আবোওয়াঃ ডিজিটাল ডেস্ক- বিলমতে ঞাম আকান মিৎ ভিডিয়ো রিপোর্ট তালাতে বাডায় এনা বাংমা পারমেন ২৭ আগস্ট হিলোঃ রাজধানী অপেরা রেন চাঁদো টুডু ঞুতুমান মিৎ গায়নাহৗরি যায়জুগ লেকা নোওয়া ধুড়ি ধৗরতি খন বাং রুওয়ৗড় দিসমে চালাও এনা। বাডায় আকানা বাংমা মিৎ বতরান ক্যান্সার লেকান আজার তেগে, আডি কম উমেরেগে উনিদয় মাড়াং এনা।
নদীয়া, কল্যানী রেনাঃ মিৎ ঞুতুমান রাজধানী অপেরারে ফেডাৎ খনগে চাঁদোয় সেলেদ্ লেনা। চেদাঃসে বাডায় আকানা রাজধানী অপেরা বেনাও অকতে যাঁহাতিনৗ জগধলা কোকো তাঁহেকানা উনকু কো মুদ্রে উনি চাঁদোহঁ মিৎ জৗজিলমান এ তাঁহেকানা। ‘নেঁডা তাঁহেয়েনা দারায় বাহা বঁগা’, ‘মৗনমি গিদিকো জজম কানা’, ‘দুলৗড় উইহৗর তিঞমে গাতে আলম হিরমাঞা’, এ বৗবু হাপেম হাঁবুড়া তালে ঠৗবু’, ‘বায়ার কাডায় দারায় কানা’, ‘ইঞমা তালা টাঁডিরে আমমা উডৗন গৗডিরে’, ‘বিলৗত দিশম বিলৗতি সেতা’, লেকান আয়মা গটাং যাত্রারে উনিয়াঃ অভিনয় কারধৗনি যাত্রা রুসিকৗ ঞেঞেলিয়ৗকো ঞেল আকাৎ তায়া। লৗইগানঃ আ অভিনয় তালাতে ঞেঞেলিয়ৗ কো ঘানেক রাঃ অচোঃ, ঘানেক লাঁদা অচোঃ, ঘানেক রৗগি অচোঃ, ঘানেক এ রৗস্কৗ অচোঃ লেৎ কোওয়া। মেনখান আর তিসহঁ যাত্রা ষ্টেজরে চাঁদো বায় রাকাব আ মেনতেগে রাজধানী অপেরা মিৎ ভিডিয়ো তালাতে দিশমরেন সুবুদিয়ৗ যাত্রা ঞেঞেলিয়ৗ গ-বাবা, দৗই-দাদা, বয়হা-মিশরৗ সানামকোয় বাডায় অচো কেৎ কোওয়া।
বাডায় আকানা হড় হিসৗবতে চাঁদো টুডু দ দাঃ লেকান হড় এ তাঁহেকানা। উনিয়াঃ রড় লাঁদা জেলেকা হেড়েম তাঁহেকান তায়া অনকাগে তাঁহেকান তায়া আচার-বেওহার। উনি রেন জিউয়ি জুরি গাতে দয় তাঁহেকানা বেটা টুডু। বানা হড়গে গনং আন মৗন দ রাজধানী অপেরারে অ-হিসৗব কিন আলায় আকাদা।
নংকান মিৎ ঞুতুমান গায়নাহৗরি যায়জুগ লেকা আদ্ কেদে খৗতির রাজধানী অপেরারেন থাপনিয়ৗ, যাত্রা জগৎ রেন ঞুতুমান গায়নাহৗরিয়ৗ লক্ষন মুরমু আর সেরেঞ জগৎ রেন ঞুতুমান সেরেঞ বাডোহি সিংরাই সরেন গোমকে তিকিন গৗহির দুক্ কিন সদর আকাদা। সাঁওতে উনিয়াঃ হয়-হাসা-হড়ম-জিউয়ি হানাপুরীরে সুলুক নিরৗইরে তাঁহেন মা মেনতেহঁ চট চাঁদো ঠেন কিন নেঁহর আকানা। গৗহির দুক্ কো সদর আকাদা রাজধানী অপেরারেন সানাম গায়নাহৗরিয়ৗ আর গায়নাহৗরি কো, অনাবেগর ইনৗহিলোঃ চাঁদো হাঁসুরঃ রেনাঃ দুক্ উমুল তে গটা কল্যানী বীর সিধু-কানু নাগার মিৎ কাড়াং ঞুতৗৎ তে উনুম তাঁহেলেনা। অনা সাঁওতে গৗহির দুক্ কো সদর আকাদা যাত্রা ঞেঞেলিয়ৗ দিসম হড়কো। চাঁদো টুডু লেকান মিৎ গায়নাহৗরি যাত্রা জগৎ খনাঃ আধা দিনরে যায়জুগ লেকা সাহায়েনতে যাত্রা জগৎ রেনাঃ আডি মারাং খুতিয়েনা মেনতে আয়মা যাত্রা দরদিয়ৗ, খঁদরঁদিয়ৗ কহঁ গৗহির দুক্ কো সদর আকাদা মেনতেগে বাডায় আকানা।
.webp)
.webp)
