(পি.ও. বোডিং আঃ জানাম মাহা দিসৗ কাতে)
পৗরসি পিয়ো রেভাঃ পি.ও. বোডিং
মহাদেব হাঁসদা
মিশনারি কো মুদ্রে জাঁহায় দ জত খন ঢের সানতালি পৗরসিয় চারচা আকাদা, উনিদ দ কানায় রেভাঃ পি.ও. বোডিং। আসল ঞুতুম তায় দ পল ওলাভ বোডিং।
জানাম তায় দ ১৮৬৫ সাল রেয়া ২ নভেম্বর, নরওয়ে রেয়াঃ জজনমিক বাজাররে। ধরম পাপাসানাওয়িচ্ লেকাতে উনিদ ভারত তেয় হেচ্ লেনা-১৮৯০ সাল রেয়াঃ ১৬ জানুয়ারি আর সাঁওতাল পরগনা রেয়াঃ মহুল পাহাড়ি মিশন রে আয়াঃ কৗ মিয় এহপ্ লেদা অনা বিদৗল বেনাগৗড়িয়া মিশন রে রেভাঃ এল.ও.স্ক্রেকস্রুড এ কৗমি কান তাঁহেনা; জাঁহায় দ কেরাপ্ সাহেব ঞুতুমতে হড়কো বাহ্না লেদে; উনিয়ৗঃ উদ্গৗওতে বোডিং সাহেব দ সানতালি পৗরসি রেয়াঃ চারচায় এহপ্ লেনা। অনা সেরমাগে, মেতাঃমে, ১৮৯০ সাল রেয়াঃ মে চাঁদো খন কেরাপ সাহেব দ – ‘হড় হপন রেন পেড়া’ ঞুতুমতে মিৎটাং সানতালি পত্রিকায় উছৗনেৎ তাঁহেনা। তায়মতেদ বোডিং সাহেব গে অনারেন সাসাপড়াওয়িচ্ আঃ আঁগিভারে চাল আদে তাঁহেনা। ১৯০৪ সাল হৗবিচ্ অনা পত্রিকা দ উছৗন লেন তাঁহেনা।
বোডিং সাহেব মাড়াং সেচ্দ বাইবেল রেয়াঃ নাঁওয়া নিয়ম (১৯০৬), মারে নিয়ম (১৯১৪), গির্জা ধারা (১৯১৭) এমান সানতালি তেয় তরজমা লেদা। মেনখান তায়মতেদ সানতালি পৗরসি রেয়াঃ রনড়-আরি, কাথা গাবান, সনদর হরা, পৗরসি তেয়াঃ গুণমান সে তেতেৎ এমান তুনখি-তলাস লৗগিৎ মনে লাওয়ের এন তায়া। অনা সাঁওতে সেরেঞ, বিনতি, কৗহ্নি কুদুম, সমাজ রেয়াঃ আরিচৗলি, লেগচার, নেমাচার এমান তুমৗল খঁদরঁদ কৗমিরেয় লাবাধিয়ৗও এনা।
বোডিং সাহেবাঃ উছৗন আকান ঞুমান পুঁথি কো মুদ্রে বারয়া গ্রামার মেনাঃ আকাদা। ঞুতুম দ- Santali Grammar for Beginers (1929) আর Materials for a Santali Grammar,Part –I (1922), Part-II (1929)। অনকাগে মড়ে হৗটিঞ আর এয়ায় হিঁসতে গাবান মিৎটেন ডিক্সনারি হঁ মেনাঃ আকাদা। ঞুতুম দ কানা- A Santal Dictionary,Vol-I (1932), Vol-II (1934), Vol-III (1935), Vol-IV (1935), আর Vol-V (1936), রে অনাদ উছৗন আকানা। নওয়ারেদ জততে চল্লিশ হাজার লেকা সাবাদ (শব্দ ভান্ডার ) মেনাঃ আকাদা- যাঁহা দ মিৎ অসামভেড় এনেম গে কানা। অনা বেগর, উনিয়াঃ আর আর পুঁথি কো দ হোয়োঃ কানা- 1. হড় কৗহ্নি কো (১৯২৪), 2. A Chapter of Santali Folk Lore (1924), 3. Santali Folk Tales- Part I (1925), Part II(1929) , Part III (1940), 4. Tradition and Institutions of the Santals(1942), 5. Studies in Santali Medicine and connected Folk Lore- Part I (1925), Part II (1927), Part III (1940)।
বোডিং সাহেব আয়াঃ নোওয়াকো অল বেল দ নরওয়ে রেয়াঃ অস্লো ইউনিভার্সিটি রে জোগাও কাতে দহ অটো আকাদা। ১৯৮৮ সালরে অঁডেখন মাইক্রোফ্লিম কাতে ১৩ হৗটিঞ তে আবো দিশম তে আগু হোয় আকানা আর কোলকাতারেয়াঃ এশিয়াটিক সোসাইটি, বিশ্বভারতী বিশ্ববিদ্যালয়, রাঁচি বিশ্ববিদ্যালয় আর Enthropological Servey of India Office রে দহ হোয় আকানা। তায়ম দারাম পৗঠুওয়ৗ আর খঁদরঁদিয়ৗ কো যেমন নঁডে খন গড় কো ঞাম দাড়েয়াঃ।
অনা পাহ্টা দ তাঁহে অচো। নিতদ উনি তুমৗলা সেদায় কৗহ্নি বাখরা তে বোন গালমারাও লেগে। বাডায় আকানা, বোডিং সাহেব দ ১৫৮৮ গটেন হড় কৗহ্নি তুমৗল লেৎ তাঁহেনা। নোওয়া কো কৗহ্নিয় তুমৗল লেৎ তাঁহেনা। নোওয়া কো কৗহ্নি রে দ তোয়ো,তৗরুপ্, কুল, বানা, চেমেঞ, কুলৗই এমান জিব-জিয়ৗলি সাঁওতে মৗনমিয়াঃ কাথা মেনাঃ আকাদা। অনকাগে ভূত,চুড়িন,রাকাস, ডৗন, জুগিন, বঁগা কড়া, বঁগা কুড়ি, জুগি এমান কো আতে নানাহুনৗর কৗহ্নি আডি মঁজগে গাবান আকানা।
(নোওয়া তায়ম দসার হৗটিঞ রে)
.webp)
