আবোওয়াঃ ডিজিটাল ডেস্কঃ- গটা পছিম বাংলারে যে, ফেক এসটি তেকো পেরেচ্ আকানা নংকান দৗবী পশ্চিমবঙ্গ আদিবাসী কল্যান সমিতি ঘানে ঘানে গে দৗবী আগুওয়াকাদায়। তেহেঞ ২৭ আগস্ট অনারেনাঃ গে মিৎ সৗবুদ্ এ উদুঃ কেদা পশ্চিমবঙ্গ আদিবাসী কল্যান সমিতি। লৗই গানঃআ অ-আদিবাসী ঠেন খন মিৎ সৗরিন আদিবাসী আয়াঃ হক আইদৗর কো ঞাম আদেয়া পশ্চিমবঙ্গ আদিবাসী কল্যান সমিতিরেন রৗসিয়ৗকো।
বাডায় আকানা হাওড়া বেলুড় মঠরে রামকৃষ্ণ মিশন শিক্ষণ মন্দির রেনাঃ ২০২১-২৩ চালাঃকান সেচেৎ সেরমারে বিএড কোর্স রেনাঃ তৗলিকারে বাংলা সাতামরে আদিবাসী কোওয়াঃ রাখা দহ জুড়ুরে মিৎ অ-আদিবাসীয়াঃ ঞুতুম তৗলিকারে সেলেদ্ লেনা। তুড়িঘুড়ি নোওয়া ইদিকাতেৎ সমিতিরেন রৗসিয়ৗকো ঠাড় গটা কেদা বাংমা নোওয়া রেনাঃ মুচৗৎ বাং ঞেল হৗবিচ্ বাংকো আড়াগা। অনাতে তেহেঞ ২৭ আগস্ট, পশ্চিমবঙ্গ আদিবাসী কল্যান সমিতি হাওড়া জেলা চাঁগা রেন রৗসিয়ৗকো নোওয়া ইদিকাতে বেলুড় মঠরেন মহারাজ সাঁও ক ঞাপাম রপড় এনা। মহারাজ নোওয়া ইদিকাতে রৗসিয়ৗ কোওয়াঃ মচা খন আডি গৗহির মনেতে কাথায় আঁজম কেদা আর সাঁও সাঁওতেগে উনি বিরুধরে কডরা বন্দেজ এ হাতাও কেদা।
বাডায় আকানা মহারাজ আঃ হুকুম তেগে অক্ত বাং হাতাও কাতেৎ মিৎ ঘৗড়িচ্ তেগে আদিবাসী তৗলিকারে তাঁহেলেন ধৃতেশ মাহাত আঃ ঞুতুম বাদ কাতে আর মিৎটাং “রিভাইজড লিস্ট” কো তেয়ার কেদা। যাঁহারে ধৃতেশ মাহাত হতেচ্তে তায়ম অচলেন মিৎ সৗরিন আদিবাসী পৗঠুওয়ৗ সিদ্ধেশ্বর টুডু অনা ঠাঁওরে দাও এ ঞাম কেদা। তায়ম দারাম নংকানা আনাটরে আরহঁ আদিবাসী কো সোররে তাঁহেনায় মেনতে মহারাজ সেটেরলেন রৗসিয়ৗকো আশ্বাস এ এমাৎ কোওয়া। মহারাজ আঃ মচা খন নংকান কাথা আঁজম কাতে আশকায়তে কুশি-রৗস্কৗ কো সদর আকাদা হাওড়া জেলা চাঁগা রেন রৗসিয়ৗকো।
পশ্চিমবঙ্গ আদিবাসী কল্যান সমিতি হাওড়া জেলা চাঁগা পাহটা খন মহারাজ মিৎ স্মারকলিপি হঁক চাল তরাও আদেয়া। সমিতি খন সেক্রেটারী মানতান ধনঞ্জয় মুরমু, অ্যা-সেক্রেটারী মানতান বৈদনাথ মুরমু আর রৗসিয়ৗকো মুদরে জিতেন চন্দ্র টুডু, মঙ্গল হাঁসদা এমান মানতান গোমকেকো মহারাজ সাঁও ঞাপাম রপড় আখড়ারেকো সেটের তাঁহেকানা।
.webp)
.webp)
