আবোওয়াঃ ডিজিটাল ডেস্ক- ৬ সেপ্টেম্বর দ সানতাড়ি সাঁওহেৎ রেন কাথা বাডোহি রূপচাঁদ হেম্ব্রম আঃ সৗগুন জানাম মাহা। নোওয়া লাসাড়হেৎতে ইনৗহিলোঃ সিঁগৗড় ওয়েবনার তালাতে উনিয়াঃ জানাম মাহা ভৗরি-ভরম আতে মানাও হোয় এনা। আখড়া দয় সৗহিজুহি লেদা ভারত জাকাত সানতাড়ি অনলিয়ৗ গাঁওতা পছিম বাংলা চাঁগা কুমুট।
গাঁওতারেন সেক্রেটারী দ্বিজপদ হাঁসদা দ অনলিয়ৗ আঃ চিতৗর রে বাহামালা এম কাতে সানাম পেড়া আর আঁজমিয়ৗ কো রৗস্কৗ সালাঃ এ আতাং দারাম কেৎ কোওয়া। অনাতায়ম ওয়েবনার দয় উঢৗউ কেদা সাহিত্য একাডেমি রেন সানতাড়ি কনভেনর মানতান মদন মোহন সরেন।
অনাতায়ম কাথা বাডোহি রূপচাঁদ হেম্ব্রম আঃ জিয়ন আর সাঁওহেৎ রে উনিয়াঃ এনেম লৗইতেয় গালমারাও কেদা ‘তেৎরে’ পাথাম রেন সাসাপড়াওয়িচ্ মানতান মহাদেব হাঁসদা। উনিয় লৗই কেদা- রূপচাঁদ হেম্ব্রম আঃ জানাম দ ১৯৪১ সাল রেয়াঃ ৬ সেপ্টেম্বর, বাঁকুড়া জেলা রেয়াঃ ইঁদপুর থানারে মেনাঃ ডুংরি গডা আতোরে। লৗই তরা গানঃ আ আকোওয়াঃ সেদায় অড়াঃ দ তাঁহেকানা খাতড়া থানারেয়াঃ বঁগা বৗইদ আতোরে। আচ্ বাবা-আঃ ঞুতুম দ শীতল হেম্ব্রম আর আচ্ আয়ো-আঃ ঞুতুম দ ভাগি হেম্ব্রম। উনিয়াঃ এতহপ্ শিখনৗৎ দ হোয়লেনা বন দেউলি প্রাথমিক বিদ্যালয় রে। অনাতায়ম ভেদুওয়াশোল হাই ইস্কুল খন ইস্কুল ফাইনাল (১৯৫৯) আর বিষ্ণুপুর রামানন্দ কলেজ খন বিএসসি (১৯৬৫) বিডৗউ এ পাশ লেদা। অনাতায়ম ভারত সরকার আঃ ইনকাম টেক্স ডিপার্টমেন্ট কৗমিরে বহাল লেনা আর ২০০১ সালরে অনা চৗকরি খন জিরৗও এ হাতাও লেদা।
মানতান রূপচাঁদ হেম্ব্রম দ সানতাড়ি সাঁওহেৎ রেন মিৎ জোলোঃ ইপিল আর কাথা বাডোহিয় তাঁহেকানা। আলেখা অনল, অনড়হেঁ, কৗহনি,গায়ান এমান উনি দয় অল আকাদা। উছৗন আকান পুঁথি কোতায়দ হোয়োঃ কানা- উরগুম (১৯৮১), উরৗলিয়ৗ (১৯৯১), ওনোরোম (১৯৯৯) আর কৗহনি বিঁডৗ (২০১২)। অনাবেগর গিদরৗ বৗউলি, শীতল হেম্ব্রম আঃ জিয়ন চরিৎ, সাঁওতালি ভাষা শিক্ষা এমান পুঁথিকো ছাপা সদর আকান তায়া।
জিয়ন রেনাঃ সুখ-দুখ, রাঃ-লাঁদা, হারখেৎ-শাসেৎ, এঁটকে-টঁড়ে আর বিশ্বায়ন রেয়াঃ অরসং উনিয়াঃ কৗহনি রে আডি মঁজগে ঝালকাও রাকাব আকানা।
‘সিলি’ সাঁওহেৎ সাকাম রেন শিরৗ সাসাপড়াওয়িচ্ মানতান কলেন্দ্রনাথ মান্ডি দ রূপচাঁদ হেম্ব্রম আঃ কৗহনি রে হড়-হপন চেতান বাজার জিয়ন রেয়াঃ অরসং চেৎ লেকা ঞেলঃ কানা, খদের খদ অনায় লৗই সদর কেদা।
অনকাগে ‘চিঠি সাকাম’ পাথাম রেন সাসাপড়াওয়িচ্ মানতান গৌউর চন্দ্র মুরমু দ রূপচাঁদ হেম্ব্রম আঃ কৗহনি রে হড় এভেন ( সমাজ সচেতনতা) কো রেয়াঃ চিতৗর অকালেকা ঝালকাও আকানা, অড়ে-অড়পাৎ অনায় তজ্বিজ্ কেদা।
মুচৗৎরে বৗইসি গোমকে টি.সি. বাস্কে দ গাঁওতা পাহটা খন সানাম কো গুন মানাও সারহাও আর জোহার এ চাল আৎ কোওয়া।
.webp)
.webp)
