আবোওয়াঃ ওয়েব পেজ- সানতাড় জৗতি লেকাতে বাঞ্চাও তাঁহেন খান ‘সারি ধরম’ কোড ঞাম লৗগতি কানা। ২০২১ সাল রেনাঃ হড় লেখারেহঁ সানাম সানতাড় ‘সারি ধরম’ কো অল অচোয় মা, বাংখান হাপেন সানতাড় ওনোরোম দ বৗই বৗইতে আদ্ ইদিঃ আ। নংকান কাথাকো উইহৗর কাতেগে হলা ১৪ ফেব্রুয়ারী পুরুলিয়া রেনাঃ বান্দোয়ান কুচিয়ারে জেলা সারি ধরম বৗইসি পাহ্টা খন মিৎ ‘সারি ধরম হেলমেল’ হুয় পারমেনা।
নওয়া হেলমেল আখড়ারে গালচিয়ৗ লেকাতে সেটের কো তাঁহেকানা সারি ধরম গুরু বাবা সমাই কিস্কু, আসেকারেন জেনারেল সেক্রেটারী মানতান ডঃ সুবোধ হাঁসদা, অনলিয়ৗ খেরওয়াল সরেন, ভারত জাকাত মাঝি পারগানা মহল রেন পুরুলিয়া জেলা পারগানা বাবা রতন লাল হাঁসদা, বান্দোয়ান বিধান সভারেন এম.এল.এ. মানতান রাজীব লোচন সরেন, উত্তরবঙ্গ রেন অনলিয়ৗ দিলীপ কিস্কু, সেরেঞ পৗরুখিয়ৗ লাংতিতি কিস্কু সাঁওতে আরহঁ আয়মা মাঝি বাবা আর পারগানা বাবা কো।
আখড়ারে সারি ধরম গুরু বাবা সমাই কিস্কু দ ‘সারি ধরম’ চেৎ কানা, ‘সারি ধরম’ সিরজন, ‘সারি ধরম’ চেদাঃ সরেশা, ‘সারি ধরম’ চেদাঃ গেবাং সানাম হড় কো পাঁজায়েদা নোওয়াকো লৗইতে উনিদ অড়ে অড়পাতে থুতি-গালচ্ কেদা।
মানতান ডঃ সুবোধ হাঁসদা আয়াঃ বাঁখেড় তালারে সদর কেদায় বাংমা সারি ধরম কোড ঞাম লৗগিৎ তে তহৎ হাঁড়া হোয়োঃ রেহঁ আরহঁ জাস্তি খন জাস্তি আঁদোড় ইদি হোয়োঃআ, লৗকতি হোয় লেনখান এখেন কোলকাতা দ চেদাঃ দিল্লী হৗবিচ্ হঁ চালাঃ হোয়োঃআ।
পুরুলিয়া জেলা পারগানা বাবা রতন লাল হাঁসদা আয়াঃ বাঁখেড় তালারে সদর কেদায় বাংমা যাঁহায় ক সেঁগেল লৗইতে ধরম কৗমিরেকো আঁড়গোওয়ানা আর হৗনি নায়া ঞুম কাতে কুশ পুতলৗ কো জেরেৎ আঃ কানা। উনকুদ বাং ঠিক কো কৗমিয়েদা। হাপেন দিন হঁ নংকা কো কৗমি ইদি লেখান ভারত জাকাত মাঝি পারগানা মহল ইকৗ বায় এমা কোওয়া মেনতেহঁ সন্তর কাৎ কোওয়া মেনতে বাডায় আকানা।
আডি ঞুতুমান গায়ান অনলিয়ৗ মানতান খেরওয়াল সরেন দ আডিগান কাথাগে সারি ধরম রেনাঃ দার্শনিক কাথা উইহৗর কাতে সেরেঞ তালাতে আয়াঃ কাথাকোয় সদর কেদা। উনিয়াঃ দুখৗলি সেরেঞ রৗড়তে গটা মঞ্চ গে মিৎ ঘৗড়িচ্ লেকা দ মেৎদাঃ তে পেঁড়ে পেঁড়ে গৎ লেনা মেনতেহঁ বাডায় আকানা।
লাংতিতি কিস্কু দ সারি ধরম চেতানরে গাবান আকান উত্তরবঙ্গ রেনাঃ রৗড়তে সেরেঞ কেদায়, উনিয়াঃ সেরেঞ আঁজম কাতে সেরেঞ সেরেঞতে ঞেঞেলিয়ৗ কো রৗস্কৗ মনেতে অড়াঃ কো রুওয়ৗড় এনা।
.webp)
.webp)
