হুডিঞ কৗহ্নী
সহরায় নেঁওতারে
দুর্গাচরণ মুরমু
দুর্গাচরণ মুরমু
হাতি লেকান সৗরি সহরায় পরব দারায় কানা। অনাতে অড়াঃ দুয়ৗর ভিৎ পিন্ডৗ পতা জেড়ের সানাম আতো করে সৗরদি আকানা। অক্ত বৗনু:আনা আথৗড়ি কাথা আজম রেনা: বৗহু বিটি দৗই-মৗই,হপন গ-মারাং গ, হন কিমিন,কৗকী- হাতম তাকোওয়া। আপান আপিন আকোরেন দৗই-তেয়াং,হাতম-কুমৗং,ভৗগনৗ-ভৗগনী ঠেন সহরায় নেঁওতা চালা: কানা।সুসৗর আচ্ আয়ো দ হলা-মাহেদের খন সুসৗর এ মেতায় কানা- বৗবু,সহরায় পবর সেটেরগ তে আর মিৎ হাপ্তাহঁ বৗনু:আ আম দৗই তিকিন সহরায় নেঁওতা আগুকিন মে। সুসৗর দ এলাকারেন ঞুতুমান ফুটবল এনেচ্ খিলডিয়ৗ কানায়, নিয়ৗ অক্তমা ফুটবল এনেচ্ রেনা: সিজিনহঁ কানা। দিনৗম হিলো:গে সুর-সাঁগিঞ আতো করে মিৎ মাহা রেনা: ফুটবল গুড়দৗও হেপরাও হুযুগ কানা। সেতাগরে বাইকতে অড়া: খনে উডুগ:আ আর তালা আধা ঞিদৗ অড়া: এ রুওয়ৗড় খানে রুওয়ৗড়া আর বাং খান অন্তে রেগেয় বাসায়েন গে। অনাতে সহরায় নেওতা চালাঃ রেনাঃ অবসর গে বাং হুয়ুগ কান তায়া।
এটাঃ সের্মা দ সুসৗর আচ্ বাবা গে সহরায় নেওতায় চালা: কান তাঁহে বানার হপন এরা আর মিৎ সাধের মিসরৗ ঠেন। নেসদ্ ম্যালেরিয়ৗ রুয়ৗ রে আয়মা দিনে গহড় এনা, নিতহঁ হড়মো জিউয়ীরে নাসেহঁ দাড়ে বাং এ আউকৗও দা। অনাতে সুসৗর গে চালা: হুয়ুগ কান তায়া সহরায় নেঁওতা।
বৗসিয়াম্ দাকা জম্ কাতে সুসৗর দ সহরায় নেওতায় উডুক এনা বাইক তে লগন ধারা গে, সিঁগৗড় অক্তে মারাং দৗই-তেয়াঞ অড়া:এ সেটের এনা। আডি দিন তায়ম তেয়াঞ অড়াঃ হেচ্ আকান তে আচ্ দৗই রেন ইরিল কুড়ি ক জাগে ক তাহে কানা ভাই-ভায়াদ রেন জত ক সেটেরেনা আজম তরা গে,আচ্ছা কাজাগ সাঁহিজ ক কাটকম কেদেয়া, আডি ঘৗড়িচ আড়াগ গে বাং আড়া: লেদেয়া। অনা তায়ম সুসৗর দ সাঙ্গাৎ কুড়ি ক সাওতে আডি রৗস্কৗ রমজ এ থুঁতি বাড়ায় কানা।
নতে সুসৗর আচ্ তেয়াঞ দ সহরায় নেওতা বাখরা আরা: সান্ডি দয় থাপা গচ্ কেদেয়া আর বেনাও কাতে মাতকম রাসা-সিম জিল চাখনা দকিন আড়তি জং না। ঞু ঞুতে আডি গেয় নেসা আকানা সুসৗর দ তিঙ্গু টারহাও গে বায় দাড়েগ কানা ভাগি সাঁহিচ আর আচ্ তেয়াঞ এ মেতায় কানা- "এ হো তেয়াঞ, গাপা ফুটবল খেলোড মেনাগ তিঞৗ জামশেদপুর রে অনাতে তেহেঞ গে হপন দৗই হঁঞ নেওতা তরা কায়া। এনাং তিকিন রে ফুন কাতে হপন দৗই ইঞ লৗই আকাদেয়া চালাঃ কৗনিঞ মেনতে।"
সুসৗর আচ্ দৗই অনা কাথা আঁজমকেৎ খান গে সুসৗর এ মেতা দেয়া- এ বাবু, তেহেঞ দ আলো গেম চালাঃ আ আডিম বুল আকানা আর ঞিদৗ হঁ ঞিদৗ ইদি: কানাঃ গাপা সেতাঃ এম চালা:আ।
সুসৗর এ মেন রুওয়ৗড় কেদা-" নোওয়া নেসা দ বাইক রে দেজ্ লেনখান গে, হড়মো রে হয় বাজাও লেখান গে চাবাঃ আ! আপে দ টেনসন্ আলো পে হাতাও সে।"
অনা ক মেন কাতে গে বাইক স্টাট কাতেয় মহডায় এনায়। সুসৗর আচ্ মারাং তেয়াং আক্ আতু খন ঝারিবৗইদ বাইক তে চালাঃ আধা ঘন্টা গান অক্ত লাগা:আ। ঝারিবৗইদ রেদ্ সুসৗর আচ্ হপন দৗই তেয়াং অড়াঃ। সুসৗর এ উডুগেন সাঁও সাঁওতেগে সুসৗর আচ্ মারাং দৗই দ আডি ধাওগে ঝারিবৗইদ এ ফুন লেদা , উনকুওয়াঃ নাম্বার রে সুইচ্ অফ গেয় মেন্দা। সুসৗর মা মানা বারন কাথা বায় আঁজম লেদা, চালাও এন গেয়ায়। মিৎ ঘন্টা তায়ম সুসৗর আচ্ দৗই দ্ সুসৗর গেয় ফুন আদেয়া, সুসৗর ফুন বায় রাকাব লেদা আরঁহয় ফুন আদেয়া, বাংগেয় রাকাব লেদা। নতে সুসৗর আচ্ দৗই তেয়াং মা আডি ভাবনা রেকিন পাড়াও এনা। ভাবনা তে ঞিদৗ মেৎ রে জৗপিদ গে বাং হিজুঃ কান তৗকিনা। জাহা লেকা কাতে ঞিদৗ দ আঙ্গায়েন গেয়া। সেতাঃ ভোর রে সুসৗর আচ্ তেয়াং দ ঝারিবৗইদ চালা: লৗগিৎ উডুক এনা পুনিয়া-মড়ে গটাং আতো পারম তেগে বেড়ায় রাকাবেন এনা। হরতে চালাঃ অক্তে মিৎ জায়গা রে ঞেলেৎ কোওয়ায় আডিগান হড়কো জারওয়া আকানা। উনকু হড়কো ঞেলতে আচ্হঁয় তিঙ্গুয়েনা। ঞেলেয়ায় সুসৗর এ এক্সিডেন্ট আকানা। ঞেল কাতেৎ বহগ গে আচুরেন তায়া। মেৎ খনাঃ মেৎ দাঃ জর্ এন তায়া । মিৎ তিতে সুসৗর এ হৗড়ুব কেদেয়া আর রাঃ রাঃ তেয় মেমেন কানা-- মানা বারণ কাথা চেদাঃ বাম আজম লেদা হো! যুদিম আজম লেখান তেহেঞ নংকা দ বাং হুয় কঃআ হো ………….!
.webp)
