আবোওয়াঃ ডিজিটাল ডেস্ক- হলা ৯ সেপ্টেম্বর, সনত্ তারাস রেন প্রেসিডেন্ট বিদ্যাধর মুরমু সানাম কো বৗগিকাতে বাং রুওয়ৗড় দিশমে চালাও এনা। চালাঃ অক্তেরে আচ্রেন অড়াঃ গমকে আর বার কড়া মিৎ কুড়ি গিদৗর এ বৗগি অটোওয়াৎ কোওয়া। উমের দ হোয়লেন তায়া ৫০ বছর। বাডায় এনা রুওয়ৗ-আজার তেগে উনিয়াঃ জিউয়ি বৗতিদ আডি কম উমের রেগে যায়যুগ লেকা ইঁড়িজ্ এন তায়া। অনাতে সনত্ তারাস ক্লাব রেন রৗসিয়ৗ কো গৗহির দুখ কো সদর আকাদা।
বিদ্যাধর মুরমুওয়াঃ জানাম অড়াঃ দ তাঁহেলেনা পুরুলিয়া জেলা আড়ষা থানা রেয়াঃ কৌরাং আতোরে। পে-বয়হা আর পে-বুহিন মুদ্রে উনিদ তালায়িচ্ এ তাঁহেকানা। বাডায় আকানা গ্র্যাজুয়েশন তায়ম উনিদ নায়তে-নাপায়তেগে আচ্রেন গিদৗর-পিদৗর আতে সংসার জিয়ন-এ খাঁডাও এৎ তাঁহেকানা। নোওয়া হঁ বাডায় আকানা বাংমা কৗটিচ্ খনগে উনিয়াঃ মনেরে রেঁগেচ্-নাচার হড় লৗগিৎ অৗডি দায়া-মায়া তাঁহেকান তায়া। অনাতে সমাজ সুসৗর লৗগিৎ মিৎ টাং ক্লাব গেয় পাঁজায়েৎ তাঁহে কানায়। বাডায় আকানা উন অকতেগে উনিদ পুরুলিয়া জেলা রেনাঃ কান্টাডিরে সনত্ তারাস ক্লাব বেনাও রাকাব্ রেন থাপনিয়ৗ সহেদ্ লেকাতেয় সেলেদ্লেনা। ইনৗতায়ম খন মিৎ লেতাড় গে সনত্ তারাস ক্লাব হারা-বুরুয়রে গড়য় এম আগুওয়াকাদা আর এ কৗমি আকাদায়। বাডায় আকানা ক্লাব চেতান উনিয়াঃ যেলেকা পৗতয়ৗউ তাঁহেকান তায়া অনকাগে ক্লাবরে অসাম্ভেড় এনেম হঁ তাঁহেকান তায়া। উনিয়াঃ মিৎটাং গে যঁশ তাহেকান তায়া নোওয়া ক্লাব তালাতে এলাকারেন রেঁগেচ্-নাচার হড় সাঁওতে রেঁগেচ্-নাচার অড়াঃরেন গিদৗর-পিদৗর কো উপগৗরঃমা আর গড় কো ঞামমা।
নংকান মহতান আর দিশ-হুদিশ আন মিৎ গৗখুড়িয়ৗ রৗসিয়ৗ, আধাদিনরেয় দাঃ দড়মেন খৗতির সনত্ তারাস ক্লাব রেন রৗসিয়ৗ কো তালারে মিৎ দুক্ উমুল রেনাঃ চিতৗর ঞেল এনা। অনাতে তেহেঞ ১০ সেপ্টেম্বর, বাডায় আকানা ক্লাব রেনাঃ অৗরি লেকাতে আয়মা রৗসিয়ৗগে ক্লাব পাহটা খন উনিয়াঃ মুচৗৎ মুখৗন ঞেল লৗগিৎ উনিয়াঃ জানাম আতো কো ঞির সেটের লেনা। সেটের কাতে উনিয়াঃ ঘাঁরঞ্জ রেন হড় কো লৗগিৎ সমান দুক্ কো বাডায় অচো কেৎ কোওয়া আর মনের সানতনা কো এমাৎ কোওয়া। উনিয়াঃ বঁগা তালায়েন জিউয়ি হানাপুরীরে নায় বাড়ে, নাপায় বাড়ে তাঁহেন লৗগিৎ চট্ চাঁদো ঠেনকো নেঁহর এনা। অনা সাঁওতে ক্লাব রেন সেক্রেটারী মানতান বুদ্ধেশ্বর বাস্কে লৗই তরা কেদায় বাংমা নোওয়া ঘাঁরঞ্জ সাঁও সনত্ তারাস ক্লাব হাপেন দিনহঁ নংকাগে সোররে তাঁহেনায়।
.webp)
.webp)
