঘাটখনক রঁদড় কেৎ কিনৗ ধরম দাড়েক নাসাওয়া মেনতে। সাঁগিঞ খন  গুতিকড়াদ নোওয়াক ঞেঁল তেবাঃলেৎতে ঞিরসেন কাতে আতুরেক লৗই কেৎখান দেবী আর দূর্গাদ  আতুরেন হড় হহ হট কাতে আঃসার কৗপি হুরলৗ হুরলৗতে হয় ভাঁরডো গুরলৗঃ লেকাকিন ঞির বাহেরেনা আয়নম কাজল দোঃ লৗগিৎতে ।

উনতেদ জাডাম জাডাম দাঃ জৗড়ি সৗরদি আকানতে নৗই গাডাহঁ পেরেজ চড়াং গৎ আকানা। আতুরেন সানামক ডডে ডপডে কাতে যখনক অডকেনা ঞেঁলাক এয়ায় নৗইগে দাঃতে মাতাল হৗতিলেকা উথৗল পাথালঃ কানা, দুক মনে তেতাং জিউয়ী দাঃ দারাম চেঁড়ে লেকা কয়ঃ কাতেরেঁহ আয়নম কাজল আর দেবী দূর্গা তাকদ বাংক ঞেঁল ঞাঁমলেৎ কতে অড়াঃ রুওয়ৗড় হেচকাতে  সানাম গাড়রেন হড়ক গালচ্ গটাকেদা বাংমা গাডা করেনাঃ দাঃ অহরাও লেনখান উনকু পাঁজাক অডকঃআ। ঞেল ঞেলতে গাডাকরেনাঃ দাঃ অহরাঃ তেগে  দাঁশায়  বঁগাহঁ  বলয়েনা  আদখান  গুরুচেলাক  সুনুম  সিঁদুর  আঁড়গ  কাতে  বৗইরি  আলক  উরুম  দাড়েয়াক  লেকা  দাঁশায়  রেনাঃ  সাজতে  সাজাও  সাপড়াও  কাতে  আয়নম  কাজল  আর  দেবী  দূর্গা  দোঃ  লৗগিৎতে   দিশোম  সাঁঘারক  বাহেরাকানা। 

দাঁশায়  সেরেঞক  তুনখি  তলাস  কাতে  ভাগেঠিক  সঃ  সেটেজ  লেখান  নংকানাঃ  কাথাগেবন  অটেজ  হচকেয়া  পালেন । নোওয়াক  অজে  তেগে  ইঞ দুঞ  মেমেন কানা-  হুদুড়  দূর্গাদ  আবরেন  রাজাদয়  বাংকানা  দিকুওয়াঃ  সাজাতেগে  আবদবন  বাজাঃ  কানা।  উনকুওয়াঃ  মেৎতেদ  নিতহঁ  আবদ  অসভ্য  বর্বর  আর  অনাগে  অনা  দূর্গাপূজারেনাঃ  চিতৗররেদ  ঝালকাও  রাকাবঃকানা । দূর্গাওয়াঃ  জাঁগা  লাতার  রম্ভাশুররেন  হপন  দেরেঞ  বহঃ  বির  শুকরিলেকা  মারাং  মারাং  ডাটাওয়াতে  মহিসাশুরদ  বল্লমতেয়  ভসা  ঝিরঝর  হচঃকানা। আর  আবদ  উনকুওয়াঃ  চল্  মেনতে  ছলতে  চালাও  কাতে  দেরেঞ  বহঃ  সটলে  ডাটা  মহিষাশুর  লেকান  মুর্তি  তেয়ার  কাতেবন  মেমেন  কানা  নুইগে  আলেরেন  হুদুড়  দূর্গা।  দিশোমরেন  বাবাতাকঠেন  ইঞাঃ  কুকলি-  আবরেন  অসুর  বয়হা  তাক  কি  ঞেঁলতেদ  উনি  মহিষাশুর লেকানাক ?  সে  আবরেন  হুদুড়  দূর্গাগে  অনকা  চেহরাদ  তাঁহেকান  তায়া  ;  দিকুহড়  উনিয়াঃ  চেহরাক  ঞেঁল  আকাদা ?  বাংগে  বাপধন  অনকানাঃ  চেহরা  বেনাওকাতে  আব  চেতান  আকোওয়াঃ  হিরখৗগেক  ফোটেল  অডক  আকাদা  ।