আবোওয়াঃ ওয়েব পেজ : গটা পছিম বাংলা ইদিকাতেৎ গে ভুয়ো এস.টি. সার্টিফিকেট লৗইতে আদিবাসী কো তালারে রাঁগাওনা একালতে হুদ্গৗও রাকাব্ কানা। আর অনা হুদ্গৗও সেঁগেল নিয়ৗবার উত্তরদিনাজপুর রেহঁ ঞেল এনা। অ-আদিবাসী কো এস.টি. সার্টিফিকেট এম কাতে সৗরিনাং আদিবাসী কোওয়াঃ সংবিধান রেনাঃ আইদৗর লুটুজ্ রেনাঃ যাঁহা বে-বৗড়িচ্ হুয় চালাঃ কানা অনাদ একালতে লাফাং রে রাকাব্ উতৗর আকানা। অনা ঞেলতে নিৎ আদিবাসী কোওয়াঃ সাহাও দাড়ে রেনাঃ সিঁয়ৗড় রৗপুদ্ আকানা। পছিম বাংলা রেন সানাম এস.টি. গাঁতাত রেন হড় জুমিদঃ কো ধুরৗও আকানা। আদিবাসী সমাজ রেন হড় আদ নানাহুনৗর ভাতা ঞাম কাতে বাংকো ভুলৗও তাঁহেনা অনা আলগাতেগে বাডায়ঃ কানা।
অনালেকাতে আদিবাসী চেতান বে-বৗড়িচ্ নাহাচার বিরুধরে রড়দারাম লৗগিৎতে ওয়েস্ট বেঙ্গল সিডিউল্ড ট্রাইব ওয়েলফেয়ার অ্যাসোসিয়েশন আঃ সৗহিজুহিতে ১৯ অক্টোবর উত্তরদিনাজপুর রায়গঞ্জ মোহনবাটি হাই ইস্কুল রে মিৎ গাপাল মারাও আখড়ারে হুদৗ হুদৗ হড় ক সেটের লেনা মেন্তে বাডায় আকানা।
‘সেরমা পুরী রেমা, সাঁকোওয়া সাডেয়েনা//এভেনঃ মে যুওয়ৗন, চিরগৗলঃ মে….’ নোওয়া রৗড়তে ঞুতুমান বালে সেরেঞ বাডোহী মৗই লাংতিতি কিস্কুওয়াঃ সেরেঞ রাহা তালাতে গাপাল মারাও আখড়া কৗমি হরা এহব্ এনা মেন্তে বাডায় আকানা।
আখড়ারেনাঃ পোয়লো রেগে বাঁখেড় এ দহ কেদা ডঃ জার্মান চঁড়ে ইনৗতায়ম প্রফেসর তালু বেসরা,আলবেনুস মুরমু, দিলীপ কিস্কু,কার্তিক পাহান, মনিকা মার্ডি, কমল মার্ডি সাঁওতে আরহঁ আয়মা গৗখুড়িয়ৗ গোম্কে কো। অনাবেগর আয়মা মাচেৎ-মাচেতানি ইসলামপুর আর ইটাহার কলেজ রেন কৗমিয়ৗ কো সাঁওতে রায়গঞ্জ আর সুরেন্দ্রনাথ কলেজ রেন আয়মা পৗঠুওয়ৗ বাবু-মৗই তাকো নোওয়া গাপাল মারাও আখড়া রেকো সেলেদ্ লেনা।
নোওয়া আখড়া চাচালাওয়িচ্ আর সাসাপাড়াও কুমুট রেন আর মিৎ মুড়ুৎ মানতান দিলীপ কিস্কু গোম্কেয়াঃ কাথাতে- ‘ নুনৗ হড়াঃ সাড়া-সৗবুদ্ যে আলেলে ঞামা অনা বাংলে আশা আকানা। আয়মা আদিবাসী গাঁতাত রেন হড় যাঁহালেকা ভাবতে কো সেটের এনা অনাতে আলে সৗরিগে রৗস্কৗয়েনালে। ওনকো সোররে তিঁগুন তে আলেয়াঃ সাঁহাস আরহঁ বৗড়তিয়েন তালেয়া। সানাম আদিবাসী কো যুদি নংকাগে কো লাহা হিজুঃআ এনখান নোওয়া নাহাচার বিরুধ রেবন তিঁগু দাড়েয়াঃআ আর সৗরিনাং আদিবাসী কোওয়া আইদৗর বন ঞাম গেয়া’- মেন্তে মানতান কিস্কু আয়াঃ মত এ লৗই সদর কেদা।
.webp)
.webp)
