ফেক এসটি সার্টিফিকেট ইস্যুতে পছিম বর্ধমান রেন জেলা শাসনিয়ৗ মেমোরেন্ডাম কো চাল আদেয়া আদিবাসী কো

আবোওয়াঃ ডিজিটাল ডেস্ক- হলা ১০ সেপ্টেম্বর, ফেক এসটি সার্টিফিকেট ইস্যুতে ওয়েস্টবেঙ্গল সিডিউল্ড ট্রাইব ওয়েলফেয়ার অ্যাসোসিয়েশন পছিম বর্ধমান জেলা চাঁগা পাহটা খন অনা জেলারেন জেলা শাসনিয়ৗ মেমোরেন্ডাম কো চাল আদেয়া। বাডায় আকানা ফেক এসটি সার্টিফিকেট বিরুধরে অনা এলাকারেন আদিবাসী কো মিৎ লেকা লৗড়হৗই গডা রেগেকো আঁড়গ গৎ আকানা।

গটা পছিম বাংলা রেগে নাসে নাসেতে অ-আদিবাসী তেকো পেরেজঃ কানা। অনাতে সৗরিন আদিবাসী কদ মিৎ লেকা লিন জিলেৎ অচোঃ কানাকো। চেৎ ইস্কুল, কলেজ, বিশ্ববিদ্যালয় ভুরতি রে, চেৎ চৗকরি রে এমন চেৎ আদিবাসী কোরেন মাড়তে লেকান ঠাঁওরেহঁ আদিবাসী কো নিশড়ৗও অচোঃ কানা। নংকাগে চালাও ইদিলেনখান সৗরিন আদিবাসী কোগে অনাকো ঠাঁও খন কো আৎ চাবা উতৗরঃ মেনতেগে আদিবাসী মহলরেন আয়মা গৗখুড়িয়ৗ কো কো আয়-উমৗন এদা। আর নোওয়া কো টেকাও দারাম লৗগিৎ গে ঞেলঃ কানা ওয়েস্টবেঙ্গল সিডিউল্ড ট্রাইব ওয়েলফেয়ার অ্যাসোসিয়েশন পাহটা খন গটা পনৎ রেগে ডিএম, এসডিও, বিডিও এমান প্রশাসনিয়ৗকো মেমোরেন্ডাম কো চাল আকো কানা।

হলা ১০ সেপ্টেম্বর, পছিম বর্ধমান জেলা চাঁগা পাহটা খন মিৎ ডেপুটেশন তালাতে অনা জেলারেন জেলা শাসনিয়ৗ মেমোরেন্ডাম কো চাল আদেয়া। নোওয়া ডেপুটেশন রে ওয়েস্টবেঙ্গল সিডিউল্ড ট্রাইব ওয়েলফেয়ার অ্যাসোসিয়েশন রেন পনৎ সুৎরেৎ পার্শাল কিস্কু, পছিম বর্ধমান জেলা চাঁগা পাহটা খন সভাপতি মতিলাল সরেন, সেক্রেটারী পবন চন্দ্র সরেন, অ্যা-সেক্রেটারী হিরন্ময় হাঁসদা, কেশিয়ার ডমন কিস্কু আর রৗসিয়াকো মুদ্‌রে নগেন হেম্ব্রম, সানাই কিস্কু, সঙ্গীতা সরেন, রাধা মুরমু, কিশোর কোড়া আর সুকু মুরমু এমান কো সেটের তাঁহেকানা।