সিঁগি মাহা রেনাঃ সাকাম ‘চেরেচ্ আড়াং’ লেখা- ৪৮

“ আবোওয়াঃ কাথা ” ওয়েব পেজ রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com ।  

 

তেহেঞা আখড়ারে যাঁহায় কো সেলেদ্‌ আকান- রিলৗমালা মুরমু, ᱥᱩᱵᱩᱫᱤᱭᱟᱹᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ, ᱥᱨᱤᱠᱟᱱᱛᱚ ᱥᱚᱨᱮᱱ,  গাতে টুওয়ৗর, রামলাল টুড, বাড়তাঙ সরেন,  সুচাঁদ হাঁসদা, সেঁগেল মারমার, সতন কুমার সরেন, দুগাই টুডু, সনাতন টুডু, কানন হাঁসদা, সীতেন মান্ডি, বিভূতি ভূষন সরেন, দুলৗড় বিটি ।

রিলৗমালা মুরুমু, ক্লাস- IV
জেলা - পুরুলিয়া

১।।

ᱡᱤᱭᱚᱱ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱵᱟᱵᱩ ᱦᱟᱯᱮᱱ
ᱦᱟᱨᱟ ᱠᱟᱛᱮ
ᱟᱜᱩᱟᱭᱟᱞᱮ ᱵᱟᱦᱩ ᱾

ᱡᱚᱢᱟᱭ ᱫᱟᱦᱮ
ᱧᱩᱭᱟᱭ ᱛᱚᱣᱟ
ᱮᱲᱟᱣ ᱠᱟᱛᱮ ᱢᱤᱸᱦᱩ ᱾

ᱵᱟᱥᱟ  ᱥᱚᱸᱝᱦᱟ
ᱥᱤᱭᱚᱜ  ᱠᱚᱨᱮ
ᱵᱟᱦᱩᱭ ᱤᱫᱤ  ᱫᱟᱠᱟ ᱾

ᱦᱮᱸᱥᱮᱡ ᱥᱮᱠᱮᱡ
ᱨᱟᱹᱥᱠᱟᱹ ᱟᱛᱮ
ᱥᱟᱜᱩᱱᱟᱭ ᱡᱤᱭᱚᱱ ᱪᱟᱠᱟ ᱾

-0᱿᱿᱿=== ᱛ== ᱿᱿᱿0-

২।।

ᱦᱚᱯᱚᱱ ᱢᱟ.ᱭ

ᱜᱳᱯᱮᱥᱣᱚᱨ ᱢᱟ.ᱱᱰᱤ

 

ᱦᱚᱯᱚᱱ ᱢᱟ.ᱭᱮ ᱦᱚᱦᱚᱭ
ᱦᱩᱲᱩ ᱜᱟ.ᱪᱷᱤᱭ ᱨᱚᱦᱚᱭ ᱾

 

ᱜᱟᱢᱪᱷᱟ ᱛᱮᱭᱮ ᱯᱟᱴᱷᱮ
ᱰᱟᱸᱰᱟ ᱩᱨᱤᱡ ᱞᱟᱴᱷᱮ ᱾

 

ᱞᱚᱥᱚᱫ ᱠᱷᱮᱛ ᱛᱟᱞᱟ
ᱞᱟᱸᱜᱟ ᱛᱷᱟᱠᱟᱣ ᱡᱟᱞᱟ ᱾

 

ᱤᱸᱜᱩᱫ ᱟᱠᱟᱱ ᱦᱟ.ᱱᱤ
ᱨᱚᱦᱚᱭ ᱤᱫᱤᱭ ᱩᱱᱤ ᱾

 

ᱛᱷᱟᱨᱮ ᱛᱷᱟᱨ ᱥᱮᱱᱚᱜ
ᱵᱤᱫ ᱤᱫᱤ ᱧᱮᱞᱚᱜ ᱾

 

ᱦᱟ.ᱲᱭᱟ.ᱨ ᱛᱮᱭᱮ ᱥᱟᱡᱟᱣ
ᱜᱳᱴᱟ ᱠᱷᱮᱛᱮ ᱢᱟᱡᱟᱣ ᱾

 

ᱡᱷᱚᱢᱚᱨ ᱫᱟᱜᱼᱮ ᱡᱟ.ᱲᱤᱭ
ᱜᱩᱸᱜᱩ ᱩᱢᱩᱞ ᱟ.ᱲᱤᱭ ᱾

 

ᱢᱚᱱᱮ ᱩᱨᱤᱡ ᱠᱟ.ᱢᱤᱭ
ᱞᱟᱦᱟ ᱪᱟᱞᱟᱜ ᱫᱟ.ᱢᱤᱭ ᱾

 

ᱯᱟ.ᱪᱳᱜ ᱵᱟᱝᱼᱮ ᱢᱮᱱ
ᱠᱟ.ᱢᱤ ᱞᱟ.ᱜᱤᱫ ᱫᱮᱱ ᱾

 

-0᱿᱿᱿=== ᱛ== ᱿᱿᱿0-

 ৩।।

ᱦᱤᱠᱤᱢᱟᱜ ᱵᱷᱟᱵᱱᱟ

ᱥᱨᱤᱠᱟᱱᱛᱚ ᱥᱚᱨᱮᱱ

ᱦᱚᱯᱚᱱ ᱵᱟ.ᱵᱩ ᱦᱤᱠᱤᱢ ᱠᱤᱥᱠᱩ
       ᱧᱟᱢ ᱟᱠᱟᱫᱮᱭᱟ ᱵᱷᱟᱵᱱᱟ
ᱚᱠᱟ ᱡᱤᱱᱤᱥ ᱠᱚ ᱵᱟᱝ ᱛᱟᱸᱦᱮᱱ ᱠᱷᱟᱱ
       ᱪᱮᱫ ᱦᱚ ᱵᱟᱝ ᱛᱟᱸᱦᱮᱱᱟ  ᱾ ᱾

ᱫᱷᱤᱨᱤ ᱠᱚᱦᱚ ᱪᱟᱯᱟᱫ ᱠᱟᱛᱮ
         ᱪᱮᱫᱟᱜ ᱚᱛ-ᱛᱮ ᱧᱩᱨᱩᱜ
ᱡᱟᱦᱟᱭᱮ ᱞᱟᱹᱭ.ᱻᱟ ᱱᱚᱣᱟ ᱛᱮᱞᱟ
        ᱩᱱᱤᱫᱚ ᱢᱟᱨᱟᱝ ᱜᱩᱨᱩ᱾᱾

ᱱᱟ.ᱭ ᱫᱟᱜ ᱠᱚ ᱟ.ᱛᱩ -ᱟ.ᱛᱩᱛᱮ
        ᱪᱮᱫᱟᱜ ᱞᱟᱛᱟᱨ ᱥᱮᱫ ᱪᱟᱞᱟᱜ
ᱞᱩᱛᱩᱨ ᱛᱟᱦᱮᱱ ᱛᱮ ᱢᱟ.ᱱᱢᱤ ᱪᱮᱫᱟᱜ
        ᱡᱤᱭᱚᱱ ᱵᱷᱳᱨ ᱠᱚ ᱠᱟᱞᱟᱜ᱾᱾

ᱥᱮᱸᱜᱮᱞ ᱠᱚᱵᱚᱱ ᱡᱳᱞ ᱞᱮᱠᱷᱟᱱ
        ᱪᱮᱫᱟᱜ ᱪᱚᱴᱥᱮᱫ ᱨᱟᱠᱟᱵ
ᱠᱷᱟ.ᱡᱟ.ᱲᱤ ᱛᱟᱵᱮᱱ ᱵᱟᱫ ᱠᱟᱛᱮ
       ᱟᱨᱦᱚ ᱚᱠᱟᱵᱚᱱ ᱛᱟᱯᱟᱜ᱿

 

-0᱿᱿᱿=== ᱛ== ᱿᱿᱿0-

  ৪।।

হপন বিটি

গাতে টুওয়ৗর

 

হপন বিটি           খিটি খিটি
           লাঁদা বাড়া জং
শৗড়িয় বাঁদে       জাঁদে তাঁদে
         বানুঃ নাসে ঢং ।
এনেচ আয়     সেরেঞ আয়
           কুলহি ধুড়ি খেল
জখনে জৗড়ি     উনগে অৗড়ি
          দেন উকুর আরেল।
মিরু চেঁড়ে           তেঁড়ে রেঁড়ে
           বালে রড় তায়
লৗডু মিঠৗই       তাবেন খৗকৗই
           লগন ঘেঁটে বায় ।
অলঃ ডিডি          চাচো ডিডি
          আউরি বাডায় চেৎ
এনহঁ উনি             দানা দৗনি
          দৗড়ায় ইতুন সেৎ ।
হপন বিটি         আডিয় খৗটি
            অলঃ এ সেড়া জং
আয়ুর কায়পে     সুতুঃ কায়পে
            গাতে ক'পে গং ।

-0᱿᱿᱿=== ᱛ== ᱿᱿᱿0-

৫।।

গিদ্‌রৗ মনে

রামলাল টুডু

 

       ইঞিচ্ বাবাদ মাচেৎ
            এর অমনায় সেচেৎ
  হুডিঞ সেঁড়া গিদৗর পিদৗর
                 যত গেতায় আচেৎ।

 

        কুলহি মুচৗৎ আসড়া
          পৗরসি চার্চাও আখড়া
  দিনৗম গেত দমেল দমেল
              আচেৎ কক গাজাড়া।

 

         বৗসয়ৗম গেল টাড়াং
             নানা হুনৗরান আড়াং
  আসড়া খনগে আঁজম হিজুঃ
               পাড়হাঃ রাহা আড়াং।

 

          করোনা সে চেৎ আজার
             বুঝৗউ ইদৗঞ বেজার
     মু আর মচা বেৎ ক মিতৗঞ
                 তি সৗবুনঃ বার বার ।

 

         বাং ঝিজঃ কান আসড়া
               বিরদৗ হামেট আখড়া
      বাবা আরহঁ তিসচয় চালাঃ
                পৗহিল লেকা আসড়া ?

-0᱿᱿᱿=== ᱛ== ᱿᱿᱿0-

৬।।

জুমিৎ

বাড়তাঙ সরেন

 

গাতে কড়া গেল বার
            মেনাঃ লেয়া আতোরে
সারাঘৗড়ি মিৎতে
              তাঁহেনালে সঙ্গেরে।

 

কিস্কু  সরেন মাণ্ডি
           আলে সানাম গাতেকো
মুর্মু  টুডু  হাঁসদা 
           আলে ঝতো গাতেকো।

 

বাস্কে বেসরা হেম্ব্রম
                 সাঁওতে চঁড়ে বেদেয়া
আলেরেন গাতে সাঁও
              আর হঁ মেনায় পৗওরিয়া।

 

ইতুন সেচেৎ আসড়া
            সেনঃ আলে সঙ্গেতে
ঝতগে সেঁড়ায়লে
             সৗরিগে মিৎ মনেতে।

 

রেঙ্গেচ তেতাং দুকরে
             বালে তাঁহেন সাঁঙ্গিঞরে
গড়োগপড় মিৎতে
                তাঁহেনালে আড়েরে।

 

জাঙ্গে দারাম বৗইরী
              লাহাঃ আলে দিলতে
আতো  দিশম বাঞ্চাও
               লৗড়হৗই আলে মিৎতে।

 

-0᱿᱿᱿=== ᱛ== ᱿᱿᱿0-

 ৭।।

আলেরেন বিটি

সুচাঁদ হাঁসদা

 

বাংদ  খিপি ,
বাংদ  কুংকি ,
রড় তায় দ উঁ - উঁ  ৷

 

জম কো রেজে ,
মচা কো চকজে ,
জত গেকো লিনেয়া  মুঁ  ৷

 

বাংদ  বুঢি ,
বাংদ. ডিঢি ,
তাড়ামায় থিয়ৗ থাপে  ৷

 

হড়কো আরজ ,
জত গেকো খজ ,
তাঁগি য়েপে হাপে ৷

 

গাতে  সালাঃ ,
ইসকুলে চালাঃ ,
অলায় খেদে বেদে ৷

 

খেল এনেচ ,
খেনেচ খেনেচ ,
জত গে মেত কো বেদে ৷

 

বাডায় আপে ,
লৗই কেয়াপে ,
অকয় অনকা হেনায় ৷

 

বাং  বাং  বাং  ,
অকয়গে  বাং ,
আলেরেন বিটি কানায়  ৷

 

-0᱿᱿᱿=== ᱛ== ᱿᱿᱿0-

 ৮।।

আলপে খেলআ

সেঁগেলমারমার

 

দাঃ রে আলপে খেলআ
আলসেপে হেলমেল আ
হোয়োঃ নানা আজার
হুনার হুনৗর বেজার।

 

মাদা উথুম রুওয়ৗ
দিল দাড়ে চুওয়ৗ
আদিম খুগ্ তেগে
হুয় গদঃ আম রুগি।

 

সাবমে চাতম গুঁগু
আলম তাঁহেন তিঁগু
আলম লহদঃ আ
রেয়াড় লাগাও আমা।

 

বিঞক তুদ্ বাড়াঃ
কিদিঞকক লাড়াঃ
হুঁসিয়ৗরগঃ মে মা
বাঙ খানেম চাবাগ্আ।

 

হুডুর বিজলী চেটের
দমে গেচ সেটেরদাঃ রে
আলপে খেলআ
আলসেপে হেলমেলআ।

-0᱿᱿᱿=== ᱛ== ᱿᱿᱿0-

৯।।

ডুলুডং

সতন কুমার সরেন

        
ডুলুডুং ডুলুডুং
কেড়চং বেড়চং,
 অকাসময় অকাসেন
খেঁনচেরঃ আম
কেড়চং বেড়চং।
কৗঁত ধারে ধারেতে
 চিলি ঞামেচং বাংচং,
 কেড়চং বেড়চং
 রেঁগেজ জ্বালা 
 পাঁজায়াম জম।
 কিড়চং কড়চং
 খেঁনচের বাড়ায়াম                                     
ঞাম কেদেয়াম রটে,                                   
খপ মেনতেম সাবকেদে
 আলাং অডক কাতে।
  আমাঃ মচা খনাঃ
  আডিই মারাং রটে,
নাডরী সেন বাম
উদ্‌ দাড়েয়ায় কান
 মচা রেগেম দিজআকান,
অনাতেম এঁঠের পেটেরঃ কান
রটে মাতয় টেরেদ টেরেদঃ কান,
 বৗই বৗইতে মচাখনাঃ
 যাঁহালে কাতেম উদকেদে ।
 লৗজমা ফুলৗউ এনতাম
 ডেবডেবে,
 অড়সং ভড়সং বি কাতে
  এঠের পেঠের 
 কিড়চং কড়চং,
বাম লাড়াও দাড়েয়াঃ কান
 জমকাতে রটে ।
  হাপে হাপে ডুলুডুং
  জিরৗঃমে কৗটিজ চুলুং,
  আলম লাড়াঃ
   কিড়চং কড়চং,
  হপন চুনুয় হিজুঃ কান
 হান্তে খনাঃ দৗড় আতে,
  দমেয় বতরাক ডুলুডুং,
 জিরৗঃমে কৗটিজ চুলুং।
 হাপেহাপে হপনচুনু
 আলম লাহাঃ 
তিগুনমে কৗটিজ চুলুং,
 কাঁত ধারেরে
 কিড়চং কড়চং,
 রটেয় জম আকাদে
  ঞেলেমে হৗনি
  অড়সং ভড়সং,
 জিরৗঃ কানে ডুলুডুং ।

-0᱿᱿᱿=== ᱛ== ᱿᱿᱿0-

 ১০।।

সেঁগেল মারমার

দুগাই টুডু

 

সেঁগেল মারমার ঞেলঃ আকো
        আয়মা জাঁগা বাছা,
লেগেম লেগেম মাছা আদ
        তাড়াম গদা বাছা।

 

আডি মঁজগে রং তাকো
        ঞেলঃ সেঁগেল লেকা,
অনা তেগে ঞুতুম পাসেচ্‌
           দহ আনা ননকা।

 

রেঁগেচ্‌ তেমা জম কো পাঁজায়
         হানে হাঁডে নাডে,
তাঁহেন রেমা একাল খুশি
         অদা লহদ্‌ অঁডে।

 

লাগায় রেদ তুতুড় গেচো
         জত হড়ক লায়া,
ঞেলতে আদ গিদ্‌রৗ কোদ
         বতর গদঃ গেয়া।

 

কিবিড় কিবিড় আতে এতে
         দমেগে ঞির লাহাঃ
অড়াঃ কোনা ঞুৎগে উনরে
         সুঁদুচ্‌ কাতে সাহাঃ।

 

-0᱿᱿᱿=== ᱛ== ᱿᱿᱿0-

 ১১।।

সিরজন

সনাতন টুডু

 

সিরজনিয়ৗ হাঃ লিখন গড়ন
ঞেল জংগে সানাঞ,
হিঁসিদ্‌ হয়রে রমজ্‌ কাথা
আঁজম জংগে সানাঞ।

 

সিতুং দিন জারাল জারাল
আডি লল বুঝৗও,
উল-খানটাড়-জজ-বিলিঃ
জম মঁজগে বুঝৗও।

 
জৗপুদ্‌ দিন অক্‌তো রেদো
রটে কক রাগ্‌
চৗষি হড়কো চাষ লৗগিদ্‌
নাঁহেল কাঁড়বাকো সাব্‌।

-0᱿᱿᱿=== ᱛ== ᱿᱿᱿0-

 ১২।।

বাবুয়া কুকলি

কানন হাঁসদা

 

ছং গডোঃ ছং গডোঃ
      আছিম থাকাও  ঝতঃ
চেৎ উতু ? চেৎ উতু
        সিবিল আডি গেচোঃ।
সুনুম বুলুঞ,রহড় মৗরিচ
       আডি গোটাগুটি
বুড়হি হাড়াম ,আৗছিম থাকাও
       বালাঞ পাড়াঃ কুটি !
লৗটু লৗটু জিল কুটি
        ডাটা লাসের বাং
যতহড়াঃ খেয়াল বৗনু
          এনরেহঃ চিকৗয়াম !
 লৗটু বায় এ ,চালাও আকান
      লৗটু থাইলৗ  আতে
লুতুর আড়িরেয় ,মেন আকাদিঞ
        আজমে!  আগুই দায় সাতে !
লৗটুগো ,খৗলিই কুলিই
     চেৎ চেকাই না বেটা ?
আডি রৗসকৗয় ঞেল এদ মেয়াঃ
     লৗই বাড়ায় দাম গোটা !
বেশ ,বৗবুইয়া! চাওলে তেহেঞ
       ঢের গেয় ইসিন তাবন
ঝত হড় ,পানতে কাতে
         দাকা  উতু জমাবন !
লৗটু বাঃ আ,লৗটু  থৗইলা
    সেটের এনা তেহেঞ  
লেবড়া গিদরৗ ,রাসকৗ আতে
     মনে  মনেই  সেরেঞ !
তিকিন বেড়া,  ডৗবরৗ সাফা
      পানতে দাকা জম
বাসেচঃ তেহেঞ ?
    ইঞ দো আৗডি কম !
দাকা উতু চাবা কান
      থৗরি জাজাল  সানা
লৗটু বায় মেন লেদা,
    অনা কি বৗনু আনা 
মান্ডার ,মুন্ডুর কয়ো আতে
 এ লৗটুবা! হাঁতি বিলি অকর ?
আলম মেনা ,এ বেটা
            অনা গে থ বতর !
বতর চেদাঃ ,এ লৗটুবা
       হাঁতিই লাগাঃ কানাঃ?
হেঁ য়া বাবু,অনা তেগে
        কুন্ডহা বিলি  হেচ এনা !
দাকা উতু ,চাবায় এনা! ঢেকার রাকাব
         অকর হাঁতি বিলি?
গড়মবা,গড়ম বুডি ,
মুলুচ মুলুচ কয়ঃ কাতে ,,,
       হাজাম লৗগিত 
এ য়া ,আগুয় মে ঠিলি !

 

-0᱿᱿᱿=== ᱛ== ᱿᱿᱿0-

 ১৩।।

চেরেচ আড়াং

সীতেন মাণ্ডি

 

সেরমা রেন জুলুঃ ইপিল 
   আগু আমাঞ বেটা
আলম আড়ি সারাঘৗড়ি
  দেন চাঁদ তওয়া দাকা।।

 

সাড় বাহারে আপ্ আকান
   মজ গে হৗনি পৗতনি
বাহা রাসায় চেপেজ্ জং কান
  কয় আমাঞ এন খান।।

 

আখরিঞ কাতে সিম সাঁডি
কিরিঞ আমাঞ উডৗন গাডি
চেঁড়ে লেকাম উডৗও বাড়ায়
সেরমা চেতান আম হঁ।।

 

মামা অড়াঃ চালাঃ আবন
    সৗরি সহরায় রে
সিলপিঞ লেকান জিল পিঠৗ
সারজম পাতড়া রে।।

 

অকয়া পে এগের কেদে
   আলে বাবু তালে
হেড়েম লৗডু এমায়ালে
  বায় হৗটিঞ আপে।।

 

নিদো নিদো আলে বাবু
  জৗপিদ তালেয়ায়
  সারাঘাড়ি নংকা দ
    বায় আড়িয়ায়।

-0᱿᱿᱿=== ᱛ== ᱿᱿᱿0-

 ১৪ ।।

কুলহি ধুড়িরে

বিভূতি ভূষণ সরেন 

 

 কুলহি ধুড়িরে হপন বিটি 
            থিয়ৗ থাপেয় খেল, 
আতুরে কৗটিচ্ খন লৗটু 
            ঝত সঁগেয় মেল। 

 

নানা-হুনৗর খিলোড অকতে 
           আচ্ গে হৗডিঃ খৗলি, 
রিটি পিটি ধুরৗও কঃগে 
         বাং দাড়েঃ রেঁহ ভৗলি। 

 

এন তেহঁ মনে কচারে 
        বৗনুঃ তায়া আড়িস, 
রৗস্কৗ সালাঃ লাঁদা লাঁদাতে 
         সাহায় তায়ে কাঁহিস।

 

-0᱿᱿᱿=== ᱛ== ᱿᱿᱿0-

 ১৫।।

বন্‌দল

দুলৗড় বিটি

 

দিন দিনতে দিনদ চালাঃ
       লেগেম লেগেম গাডা,
হাড়াম কাডায় জবে লেনখান
         রটে কক হাড্‌-বাডা।

 

বছর বছরতে বছর চালাঃ
         সগড়্‌ বগড়্‌ ঝার্‌না,
বুড্‌হি গৗই এ অবর লেনখান
         সিঁকড়িচ্‌ কক ফারনা।

 
যুগ যুগতে যুগদ চালাঃ
         শয়ড় শয়ড় নালা,
হৗলি ফেঁটাড়ে থৗলি লেনখান
         রঁক বাকো জালাঃ।

 

************ মুচৗৎ *************