নাহাঃ রেন পৗঠুওয়ৗকো তিরে মোবাইল ঞাম কাতে অলঃ পাড়হাও খনকো সাহাঃ কানা

(অল তালাতে কাথা রাপাচাঃ)

সাতাম- (নাহাঃ রেন পৗঠুওয়ৗকো তিরে মোবাইল ঞাম কাতে অলঃ পাড়হাও তেকো লাহাঃ কানা, সে কো সাহাঃ কানা)

পাহটা- নাহাঃ রেন পৗঠুওয়ৗকো তিরে মোবাইল ঞাম কাতে অলঃ পাড়হাও খনকো সাহাঃ কানা

সমরলাল টুডু

" মাছ ধর্ ধর্ ব্যাঙটা ধর্ " নংকা কাতে আলে দুদুবা দুদুগ তাক হুডিং লেটকা বিদৗল আলে দক বৗউলি দহ লেৎ্লেয়। আডি কুরুমুটু কাতে রেহঁ উদুঃ কৗটুব্ হৗকুদ বাংলে সাব দাড়েয়াঃখান দুদুবা দুদুগ তাক দক লাঁদাওয়ালে কান তাঁহেকানা - ছিঃ ছিঃ রটেগেম সাব কেদেখান রাটঃ রাটঃ রটেদ জম কায়মে। আদ আলেদ লাজাও কাঁহিসতে কাবা কুবু মায়াঃ মুয়ুঃ । দাঃ আতু পারম কাতে ডাঁডাঁঞ পাঠে কেটেজঃ কান লেকা নেবেতার আনিজ্ ইঞ বুঝৗও তিয়োঃ আকাদা-- যাঁহান কৗমিরেম জিৎকৗরঃখান মেৎ লুতুর আর মনে জিউয়ী মিৎ হুয়ামা, যাঁহাদ বাংলাতেক মেতাঃ কানা 'একাগ্রতা' । মনে কেটেজ্ কাতে লিঠুর তি-কৗটুব গে যুদিম কয়ঃ দাড়েয়াঃ এন্ডে খান যাঁহা তিনাঃ চাইল্ বাজ্ দুদুবা দুদুগ কিন হুই হচোওয়ান খপ মানতে উদুঃ কাটুব হৗকুদম চাপু দাড়ে কেয়া, আর বাংখান জিন গানি ভোর বুড়্হা কৗটুব রটেগে চপজ্ জজম্ হুয়ুঃ তামা ।

নেবেতার নোওয়া ইনটারনেট্ যুগরে মোবাইল্ ফোন দ আডি লৗগতিয়ৗন দুরিবগে কানা, যুদি যথাৎ্ বেওহারেম বাডায় খান । আয়ো বাবাকোওয়াঃ দিশৗ তাহেঁন জৗরুড় কানা -হপন হপন বৗবু মৗইতাকোওয়া্ঃ তিরে বিন্ঠি, কৗপি তাড়োওয়ৗরি নংকানাঃ হাথয়ৗরদ বাংব চাল্ আকোওয়া, চেদাঃসে আববন বাডায়া নোওয়াক সাব রেয়াঃ অক্ত সে উমের দ আউরিয়ৗ তাকোওয়া। উমের আউরিতেগে যুদি নোওয়া কবন সাব হচোওয়াকোওয়া এন্ডেখান আঁপড়ে গেয় রেতাআ আর বাংখান আমগেয় হুবৗঃ কাবাকুবু মেয়া ।

আডি আশা কাতে রৗস্কৗ ছেচ্ বেচ্ সংসার জিয়ন্ কাপাট্ ঢাকা ঝিজ্ কাতে নাওয়া নাওয়া জিয়ন্ জুরি সাঁওতে সংসার্ জিয়ন্ অড়াঃ ভিতৗর্ তেঞ বল লেনা। নাহাঃ রেন এসেল উসুল চরক চেহরা অলঃ কুড়ি। জিয়ন লৗউকৗ সংসার সৗমুদ্ গাডারে খাদ্ খাদ্ পৗউড়িয় গিডিকেৎ খান গিঞ বুঝৗও তিয়োঃ কেদা সের্মা চেতান খন হয় ভাঁরডোওয়াতে হেঁদে রিমিল দ কাম সাও হিজুঃ কানা। অলঃ কুড়ি তুড়ি ঘুড়ি মোবাইলগেয় পাস্কায়া, সংসার রেনাঃ কৗমি কদ তারাল বাসাল ঢান্ ঢান্ অকা কৗমিগে বায় গান্ । মিৎ দিন উতু লৗগিৎতে বাজার খন আলু, বেঁগাড়্, বিলৗতি এমান এমান আনাজ্ সাঁওতে মটর শুঁটিঞ সয়দা তরা কেদা নাপায় ঞঃলে জমা মেন্ তে মেনখান দাকা জজম্ অক্তঞ বুঝৗও কেদা ইঞরেন চরক চেহ্ রা জুরিতিঞদ মোবাইল ফোন পাসকা পাসকাতে আয়াঃ শিখনৗৎ গে ধুইলৗ পায়লায়্ পাসকা পৗসির চাবাওয়াকাদা । বাং ছাড়াও কাতেগে গটা গটা মটরশুঁটিদ রাসে কাতে মাসেয়্ সুরৗদিঞৗয় । মোবাইল সঃ সেটেজ্ কাতে সিবিল্ সড়ম ইসিন্ বাসাং ঢাকা সাহা কাতে পেটেজ্ গেয় আপ নারাকাদা। নাহাঃ আবরেন গিদরাক হাটাঃ লেকা ঢালকা ঢালকা মোবাইল ফোন দবন চাল আক কানা নোওয়া রেনাঃ যথাৎ বেওহার আউরি বাডায় তেগে, আদ যাঁহা হুয়ুঃ রেনাঃ অনাগে হুয়ুঃ কানা। মোবাইল ঞাম কাতে কংকা লেকা অলঃরেদক লবডংকাঃ কানা। অলঃ দুড়ুব কাতে যাঁহানাঃ এটকে টঁড়েরেম ঞুঁরু লেনখান গুগুলখন আডি সহলেতেগে হরেম পাঁজা ঞাম কেয়া মেনখান নিতোঃরেন বাবু মৗই তাকোদ ফোন রেনাঃ ভাগে গুন ঢাকা সাহা কাতে এনেচ্ সেরেঞ যাঁহা অলঃ পাড়হাওরে এটকে টঁড়েয় সিরজৗও অনারেক বৗউলিয়াকানা। অনাতে ইঞাঃ উইহৗর-পৗঠুওয়ৗকদ পালে শিখনৗৎ ডাহার খনদ বৗই বৗইতে আডি সাঁগিঞক সাহাঃ কানা।