(হুডিঞ কৗহ্নি)
লাচ্মোটা ভুচুং
রোববার। তেহেঞ দ ভুচুং আঃ অফিস ছুটি। ফুটবল ডৗহিরে আডি ঘৗড়িচ তেহেঞ দয় ঞির বাড়াকেদা। উদগৗর ভাল ভালাও কাতেঃ, ফেঁ ফঁ সাঁহেৎ সাঁহেৎ তে যখন অড়াঃতেয় রুয়ৗড় এনা, উন দ ঘড়িরে এনেগে আরে টাড়াং পারম আকানা। অড়াঃরে বলো তরা আলমারি সাঁও লাগাও আরসি সামাংরেয় তিঙ্গুয়েনা। টেরা টেরাতে আরশিরে আয়াঃ মড়ে গেল উমেরানাঃ মোটা লাচ্ সেচ এ কয়ঃকেদা ভুচুং। তেহেঞ দ আয়াঃ মোটা লাচ নাশেনাঃ চপৎ আকান লেকায় ঞেল কেদা। এমনি তেগে সেতাঃরেনাঃ হিসিৎ হয়তে মনে জীউয়ী আডি রাওয়ালগেয় আয়কৗয়এৎ কান তাঁহেনা। নিতং লাচ চপৎ ঞেলতে মনেরে রৗস্কৗ ছিলকৗও এন তায়া। আয়াঃ কেওয়া জটেৎ কাতে বার জোহা হান্তে নাতে আচুর কাতেয় কয়ঃ আদা বারপে ধাও। মঁড়ে তুরুয় সেরমা উমের কম এন তায় লেকায় বুজ কেদা ভুচুং হাঁসদা। আরশি সেচ কয়ঃ কাতে মুলুচ মাছায় লান্দাকেদা। মনে মনেতেয় মেন কেদা--তাহলে খান, সেতাঃরে ঞির বাড়া রেনাঃ গুণ দ ঞামঃকান গেয়া !
আচকাগে দাকায় অড়াঃখন ভুচুং এরাৎতেৎ , মুংলী দ সিড়ৗক মাছাতেয় মেন কেদা-----যাঁহাঁ তিনৗঃগে সেতাঃ পায়াং পিয়ৗং খন ঞির বাড়ায়মে, যোগবেয়াম বাম করাও লেখান দ আমাঃ অনা মোটা লাচ বাং চপতঃ তামা ! এরাৎ তেৎ আঃ অনা কাথা আজম তরা ভুচুংআঃ মনে রেনাঃ রৗস্কৗ দ পোসাঃ বেলুন লেকা চপৎ এন তায়া। সানাম রৗস্কৗ হয় ভারডো লেকা অটাং এনতায়া। মনেরে থড়া দুকহঁয় ঞাম কেদা।
তবে মুংলীওয়াঃ কাথা সানাম দ বায় গিডি দাড়েয়াদা। মনে মনেতেয় গোটাকেদা, তেহেঞ খনগে যোগবেয়ামে এহপা। চেদাঃসে, লাচ মোটা খৗতির আয়মা ঠাঁওরে আয়মা লেকান এটকে টড়ে সামাংরেয় পাড়াও আকানা ভুচুং। অকা দ বাস গৗডিরে বায় সাহবঃ আ, অকা দকো রিডৗৎ তেয়া, অকা দ কঁহডা লেকান লাচ আতে হাট বাজার করে হড়ে ধাক্কা পৗসির কওয়া। আয়াঃ উসুল মোটা লাচ খৗতির তিনৗ আঙরপ্ রেনাঃ বোতাম যে তপাঃ আকানা, অনা দ আচ এরাৎ তেৎ মুংলীগেয় বাডায়া। অনাতে মিৎ মনেতে উনি দ দিনৌম হিলোঃ সেতাঃ তরা ফুটবল ডৗহিরেয় ঞির বাড়ায়া, চেদাঃসে, উসুল মোটা লাচ দ কম উতৗর তেগে হুয়ুঃ আ।
এরাৎতেৎ, মুংলী দ ললো চা আগুকাতেয় মেনকেদা --তেহেঞ থ রোববার, এগো দুলী আপাৎ,
জাগে খৗজৗড়ি জম বাড়া কাতেঃ হাটতে সেনঃ মে। উতূতেয়াঃ আর জাগে মেরম জিল আগুয়মে। হপন বিটি আডিয় কুশিয়াঃআ।
নয়য় চা ঞুয়মে, আডি দ আলোম বিলমা। চা সিড়ুপ সিড়ুপতে ভুচুং এ মেন কেদা--হোয়,আগুয়ৗঞ নাহাঃ।
চা ঞুঁ মুচৗৎ কাতে ভুচুং দ দলান কোঠারেয়াঃ বারান্দারেয় সেন এনা। সিঁড়িরে আড়গো রাকাপ অক্তেয় মেন কেদা -- চটরে মিনৗঞা, আধা ঘন্টা তায়ম হহোআঞ মে,
আদ নাহাঃ ইঞ সেনঃআ। চটরে সেন কাতেঃ ভুচুং দ পৗটয়ৗ আটেৎ কাতে মিৎ মনেতে বেয়ামে এহপ কেদা। চিৎতে, তাবের তে, উল্টোওতে লেওয়া কাতেঃ তিনৗ লেকানাঃ বাডায় তাঁহেকান, অকাটাঃগে বাদ দ বাং তাঁহেলেনা ! চেদাঃ সে লাচ্ রেনাঃ জালা কানা তো
! অনা দ চপৎ চাবা তেগে হুয়ুঃ আ। বেয়াম বেয়ামতে তিনৗ যে বিলম এনা অকয় হঁ বাকো দিশৗ লেদা।
দাকা ইসিন বাড়া কাতেঃ আচকাগে ভুচুং এরাৎ তেৎ এ দিশৗকেদা,
নিত হঁ তো বাবু আপাত হাট খন বায় রুওয়ৗড় আকানা। উতুতেয়াঃ আর মেরম জিল নিতহঁ আওরিয় আগুয়া। তি রেচঞ উতু সৗত। আচকাগে মুংলীয় ঞেল কেদা,
হাটরেনাঃ খৗলি থৗইলৗ, আর টাকা সানামগে হেনাঃ আ তক্তা চেতানরে। সাইকেল হঁ মেনাঃ গেয়া। হুদিশ কেদায় মুংলী,
তবে কি হৗটিয়ৗতে বায় সেন আকানা বাবু আপাত
! মুংলী দ
ধাড় পাড় কোঠা চটতেয় রাকাপ এনা। চটরে সেন কাতেঃ মুংলী দয় ভাড়ুম্বাঃ উতৗর এনা। ঞেলে কানায়,
পৗটয়ৗরে গিতিচ কাতেঃ ভুচুং দ উদুর উদুর তেয় জৗপিৎ জংকানা আডি সুকতে। মুংলী দ রৗগিতে ডাটা মাট মাটাও কাতেঃ ভুচুংএ অর বেরেৎ কেদেয়া।
ভুচুং দ বার তিতে মেৎ ইতকিৎ ইতকিৎ তেয় মেনকেদা--ও সেতাঃ এনা বাবু এগাঁত, বাম হহ আঞকান
,দু,দুসে চা আগুয় তালাংমে। মুংলী দ রাঙ্গাওতে, কাঁহিসতে চেৎ এ মেনা বায় বুজ তিয়োঃ দাড়েয়াদা। খৗলি কিকয়ৗও আতেয় মেনকেদা-- ইঞাঃ বহঃ হৗম্বুড়মে !
.webp)
.webp)
