আবোওয়াঃ ওয়েব পেজ- হলা ১২ অক্টোবর, আদিবাসী একতা মঞ্চ রাইপুর ব্লক কুমুট আঃ হহতে সানাম আদিবাসী কো জুমিদ কাতে এস.টি. সার্টিফিকেট জৗলিয়ৗতি সাঁওতে আদিবাসি কোওয়াঃ রেঁগেচ্-রাবাং,সেচেৎ রেনাঃ নানাহুনৗর দাবী-দাওয়া লৗইতে রাইপুর বি.ডি.ও. ঠেন গণডেপুটেশনক এম কেদা মেন্তে বাডায় আকানা। বাডায় আকানা নোওয়া করোনা আওহাল রেহঁ আপনারা হক আইদৗর ঞাম আর অনা বাঞ্চাও দহয় লৗগিৎ নোওয়া ডেপুটেশনরে হাজার হাজার আদিবাসী মিছিল রে কো তাড়াম কেদা মেন্তেহঁ বাডায় আকানা।
বাঁকুড়া রাইপুর এলাকারেন আদিবাসী হড় আডি দিন খনগে নানাহুনৗর এঁটকেটঁড়ে রেকো সামাং-অঃ কান তাঁহেনা অনা রেনাঃ এদ্রেহঁ মিছিল রেকো উজৗড় আকাদা মেন্তেহঁ রাইপুর খন আবোরেন খবরিয়ৗয় লৗই সদর আকাদা। মিছিলরে ঘানে ঘানে দাবী-দাওয়া কো মুদ্রে তারক কান তাঁহেনা- ১। জৗতিয়ৗরী সেচেৎ অৗরি-২০২০ বাতিল হোয়োঃ মা, ২। জাল সার্টিফিকেট লগন তে বাতিল হোয়োঃমা, ৩। সরকারি সুজুগ সুবিধা ঞামরে দলবাজি, কাটমানি বন্দ হোয়োঃমা, ৪। বন্দ আকান আদিবাসী হোস্টেল কো লগন তে চৗলু হোয়োঃমা, ৫। সান্তাড়ি মিডিয়াম তে সেচেৎ রেনাঃ নাপায় পুরিকাঠামো বেনাও রাকাব্ হোয়োঃ মা, ৬। বির-বুরু, হর-ডাহার বেনাও সাঁওতে আরহঁ এটাঃ কৗমি করে আদিবাসী কোওয়াঃ হাসা-জায়গা দখল বাং চালাঃ আ।
মিৎ বেড়া রেনাঃ গণডেপুটেশন মঞ্চ খন ভারত জাকাত মাঝি পারগানা মহল বাঁকুড়া জেলা গডেৎ মানতান বিপ্লব সরেন গম্কেয় লৗই সদর কেদা- “বাংমা নানাহুনৗর সরকারি প্রকল্প চৗলু আকান রেহঁ আদিবাসী হড় ঠেনদ ঠিক ঠাক সাঁহিচ্ বাং সেটেরঃ কানা”। মানতান সরেন গম্কে উদাহরন লেকাতে “জয় জোহার” প্রকল্প রেনাঃ অভিযোগ এ রাকাব আকাদা। অঁডে উনি লৗই আকাদায় বাংমা- “মিৎ অক্তে নোওয়া রাইপুর এলাকারে ১৭০৫ গটাং আদিবাসী হাড়াম-বুডহি ‘বৃদ্ধভাতা’ কো ঞাম এৎ তাঁহেকানা, মেনখান নিৎ “জয় জোহার” প্রকল্প চালু কাতে মাত্র ৪০০ গটাং হাড়াম-বুডহি ‘বৃদ্ধভাতা’ কো ঞাম এদা। বাংমা “জয় জোহার” প্রকল্প রে কাস্টসার্টিফিকেট বাংতে অনা দাও খন কো পুচুজঃ কানা আয়মা রেঁগেচ্-নাচার হাড়াম-বুডহি”। নংকাগে আয়মা জায়গারে আদিবাসীকো সুযুগ সুবিধা বাংক ঞাম এদা মেন্তেহঁ মানতান সরেন এ রড় তরা কেদা। আর অনা খৗতির গে নোওয়া গণডেপুটেশন রেনাঃ মুড়ুৎ জঁস তাকো মেন্তে বাডায় আকানা।
বিডিও ঠেন গাপাল মারাও আর দাবী সাকাম এম তায়ম মাড়তেকো লৗই কেদা বাংমা বিডিও কাথায় এম কেদা আয়াঃ এক্তিয়ার ভিতরি রেনাঃ কৗমি কদ তলাশ কাতে কৗমিয়ায়। নতে নোওয়াক কৗমি অৗডি লগনতে বাং হোয় লেনখান সানাম গ্রাম পঞ্চায়েত রেহঁ নংকাগে ডেপুটেশন কো এমা মেন্তে আদিবাসী একতা মঞ্চ পাহ্টা খন সাফা কাথা কো লৗই হটঃ আদেয়া মেন্তেহঁ বাডায় আকানা।
.webp)
