মারাং গমকে জয়পাল সিং মুন্ডা
মহাদেব হাঁসদা
মারাং গমকে জয়পাল সিং মুন্ডা হতেতে আদিবাসী সমাজ গরব এ আটকারা। উনি দ আদিবাসী সমাজ রেন হর উদুগিচ্ ভুরকৗ ইপিল মা হেঁগে; মিৎ মারাং খেলোডিয়ৗ আর দিসম লৗউড়িয়ৗ লেকাতেহঁ অসামভেড় এনেম এ দহ অটো আকাদা।
১৯০৩ সাল রেয়াঃ ৩ জানুয়ারি জয়পাল সিং মুন্ডা দয় জানাম লেনা খুঁটি জেলা (পৗহিল দ রাঁচি জেলা) রেয়াঃ টকরৗ আতোরে। গিদ্রৗ খনগে উনিদ আডি লাসের হাতাং আন পৗঠুওয়ৗয় তাঁহেকানা। অনা লেকারে জয়পাল সিং মুন্ডা দ ইংল্যান্ড রে সেন কাতে পাড়হাঃ রেয়াঃ অৗত এ ঞাম লেদা। অক্সফোর্ড বিশ্ববিদ্যালয় রেয়াঃ সেন্ট জনস্ কলেজ খন ১৯২৬ সালরে উনিদ বি.এ. অনার্স (ইকোনমিক্স) এ পাস লেদা। অনডে মুখিয়ৗ আর অক্সফোর্ড ভারতীয় মজলিশ রেন প্রেসিডেন্ট এ বাছাও লেন তাঁহেনা। অনডে তাঁহেন উনিদ সি.এফ.এন্ড্রজ.অ্যানি বেসেন্ট , লালা লাজপত রায় এমান ঞুতুমান ভারতীয় কো সাঁও এ গাতে লেনা।
অনাকাতে ১৯২৭ সালরে উনিদ ইন্ডিয়ান সিভিল সার্ভিস (ICS) বিউটি রেয় পাস লেদা। মেনখান নেতাজী সুভাষ চন্দ্র বসু লেকা সরকারি রেদ বায় বাহাল লেনা। বিচকম, হকি খেলোড রেয় সেলেৎ এনা আর সরেস খেলোডিয়ৗ লেকাতে ‘অক্সফোর্ডব্লু’ মৗন হামেট লেৎ তাঁহেনা। ১৯২৮ সালরে জয়পাল সিংদ ভারতীয় হকি দল রেন ক্যাপ্টেন এ হোয় লেনা আর দিশম রেয়াঃ মৗন–মহৎ ধৗরতি রেয় পাসনাও লেদা।
মেনখান দিশম রেন আদিবাসী আর রেঁগেচ্ নাচার হড়কো লৗগিৎ জিউয়ি লঃ কান তায় তাঁহেন। অনা বিদৗল ছোটনাগপুর উন্নতি সমাজরেন পৗঠুওয়ৗকো আদিবাসী কো লৗগিৎ জুদৗ রাজ্যকো দাবিয়েৎ তাঁহে। ১৯৩৮ সালরে অনা দ ‘আদিবাসী মহাসভা’ লেকাতে ছৗটিয়ৗর এন খান জয়পাল সিং মুন্ডা দ অনারেন মারাং গমকে লেকাতে আঁগিভার এ গঃ কেদা।
এহপ্ এনা উনিয়াঃ নাওয়া তাড়াম। দিসম ফুরগৗল তায়ম সংবিধান বেবেনাও কৗমিরে মড়ে গটেন আদিবাসী প্রতিনিধি কো দহলেৎ কোওয়া। ওনকো মুদ্রে মিৎ ঞুতুমান রৗসিয়ৗ দয় তাঁহেকানা জয়পাল সিং মুন্ডা উনি দ সংবিধান রে “আদিবাসী” কাথা সেলেদ্ রেয়াঃ এ দাবী লেদা। মেনখান কমিটি রেন রৗসিয়ৗকো অনা বাংকো বাতাও লেদা। খান ১ জানুয়ারী ১৯৫০ হিলোঃ “আদিবাসী মহাসভা” দ ঝাড়খন্ড পার্টী” মেনতে ঞুতুম এনা। ১৯৫২ সাল রেয়াঃ সাধারন নির্বাচন রে ঝাড়খন্ড পার্টীরেন ৩২ গটেন এম.এল.এ. আর পেয়া এম.পি. কো জিতৗ ও এনা- জয়পাল সিং আঃ আয়ুরতে। নুনৗ কাতে রেহঁ এটাঃ কোওয়াঃ ফেরকৗটিতে জয়পাল সিং দ ১৯৬৩ সালরে ঝাড়খন্ড পার্টী দ কংগ্রেস দল রেয় মেসা কেদা। নংকা কাতে আদিবাসী কোওয়াঃ জুমিৎ আঁদোড় দ তালা হররে ছিতিবিতি এনা। তায়মতে আয়াঃ হঁ জিউয়ি মঁডঃ মঁডঃ লঃ এহপ্ এনা। নংকা কাতে ১৯৭০ সাল রেয়াঃ ২০ মার্চ মারাং গমকে জয়পাল সিং মুন্ডা দয় দাঃ দড়ম এনা।
দিসম ফুরগৗল কাতে ৫৩ সেরমা তায়ম জয়পাল সিং আঃ কুকমুদ সারিয়েনা। ২০০০ সালরে ঝাড়খন্ড রাজ্য দ তেয়ার এনা। মেনখান আদিবাসী কোওয়াঃ আস আর কুক্মু দ নিত হঁ বাং পুরুন আকানা।
নিত হঁ হয়রে রিমিল রে আড়াং তাকের’ কানা- “মারাং গমকে জয়পাল সিং মুন্ডা, জায় জুগ জিউয়েৎ তাঁহেন মে, তাঁহেন মে।
.webp)
.webp)
