চনহাও

 চনহাও

আনন্দমোহন হেমব্রম

 হপনেরা জাঁওয়ায় গংকেত তাকওয়াঃ আতোতেয় সেটেরেনা। সাইকেলতে। তাড়ামতেরেন হড়, হররে বাঙে সেটের দাড়েয়াদেয়া। গিদৗর তায়দ নডেদ বাঙে হেচ আকানা সে চেতা! এনখান অকাতেয় সেনএনা? আচ মামা অড়াঃদ চেলেৎ বাঙে সেনঃআ। আজাঃ হাতম অড়াঃথর বাঙে সেনাকানা। অনাতে নডেয় হেচএনা সালদ।  

 নুই লেকান গিদৗরদ অকয় রেনহঁ বৗনুঃ কোওয়া জৗনিচ্। নুন মারাং গিদৗর হোয়কাতে চেৎহঁ বাঙে কৗমিয়ৗ। সালদ হাড়াম হড় হোয় কাতেরেহঁ জত লেকানাঃ, দুনয়ৗ রেনাঃএ কৗমিয়েদা। বারয়া ডাংরা তল মেনাঃকিনৗ, হপনতেৎদ বাংদ আতিংগেয় ইদিয়াকাৎ কিনৗ; বাংদ মিৎ চুপুৎ ঘাসগেয় ইরৗকাৎকিনা! হলা কিদুগঃ লাহা বার কাথা মেনতেগে সাল সাঁওতে হপন তেৎআঃ তাপাম হোয়েনা। আপাৎ হোয় কাতেরেহঁ আচগেয় দাল অচঃ কানতাঁহেৎ। তিয় অচঃকেদা মেনতে বাংখানদ তিগে দাল কাতেয় রৗপুৎ কাতায়কেয়া। 

সালওয়াঃ জাঁওয়ায় গংকেত তাকওয়াঃ ছাটকা বলঃ অক্ত কুলহিরে সালতাকিন আপাহন আচক সামাং দাপরামকিন ঞাপামেনা। মুলুচ লাঁদা সালাঃ সালদ আজাঃ সাইকেল লাগা নাসেয় থির ঞঃ কেদা। আর হলা বাংকি দুঃআকান, রেঁগেচ তেতাংতে তাড়াম লাঁগাওয়াকান হপনতেৎদ 'নডে জম আগু কেদেয়া!' মনে মনেতে মেমেন তুলুচ্ তুঁবুৎ কয়ঃকাতে আজাঃ তিয়াং অড়াঃতে লাহাতেয় বলয়েনা।