দুউয়ৗররে সরকার আর অৗদিবৗসিকো
কিস্কিন্ধ্যা মুরমু
পুছিমবাঙলা পনতরেগে 'দুউয়ৗররে সরকার ' কৗমিহরা সাব হুয় আকানা। প্রশাসনিয়ৗ মুঠু ক ঠাড়বুটৗ ঠাঁওরে ক্যাম্প তালাতে জিলৗ রেন নৗগরিয়ৗ কঠেন খন ফরম সাকাম জিমৗ হাতাও এদা। বিন পুয়সৗ গনংতে দুউয়ৗররে সেন কাতে লৗকতিয়ান কাগজ সাকাম জগাড় সামটাও কাতে জমা লেখানগে। আফিস আফিস বাং দৗড় লাঙগা কাতে নডে জিমৗ লেখানগে হুযুঃ কানা। দিকু কুঁড়বি খন এতহব কাতে নওয়া সৗগুন কৗমিহরা সার সৗগুনরে অৗদিবৗসি গাতাক রেন হড় হপন তিরলৗ অকয়গে তায়নমরে বৗনুঃ কওয়া। লাহা হেচ কাতে দাও হামেট কুরুমুটু আকাদা । সৗহিজুহি আকাৎ সুজোগ সুবিসতা কদ লৗয়মা- - লক্ষী ভান্ডার ,স্বাস্থ্য সাথী ,শিক্ষাশ্রী , স্টুডেন্ট ক্রেডিট কার্ড ,জৗতি শংসাপত্র ,কন্যাশ্রী, খাদ্য সাথী,তপসিলী বন্ধু ,রুপশ্রী ,ডিজিটাল রেশন কার্ড আর আধার লিঙ্কেজ,জয় জোহার , ১০০দিন কৗমি , কৃষক বন্ধু ,হাসা জমি রেকড সে মিউটেশন ,ঐক্যশ্রী, বিন গনংতে সমাজিয়ৗ সুরক্ষা যোজনা ,ব্যাংক পরিষেবা ,মানবিক ,আধার পরিষেবা এমান এমান।
থিরথার তাঁহেলেন হড় হপন কো নেডা মাহা সেটের তরাগে আপান আপিন লাকতিয়ানাঃ আর্জি সাকাম আতে সেলেৎ লেনা। অৗদিবৗসিয়াঃ ভাগ জুড়ু চেতানমা পৗহিল খনগে ছৗতিক দিকু কক রফায় কান তাঁহে কানা। সুজোগ লুটুচ্ এৎ তাঁহেনগে, নিৎমা দুউয়ৗর সরকার রেহঁ ঞেল ঞামেনা খবর কাগজরে। লক্ষী ভান্ডাররে অ-অৗদিবৗসি কো অৗদিবৗসি কোওয়াঃ ঞুতুমতে জৗতি শংসাপত্র দরসাউ তালাতে অৗদিবৗসি রাখা দহ জুড়ু খন এড়ে ভুড়ুচ্ রেনাঃ কাথা ঞেল ঞামেনা।
অৗডি অৗদিবৗসি সান্তাড় হড়গে নওয়া 'দুউয়াররে সরকার' সুররে সৗহিজুহিঃ কানতে সারহাও সারহাও মেমেন কানা। রেগেচ অরেচ মুরুক হড় লৗগিৎ দ নাপায় আকান গেয়া ঢেরতেৎ ।দুউয়ৗর সামাংরে সেন সুর কাতে আরজি সাকাম জিমৗ দাড়েয়াঃ কানতে।
দিনৗম দিনরে যাঁহাটাঃ বাং যাঁহাটাঃ লৗকতি মেনাঃ আকাৎ গেয়া। অনাগে দুউয়ৗররে সহর সেটের কাতে এম এদা জিমৗ সাকাম। দুউয়ৗর সরকার ঞুতুমতে যাঁহায় অ-অৗদিবৗসি দিকু কুড়বি অৗয়ুরিয়ৗ বেনাও কাঃ লৗগিৎ লোভ লালচ এম কাতে টাকা কৗউডি খজঃ কানা। অৗদিবৗসি রাখা দহ বাখরা হামেট রেনাং কুরুমুটুয়েদা ,নওয়া চিতৗর ঞেল আঁজম বুজ বাড়ায় ঞাম তায়নম অৗদিবৗসি হুয় কাতে চিকৗতে থিরেম তাঁহেনা ?
.webp)
.webp)
