সহরায় পরব - এনাং আর নিত্ (মুচৗৎ হৗটিঞ)
 |
মহাদেব হাঁসদা |
আহিবৗহি সহরায় পরব রেয়াঃ জতখনাঃ রৗস্কৗ রেনাঃ দিন দ কানা জালে। জালে হিলোঃ দ আটাল আটাল গেলবার আটাল কড়াকুড়ি কুলহি রেক আঁগা আয়ুবা। অকয় কদ কুলহি কুলহিতে লেওএর কদর কো সেরেঞ জংআ অকয় কদ ঞহড় ঞহড় তিরয়ো বানাম আতে হেসেচ্ সেকেচ্ কো এনেচ্ জংআ, আরহঁ অকয় কদ অড়াঃ ভিতরিরে রৗস্কৗ গেক’ গুঁদুর গুঁদুরঃ আ। ডানটা গলওয়ার, মাতওয়ার, রিঁজৗ, ডাহার, লাঁগড়ে, দুরুমজাঃ, সাড়পা এমান নানাহুনৗর এনেচ্ সেরেঞ তে কুলহি ডাহার কো আঁদোড় চাবা কাঃআ, কাথাচ্ কুলহি কুলহিতে রৗস্কৗ রেয়াঃ ঝারনা লিঁগিন কান লেকা। এনেচ্ আর সেরেঞ তিনাঃ এম ঞেল, নওয়াকো উনাঃগে ঞেঞেল সানওয়া। মুচৗৎ অড়াঃ রেদ’ ডানটা কো এনেচ্-সেরেঞা।
আদম আদম টঠারে সহরায়রে আর ফিরিয়াতেৎ ফৗদ সে পৗইচাহা দন হঁ হোয়োঃ আ। ফৗদ দন রু রেয়াঃ তাড়তে হেড়ান হাহাড়াঃ লৗড়হৗই রেয়াঃ এনেচ্ কান লেকা বুঝাঃ আ। অনকাগে সাড়পা রেদ তুমদাঃ টামাক বাং কাতে করতাল, সেকেচ্ আর সাড়পারে্যাঃ তাড়তে তিরয়ো বানাম রেয়াঃ রাহা জুরি কাতে কড়া কুড়ি ক ক এনেচ্ সুলৗং জং আ। সৗরিগে সহরায় রে তিনাঃ লেকান এনেচ্ সেরেঞ, তিনৗ লেকান রৗস্কৗ রমজ মেনাঃ আকাদা অনাদ লৗই তেহঁ বাং লায়োঃ আ। হাড়াম বুঢিয়াকান হড় ইনৗ হিলোঃ নৗই অড়াঃ কো হৗনি অড়াঃ কো জালে ইদিয়া।
মুচৗৎ রেয়াঃ কাথা – জুগ বদলঃ কানা, অনা সাঁওতে সমাজ হঁ। অনা লেকারে সহরায় রেয়াঃ আরিচৗলি, বঁগাবুরু,এনেচ্ সেরেঞ এমান জতওয়াগে বদল ইদিঃ কানা। মড়ে সিঞ মড়ে ঞিদৗ রেয়াঃ সহরায় নেতার দ পে মাহারে তিঁগুওয়াকানা। সেরেঞ কহঁ আৎ ইদিঃ কানা। মিমিৎ টঠারে মিমিৎ লেকা সহরায় হোয়োঃ কানা। অনা সাঁওতে নিতঃ দ আতো খন সাহারে বাজার সাহার রেহঁ আয়মা হড়বোন গিরৗবৗসিয়াকানা আর বাজার সাহার রেয়াঃ আরিচৗলি কহঁ আতো দিসম তে অরসং হিজূঃ কানা। অনা লেকাতে সহরায় ঞতুমতে গৗই চুমৗওড়া, গৗই জাগাও, রাচা অলঃ, খুনটৗও কদ বৗই বৗইতে আৎ ইদিঃ কানা। আদঃ রেয়াঃ কাথা গে। এনতেরেহঁ সহরায় দ সহরায় গে। জতখনাঃ মারাং পরব মেনতে নিতঃ হঁ দিসৗ হিজুঃ আ। মেনখান উইহৗর হোয়োঃ তাবোনা, নওয়া ক সেরেঞ চিকৗলেকা রেবোন তুমৗল দহয়া, আর অনাবোন সাব্ দহয়া। সহরায় রেয়াঃ রৗস্কৗ জত হড় ঠেন নিতঃ হঁবন চাল দাড়েয়াঃ আ। নাঁওয়া জুগ সাঁও তাল দহ কাতে নাওয়া লেকাতে মিৎ সাঁওতে সানাম টঠারে সহরায় পরব হোয় লেনখান অনা রেনাঃ মৗন আর মৗহিমা দ আরতেৎ বৗড়তি কঃআ।
.webp)
