আবোওয়া ডিজিটাল ডেস্ক- পারমেন ১৮ সেপ্টেম্বর, দিল্লী সাহিত্য অ্যাকাডেমি শিরপৗ কো চাল আদেয়া রূপচাঁদ হাঁসদা। লৗই লেগ্ কানা ২০২০ সালরেনাঃ সানতাড়ী সাঁওহেৎ রে দিল্লী সাহিত্য অ্যাকাডেমি শিরপৗ ঞাম লৗগিৎ এ বাছনাও লেনা।
মানতান রূপচাঁদ হাঁসদা দ আয়াঃ অনড়হেঁ পুঁথি ‘গুড় দাঃ কাসা দাঃ’ হতেচ্তে নোওয়া মৗনৗন সাহিত্য অ্যাকাডেমি শিরপৗ কো চাল আদেয়া। শিরপৗ দয় চাল আদেয়া দিল্লী সাহিত্য অ্যাকাডেমি রেন সভাপতি মানতান চন্দ্রশেখর কাম্মার। নঁতে মানতান চন্দ্রমোহন কিস্কু মহাশ্বেতা দেবীয়াঃ গামাম ‘সিধু কানুর ডাকে’ সানতাড়ীতে ‘সিধু কানু তৗকিনাঃ হহতে’ তর্জমা খৗতির সাহিত্য অ্যাকাডেমি শিরপৗকো চাল আয়া মেনতেহঁ আখড়ারে বাখেড় তরায় এনা।
রূপচাঁদ হাঁসদা আঃ জানাম আতো দ পুরুলিয়া জেলা বান্দোয়ান থানা রেয়াঃ কায়রা আতোরে। বাডায় আকানা মানতান হাঁসদা দ কৗটিচ্ খনগে সানতাড়ী সাঁওহেৎ রে দায়া-দুলৗড় আর অলবেল দয় এহব লেদা। অড়াঃরেগে ‘তেৎরে’ পাথাম রেন সাসাপড়াওয়িচ্ আর সানতাড়ী সাঁওহেৎ রেন মিৎ ঞুতুমান সাঁওহেদিয়ৗ মানতান মহাদেব হাঁসদা আঃ উদ্গৗও কৗটিচ্ খনগেয় ঞাম লেদা।
নঁতে চন্দ্রমোহন কিস্কু দ ঝাড়খন্ড পনৎ পুরুব সিংভূম জেলা ধলভূম গড় থানা রেয়াঃ বেহাড়া রে আয়াঃ জানাম আতোদ। বাডায় ঞাম আকানা বাংমা মানতান কিস্কু হঁ কৗটিচ্ খনগে অলবেল দয় এহব লেদা। নোওয়াহঁ বাডায় আকানা বাংমা স্কুল জিয়ন খনগে অলবেল সাঁও সাঁওতে তর্জমা সাঁওহেৎ রেহঁ মনে রিকিড় লেন তায়া। উনিদ সানতাড়ী সাঁওহেৎ হারা বুরুয় লৗগিৎ বাংলা হিন্দী এমান পৗরশি খন আয়মা অনড়হেঁ,কৗহনি এমান সানতাড়ীতে তর্জমা আকাদা মেনতেহঁ আবোরেন খবরিয়ৗয় বাডায় অচো আকাদেয়া।
.webp)
.webp)
