World Calamity Control Day (WCCD) দিসৗ কাতে
-সুরেন্দ্রনাথ মান্ডি
১৩ অক্টোবর WCCD মেন্মা ‘জেগেৎ দামধাসের টেকাও দারাম মাহা’ লেকাতে মানাওয়ঃ আ। দামধাসের নিতদ সানাম রেগে- সিরজনপুরিরে, দিসমরে,সমাজরে এমন চেৎ মৗনমি কোওয়াঃ অন্তর-মনে রেহঁ মৗনমি জানাম আর বৗড়-হরা দ সিরজনপুরি(প্রকৃতি) চেতান টেঁহাড় কাতেগে হোয়াকানা। সিসিরজন সাঁও গাতে-গাপাতে আর অনা বেওহার কাতেগে মৗনমি সসনঃ হরা দ লাহা চালাও আকানা। মৗনমি আকোওয়াঃ লৗক্তি লেকাতেগে সিসিরজন বেওহার সুমুং দ বাং, অনা আকোওয়াঃ বস্রে আগু লৗগিৎ কো কুরুমুটু কেদা, আর নংকান কুরুমুটু খন গে সিসিরজন সে পুরিবেস রেয়াঃ পালাট এহব এনা, তেয়ার এনা সিসিরজন দামধাসের (বিপর্যয়)। অকা অকা অক্তেদ আচ্তে আচ্তে মেনমা সিসিরজন অজ্তে ভুংচাল,বির-বাঁও (হয়-বার্ডু), সেঁগেল দাঃ ভুঁবুক, আকাল, বানভৗসি,হুডুর-বিজলি এমান এমান আরহঁ অকা অকা অক্তেদ মৗনমি কোওয়াঃ অনহেলাতে তেয়ারঃ কান সিসিরজন দামধাসের সাঁওতে আয়মা লেকানাঃ দামধাসের, জাঁহাতেদ ধৗরতি পুরিরেনাঃ সানাম সিরজন রেগে অরসং ঞুরুঃ কানা।
সসনঃ মৗনমি ক দারায়তে বিরবুরু উজৗড়, বৗড়তি ইলেক্ট্রনিক গেজেট বেওহার, প্রাকৃতিক জ্বালানি বেওহার,কারখানা থাপন এমান তে ‘বিশ্বউষ্ণায়ন’ হোয়োঃ কান খৗতির সিসিরজন দামধাসেঃ কানা। কলকারখানা খন আর লেমেঞ লৗড়হৗই খৗতির বিস্ আন গ্যাস, তেজষ্ক্রিয়, পারদ এমান অডক কাতে সিসিরজন সে পুরিবেস দামধাসেঃ কানা। ধৗরতি পুরিরে জিউয়িয়ৗন কোওয়াঃ বাঞ্চাও তাঁহেন নিতো কুক্লি সামাং রে।
মৗনমি নিতো জাঁহাতিনাঃগে সসনঃ কো মনে অচওয়ান, উনৗগে আকোওয়াঃ হাহপাপঃ অসহায় অবস্থা ফোটেল রাকাবঃ কানা। মৗনমি অকা হিলোঃ সিসিরজন সাঁও গাতে কাতে সুলুক-সুপুলুকতে তাঁহেন কো রিকৗ লেদা, এনহিলোঃ দ নাপায় অক্ত-মাহা ক তাঁহেকানা। সাঁড়েষ রেয়াঃ লাহান্তি ধৗরতিপুরিয় সসনঃ কেদা ঠিকগে, মেনখান সাঁড়েষ রেয়াঃ অভিশাপ এ আগুকেদা সিসিরজন দামধাসেঃ লেকান আজার। অনাতে নোওয়া দামধাসেঃ খন বাঞ্চাওয়ঃ লৗগিৎ হর ডাহার তুনখি-তলাশ এতহব্ এনা। ধৗরতিপুরিরেয়াঃ এটাঃ দিসম কো সাঁওতে আবো দিসম রেয়াঃ বিরদৗগাড় করেহঁ ‘পুরিবেস বিরদৗ’ রেয়াঃ পঠন-পাঠন এতহব আকানা।
সসনঃ রেয়াঃ গুড়কৗও চাঁক যুদি মৗনমি কোওয়াঃ ভৗলৗই বায় অৗগুয়া, মৗনমি সমাজ যুদি তাহায় তাহায় দামধাসেঃ সামাং রেকো সম্বরোদঃ – ইনাঃতে অনাদ সিসির অজতে হোয় অচওয়ান আর বাং মৗনমি তেয়ার অজতে হোয় অচওয়ান, উনদ মেমেন তেগে মৗনমি সমাজ কো বড়হেআ– ‘লৗক্তি বৗনুঃআ নোওয়া সসনঃ, নওয়া সাঁড়েষ, নোওয়া বাজার-সাহার, আলেদ বির-বুরু দারে নৗড়ি, চেঁড়ে-চিপ্রুৎ, বিঞ কিদিঞ, জিনটি-পিপিড়ি, জিব-জিয়ৗলি তালারেগে গিরৗবাসীঃ লে খজ্ কানা। অনা/ওনকো রুওয়ৗড় কাকো তালেপে’।
সৗরি দ সৗরি গে সিসিরজন ধাসাও কাতে মৗনমি সমাজ অহ বাঞ্চাও তাঁহে দাড়েয়াঃআ।
.webp)
