গাপা কেশপুর আর শালবনী চলবন- হহকেদায় মাঝি পারগানা মহল

আবোওয়াঃ ডিজিটাল ডেস্ক-  গাপা ৩১ জুলাই কেশপুর আর শালবনী চালাঃ লৗগিৎ- হহকেদায় বাং হৗটিঞ মেদিনীপুর ভারত জাকাত মাঝি পারগানা মহল। বাডায় আকানা পছিম বাংলা সরকার পঞ্চায়েত প্রতিমন্ত্রী সাঁওতে কেশপুর বিধান সভারেন বিধায়িকা শিউলি সাহা আর ক্ষুদ্র-কুটীর শিল্প রেন প্রতিমন্ত্রী সাঁওতে শালবনী বিধান সভারেন বিধায়ক শ্রীকান্ত মাহাত ঠেন আদিবাসী কোওয়াঃ নানাহুনৗর দৗবি লৗইতে গণডেপুটেশন এমঃ লৗগিৎ ভারত জাকাত মাঝি পারগানা মহল বাং হৗটিঞ মেদিনীপুর সানাম হড় গে দেলা আকাৎ কোওয়ায় মেনতে বাডায় আকানা। 

দৗবী কো মুদরে বাডায় আকানা- ১। পছিমবাংলা পনৎ রেনাঃ আইটিডিপি এলাকাকো আর্টিকেল্‌ ২৪৪ লেকাতে আডি লগন গে 5 th Schedule লৗগু করাও হোয়োঃ মা, ২। পুরুলিয়া জেলারে আযোদিয়ৗ ঠুড়গৗ প্রকল্প ঞুম কাতে আদিবাসী লাগা ডিগলৗও বনদ হোয়োঃ আ, ৩। পুরুলিয়া জেলা রেনাঃ আযোদিয়ৗ বুরুরে সানতাড় কোওয়াঃ ঞুমৗনাঃ ‘সুতৗন টৗন্ডি’ সরকারী ভাবতে জতন-জগাও রেনাঃ বন্দেজ করাও হোয়োঃমা, ৪। আদিবাসী কোওয়াঃ ধরম সেঁদরা বনদ বাং চালাঃ আ, আর সেঁদরা ঞুতুম তে আথৗউড়ি কেশ এম কাতে হায়রৗনি এম বাং গানোঃ আ, ৫। সানাম ফেক এসটি সার্টিফিকেট সিজ করাও হোয়োঃ মা আর সার্টিফিকেট এম আকাদ্‌ আপিসার কো কডরা শাসেৎ এম হোয়োঃমা, ৬। Forest Right Act- 2006 লৗগু করাও হোয়োঃ আ, ৭। সানতাড়ি মিডিয়াম লৗগিৎ ভেগারতে সেচেৎ বোর্ড বেনাও হোয়োঃ আ, ৮। আদিবাসী এলাকারে সানাম জাহের থান রে পাট্টা রেকর্ড এম হোয়োঃআ।  

 ভারত জাকাত মাঝি পারগানা মহল বাং হৗটিঞ মেদিনীপুর জেলা পাহটা খন গাপা ৩১ জুলাই কেশপুররে ১১ বাজা অকতে আর শালবনিরে ১ বাজা অকতে জৗতিয়ৗরী সাপাপ্‌ আর টামাক,রেগড়া, ঘন্টা, সাঁকোওয়া আঁদোড়াতে দোমেল দোমেল সহর সেটেরঃ লৗগিৎ আরদাশ কো দহ আকাদা মেনতে বাডায় আকানা।