(হুডিঞ কাহ্নি)
জুরি পাওরা
-বাড়তাঙ সরেন
ঠেটা মাঝহি দ কুলহী খন রাচা সেচ আডি তৗপিস আতে ফির ফিরে আফির বলয়েনা। আচরেন এরাৎ তেদ সেচ আরাঃ পুণ্ড বেঙ্গেৎ কাতেঃ কুল লেকা হান্ড্রৗও আতেয় মেনকেদা - 'উনি রুতি সাঁও রড় লান্দা, ঞেপেল ঞাপাম বায় বৗগি লেখান উপেলদঞ হেলেচ গজেয়া ! আর বাংখান ইঞগে ইঞাঃ জিউয়ীঞ ভারাভাট চাবায় তিঞৗ ! এনতেখান নংকান পাপ দ বাং ঞেল হুয়ুঃতিঞৗ’ ! মাঝহি বুড়হি ছিতৗ দ বতর বতরতে লৗবিৎ আড়াংতেয় রড় রুয়ৗড়কেদা --'এগো, উপেল আপাত, উনৗ দ বহঃ আলোম ললয় তামা। বাবু দ মজ মজ তেলাং বুঝহৗও আয়া। বায় বুঝহৗও গেয়া, নাহাঃ '! ঠেটা মাঝহি দ চেৎহঁ বাং রড় কাতেঃ রৗগিতে আয়াং বিঞ লেকা ফঁস ফঁস সাহেৎ কাতেঃ রাচাখন পিন্ডাতেয় বলয়েনা।
মারাং অড়াঃ কোঠা চটখন উপেল দ আচ আপাতাঃ রড়ে আঁজম কেদা। পুঁথি তালারে দহ মেনাঃ রুতিয়াঃ চিতৗর সেচ মিৎ মনেতেয় কয়ঃ আকাদা। আয়াঃ বার মেৎ খন টড়ঃ টড়ঃ মেৎদাঃ জর ফেডঃ কানা।
উপেল আর রুতি তৗকিন দ কুলহী ধুড়ীরে মিৎ সাঁও গাতে গাতেকিন হারা আকানা। বাড়গেরে ঘাঙরা গৎ, জঁডরা ফড়, উল হালাং. মাদারগম তিয়ো, তিনৗ যে হান্তে নাতেকিন ঞির বাড়া আকাদা, অনা দ চাঁদোবঙ্গা গেয় বাডায়া। চৗইত বৗইশাখ চাঁদো কুপৗই গাডারে জিরি জিরি আতুঃ দাঃরে সারা তিকিন হাকোকিন ঝৗলি আকাৎ কওয়া। হাকো ঝৗলি ঝৗলি মিৎ সাঁওতে তাঁহেরেনাঃ রৗস্কৗ গে জুদৗ গেয়া ! আতোরেনাঃ ইস্কুল রেহঁ মিৎ তেগেকিন পাড়হাঃও আকাদা। সুর সুপুরকিন দুড়ুপকান তাঁহেনা। ইস্কুলখন রুয়ৗড় কাতেঃ হঁ মিৎতেগে গাতে বাড়ায়, ঞির বাড়ায় ! অনা তায়ম হাই ইস্কুলরেহঁ অনকাগে। ঞিদৗ জৗপিৎ অক্ত ছাডা মিৎ ঘৗড়িচ হঁ বাংকিন ঞেল আদঃ আ উপেল আর রুতি তৗকিন দ। অনাতে আতোরেন হড়দকো মেতাকিনা 'জুরি পাওরা'।
হাই ইস্কুল মুচৗৎ কাতেঃ উপেল আর রুতি তৗকিন দকিন আগঁচ্ তিয়ৗ লেদা, আকিনাঃ 'গাতে সৗগৗই' দ তিরেচ 'দুলৗড় সৗগৗই'রে বদল আকানা। আকিনাঃ বার মন দ দুলৗড় লাঠাতে লাঠা মিৎ আকান তৗকিনা। আর নওয়া কাথা যাঁহা অক্তে রুতি আপাত, ঝাদে পারগানায় বুজ তিয়ৗঃ কেদা, উন অক্তেগে উনি দ রুতি লৗগিৎ জাঁওয়ায় পাঁজায় ধুরৗওলেনা। উপেল আর রুতি তৗকিনাঃ সৗগৗই খৗতির ঠেটা মাঝহি আর ঝাদে পারগানা তৗকিনাঃ হেড়েম সৗগৗই হঁ তেহেঞ কাসায়েনা। আতোরেন হড়কোহঁ অৗড়িস গেকো রড় এদা। আর চেদাঃ বাংকো রড়া এনতেদ, মিৎ পৗরিসরে বাপ্লা দ আবো সাঁওতারে দ একালতে বাং গানঃ আ। বানা হড়গে কিস্কু 'মৗয়লৗ', বয়হা লেকা সৗগৗই। অনাতে ঠেটা মাঝহি আর ঝাদে পারগানা ভিতরিরে তালা কুলহীরে তেহেঞ আডি কৗইজৗ খৗপৗরি হুয় আকানা। বানাহড়গে আপনারাঃ দোষ দ বাংকিন ঞেল ঞাম এদা। বানাহড়াঃ মচারে অনা মিৎ কাথা, "আমরেন গিদরৗ শাসনেম " !
দশার হিলোঃ সেতাঃ তরারে ধিরিবাঁদি আতো সুর কুপৗয় গাডা আড়েরে দুরুং দুরুং হড়কো জাওরা আকানা। গাডা আড়ে বুরুৎ বুরুৎ কৗশি ঝুড় দানাংরে বারয়া হারা জুয়ৗন কড়াকুড়ি তি-তি সাপাপ কাতেঃ কিন গিতিচ আকানা পান্তিয়াতে। বাহা লেকা বারয়া জিয়ন জিউয়ী, অৗউরি সাড়ঃ রেগে ঝাড়গাও ঞুঁরুয়েনা !
.webp)
.webp)
