WIT

 (হুডিঞ মাছা কৗহ্‌নি)

WIT

মধুসূদন হাঁসদা

 

ঢের দিন মাড়াং রেনাঃ কাথা, কুঁঙ্কি আজ্ আয়ো দ আতোরেন অকয় হড় সাঁওতে চেৎ খৗতির চয় খৗপৗরি লেনা! উনরে আতো-ষোলআনা কুঁঙ্কি আজ আয়ো ঠেন ইসি হাজার টাকা ফুরৗন ক দৗবি আকাদা, সাঁওতে নোওয়া হঁ ক মেতাদেয়া যতদিন টাকা বাম এমা উমিন দিন দ ষোলআনা চেৎ কৗমি রেহঁ বাং এ গড় আমা ৷ নঁতে আজ্‌ বাবা হঁ প্যারালাইসিস রুগী। আডি দিন পারম আকান রেহঁ ষোলআনা টাকা বায় এম আকাৎ কোওয়া৷ আচকা গে কুঁঙ্কি আজ্ বাবায় গজ্ এনা, আতো ছুত এনা৷  মেনখান কুঁঙ্কি আজ্ বাবা রাপাগে লৗগিৎ আতো ষোলআনা অকয় হঁ বাং ক হেজ্ লেনা৷ আজ্ বাবা গজ্ রেনাঃ যাঁহা দুক, ষোলআনা বাং গড় রেনাঃ যাঁহা হারকেৎ বানার গে মনেরে হবর কাতে আডি এঁটকেটঁড়ে তালাতে কুঁঙ্কি আজ্ বাবায় রাপাঃ কেদেয়া ৷ গজ্ হড় রাপাঃ কাতে মা ছুত দ বাং ফেড়াও লেনা! অনাতে কুঁঙ্কি আর হঁ মাঁঝি হাড়াম ঠেন এ ঞির চালাও এনা, পে দিনরে ছুত মেটাও রেনাঃ কাথায়  লৗই আদেয়া ৷ মেনখান মাঁঝি হাড়াম এ  লৗই কেদা "আম আয়ো যতদিন ফুরৗন রেনাঃ ইসি হাজার টাকা ষোলআনা বায় এমা কোওয়া উনদিন দ আপেয়া চেৎ কৗমি রেহঁ ষোলআনা দ বায় গড় আপেয়া ৷ "কুঁঙ্কি দ দমেয় মায়াঃ-মুয়ুঃ এন রেহঁ মাঁঝি হাড়াম আঃ জাঁগারে সাব কাতেয় মেতাদেয়া- "মাঁঝি বাবা, ইঞ আয়ো আঃ ফুরৗন টাকা দ ইঞ বাবা আঃ ভান্ডান কৗমি তায়ম গিঞ এম উতৗর কাঃ আ, আপেরেন গে গিদরৗ মনে কাতে ইঞ বাবা আঃ কৗমি দ পারম কাতায় পে বাপধন৷" মাঁঝি বাবায় মেন কেদা "কুঁঙ্কি বিটি, উনৗঃ এম নেঁহরঃ কান খান তেহেঞ আয়ুব বেড়া গে ষোলআনা জাওরা কোয়াঞ উনকু ঠেন খন গে রায় আঁজম মে, ষোলআনা জাঁহা ক গটায়া অনা গে হুয়ুঃ আ৷"

 ষোলআনা ঠেন খন রায় রাকাব এনা বাংমা কুঁঙ্কি আজ্ আয়ো ফুরৗন রেনাঃ ইসি হাজার টাকা বায় এম লেখান চেৎ কৗমি গে ষোলআনা তরপ খন গড় গে বাং গানঃ আ৷

 কুঁঙ্কিয়াঃ নেঁহর মিছৗয়েন তায়া, মেৎ রেনাঃ দাঃ দরয়া সৗকিৎ এন তায়া, মনে রিকিড় কাতে আজ্ বাবা আঃ ছুত আর ভান্ডান কৗমি পেড়া ক আতেৎ গেয় পারম কেদা ৷