আবোওয়াঃ ডিজিটাল ডেস্ক- ফেক এসটি সার্টিফিকেট অৗমরৗও আকাৎ কো বিরুধরে যথাৎ শাসেৎ বন্দেজ হোয়োঃ মা অনা লৗগিৎ বাঁকুড়া রেন আদিবাসীকো লৗগিয়া পাড়াও আকানা। পছিম বাংলারেনাঃ সানাম টঠারে ফেক এসটি সার্টিফিকেট অৗমরৗও কোওয়াঃ সুংখা দিনকে দিন বাড়হাও চালাঃ কান গেয়া। নিৎ চালাঃ কান দুওয়ৗররে সরকার প্রকল্প তালাতেহঁ আয়মা অ-আদিবাসীকো পুচুজ্ পারম দাড়েয়াঃ আ মেনতেগে আদিবাসীকো তালারে মিৎ ধাদস-বতর এ কৗমিয়েদা। চেদাঃ বাংমা এসটি সিট রে নোওয়া মাড়াং ঞেল আকানা কলেজ, বিশ্ববিদ্যালয় করেনাঃ ভুরতি তৗলিকারে আর নানাহুনৗর চৗকরি ঠাঁও করেহঁ ফেক এসটি সার্টিফিকেট অৗমরৗও আকাৎ কোওয়াঃ ঞুতুম গে সৗরিন আদিবাসী কোওয়াঃ খন ঢের ঞেল ঞামঃ কানা। অনাতে সৗরিন আদিবাসী কোদ হায়-হুতৗশ কাতেৎ কো তাঁহেন কানা। নংকান কাথাকো সামাংরে দহ কাতে ওয়েস্ট বেঙ্গল সিডিউল্ড ট্রাইব ওয়েলফেয়ার অ্যাসোসিয়েশন গটা পছিম বাংলারে আঁদোড় এ এহব আকাদা। যাতে অ-আদিবাসীকো এসটি সার্টিফিকেট অকালেকাতেহঁ আলোকো অডক দাড়েয়াঃমা। অনা লেকাতে জেলা শাসনিয়ৗ, মহুকুমা শাসনিয়ৗ, ব্লক আধিকারিক এমান সাঁও ঞাপাম-রপড় কাতে মেমোরেন্ডাম কো চাল আকো কানা।
হলা ৭ সেপ্টেম্বর, ওয়েস্ট বেঙ্গল সিডিউল্ড ট্রাইব ওয়েলফেয়ার অ্যাসোসিয়েশন বাঁকুড়া জেলা চাঁগা পাহটা খন বিষ্ণুপুর আর বাঁকুড়া মহুকুমা শাসনিয়ৗ, অনগ্রসর শ্রেণি কল্যান দপ্তর বিষ্ণুপুর, ওন্দা, বাঁকুড়া-১, বাঁকুড়া-২ ব্লক রেন বি.ডি.ও. কো মেমোরেন্ডাম কো এম চাল আৎ কোওয়া।
নোওয়া আঁদোড়রে সেটের কো তাঁহেকানা বাঁকুড়া জেলা চাঁগা পাহটা খন ভীম চন্দ্র মুরমু, গোপাল চন্দ্র মুরমু, সহ-সেক্রেটারী নিবারন কিস্কু, কেশিয়ার রাজেশ্বর মান্ডি, অ্যা-কেশিয়ার যতীন্দ্রনাথ কিস্কু অনাবেগরহঁ মহাদেব বাস্কে, মধূসুদন হাঁসদা, শ্যামলাল মান্ডি, রোহিৎ মুরমু এমানকো।
.webp)
.webp)
