(গিদরৗ কৗহ্নি)
তাম্বড় 'বীরবান্টা '
বাড়তাং সরেন
আডি সেদায়রেনাঃ কাথা। উন দ আবো হড়কো বির বুরু আড়েরে অড়াঃ দুয়ৗর তেয়ার কাতেঃকো তাঁহেন কান তাঁহেনা। আতো অড়াঃরে মাঝহি মাপাজি শাসন তাঁহেকানা। বাহা, সহরায়, সাকরাত আর জানথাড় লেকান পরব পৗলি আডি গুণমান আর এনেচ সেরেঞ আতে পালাও হুয়ুঃকান তাঁহেনা। আতো অড়াঃরেন হড়কো তালারে আডি সুলুক সৗগৗই তাঁহেকানা।
অনকাগে খাণ্ডেরায় বীর আড়েরে সারজমডি ঞুতুমান মিৎ রৗসি আতো তাঁহেকানা। অনা সারজমডি আতোরে বাদাড় ঞুতুমান মিৎ পারগানায় তাঁহেকানা। উনি দ আডি মারাং কিষাঁড় হড়ে তাঁহেকানা। উনিয়াঃ অড়াঃরে তাম্বড় ঞুতুমান মিৎ গুতিকড়ায় তাঁহেকানা। তাম্বড় দ আচ আয়ো সাঁওতে আতো মুচৗৎরে মিৎ হুডিঞ হুডিঞ কুম্বৗ অড়াঃরেয় তাঁহেনকান তাঁহেনা। আচ আপাত দ বৗনুগেয়া। বাংমা বুরু আড়ে খেত হাসারে কৗমি অক্তে তৗরুপ কো জম আকাদেয়া। আবার অকয় দকো লৗই আ,বাংমা, অনা দলমা বুরুখন মারাং উতৗর 'ঢিংকিবিঞ' লাওয়ের ফেড কাতেয় লাকপ জম আকাদেয়া। আচ আয়ো দ নায়কে অড়াঃরেয় কৗমি গড়ো আকোওয়া। আর দিনৗম হিলোঃ মিৎ পৗয় চাওলে কো এমায়া। আদ অনকাতেগে এগাঁ হপন জিয়ন কিন খাণ্ডাও ইদিয়া।
তবে তাম্বড় দ আডি দিল দাড়েয়ান কড়ায় তাঁহেকানা। হড়মো রেনাঃ গড়হনতে হঁ আডি দাড়েয়ান কড়ায় তাঁহেকানা। সেতাঃতরা পারানিক আঃ অড়াঃরেনাঃ সানাম কৗমি সৗত বাড়া কাতেঃ তাম্বড় দ দিনৗম হিলোঃ অনা খাণ্ডেরায় বিরতে গৗই কাডা আতিঞ এ ইদি কওয়া। গৗই কাডা আতিঞ অক্তে তাম্বড় দ মিৎ মাডের বাড়ে বুটৗরে দুড়ুপ কাতেঃ তিয়য়োয় অরং জংআ। গৗই কাডাকো আতিঞ বি লেন খান অনা বাড়ে বুটৗ বেড়হায় তেকো বুরুম কঃআ, আর তাম্বড় আঃ তিরয়ো অরংকো আঁজম জং আ।
মিৎ দিন তিকিন অক্তে দিনৗম হিলোঃ লেকা তাম্বড় দ তিরি্যোয় অরং জংকানা অনা বাড়ে বুটৗরে। আচকাগে সাঁগিঞরে বুরু আড়ে সেচখন কিক্য়ৗও আঁজম হেচ এনা। অনা আঁজমতে গৗই কাডা হঁকো ঞির বেরেৎ এনা। তাম্বড় দ ডাঁডা তল উরিচ কাতেঃ বহঃ দৗহড়িরে তিরিয়ো রেবেৎ কাতে পিলচু টেঙ্গজ সাব কাতে অনতেয় ঞির চালাও এনা। ঞির চালাও কাতেয় ঞেলকেৎ কিনৗ সারজমডি আতোরেন মাঝহিবাবা আর মাঝহি এরা দ মিৎ বুরু ডঁন্ডহর সামাংরে কিক্য়ৗও আতেকিন রাঃ রাঃ কানা। তাম্বড় দ উনকিন ঠেন ঞির চালাও কাতেয় কুলিকেৎ কিনৗ , চেৎ চেকাও আকানা মেনতে।
তাম্বড় দয় বাডায় ঞাম কেদা, ওনকো দ পেড়া অড়াঃ খনকো রুওয়ৗড়কান তাঁহেনা। বুরু নাখা হর আড়েরে আকিনরেন হপনবিটি হিসি দ হাটবাহা সিসিৎ এ তায়ম লেনা। আচকাগে তায়ম সেচখন মিৎ মারাং 'ঢিংকি বিঞ' হিসিদয় পাঠে কেদেয়া আর গাজাড়তে পেরেচ অনা বুরু ডঁন্ডহর সেচ এ অর আদের কেদেয়া। তাম্বড় দ বাং বিলম কাতে পিলচু টেঙ্গচ আতে অনা ডঁন্ডহর সেচ এ ঞির বলয়েনা। বুরু ডঁন্ডহর ভিতরিরে রাদবাদ সাডে আঁজম এনা, ঢিংকি বিঞাঃ হয় লেকা হাদাড় হাদাড় সাঁহেৎ আর লৗড়হৗই রেনাঃ গুড্গৗড সাডে আঁজম হেচ এনা। তাম্বড়াঃ কিক্য়ৗও আতে গারজাও হঁ আঁজম এনা।
আচকাগে রাদবাদ সাডেয়াতে বুরু ডঁন্ডহর খন আডি জেলেঞ মিৎ ঢিংকি বিঞ এ সহর ওডোং এনা। গোটা মায়ামতেয় লটপট আকানা। উনি ঞেলতে জাওরা আকান আতো হড়দ বতর তেকো ঞির সাহায়েনা। উনি ঢিংকি বিঞ দ মিৎ মিৎতে মড়ে তুরুয় গটেচ গৗই কাডা আর মেরমে উলৗ ওডোক কেৎ কওয়া। মিৎ ঘৗড়ি তায়ম উনিদয় গচ উতৗর এনা। আচকাগে সাঁঙ্গিঞ খন আতোহড় কো ঞেল ঞাম কেদেয়া তাম্বড় দ হিসি দৗবীরে গঃ কাতেঃ জজম তিরে পিলচু টেঙ্গচ আতে বৗই বৗইতে গাজাড় খনে ওডোং হিজুঃকানা। গোটা হড়মো মায়ামতেয় লটপট আকানা। হিসি এগাঁত দ ঞির লাহা কাতে হিসিয় হবর কেদেয়া। হিসি দ ' গ গ ' মেন কাতে আচ আয়োয় হাড়ুপ কেদেয়া।
গোটা আতোরেন হড় দ সানাম কোতে আডি রৗস্কৗতে তাম্বড়কো গঃ রাকাপ কেদেয়া আর উনি ঢিংকি বিঞ সামাঃ গচ খৗতির 'বীরবান্টা' মেনতেকো ছৗটয়ৗর কেদেয়া। আর আতোরেন সাঁওয়ার মাঝহি দ রৗস্কৗতে তাম্বড় বৗয়হৗড় রেনাঃ মড়ে গেল বিঘৗ খেতহাসা আর পে জড় কাডা নাহেলে এম উতৗর আদেয়া।
.webp)
.webp)
