(হুডিঞ কৗহ্নি)
চাঁদো হাঁসুরঃ অক্তে
-বাড়তাং সরেন
রুপি দ ডাহার আড়ে মিৎ জজদারে বুটৗরে গৗডিয় তিঙ্গু কেদা। অফিস খন তেহেঞ দ উশৗরাতেয় অডক আকানা। চেদাঃ চ তেহেঞ দ সেতাঃ খনগে মনে জিউয়ীরে চেৎ লেকা চয় আটকার এদা। অনাতে অফিস রেনাঃ ফাইল বাং সই চাবা কাতেঃ গেয় অডক হেচ এনা। গৗডি ভিতরী খনগে চাঁদো হাঁসুরঃ সেচ এ কয়ঃ কেদা রুপি। জরং জরং আরাঃ বাড়ে বিলি লেকা সিঞ চাঁদোয় হাঁসুরঃ লৗগিৎ। বৗইহৗড় তালা হরতে নাওয়া নাওয়া হরঃ বাঁদে আতে বহঃরে সাঁদেশ দিপিল কাতেঃ মিৎ জড় জুরিপৗরি পান্তে কাতেঃ কিন তাড়াম ইদিয়েদা। মিৎ হুডিঞ বাবু গিদরৗ তৗকিন দ লাহা লাহাতে মিহু হপন লেকা রৗস্কৗতে দন দনতেয় দৗড় লাহাঃ কানা। মিৎ বার ধাও দ ডাহার আড়ে সোনা বিদলৗয় সাসাং তুড়ি বাহায় জাঃ জটেৎ এদা আয়াঃ লৗবিৎ লৗবিৎ তি কৗটুপ্ তে। সাঁঙ্গিঞ আতোটলা খন সহরায় রাহাতে রৗ স্কৗগে তুমদাঃ টামাক রেনাঃ সাডে আঁজম হিজুঃকানা। অনাকো ঞেলতে আর আঁজমতে রুপিয়াঃ জিউয়ীদ ল গদ্ এনতায়া। মন অন্তরে রাঃ হমর কেৎ তায়া।
তেহেঞ খন গেল তুরুয় সেরমা লাহারে চেৎ চং চেৎ আশতে এগাঁত আপাতাঃ মানা কাথা কলসা লটম কাতেঃ সুমন আঃ তি সাপ কাতেঃ অড়াঃ খনে অডং হেচ লেনা রুপি। উন দ এনেগে রুপি M.A এ পাশ আকাদা। সুমন হঁ আচ্ সাঁওতেগেয় পাড়হাঃকান তাহেঁনা। চাকরী ঞাম লাহারেগে অড়াঃহড় বাং বাডায় ওচোকাতেঃ কিন আঙ্গির লেনা। বঙ্গাথানরে বাপলা কাতেঃ সুমন আর রুপি যখন বহরমপুর তেকিন সেন এনা, উন দ সুমন এগাঁত আপাত তৗকিন রুপি দ বৗহু মেনতে বাংকিন মানাও বাতাও লেদেয়া, চেদাঃসে, রুপি দ মিৎ সান্তাড় তিরলৗ কানায়। মিৎ সান্তাড় কুড়ি হপন তিস হঁ বাঁমড়েঁ অড়াঃরেন বৗহু বায় হুয় দাড়েয়াঃ আ,সুমন এগাঁত আপাত দ পুষ্টৗও তেকিন লৗই কেদা। অড়াঃরে ঠাঁই বাংকিন ঞাম লেৎতে সুমন আর রুপি তৗকিন দ ভাড়া অড়াঃরে তাহেঁকিন এহপ লেদা। M.A পাশ কড়া সুমন দ টিউশন পাড়হাও এ ধুরৗও এনা। আর অনকা তেগে রুপি আর সুমন দ মিৎ লেকা জিয়ন কিন খান্ডাওয়েৎ কান তাঁহেনা। বার সেরমা ভিতরীরে রুপি দ সরকারি চাকরীরেয় বাহাল লেনা। হাওড়া জিলৗরে পৗহিল পোষ্টিং। রুপিয়াঃ চাকরী আর সুমনাঃ প্রাইভেট টিউশন আতে উনকিন দ নাপায়গে কিন তাঁহেকানা। আচকাগে সুমন এক্সিডেন্ট তেয় বঙ্গাতালায়েন খান রুপি দ দাঃ দরয়া রেয় ঞুঁরুয়েনা। হান্তে এগাঁত আপাত সাঁও সৗগৗই শিকড়ি হঁ যায়যুগ লেকায় তপাঃ আকাদা লাহারে। বুকৗতপা ঠাঁও, মুরুৎ ঘুটু আতো অড়াঃ রুয়ৗড় সেনঃ হর ডাহারে আৎ উতৗ র আকাদা। হান্তে অফিসরে, ফ্লাট করেহঁ রুপি দ নানা পারকান আড়িস গেকো রড় সিঁড়িঁচেয়া উকু দানাংখন। অফিস রেহঁ ঠিক সাঁহিচ মৗন বৗনুঃতায়া। নেতার দ প্রোমোশন ঞাম কাতে বর্ধমানরে পোষ্টিং হুয় আকান তায়া। এনতেরেহঁ রুপিয়াঃ মনে জিউয়ীরে মিৎ ডঁডে রৗস্কৗ বৗনুঃ আ,সুক বৗনুঃ তায়া।
তেহেঞ হরতে তাড়াম চালাঃ উনকিন জুরিপৗরি ঞেলতে আচ এগাঁত আপাতাঃ কাথা আডিয় দিশৗ রুয়ৗড় এদা। ঘারঞ্জরেন মিৎ সুমুং কুড়ি, তিনৗঃ কিন দুলৗড় লেদেয়া। জম ঞু চেৎ রেগে আনাট বাং তাঁহেকানা। আচ আপাত, মুসুচ মাষ্টার দ আডি নাপায়তে অলঃ এ সেঁড়া ওচো লেদেয়া। মেনখান, হারাগদঃ জুয়ৗন অক্তেরে আচকাগে মিৎ কংকা 'হয় ভারডো' রূপি দ এগাঁত আপাতাঃ দুলৗড় আঞ্চার খনে হয় অটাং লেদেয়া আর দুখ দরয়ারেয় চাপাৎ খাঁজো লেদেয়া। অনাকো কাথা দিশৗ কাতেঃ মনে কাঁহিসতে রুপি দ আয়াঃ গৗডিরেনাঃ স্টেয়ারিংরে বহঃ তৗকিচ এ ধুরৗও এনা। রুপি চাঁদো হাঁসুরঃ সেচ এ কয়ঃকেদা। হাঁসুরঃ কান চাঁদো তারাসতে হাসা ডাহার দ আরাঃগে ঞেলঃ কানা। অনা ডাহার দ অৗচুর অৗচুরতে আকো মুরুৎ ঘুটু আতো সেচ লাহা চালাও আকানা। আর মিৎ ধাও অন্তেয় কয়ঃ কেদা। সাঁঙ্গিঞরেনাঃ দারে নৗড়ীকো গৗদুজ আয় কানা। রুপি দ কৗটিচ গিদরৗ লেকা হেঁকৎ হেঁকৎ রাঃ রাঃ এ ধুরৗও এনা। মিৎ ঘৗড়িচ্ তায়ম বেড়ায় হাঁসুরেনা।
.webp)
.webp)
