(হুডিঞ কৗহ্নি)
বাড়তাঙ সরেন
তালা কুলহী। হাঁসদা বাখোল। বেড়হায়তে আডি মারাং পৗচরী। পৗচরী দুয়ৗর সামাংরে উসুল মাডের বাড়ে। চাষীবাসী কিঁসৗড় অড়াঃ মেনতে যাঁহা লৗই গানঃ লিদু হাঁসদাওয়াঃ ঘারঞ্জ দ অনকাগে। ক্ষেত হাসা, হুড়ু চাওলে, গৗই কাডা, আতো সুররে মারাং মারাং জোড়া পুখরী । তোওয়ারে দাহেরে অকাটাঃ আনাটগে বৗনুঃ আ। লিদু হাঁসদা, আচ হঁ আতো সুররে হেনাঃ গিতিলডি প্রাইমারি ইস্কুলরেন মারাং মাচেৎ এ তাঁহেকানা। হালেগে বার সেরমা লাহারে কৗমি খনে জিরৗও আকানা। বার কড়া আর মিৎ কুড়ি। সানামগে অলঃ পাড়হাও মুচৗৎ কাতে চৗকরীয়েদাকো। সানামগে চৗকরী ঠাঁওরেকো তাঁহেনা। আকিন দ হাড়াম বুড়হী কৗমি হড় আতেগে উন মারাং ঘারঞ্জকিন ঞেল সামটাও আ।
লিদু হাঁসদা দ আতোরেন হড় তালারে আডি মৗন
তাঁহেকান তায়া। হাড়াম বুড়হী, কড়াকুড়ি সানামগে আডিকো কুশিয়ায়কান তাঁহেনা, চেদাঃসে উনি দ আতোরেন হড়াঃ দুক দয়িপরে সানাম ঘৗড়িচ এ ঞির সুরুঃকান তাঁহেনা। আপিস আদালতরে, রুওয়ৗঃ হাসোরে সানাম অক্তেগে উনি আতোরেন হড়ে গড়ো আকোকান তাঁহেনা। অকা অকা দ কৗওডি এমকাতেঃ হঁয় গড়ো আকোকান তাঁহেনা আতোহড়।
আচকাগে অকয়াঃ উসকুর তেচ সিরৗমটলা আতোরেন হড়কো বার হৗটিঞ এনা। বার নাখারেন হড় গে লিদু মাষ্টার আকোসেচ সেলেদ রেনাঃকো কুরুমুটু কেদা। আতোহড় ভিতরীরে রেষারিসি এপেড় হেডেজ সিরজৗও এনা। বার গাঁতাকরেন হড় রড় লান্দাকো বৗগিকেদা। ঞেল ঞেপেল হঁ কো চাবাকেদা। বানার দলরেন হড়গে লিদু মাষ্টার সাঁও হঁ রড় রপড়কো বৗগিকেদা। বার দলরেন হড়গেকো উইহৗর কেদা --লিদু মাষ্টার দ পালেন হানকো সাঁওতেয় সেলেদ আকানা। ওনকোওয়াঃ মনেরে হিদিচ তেয়ার এনা আর হঁ, যখন উনি দ রাজআরি খৗতিরতে আতোরেন হড় ভেগার হৗটিঞে বারন কেৎ কওয়া। অনা খৗতিরতে লিদু মাষ্টার দ বার সেচ খনগেকো বিটৗল কেদেয়া।
বিধানসভা ভোটরেনাঃ অরজ ওডোক সে আওরি আতোরেন হড় ভিতরীরে লৗড়হৗই তাপাম সিরজৗও এনা। কুলহী ধুড়ীরে বার দলরেন কড়াওয়াঃ মায়াম জরয়েনা। চেতান টলা, লাতার টলা রেনাঃ মিৎবার অড়াঃ দুয়ৗর হঁ সেঙ্গেলতে আতারেনা। আতোরে পুলিশকো সেটেরেনা। যাঁহায় যাঁহারেকো ঞামকেৎকো পুলিশ দ ওনকো গেকো সাব কেৎ কওয়া আর হাজত তেকো তল ইদিকেৎকওয়া। আর ঢের কায়তে আতোরেন কড়া দ আতোখন অচঃ সাহাকাতে উকু দানাং রেকো তাঁহেয়েনা। আতোরেন আয়ো হড়দ সৗরিগে আডিকো হালেডালেয়েনা গিদৗর পিদৗর আতে। অকা রাজআরি দলগে ওনকো ওয়ার লৗগিৎ বাংকো লাহা হেচলেনা। জম ঞুঁ জৗপিৎ সানাম চাবা উতৗরেনা।
পে মাহা তায়ম সেতাঃ তরারে আতোরেন সানাম আয়োহড় দ রাঃরাঃতে লিদু মাষ্টারাঃ বাখোল তেকো বলয়েনা গিদৗর পিদৗর আতে।
লিদু মাষ্টার রাঃ হমর আতে সানাম কতেকো নেহর কেদেয়া -- আলেয়াঃ আডি মারাং বৗড়িচ হুয় আকান মারাংবা, বারহে রেন হড়াঃ কাথা আঁজম কাতেঃ আলে দ বৗড়িচ ডাহারলে পাঁজালেদা। মা আমগে নওয়া দুক দারহা খন অয়ারলেম। মা , আমগে আলেরেন বাবাহড় দ বাঞ্চাও কতালেম !
লিদু মাষ্টার দ আতোরেন আয়োহড়াঃ কাথা বায় গিডি দাড়েয়াদা। সানাম কতে বোলপুর থানায় চালাও এনা। উনি দ আইন কৗনুন হঁয় বাডায় গেয়া। পুলিশ আপিসার হঁকো চিনহৗপেয়া। বাবার গটেচ কাগজরে অল সই বাড়াকাতেঃ থানারেন বড়বাবু ঠেনে জমা কেদা। থানারেন বড়বাবু ঞেলবাড়া কাতেয় মেন কেদা ---ঠিক আছে মাষ্টার মশাই, আপনি যখন আছেন কোন অসুবিধা নেই। আমরা ওদের কাউকেই জেলে পাঠাইনি, ওরা সব লকআপেই আছে। এক্ষুনি ওদের ছেড়ে দিচ্ছি। মাঝে আর একবার আপনি দেখা করে যাবেন। অনা মেনকাতেঃ বড়বাবু দ বারয়া কনস্টেবল লকআপ খন সিরৗমটলা আতোরেন হড় ওডোক আগুয় অর্ডার আৎকিনা।
মিৎ ঘৗড়িচ্ তায়মগে সাব আগুলেৎকো আতোহড় দ থানারেয়াঃ লকআপ খনকো ওডোক হেচ এনা। ঞেলকেদেয়াকো লিদু মাস্টার দ আকোরেন এরা-উরু আতে থানা সামাংরে মারাংবুরু লেকায় তিঙ্গু আকানা। রাঃ মেৎহা আতে ওনকো দ বৗই বৗইতে জোহারাতে উনি সেচকো লাহা চালাওএনা......।
.webp)
.webp)
