সিঁগি মাহা রেনাঃ সাকাম ‘চেরেচ্ আড়াং’ লেখা- ৫৫

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com ।   

তেহেঞা আখড়ারে যাঁহায় কো সেলেদ্‌ আকান- রিলৗমালা মুরমু, ᱥᱩᱵᱩᱫᱤᱭᱟᱹᱢᱩᱨᱢᱩ,  ᱜᱳᱯᱮᱥᱣᱚᱨ ᱢᱟ.ᱱᱰᱤ,  ᱠᱤᱥᱠᱤᱱ ᱫ ᱷ ᱟ   ᱢ ᱩᱨᱢ ᱩ, ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ,  ᱥᱨᱤᱠᱟᱱᱛᱚ ᱥᱚᱨᱮᱱ, গাতে টুওয়ৗর, কানন হাঁসদা, সাকম সরেন, বাড়তাঙ সরেন, সুচাঁদ হাঁসদা, সেঁগেল মারমার, সমর লাল টুডু, বিভূতি ভূষন সরেন, নিতাই টুডু, সীতেন মান্ডি, সম্বরি সরেন, বাবলু সরেন, দুগাই টুডু, সনাতন টুডু, দুলৗড় বিটি ।

 

রিলৗমালা মুরুমু, ক্লাস- IV
জেলা - পুরুলিয়া

১।।

ᱴᱚᱴᱠᱚ ᱱᱟᱹᱭ

      ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱴᱚᱴᱠᱚ ᱱᱟᱹᱭ
ᱮ ᱱᱟ  ᱫᱟᱹᱭ
ᱜᱤᱛᱤᱞ ᱡᱤᱸᱲᱤᱫᱽ ᱡᱤᱸᱲᱤᱫᱽ ᱾

ᱞᱤᱸᱜᱤᱱ ᱫᱟᱜ--ᱫᱚ
ᱟᱹᱛᱩᱜ  ᱠᱟᱱ--ᱫᱚ
ᱦᱚᱭᱛᱮ ᱯᱤᱸᱲᱤᱫᱽ ᱯᱤᱸᱲᱤᱫᱽ ᱾

ᱦᱟᱹᱠᱩ ᱠᱟᱴᱠᱚᱢ
ᱦᱟᱯᱮ  ᱧᱮᱞᱠᱚᱢ
ᱢᱮᱱᱟᱜ ᱠᱚᱣᱟ  ᱥᱮᱯᱮᱧ ᱾

ᱫᱟᱜᱢᱟ ᱟᱛᱳᱜ
ᱥᱳᱛᱳᱜ ᱥᱳᱯᱳᱛᱳᱜ
ᱥᱤᱧ ᱧᱤᱸᱫᱟᱹᱭ ᱥᱮᱛᱮᱧ  ᱾

ᱜᱩᱞᱟᱹᱰ ᱫᱷᱤᱨᱤ
ᱫᱟᱜ ᱮ ᱦᱤᱨᱤ
ᱨᱤᱞ ᱠᱤᱪᱤᱞ  ᱡᱤᱨᱤᱦᱤᱨᱤ ᱾

ᱴᱚᱴᱠᱚ ᱛᱩᱞᱩᱪ
ᱡᱟᱹᱵᱽᱱᱟᱹ ᱜᱟᱰᱟ
ᱢᱮᱥᱟᱜ ᱠᱟᱺᱥᱟᱹᱭ ᱠᱩᱸᱣᱟᱹᱨᱤ ᱾

========= ᱛ ==========

২।।

ᱟ'ᱡᱚᱢ ᱤᱧ

ᱜᱳᱯᱮᱥᱣᱚᱨ  ᱢᱟ.ᱱᱰᱤ

 

ᱟᱭᱳ ᱟᱯᱟᱛ ᱢᱮᱱᱟᱜ
ᱮᱠᱟᱞ ᱵᱟ.ᱧ ᱛᱮᱱᱟᱜ।

 ᱩᱱᱠᱤᱱ ᱟ.ᱪᱩ ᱟᱲᱟᱝ
ᱟ'ᱡᱚᱢ ᱤᱧ ᱢᱟᱬᱟᱝ।

 

ᱤᱧ ᱞᱟ.ᱜᱤᱫ ᱱᱟᱯᱟᱭ
ᱠᱟ.ᱢᱤ ᱛᱟ.ᱠᱤᱱ ᱪᱷᱟᱯᱟᱭ।

 

ᱥᱮᱛᱟᱜ ᱟ.ᱭᱩᱵ ᱛᱤᱠᱤᱱ
ᱩᱭᱦᱟ.ᱨ ᱢᱮᱱᱟᱜ ᱛᱟ.ᱠᱤᱱ।

 

ᱫᱩᱠᱷ ᱦᱟᱨᱠᱮᱛ ᱥᱟᱦᱟᱭ
ᱥᱩᱠᱷ ᱟ.ᱜᱩ ᱞᱟᱦᱟᱭ।
 

ᱵᱚ'ᱜᱟ ᱵᱟᱨᱟ ᱵᱟ.ᱨᱤ
ᱫᱟᱲᱮ ᱛᱟ.ᱠᱤᱱ ᱥᱟ.ᱨᱤ।

 

ᱜᱩᱱ ᱢᱟᱱᱚᱛ ᱡᱚᱦᱟᱨ
ᱮᱢᱟ ᱠᱤᱱᱟ.ᱧ ᱥᱟᱦᱟᱨ।

========= ᱛ ==========

৩।।

ᱦᱩᱰᱤᱧ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

 ᱤᱧ  ᱨᱮᱱ  ᱵᱚᱠᱚᱧ  ᱦᱩᱰᱤᱧ
 ᱠᱮᱱᱮ ᱠᱚᱛᱮᱭ  ᱨᱚᱲᱤᱧ
 ᱵᱟᱢ ᱟᱸᱡᱚᱢ ᱜᱚᱸᱝ  ᱨᱮᱫᱚ
  ᱟᱰᱤᱭ ᱩᱥᱟᱛ ᱜᱚᱫᱚ ᱾
                      
 ᱡᱟᱸᱦᱟᱢ  ᱡᱚᱢ ᱠᱷᱚᱡᱚᱜ ᱰᱷᱮᱨ
 ᱵᱟᱝ ᱮᱢᱟᱭ  ᱨᱟᱜᱟᱭ ᱯᱷᱮᱨ
 ᱠᱟᱹᱴᱤᱡ  ᱠᱮᱪᱟᱜ ᱵᱟᱭ ᱠᱩᱥᱤᱜ
 ᱞᱟᱹᱴᱩᱱᱟᱜ  ᱩᱫᱩᱜ ᱥᱩᱥᱤ ᱾

 ᱥᱮᱨᱮᱧ  ᱵᱟᱲᱟᱭ ᱨᱟᱹᱥᱠᱟᱹᱜᱮ
 ᱠᱷᱤᱞᱰᱩ  ᱮᱱᱮᱪ  ᱚᱠᱚᱛᱚᱜᱮ
 ᱦᱤᱲᱤᱧ ᱠᱟᱜ  ᱫᱟᱠᱟ  ᱡᱚᱡᱚᱢ
 ᱦᱚᱦᱚ  ᱟᱭᱟ ᱵᱟᱭ  ᱟᱸᱡᱚᱢ ᱾

ᱦᱩᱰᱤᱧ  ᱫᱮᱞᱟ  ᱦᱤᱡᱩᱜᱢᱮ
ᱜᱚᱜᱚᱭ   ᱞᱟᱹᱭ  ᱟᱸᱡᱚᱢᱚᱢᱮ
ᱵᱟᱹᱜᱤ ᱟᱢᱟᱭ ᱵᱩᱡᱷᱟᱹᱶᱢᱮ
 ᱩᱱ ᱫᱚ ᱫᱚᱱ  ᱟᱛᱮ ᱨᱟᱜ  ᱢᱮ  ᱾

========= ᱛ ==========

৪।।

ᱦᱚᱯᱚᱱ ᱵᱟᱵᱩᱣᱟᱜ ᱠᱷᱚᱡᱽ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

  

ᱵᱤᱞᱤᱫ ᱵᱟᱞᱟᱝ ᱥᱮᱨᱢᱟ ᱤᱯᱤᱞ
ᱧᱩᱛᱟᱹᱛ ᱥᱮᱨᱢᱟ ᱨᱮ ᱾
ᱪᱤᱠᱟᱹᱛᱮ ᱟᱯᱮ ᱢᱮᱱᱟᱜ ᱯᱮᱭᱟ
ᱩᱱᱟᱹᱜ ᱪᱮᱛᱟᱱᱨᱮ....?
ᱥᱤᱧ ᱢᱟᱨᱥᱟᱞ ᱚᱠᱟᱜ ᱟᱯᱮ
ᱵᱟᱯᱮ ᱧᱟᱢᱚᱜᱼᱟ ᱪᱮᱫᱟᱜ....?
ᱟᱯᱮ ᱥᱟᱶᱛᱮ ᱠᱷᱮᱸᱞᱳᱰ ᱥᱟᱱᱟᱧ
ᱯᱟᱸᱡᱟ ᱯᱤᱭᱟᱹᱧ ᱥᱮᱛᱟᱜ ᱾᱾
ᱰᱟᱦᱤ ᱨᱮᱱᱟᱜ ᱫᱷᱤᱨᱤ ᱞᱮᱠᱟ
ᱛᱮᱨᱮ ᱛᱮᱥᱮ ᱛᱟᱥᱮ ᱨᱮ ᱾
ᱦᱟᱞᱟᱝ ᱡᱟᱣᱨᱟ ᱫᱚᱦᱚ ᱯᱤᱭᱟᱹᱧ
ᱧᱟᱢ ᱯᱤᱭᱟᱹᱧ ᱚᱠᱟᱨᱮ ᱾᱾
ᱦᱤᱡᱩᱜ ᱯᱮᱥᱮ ᱥᱳᱨ ᱛᱮ
ᱥᱤᱫ ᱯᱤᱭᱟᱹᱧ ᱵᱟᱞᱮ ᱛᱤᱛᱮ ᱾
ᱜᱟᱞᱟᱝ ᱵᱟᱦᱟ ᱢᱟᱞᱟ ᱞᱮᱠᱟ
ᱥᱟᱡᱟᱣ ᱯᱤᱭᱟᱹᱧ ᱛᱷᱟᱨᱛᱮ ᱿
ᱛᱤᱥᱫᱚ ᱟᱯᱮ ᱟᱬᱜᱳᱱᱟᱯᱮ
ᱟᱞᱮ ᱚᱲᱟᱜᱛᱮ ᱦᱤᱡᱩᱜ ᱟᱯᱮ ᱾
ᱦᱟᱸᱥᱟ ᱚᱲᱟᱜ ᱠᱷᱚᱲ ᱪᱟᱞᱤᱨᱮ
ᱛᱤᱥᱚᱜ ᱟᱯᱮ ᱥᱚᱜᱮᱜ ᱟᱯᱮ ᱿
ᱚᱲᱟᱜ ᱥᱟᱛᱮ ᱫᱷᱟᱨᱮ ᱫᱷᱟᱨᱮ
ᱥᱚᱜᱮᱜ ᱯᱮᱥᱮ ᱛᱷᱟᱨᱮ ᱛᱷᱟᱨᱮ  ᱾
ᱱᱚᱣᱟ ᱠᱩᱲᱭᱟᱹ ᱟᱞᱮ ᱚᱲᱟᱜ
ᱢᱟᱨᱥᱟᱞ ᱯᱮᱥᱮ ᱜᱚᱴᱟ ᱫᱷᱟᱨᱮ ᱿
ᱤᱧ ᱟᱭᱳᱭ ᱫᱟᱠᱟ ᱟᱯᱮ
ᱯᱟᱯᱟᱜ ᱠᱩᱴᱤᱭ ᱨᱟᱥᱮ ᱟᱯᱮ ᱾
ᱚᱠᱚᱭᱴᱟᱜ ᱦᱚᱸ ᱡᱟᱥᱛᱤ ᱫᱚ ᱵᱟᱝ
ᱵᱟᱨᱟᱵᱟᱨᱤ ᱜᱮᱭ ᱦᱟᱴᱤᱧ ᱟᱯᱮ ᱿
ᱤᱧ ᱟᱭᱳ ᱫᱚ ᱫᱩᱞᱟᱹᱲ ᱠᱟᱛᱮ
ᱦᱚᱵᱚᱨ ᱠᱟᱛᱮᱭ ᱟᱡᱚ ᱟᱯᱮ ᱾
ᱤᱧ ᱞᱮᱠᱟᱜᱮ ᱡᱚᱢ ᱥᱟᱹᱛ ᱠᱟᱛᱮ
ᱵᱟᱞᱮ ᱡᱚᱦᱟᱨᱮᱭ ᱪᱚᱜ ᱟᱯᱮ ᱾᱾
ᱢᱤᱫ ᱥᱟᱶᱛᱮ ᱛᱟᱦᱮᱱᱟᱵᱚ
ᱟᱞᱮ ᱠᱩᱞᱦᱤᱨᱮ ᱠᱷᱮᱸᱞᱳᱰ ᱟᱵᱚ ᱾
ᱞᱳᱥᱳ ᱯᱳᱸᱰᱳ ᱫᱷᱩᱲᱤ ᱦᱚᱲᱢᱚ
ᱤᱧ ᱟᱭᱳ ᱜᱮᱭ ᱩᱢ ᱯᱷᱟᱨᱪᱟ ᱠᱟᱵᱚ ᱿
ᱟᱵᱚ ᱜᱮᱵᱚᱱ ᱜᱟᱛᱮᱜᱼᱟ
ᱮᱠᱟᱞ ᱵᱟᱵᱚᱱ ᱠᱟᱹᱭᱡᱟᱹᱜᱼᱟ ᱾
ᱮᱸᱰᱮ ᱠᱷᱟᱱᱜᱮ ᱤᱧ ᱟᱭᱳ ᱫᱚ
ᱟᱹᱰᱤ ᱜᱟᱱᱮ ᱨᱟᱹᱥᱠᱟᱹᱜᱼᱟ ᱾᱾

========= ᱛ ==========

৫।।

ᱢᱤᱫ ᱠᱤᱥᱟ.ᱲᱟᱜ ᱠᱟ.ᱦᱱᱤ

ᱥᱨᱤᱠᱟᱱᱛᱚ ᱥᱚᱨᱮᱱ

   ( ...ᱞᱟᱦᱟ ᱠᱷᱚᱱ ᱛᱳᱸᱜᱮ)

ᱦᱟᱨᱟ ᱠᱟᱛᱮ ᱟᱢᱲᱟ ᱫᱟᱨᱮ
        ᱡᱚᱭᱮᱱ ᱞᱟ.ᱴᱩ - ᱞᱟ.ᱴᱩ
ᱡᱟᱱᱛᱟᱲ ᱠᱚᱲᱟ ᱟ.ᱠᱷᱨᱤᱧ ᱞᱟ.ᱜᱤᱫ
        ᱫᱤᱱᱟ.ᱢ ᱟ.ᱴᱩ -ᱯᱟ.ᱴᱩ ᱾

ᱟᱢᱲᱟ ᱡᱚ ᱟ.ᱠᱷᱨᱤᱧ ᱠᱟᱛᱮ
          ᱠᱤᱥᱟ.ᱲ ᱞᱮᱱᱟᱭ ᱡᱟᱱᱛᱟᱲ
ᱦᱚᱲᱠᱚ ᱠᱩᱞᱤᱭᱮ ᱪᱤᱠᱟ.ᱢ ᱠᱤᱥᱟ.ᱲᱮᱱ
          ᱞᱟᱹᱭ. ᱟᱞᱮᱢᱮ ᱢᱟᱱᱛᱟᱨ᱾

ᱠᱤᱥᱟ.ᱲ ᱠᱷᱚᱵᱚᱨ ᱟᱸᱡᱚᱢ ᱠᱟᱛᱮ
          ᱦᱮᱡ ᱮᱱᱟᱭ ᱛᱳᱭᱳ
ᱡᱟᱱᱛᱟᱲᱮ ᱢᱮᱛᱟᱭ ' ᱮᱦᱳ ᱜᱟᱛᱮ
        ᱟᱫᱷᱟ ᱮᱢᱚᱜ ᱦᱳᱭᱳᱜ᱾ '

ᱟᱢᱟᱜ ᱚᱱᱟ ᱟᱢᱲᱟ ᱟ.ᱴᱤ
          ᱤᱧᱟ.ᱜ ᱜᱮᱛᱚ ᱛᱟᱸᱦᱮ ᱠᱟᱱ
ᱵᱟᱢ ᱮᱢᱟ.ᱧ ᱠᱷᱟᱱ ᱟᱫᱷᱟ ᱴᱟᱠᱟ
        ᱥᱚᱨᱠᱟᱨ ᱴᱷᱮᱱ ᱤᱧ ᱠᱮᱥ ᱟᱢ᱿

========= ᱛ ==========

 ৬।।

আলে বৗবু আঃ উড়বি

গাতে টুওয়ৗর

 

আলে বৗবুয় রৗগি আকান
বায় জমা দাকা
লল লল আগু আয়পে
বওয়াড় হাকো চাকা ।

 

আলে বৗবুয় অৗড়ি আকাৎ
বায় জমা উতু
হয় দাঃ হুদুড় দাঃ
কুল কুতু কুতু ।

 

আলে বৗবুয় উসৗৎ আকান
বায় ঞুয়া দাঃ
রাঃ মচা ফগড়া ডাটা
ভেরেল ভেরেল ছাঃ ।

 

আলে বৗবুয় উড়বি আকাৎ
রটে বৗহুয় খজে
অচঃপে মেন অচঃপে
পোঁড সিমে গজে।

 ========= ᱛ ==========

৭।।

কৗহু

কানন হাঁসদা

 

কৗহু কাঃ কাঃ
কাথা তামসে রাঃ?
বাংক বুঝ এদ অকয়
চেৎ খৗলিম ককয় !
ঞেলতে তরচ হেন্দে
আচুর বাড়াই হান্ডে,
কয়ঃ তাম মাঃ টেরা টেরা
ঞেলরে লালচ ,জাওরা !
লেবড়া উয়ুং আমদো
দাল বতর ,বৗনু তামদো ৷
আফির আতেম উডৗও  গদো,
চুকু কাতেৎ ,অকাম আদো !
বাকো দাড়ে এটা চেঁড়ে
বাংকো দাড়ে, আম এড়ে !
সাফা সৗফি ,কৗমি  তাম
রোগ আজার ,লাগায় দাম !
সাঁওতা দুলৗড়,খৗতির সৗরি,
আমদো আডি দরকৗরি !
গুজু বুরু ,মিদুনঃ আপে
দমেল দমেল সেটেরঃ আতে,
রাঃ হমর সদর কাতে
দুখ দিনরে ,তাঁহেন আপে !
মৗনমী দেলা বুঝ বন,
দুখ দিনরে সেটেরঃ আবন ,
দুখ দিনরে সেটেরঃ আবন  !

========= ᱛ ==========

 ৮।।

মনেরে কুকলি

সাকম সরেন

গড়মবুডহি আঃ কৗমি গেতায়
খৗলি ইঞ এগের,
সৗরি'ঞ লৗই, হাসো আডি --
জেলেক্ মুঁচ্ কো গেগের।

 

মিৎ এসাগেয় মিতৗঞ --
দো দুড়ুব্ মে পাড়হাঃ,
তাঁহেনাম মুরুখ্ গে চেতা
তাঁহেন গেয়াম টয়হাঃ?

 

পতব্ কো অটাঃ কাতে --
পাড়হাঃ অৗঞ অম্বাঃ ইকড়ুম,
মনেরে বাং তাঁহেন দিসৗ --
দুড়ুব্ দুড়ুব্ ইঞ দুদড়ুম।

 

মনেরে ইঞৗঃ কুকলি সেটেরঃ --
পাড়হাও দ অকয়ে সিরজৗউ লেৎ?
সেতাঃ সিঁগৗড় তৗঁগি কাতেহঁ --
তেলাদ বৗঞ ঞাম এৎ।

========= ᱛ ==========

৯।।

তুড়

বাড়তাঙ সরেন

 

 তুড়ুৎ তুড়ুৎ তুড় আম দ
              ডৗরমা লাফাং চট রে
দন বাড়ায়াম হান্তে নাতে
               দারে গোঁডা ফেড রে।

 

রড় তাম দ টেঁড়েঁচ  টেঁড়েঁচ 
              একাল আডি চিরগৗল
তুড়ুৎ তুড়ুৎ রড় সাঁওতে
           ফুলৗও তামাম চাড়বড় ।

 

অকয় হায়রে তেয়ার লেদা
                      চেতান দেয়া চিতৗর
সোরতে সৗরি সাজাও আকান
                    সানাম হড়মো উতৗর।

 

গোটা হড়মো লোসো পোণ্ডো
                   অজঃ এদাম তরজ
কেটেচ কলাই সুটুর সুটুর
                একাল আডিম তগজ।

 

উয়ুং চোণ্ডোঃ সেতাঃ তরা
                   তুকৗ খনেম উয়ুং
লুগুৎ তুকৗ বৗগি কাতেঃ
                     পাঁজায় সুনুম বুলুং ।

 

তিকি হোড়োম হালাং এদা
                        এরা উরু লৗগিৎ
খৗরৗই তালা তাসে হেনাঃ
                কেটেচ তৗবুজ লৗবিৎ।

 

দিনৗম হিলোঃ হিজুঃ মেসে
                       আলে রাচা তালা   
এনেচ আলাং সেরেঞ আলাং
                    রৗসকৗ রিলৗমালা।

 

========= ᱛ ==========

 ১০।।

গেল

সুচাঁদ হাঁসদা

 

মেন মে বিটি মিত ,
কানথা আড়াঃ সিত ৷
মেন মে বাবু বার ,
জৗতিয়ৗরি সাপাপ আঃ সার ৷

 

দে মেনপে পে ,
পে হড়দ আপে ৷
ইনৗ তায়ম দ পুন ,
মারাং আ অলঃ গুন ৷

 

মেন পে বাবু মড়ে ,
জাহের রেবন সড়ে ৷
ইনৗ তায়ম দ তুরুই ,
তাঁহেনাবন সুতৗম সুই ৷

 

দে মেনপে এয়ায় ,
এনেচ হঁবন সেঁড়ায় ৷
মেনপে আরহঁ ইরাল ,
জেট সিতুং দ জারাল ৷

 

ইনৗ তায়ম দ আরে ,
বাকো দেজঃ দারে ৷
মেন তাবন পে গেল ,
দেলা বলবন খেল ৷

 

========= ᱛ ==========

১১।।

দাঁসায় বঁগা

সেঁগেলমারমার

 

গাডা আড়েরে,খেত আড়েরে
হিলৗঃ দোলেঃ কৗশি গেলে
কঁগক আতিঞ গটা সিতুঙ
কয়ঃ কাঃক মেলেমেলে।

 

হেড়হেদ্‌ আক হুড়ু খেত
নালহা খাটাও হড়ক
আতেন ঞামঃ সেরেঞ দুরৗং
আতেন ঞামঃ রড়ক।

 

পুঁড় রিমিল উডৗও বাড়ায়
সেরমা চেতান চেতান
হয়হিসিদ্ হড়মরেদ
লাগাঃ এতাং এতাং।

 

নেসদ মাসেয় সাঁওয়ায় গেয়া
বাঙচ হুয়ুঃ আকাল
দিনকালম মা বায় দাঃ লেদ্
হুয় লেনাবন নাকাল।

 

হৗড়িয়ৗরগে দিশম ঞেলঃ
হৗড়িয়ৗরগে মন
হৗড়িয়ৗরতে পেরেচ আকান
মানেওয়া জীয়ন।

 

কাঁসা করতাল সাডে কানা
সাডে কানা ভূয়ৗঙ
দাঁসায় এনেচ দাঁড়ানাক
গিদরৗ হাড়াম জুওয়ৗন।

 

রৗসকৗ তেগে পেরেচ আকান
নওয়া দাঁসায় বঁগা
হাকো কাটকম ঞামঃ আক
ঞামঃ আকো গঁঘা।

 

পেড়া অড়াঃ ছাতাপাতা
হড়ক চালাঃ ঞেঞেল
আডি নাপায় হালায় হালায়
রৗসকৗ চেহেল চেপেল।

========= ᱛ ==========

 ১২।।

আলে  বাবু

সমরলাল  টুডু

 

আলে   বাবু  বানাম  রেতা
তাঁহা  রেতা  নানা  তার্ না 
তাঁহা রেতা,
হেঁ চং  বাং চং  বায়্  সের্ থা
এন্তে  রেহঁ  জানাম্  আড়াং
বাং এ  ফেরতা ।

 

আলে  বাবু  তিরয়োয়  অরং
তুরু  রুরু রু রুয়ে  আডি জরং
উসুল্  ডুংরি  ধিরি  ধাস্‌না
উসুল্  চড়াং,
জানাম্  আয়ো  পিলচু  বুঢি
জহারায়ে  মাড়াং ।

  

আলে  বাবু  তুমদাঃ এ  চেটাগ্
তিঞ  ভেতাং  তিঞ  আড়াং 
বাংএ  এটাগ্,
কঁয়ে  খনাঃ  এতম্  জাঁগাকিনে কলসায়্,
হড়্  আরি  চৗলি  জাঁগাতে  বায়্
কল্ সায়্  ।

  

আলে বাবু  টামাকে  গুডৗও
গুড্  গুড্  দিকুওয়াঃ  কুকমু গেয়  উডৗও,
জপর্  জলে  মাদাড়িয়ৗ  পিলচু 
হাড়াম্  কড়া,
সেরওয়া রেয়াঃ  সৗরি  ছাডা
এড়ে  বাংএ  রড়া।

  

আলে বাবু  রেগড়ায়  রাগড়াও
ঠাটাড়্  ঠাঃ  ঠার্‌র্   আখড়া
সাপ্‌ড়াও,
হিসিৎ  হয়তে, ঝৗন্টি  লেকা
নাচনিয়ৗক  হিলাঃ,
হপন হপন্  মৗই তাকদ  তায়ম্ রেক ঝিলাঃ ।

  

ঘন্টা  সাডে  ঠাঁয়োঃ  ঠাঁয়োঃ  ঠাং
আবোদ  আদিম্  ছৗতিকাঃ  ডিজে দ  বাং,
কারাম্  ডানটা  বাহা  সহরায়্  দং
রটে  বৗরুডাং  লেকা  বাবন্  দন্ ।

                       

========= ᱛ ==========

১৩।।

হাঁড়ু বাপলা দাঃ

বিভূতি ভূষণ সরেন

 

শান ভাদর ঝিপিক দাঃ
ঘানেয় সিতুং ঘানেয় দাঃ,
গড়ম কড়ায় কুলি কান
গড়ম বুড়হি লায়ে কান।
নংকা সিতুং-দাঃ রে
হাঁড়ু ক বাপলাঃ তে,
অনা তেক মেতাঃ আঃ
'হাঁড়ু বাপলা দাঃ।

 

ঝিপিক ঝিপিক দাঃ এ জৗড়ি
গড়ম কড়ায়াঃ মনে অৗড়ি,
দু দাঃ চালাঃমে লুগু বুরু তে
দেলা সিতুং হিজুঃমে ঘান্টা বাড়ে তে।
গড়ম বুড়হি লায়েঃ কানে
ঘানেয় দাঃ-সিতুং খানে,
হাঁড়ু বাপলা সৗগুন সড়ম
বুঝৗওমে ইঞিচ্ সাধের গড়ম।

========= ᱛ ==========

১৪।।

মৗঝি কুয়িজ্‌ হাড়াম সেতা 

নিতাই টুডু

 

মৗঝি কুয়িজ্ হাড়াম সেতা
         ঞুতুম তায়দ কৗলু,
যাহানাঃ এম মেতায় খানদ
              দমে গেয়ে  চৗলু  ।

 

সিঞ বেড়ায় জৗপিদা
    ঞিদৗ বেড়ায় এভেনঃ ,
কুমড়ু বুকড়ুক হেজ্ লেনখান
        বতর তেয়ে ছানঃ ।

 

জমাঃ ঞুয়াঃ জাঁহাতিনৗঃ এম এমায়
      জমায় খাদবাদ্ ,
একাল উনিয়াঃ বাছাও বৗনুঃ আ
           অকাহঁ বায় বাদ্  ।

কৗলু কৗলুক হহয়ায় খানদ
       দৗড় হিজুঃ আয় রৗস্কৗতে ,
জমাঃ যুদি বাংক এমায়া ,
           কুঁয় কুঁয় বাড়াঃ আয় রৗগিতে।

 
সিঞ বেড়ায় দাঁড়ানা
       বাম ঞামেয়া পাঁজাতে,
আয়ুব্ খানগে সেটেরঃ আয়
           মৗঝি অড়াগাঃ ছাটকাতে।।

========= ᱛ ==========

 ১৫।।

ভাদর বঙ্গা

সীতেন মাণ্ডি

 

কৗশি বাহা পুঁড গে অনে
ঞেলঃ কানা খেত আড়ে টাঁডি করে
খেত পেরেচ হুড়ু গৗছি
হৗড়িয়ার গে মনে কুশি।

 

হয়তে যখন হিলৗঃ অনা
তিনৗঃ লুবুই তিনৗঃ চেহরা
গটা ধৗরতি দহয় সভা
গিদরৗ লেকা চেরেচ সানা।

 

বাং জঃ বৗনুঃ রাসা
গিদরৗ মনে বাং কাশা
কৗশি বাহা গিদৗর লেকা
মেটাও আয় মনে জ্বালা।

 

ধৗরতি আয়ো সহাগ দুলৗড়
দারে নৗড়ি উলৗট কাছাড়
গ বাবা চেরেচ হারা
গিদৗর মনে কৗশি বাহা।

 

যাঁহা আড়ে টাঁডি করে
কৗশি বাহা লেগেচ লেগেচ্
সানাম কোওয়াঃ জিউয়ি রাড়েচ
অকয় অড়াঃ গিদরৗ পেরেচ।

========= ᱛ ==========

 ১৬।।

হুডিঞ হুডিঞ মুচ্ 

সম্বরী সরেন 

 

মুচ্ দ অৗডি হুডিঞ রেহঁ
মনে তায় অৗডি মারাং
অনা তেগে সারা ঘৗড়িজ
জমাঃ গেয় পাঁজা মাড়াং ৷

 

অকায় দহয়, অকায় জম
অনাগে বাং এ বুজ
ছুটৗও কঃ আয় অনাতে
উতি সুতি মুচ্ ৷

 

হড়ে হুডিঞ রেহঁ উনি
গেমের আয় অৗডি হামাল
লাঁগা অৗড়িস বাচম ঞেলে
চালাঃ আয় নামাল ঝামাল ৷

 

আব কহঁ উনি লেকা 
ছুটৗঃ আবন উতি সুতি
বাবন দহয় বেজার অৗড়িস
কৗমিয় আবন মিদ্‌ রুতি ৷

========= ᱛ ==========

১৭।।

 হপন মৗই আর হপন বাবু

বাবলু সরেন

 

অলঃ পাড়হাও ইতুন আসড়ারেদ্
একাল বাকো অজা,
হপন মৗই আর হপন বাবু
অলঃ পাড়হাও গেকিন খজা।

খেলোড রেনাঃ ডৗহিরেদ
খে্লোড আকো মেশা মেশা
খৗপৗরিয়ৗ তাপাম লৗগিৎ
একাল বাকো অজা।

========= ᱛ ==========

১৮।।

আমড়া

দুগাই টুডু

 

আতো কুলহি মুচৗৎ নাখা
       মারাং আমড়া দারে,
গিদরৗ আলে অঁডে আদ
       সেটের গদঃ দরে।

 

তিয়ৗঃ আনা চাপাদ আতে
        আয়মা গেদ এতে,
অনা উনরে ইদি কাতেদ
        জমগে বুলুং আতে।

 

রাপাঃ আতে সিপি লেখান
      সাকাম করে অনা,
সুনুম মৗরিচ্‌ মেসা রেদ
      দমে সেবেল আনা।

 

গগ অনে মেসাল আতেদ
        দৗলে উতুয় রাসে,
আদম হানে সেলেদ কাতে
        হাকো উতুয় গেসে।

 

কাটকম্‌ উতু আডি ভাগে
        জমগে বাড়া এদা,
সারেচ্‌ আমড়া তেদ ভালা
        বলে আচার কেদা।

 

অক্‌ত করে জমরে অনা
       মজগে বুজুঃ কানাঃ
সিডুপ আতে লুটি মেলদ
       চাটঃ বাড়ায় মেনা।

 ========= ᱛ ==========

 ১৯।।

 রৗস্‌কৗতে সহাগী

সনাতন টুডু

 

করোনা খৗতির বন্দ আকান
             অলঃ পাড়হাও ঝত।
রৗস্‌কৗ তেবোন এনেজ সেরঞ
             বন্দ মেনাঃ ঝত।

 

স্কুল খুলৗও অকতো রেমা
          অলঃ পাড়হাও জুর।
ব্যাগ পেরেজ পুঁথিকো ঝত
          দিনগে হোয়োঃ তুল।

 

রৗগি আড়িশ দেয়া কাতেদ
       হোয়ো তামা অল।
সেতাঃ খনাঃ আয়ুব ধৗবিজ
       অকাতে রেগে তল।

 

হিজুঃ পেসে জবা মৗলি
      কৗলি–ঝানো–মুলি।
এনেজ আবো খিলডূ আতে
      লানদা উতৗ হুলি।

 

হিঁসিদ হয় আর সেরমা জৗড়ি
        দেলা হিজুঃ বিন।
গস-তলমচ্‌ মনে জিউয়ী
       দেলা রিতৗয় বিন।

 

অলঃ পাড়হাও বন্ধ নিতঃ
     বাংকো এগের রহেদ।
মন কুশিবন এনেজ জংআ
     মনে জাহাঁয় খজেদ।

       ========= ᱛ ==========

 ২০।।

নিরন গেলে কয়

দুলৗড় বিটি

 

নিরন বঁগা সিতুং তেমা
     সিতুং জারাল জারাল,
ঘানে ঘানে দাঃদ তেতাং
     জিউয়ি আকাল সাকাল।

 

জৗপুৎ বঁগা দাঃএ জৗড়ি
    আড়ে ধৗসুড় নৗপিৎ,
রৗপুদ্‌ রৗপুদ্‌ অড়াঃ তালে
     মেৎরে বৗনুঃ জৗপিৎ।

 

রাবাং বঁগা ঠুরু ঠুরু
    রেয়াড় গেচয় হয়,
উয়ুঃ গেঁদাঃ বৗনুঃ তালে
      নিরন গেলে কয়।

       

************মুচৗৎ ************