আবোওয়াঃ ওয়েব পেজ- সাঁওতা আরিরে নোওয়া গে জৗনিচ্ মুড়ুৎ যঁশ কানা- ইঞাঃ দুক্রে আম, আমাঃ দুক্রে ইঞ। সাঁওতা তালারে সুক্-দুক্ হাপাটিঞ রেনাঃ চল্ মেনাঃ তেগে তেহেঞ হঁ রিদ-রদ খাম খুঁন্টি আতে রেহঁ সাঁওতা সৗড়িম তিঁগু মেনাঃআ। যাঁহারেন মুড়ুৎ কৗরিগল গে কানা কো আতোরেন মাঝি বাবাকো আর দিশম রেন পারগানা বাবাকো। যাঁহা সাঁওতারে নোওয়া আরি মেনাঃআ অনা সাঁওতারেদ যাঁহা তিনাঃ হয় ভান্ড দারায় রেহঁ সাঁওতা সৗড়িম টেঁহাড় গে তাঁহেনা। আর অনা তেগে মিৎ মাঝি বাবাআঃ দুক্রে আর মিৎ মাঝি বাবাআঃ গড় ঞেলঃ আ সে মিৎ পারগানা বাবাআঃ দুক্রে আর মিৎ পারগানা বাবাআঃ গড় ঞেল ঞামঃআ। নোওয়াগে সমাজ।
নংকাগে হলা ১৬ মে মিৎ চিতৗর ঝালকাও রাকাপ্ এনা পছিম বাংলা রেনাঃ পছিম বর্ধমান জেলা আউসগ্রাম ২ নং ব্লকরে মেনাঃ কাঁকোড়া আতোরে। যাঁহা আতোরেনাঃ খবর নিত গটা দিশম হড়কো বাডায় কেদা। খবর খনগে বাডায় আকানা পারমেন ৩ মে হিলঃ সমাজ বৗইরী কোওয়াঃ নিরঘিন কৗমিতে কম কাতেৎ ১৫ গটাং সানতাড়াঃ অড়াঃ বতরান সেঁগেল তে গটা ল পুটুর এনা। অড়াঃ করে তাঁহেকান জিওয়েত জিউয়ি রেনাঃ নানাহুনৗর সার্টিফিকেট, খাদ্যসাথী কার্ড, রেশন কার্ড, স্বাস্থ্য সাথী কার্ড, আধার কার্ড, জব কার্ড সাঁওতে গিদৗর কোওয়াঃ সেচেদ্ রেনাঃ পুঁথি-পতব-খাতা, হরঃরেনাঃ লুগড়িচ্-লাপো, জম রেনাঃ হোড়ো-চাওলে আরহঁ আয়মা লেকান অড়াঃ রেনাঃ সামঃগিরি সানামা গে সেঁগেলতে ল তরজ্ আকান তাকোওয়া। লৗই লেক কানা ওনকো নিৎ সেরমা লাতার দারে বুটৗরে দিনকো খেমাও এদা। নংকান দুক্তে দুক্ আকান পছিম বর্ধমান জেলা পারগানা বাবা বেওরা তালাতে দিশম হড় তালারে আয়াঃ দুক কাথায় সদর লেদা সাঁওতে আচ্রেন হপন কোওয়াঃ জিউয়ি বাঞ্চাও লৗগিৎ যা উডিচ্ কুড়ৗ গড়য় খজ্ লেদা।
আরহঁ বাডায় আকানা তেহেঞ গে হুগলী জেলা আসেকা কুমুট পাহ্টা খনহঁ চাওলে খন এহব কাতে আয়মা গটাং দান সামঃগিরি আতে পছিম বর্ধমান জেলা পারগানা বাবা আঃ তিরে চাল কেদাকো।
তেহেঞ নোওয়া দান সামঃগিরি আখড়ারে সেটের কো তাঁহে কানা বাং হৗটিঞ মেদিনীপুর জেলা পারগানা বাবা মানতান রবীন্দ্রনাথ মুরমু, মেদিনীপুর জেলা জগ পারগানা বাবা মানতান দিলীপ কুমার মান্ডি, আসেকা হুগলী জেলা সুৎরেৎ মানতান দুলাচাঁদ মান্ডি,ভারত জাকাত মাঝি পারগানা মহল রেন পনৎ গোডেত মানতান উপেল মান্ডি, হুগলি মুলটি মারাং বুরু সুসৗর গাঁওতারেন সুসৗরিয়ৗ মানতান সমীর হেম্ব্রম, হুগলি খন্নান নয়াপাড়া মাঝি বাবা মানতান মঙ্গল হাঁসদা,দুর্গাপুর নাগার পীড় পারগানা বাবা মানতান অমিত টুডু আর পছিম বর্ধমান জেলা পারগানা বাবা সিদ্ধার্থ মান্ডি সাঁওতে আচ্রেন সাপাপ্ তিকো।
সেটের লেন মাঝি বাবা, পারগানা বাবাকো দান সামঃগিরি এম তায়ম ওনকো নাচার আকান হড় লৗগিৎ তে প্রশাসনিয়ৗ ঠেন গড় এম লৗগিৎ হঁ দাবী কো রাকাপ্ কেদা। সাঁওতে যাঁহায় সমাজ বৗইরী কো নংকা বৗড়িচ্ কো কৗমি আকাদা ওনকো যাতে প্রশাসন পাক্ড়াও কোমায় আর আডি লগন শাসেৎ এম রেনাঃ বন্দেজ এ হাতাওমা নোওয়া দাবী হঁক সামাং তরা কেদা।
.webp)
.webp)
