আবোওয়াঃ ডিজিটাল ডেস্ক- পুরুব মিদিনপুর জিলৗ রেনাঃ তমলুক রৗস্কৗমহল আঃ সাপড়াওতে হলা ৯ আগস্ট, ডাককর্মী ভবনরে জেগেত আদিবাসী মাহা রৗস্কৗ সালাঃ মানাও এনা।
আখড়ারে সেটের কো তাঁহেকানা ডাঃ সুরেন্দ্রনাথ মান্ডি, মানতান অমূল্য রতন হাঁসদা, দেবেন্দ্রনাথ হেম্ব্রম, মানতান কান্ত সরেন, শিবরাম মুরমু এমান গোমকে কো।
আখড়ারে জেগেত আদিবাসি মাহা চেৎ আর চেদাঃ নোওয়কো ইদিকাতে গালচিয়ৗকো আকোওয়াঃ কাথা তালাতে অড়ে অড়পাত কো লৗই সদর কেদা। মেনখান উনরেন ইংরেজ লেকাগে ভারত দিসমরেন আদিবাসীকো চেতান নাহাচার, রডচ্, কচলন, নিশড়ৗও এমান আয়মা লেকান শাসেৎ নিৎহঁ ঞেলঃ কান গেয়া মেনতে গালচিয়ৗ কোওয়াঃ কাথা তালাতে রাকাব হেচ্ এনা। অনালেকাতে আখড়া খনগে রৗস্কৗ মহল দাবীয় রাকাব কেদা-
১। আদিবাসীকো দাঃ-হাসা-বিরবুরু রেনাঃ আইদৗর খন এঃড়ে বাং গানো আ, ২। অকা বাহনাতেঁহ কর্পোরেট কোওয়াঃ তিরে বিরবুরু রেনাঃ আইদৗর এম চাল বাং চালাঃ আ, ৩। অকা আবস্থাতেহঁ আদিবাসী রেঁগেচ্ হড় আকোওয়াঃ দখল জুমি খন লাগা ডিগলৗও বাং চালাঃ আ, ৪। Forest Right Act- 2006 একালতে লৗগু কাতেৎ সানাম বিরবুরুরেন আদিবাসী কোওয়াঃ দখল জুমি রেনাঃ পাট্টা এম হোয়োঃআ, ৫। Santal Porgona Tenancy Act আর Chotonagpur Tenancy Act সাঁওতে এটাঃ পনৎ রেন আদিবাসী কোওয়াঃ জুমি রুখিয়ৗ আইন শুধরৗও বাং গানঃ আ।
অনাবেগর আখড়ারে তমলুক রেন যাঁহায় আদিবাসী পৗঠুওয়ৗকো নেশ মাধ্যমিক আর উচ্চমাধ্যমিক কো পাশ কেদা মহল পাহটা খন ওনকো-কো সারাহাও কেৎ কোওয়া। অনা সাঁওতে অনড়হেঁ বাখেড়, এনেচ, সেরেঞ এমান তালাতে আখড়া আঁদোড় গে তাঁহেলেনা।