আবোওয়াঃ ওয়েব পেজ- “পাঞ্চেৎ বুরু ঞালাঃ ঞালাঃ পান্তে
তেলাং দুড়ুপ্ আকান, চেদাঃ জুরি মেৎদাঃম জরয়েৎ”- নংকাগে আডি সেদায় খনগে পাঞ্চেৎ বুরু
লৗইতে আথান সেরেঞ মেনাঃ আকাদা। মেনখান নিত্ কুক্লি রাকাপ কানা সৗরিগে তেহেঞ অনা পাঞ্চেৎ
বুরু ইদিকাতে সানতাড় হড়-হপনাঃ রারাঃ হোয়োঃ কান তাকোওয়া ? সে হাপেন রাঃরাঃ হোয়োঃ তাকোওয়াঃ
? সে পাঞ্চেৎ বুরু রেনাঃ সারজম সাকাম বাংতে বাহা-সহরায় গে বৗগি লাগাও কোওয়া ? সে পাঞ্চেৎ
বুরু রেনাঃ হক্-আইদৗর ঞাম লৗগিৎ তে সেদায় লেকা কুল-বানা বদলতে আরহঁ মিৎ ধাও নিৎ সরকার
সাঁও লৗড়হৗই-তাপাম হোয়োঃ তাকোওয়া? নিত্ নংকান আয়মা কুক্লি গে একেন পাঞ্চেৎ বুরু ধাসনা
এলাকারেন হড়-হপনাঃ দ বাং কানা। তবে চেৎ তামাম আদিবাসী কোঠেন গে বতর আনা দিন সেটেরঃ
কানা ? নংকাগে আদিবাসী মহলরে বুরধি জীবি কো তালারেহঁ নংকান কাথাকো গুরলৗও বাডায় কানা।
সেদায় লেকাগে নেশহঁ পারমেন ২৩ ডিসেম্বর হিলঃ পাঞ্চেৎ বুরু সোর-সোপোর এলাকারেন তিরলৗকো দারায়কান সহরায় বাখরা বুরু খন সারজম সাকাম আগুকো চালাও লেনা। মেনখান ফরেস্ট গার্ড ঠেন কো আটক অচ লেনা। বাডায় আকানা ওনকো দুঃ লৗগিৎ গে সমাজ সুসৗরিয়ৗ রাজেন টুডুয় ঞির সেন লেনা। মেনখান কৗমি অক্ত রেন মিৎ বিট অফিসার আঃ মনে হুয়েন তায়া বাংমা রাজেন টুডু দ বুরু আইন এ নাশাও এদা। অনাতে থানারে এফ আই আর রেনাঃ হুমকিয় এমাদেয়া। আর অনা হুমকি বিরুধরে আর বুরু আইন বাঞ্চাও লৗগিৎ ২৯ ডিসেম্বর হিলঃ পুরুলিয়া জেলা নিতুড়িয়া থানা রেয়াঃ গোবাগ মোড়রে ভারত জাকাত মাঝি পারগানা যুওয়ৗন মহল পাহ্টা খন মিৎ রাঁগাওনা জমেলায় হুয় পারমেনা। অনা জমেলায়রে হাজার হাজার দিশুওয়ৗ সুসৗরিয়ৗ রাজেন টুডু সোর রেকো তিঁগুয়েনা। সাঁওতে অনা আখড়ারে প্রকৃতিবাদী সৌরভ, ভারত জাকাত মাঝি পারগানা মহলরেন জেলা পারগানা বাবা মানতান রতন লাল হাঁসদা, বাঁকুড়া জেলা গোডেৎ মানতান বিপ্লব সরেন এমান আয়মা গোমকে কো ঞির সেটের লেনা।
ইনৗ হিলোঃ রাঁগাওনা জমেলায় খনগে দাবী রাকাপ্ এনা বাংমা যুওয়ৗন
মহলরেন সভাপতি মানতান রাজেন টুডুওয়াঃ বিরুধরে পেঁদলা অভিযোগ আগুওয়ৗন হড়কো লগন পাকড়াও
হোয়োঃ মা, পেঁদলা অভিযোগ আগুওয়াকাৎ নিতুড়িয়া বিট অফিসার আডি লগনতে বরখাস্ত করাও হোয়োমা,
আদিবাসী কোওয়াঃ বুরু আইন-২০০৬ বৗতিল কাতে আদিবাসীকো চেতান জোর-জুলুম বাং চালাঃআ।
সেটের লেন বাঁকুড়া জেলা গোডেৎ বাবা মানতান বিপ্লব সরেন এ লৗই
কেদা বাংমা আদিবাসীকো আদ বির-বুরু বাং বলন অচয় রেনাঃ মিৎ চক্রান্ত চালাঃ কানা, রাজেন
টুডু লেকান আদিবাসী রেন লৗউড়িয়ৗকো বিরুধ রেঁহ নানাহুনৗর বাহ্না কাতে আদিবাসী কোওয়াঃ
হক্-আইদৗর ঞাম রেনাঃ আঁদোড় বানচাল কাঃ রেনাঃ ষড়যন্ত্র চালাঃ কানা। মানতান সরেন ওনকো
বুরুরেন বিট অফিসার, রেঞ্জ অফিসারকো হুঁশিয়ৗরী এম কাতে এ লৗই কেদা বাংমা রাজেন টুডু
বিরুধরে এফ.আই.আর. হুয় লেনখান একেন পুরুলিয়া সুমুংদ বাং বাঁকুড়া,মেদিনীপুর,ঝাড়গ্রাম
জঙ্গলমহল খন এহব কাতে গটা পছিম বাংলারে হুলসৗই রেনাঃ আঁদোড় কো আগুয়া।
ইনাহিলোঃ রেনাঃ রাঁগাওনা জমেলায় ঞেলতে, তুমদা, টামাক, রেগড়া,ঘন্টা,
সাঁকোওয়া সাডেতে আর দিশুওয়ৗ কোওয়াঃ গারজাওতে গটা পাঞ্চেৎ বুরু রেন জীব জিয়ৗলিকো
সাঁওতে অনা এলাকারেন আয়মা হড় গে আর মিৎ ধাও আদিবাসী কোওয়াঃ জুমিৎ কো আঁগচ্ কেদা।
.webp)
.webp)
