(পোয়লো হৗটিঞ তায়ম)
বিরসা মুন্ডা দিসৗতে
মহাদেব হাঁসদা
ধরম ঞুম কাতে উনিদ মুন্ডা জৗতি চিরগৗল কো লৗগিৎ নাওয়া ডাহারে সাপ্ কেদা। অনাদ নংকা- হাঁডি পৗউরৗ ঞু বাং গানঃ আ,ডৗন-ভূত-জুগিন রে পৗতিয়ৗও দহ বাং গানোঃ আ, বঁগা ঞুতুম তে দাঁড়ে এমঃ বাং গানঃ আ, এড়ে কাথা লৗই বাং গানঃ আ, কয় কাতে আসুলঃ বাং গানোঃ আ, কোমড়ো বাং গানোঃ আ, দুলৗড় সুতৗমতে তপলঃ হোয়োঃ আ, জুমিদঃ হোয়োঃ আ এমান।
বিরসা আঃ নওয়াকো নেয়াম-নেমাচার জাঁহায়কো মানাও আ, ওনকো দ ‘বিরসাইত’ কো ঞুতুম কেৎ কোওয়া। নংকা কাতে বিরসা দ মুন্ডা কো রেন গুরু বাবায় হোয় এনা। ঞুতুম কেদেয়াকো- ‘ধৗরতি আবা’। হাড়াম বুডহি, কড়া কুড়ি দোমেল দোমেল বিরসা-আঃ নওয়া ডাহার কো পাঁজা কেদা।
আদ ইনৗ জখেজ্ আচ্কাগে সিংভুম, মানভূম আর পালামৌ টঠারে সরকার নাওয়া অৗন এ জৗরি কেদা- আতো আতো জাঁহা তিনাঃ খাস জমি মেনাঃ আকাৎ ,অনাকো দ জতগে সরকারাঃ কানা। আডি হাহাড়াঃ! নুন দিন বির-বুরু মাঃ কাতেঃ, কুল-বানা লাগা কাতে জাঁহা অত-খেত আদিবাসী কো তেয়ার আকাৎ- অনাদ বাং কো ঞামা? খান চেকাতে কো বাঞ্চাঃ আ?
তাক্ দ দিসম রে মারাং আকাল সেটের এনা। জমাঃ ঞুয়াঃ রেয়াঃ আনাট ঞেল এনা। -আরহঁ নতে জমিদার আঃ খাজনা দ এমঃ তেগে হোয়োঃ আ। মহাজনা ঝৗলিরে মিৎ ধাও জাঁহায়ে বল লেনখান অনাখন অডকঃ হর দ বায় ঞামা। নংকান মুহিম দসারে বিরসা থির বায় তাঁহে দাড়েয়া দা। দুপ্ড়ুপ হহ কাতে লৗই সদর কেদা- খাজনা দ বাংবন এমা। জমিদার, মহাজন, ঠিকাদার, আড়কাঠি- নোকোদ আবোরেন দুষমন কানাকো। সাহেব হঁ দুষমন কানাকো- নোকোদ লাগা কো হোয়োঃ আ। নওয়া কাথা আঁজম কাতে হাজার হাজার বিরসাইত কো এভেন গৎ এনা।
সরকার ঠেন খবর সেটেরেনা। পুলিশ বিরসা দ কো বুঁদি কেদেয়া। হাজারিবাগ জেহল রে বার সেরমা লেকা তাঁহে কাতে ১৮৯৭ সাল রেয়াঃ ৩০ নভেম্বর বিরসা কো আড়াঃ কাদেয়া। মেনখান আদ থির বায় তাঁহেলেনা। ডোমবারি বুরু খন এহপ্ কাতে বাসিয়া, সিসাই, কলেবিরা, বানু,লোহারদাগা, তোরপা, কারা, খুঁটি, মুরহু,তামাড়,বুনডু, সোনাহাতু, জোড়হাট, জালোমাই, বেলনিয়া, বালিহাতু,জালসার- নংকা আয়মা ঠাঁওরে বিরসা গারজাও কাতে মেন কেদা-“আবোওয়াঃ দিশুমরে আবোওয়াঃ রাজ সেটের জানা, মহারানী রাজ টুটু জানা”। জত সেচ্ আড়াং রাঁওয়াও এনা- উলগুলৗন! উলগুলৗন! ধৗরতি আবা জিৎকৗর!
আদ সেটেরেনা ১৮৯৯ সালরেয়াঃ ২৪ ডিসেম্বর সাহেব কোওয়াঃ মারাং দিন রেয়াঃ পৗহিল হিলোঃ। বিরসাইত কো আচ্কাগে চক্রধরপুর, খুঁটি, কারা, তোরপা, তামাড় আর বাসিয়া- নওয়াকো তুরুই গটাং থানা কো জারপা কেদা। আয়মা হড়কো গচ্ এনা আর কো ঘৗল এনা। অনা ৬ জানুয়ারী ১৯০০ হিলোঃ বুরজু আর ৮ জানুয়ারী দ রাঁচি কো জারপা কেদা। মিৎ সেৎ বাঁদুক,কামান রেয়াঃ গুলি আর মিৎ সেৎ আঃসার,কৗপি, তারওয়াড়ে আতে লৗড়হৗই সৗরদিয়েনা।
সরকার বিরসা সাবে লৗগিৎ ৫০০ টাকা আর ডোনকা মাঝিয়া,বুধু আর পরান মুন্ডা কো সাপ্ কো লৗগিৎ ১০০ টাকা কাতে শিরপায় লৗই সাডে কেদা। ৩ ফেব্রুইয়ারী ঞিদৗ সেন তরা বিররে বিরসা দ পুলিশ কো সাপ্ কেদেয়া। অনা তায়ম উলগুলৗন রে কো সেলেদ্ লেন হতেতে ৫৮১ হড় কো বুঁদি অচোয়েনা।
বিরসা মুন্ডাদ মেড়হেৎ শিকড়িতে তল কাতে রাঁচি জিহল রেকো দহ কেদেয়া। মেনখান ১৯০০ সাল রেয়াঃ ৯ জুন আচ্কাগে বিরসা আঃ জিওয়ি বৗতি ইড়িচ্ উতৗর এনা। সরকার এ লৗই সাডে কেদা- উনিয়াঃ দ কলেরা হোয় লেনা। মেনখান ঢের তেৎ হড় গেকো মেনা- বিরসা দ বিষ এম কাতে গচ্ হোয় আকানা।
বিরসা তেহেঞ দ আবো তালারে বৗনু গেয়া। মেনখান উনিয়াঃ কুক্মু ‘আবুওয়া দিশুম, আবুওয়াঃ রাজ’ দ নিৎহঁ সেরমা রে গুরলৗও বাডায় কানা।
.webp)
