মহাদেব হাঁসদা
তেহেঞ দ ৩ সেপ্টেম্বর, ঞুতুমান অনলিয়ৗ নাথানিয়েল মুরমু আঃ সৗগুন জানাম মাহা। ১৯২৬ সাল রেয়াঃ নোওয়া দিনরে উনিদ নিতাঃ পছিম দিনাজপুর জেলা রেয়াঃ হিলি ব্লক রে মেনাঃ নারায়নপুর মিশন রেয় জানাম লেনা। আচ্ বাবা ঞুতুম দ কর্নেলিয়াম মুরমু আর আচ্ আয়ো-আঃ ঞুতুম দ কানা নাসো সরেন। উনিয়াঃ পুরৗ ঞুতুম দ কানা- নাথানিয়েল রবিনসন মুরমু।
নারায়নপুর মিশন ইস্কুল মিশন খন এতহপ্ শিখনৗৎ হাতাও কাতে বালুরঘাট হাই ইস্কুল রেয় ভুরতি লেনা। মেনখান অনা বৗগি কাতে কোচবিহার রেয়াঃ মনীন্দ্রনারায়ন হাই ইস্কুল তেয় উচৗড় এনা আর অঁডে খনাঃ মেট্রিক ( ১৯৪৬) বিডৗউ এ পাশ কেদা। উনিদ আডি লাসের হাতাং আন পৗঠুওয়ৗয় তাঁহেকানা। মেনখান নারায়নপুর মিশনরে চেচেৎ ইচ্- আঃ কৗমিয় ঞামকেৎ খান পাড়হাঃ দয় বৗগি কেদা। অনা কাতে বার সেরমা গান তায়ম চৗকরি বৗগি কাতে উনিদ রাজনীতি রেয় সেলেৎ এনা।
পাড়হা জিয়ন খনগে নাথানিয়েল মুরমু দ দিশম রেয়াঃ ফুরগৗল লৗড়হৗই, তে-ভাগা আন্দলোন, খাদ্য আন্দোলন এমান ঞুমানাঃ লাড়াওনা রেহঁ সেলেৎ এ তাঁহেকানা। নোওয়া কো হতেতে উনিদ এয়ায় সেরমা ‘রাজবন্দী’ লেকাতে জেহল রেয় তাঁহেলেনা। আদ ১৯৬২ সালরে দিনাজপুর রেয়াঃ তপন বিধান সভা খন ভোট রে জিতৗউ এনা। অনা তায়ম ১৯৬৭, ১৯৬৯ আর ১৯৭৭ সাল রেয়াঃ ভোট রেহঁ জিতৗউ কাতেয় এম.এল.এ. লেন তাঁহেনা।
মিৎটেন এম.এল.এ. লেকাতে উনিদ আদিবাসী কোওয়াঃ লাহান্তি লৗগিৎ সরাকারাঃ আয়মা কমিটি রেন রৗসিয়ৗয় হোয়লেন তাঁহেনা। জেলেকা ইউ.এন. ধেবর কমিশন, কলকাতা বিশ্ববিদ্যালয় রেন সিনেট মেম্বার, নর্থ বেঙ্গল স্টেট ট্রান্সপোর্ট কর্পোরেশন রেন ডাইরেক্টর, সান্তালি ল্যাঙ্গুয়েজ কমিটি এমান। অনা বেগর All India Santali Lingustic Committee (Dumka), The Santali Literary and Cultural Society এমান সাঁওহেৎ গাঁওতা রেন চাচালাওয়িচ্ লেকাতেহঁয় কৗমিলেৎ তাঁহেনা।
নাথানিয়েল মুরমু দ সানতালি সাঁওহেৎ রেন মিৎ ঞুতুমান অনলিয়ৗয় তাঁহেকানা। উনিয়াঃ উছৗন আকান ঞুতুমান গামাম দ কানা- ‘অজয় গাডা ঢিপরে’ (১৯৯৪)। অনাবেগর ১) সানতালি পৗরসি রেয়াঃ তায়ম দারাম, ২) আনাড়ি হড়, ৩) কৗকি গগ, ৪) মার্থা ম্যারী, ৫) বুরসি সেঁগেল এমান পুঁথিয় অল আকাদা। অনাবেগরহঁ আরসাল (১৯৫৪), আড়াং (১৯৬০), সার সাদলে ( ১৯৬৬), জুগ সিরিজল (১৯৭১) এমান সাঁওহেৎ সাকাম রেন সাসাপড়াওয়িচ্ লেকাতেয় কৗমি আকাদা।
সানতাড়ি পৗরসি সাঁওহেৎ আর সমাজরে আয়াঃ অসাম্ভেড় এনেম হতেতে পছিম বাংলা সরকার সেচ্ খন উনিদ “ গুণীজন সংবর্ধনা”( ১৯৮৯) সারহাও শিরোপা ঞাম আকাদা। আদ আচ্কাগে ১৯৮৯ সাল রেয়াঃ ২৫ অক্টোবর উনিয়াঃ জিউয়ি বৗতি দ ইঁড়িচ্ গৎ এনা।
তেহেঞ দ, নুয় মারাং অনলিয়ৗ আঃ সৗগুন জানাম মাহারে তাঁহেয়েনা অন্তর রেয়াঃ শায় শায় মানোত জোহার।
.webp)
.webp)
