আবোওয়াঃ ওয়েব পেজ- পুরুলিয়া জেলা রে সান্তাড়ি এলাকা করেনাঃ ইস্কুল করে ল্যাঙ্গুয়েজ লেকাতে সান্তাড়ি সাতাম চৗ লুয় লৗগিৎ ৮ অক্টোবর হিলো জেলা ডি.আই. সাহেব পাহটা খন সানাম জুনিয়র হাই ইস্কুল, হাই ইস্কুল আর হায়ার সেকেন্ডারী ইস্কুল করে মিৎ আরদাশ সাকাম এ ভেজা আকাদা। নোওয়া আরদাশ সাকাম তালাতে বাডায় আকানা বাংমা ইস্কুল করেন মুড়ুৎ মাচেৎ কঠেন আকোওয়াঃ ইস্কুল রে ল্যাঙ্গুয়েজ লেকাতে সান্তাড়ি সাতাম চৗলু রেনাঃ প্রস্তাব সদর লৗগিৎ আরজি দহ হুয় আকানা।
নোওয়া ডগর বাডায় কাতে পুরুলিয়া জেলা আড়ষা থানারে মেনাঃ কান্টাডি “সনত্ তারাস” ক্লাব রেন রৗসিয়ৗ কো আপনার এলাকারেনাঃ ইস্কুল করে সাঁঘার কো এহব গৎ আকাদা। বাডায় আকানা বাংমা ইস্কুল চালাও কাতে ইস্কুল রেন মুড়ুৎ মাচেৎ সাঁও ঞাপাম কাতে ল্যাঙ্গুয়েজ লেকাতে সান্তাড়ি সাতাম চৗলুয় বাবদ্ তে তলাশ কো হাতাও এদা। আর মুড়ুৎ মাচেৎ ঠেন খন উনিয়াঃ মতামত হঁক হাতাও তরায় এদা। সাঁওতে নোওয়াহঁ বাডায় আকানা বাংমা এলাকারেনাঃ ডিমান্ড লেকাতে অভিভাবক আঃ সই-সৗবুদ্ হঁ মুড়ুৎ মাচেৎ কো চাল হট আয় কানা।
নংকাগে হলা ৪ নভেম্ববর ‘সনত্ তারাস’ রেন রৗসিয়ৗ কো কান্টাডি আর পুয়াড়া হাই ইস্কুল কো সাঁঘার কেদা মেন্তে বাডায় আকানা। কান্টাডি হাই ইস্কুল রেন মুড়ুৎ মাচেৎ বায় তাঁহে লেনরে, মুড়ুৎ মাচেৎ আঃ কাথা লেকাতেগে অনা ইস্কুল রেন আর মিৎ মাচেৎ বীরেন্দ্র নাথ কুইরী গোমকে ঠেন আকোওয়াঃ দাবী সাকাম কো চাল অট আদেয়া। মেনখান পুয়াড়া হাই স্কুল রেন মুড়ুৎ মাচেৎ দ ইস্কুল পরিকাঠমো আর মাচেৎ বাং রেনাঃ এ বাহ্না কেদা মেন্তে বাডায় আকানা। নংকান বাহ্না কাথা মিৎ-বার মুড়ুৎ মাচেৎ ঠেন খন ঞামঃ আ, অনা কাথদ মাড়াং খনগে রৗসিয়ৗ কোওয়াঃ বাডায় তাঁহেকানা, অনাতে তারাস রেন রৗসিয়ৗ কো মাচেৎ আর পৗঠুওয়ৗ করেনাঃ আনাট রে ইস্কুল সানাম লেকানাঃ গড় কো এমায়া মেনতে অনা ইস্কুল রেন মুড়ুৎ মাচেৎ কাথাকো এমা দেয়া। অনালেকাতে নোওয়াকো ইস্কুল সাঁঘার খৗতির আডিগান কৗমিহরা লাহাঃ কানা মেন্তে ক্লাব রেন রৗসিয়ৗ কো আবোরেন খবরিয়ৗ কো বাডায় অচ আকাদেয়া।
“সনত্ তারাস” পাহ্টা খন নোওয়া সাঁঘার রে মানতান বুদ্ধেশ্বর বাস্কে ( সেক্রেটারী), ঠাকুর দাস সরেন,মহেশ মুরমু, রঞ্জিত কিস্কু, শোভারাম টুডু, অক্ষয় হেম্ব্রম, শত্রুঘ্ন টুডু, সমীর মান্ডি, ধর্মেন্দ্র হেম্ব্রম আর সঞ্জিত মুরমু, এমান গম্কে কো সেটের তাঁহেলেনা মেনতে বাডায় আকানা।
.webp)
