আবোওয়াঃ ওয়েব পেজ- ভারত জাকাত সান্তাড় পৗঠুওয়ৗ গাঁওতা আর যুওয়ৗন মহলাঃ গড়-গপড়ঃতে দারায়কান ১৯ অক্টোবর হিৎ হিলোঃ ঝাড়গ্রাম জেলা প্রশাসনিয়ৗ ঠেন জাল সার্টিফিকেট বিরুধ্রে অল-বেল তালাতে ডেপুটেশন এম কো চালাঃ কানা মেন্তে বাডায় আকানা। নঁডে লৗই লেক কানা পারমেন ২৫ সেপ্টেম্বর ভারত জাকাত সান্তাড় পৗঠুওয়ৗ গাঁওতা জাল সার্টিফিকেট বিরুধ্রে পুরুলিয়া জেলা প্রশাসনিয়ৗ ঠেন দোমেল দোমেল মিছিল আর গারজাও রড়দারাম তালাতে উনুইহৗর সাকাম (স্মারকলিপি) কো জমা লেদা।
মিৎ অক্তে তাঁহেকানা পৗঠুওয়ৗদ পাড়হা ভেদ্রেগে তাঁহেনায়। পাড়হা বেগর আর এটাঃ চেৎহঁ বায় উইহৗরা। মেনখান নাহাঃ যুগ বনদল আকানা পৗঠুওয়ৗ কো পাড়হাঃ সাঁও সাঁওতে সাঁওতা রেনাঃ বুগি-বৗড়িচ্ পাহ্টা কহঁক ঞেল দাড়েয়াঃ মেন্তেহঁ আয়মা গৗখুড়িয়ৗ সেচেদিয়ৗ আকোওয়াঃ মতামত কো সদর আকাদা। আরহঁ লৗই গানো আ পৗঠুওয়ৗআঃ পাড়হা কৗমি কান রেহঁ সমাজ রেয়াঃ দায় দৗয়িক্ বাংক এড়াও ইদিকেয়া। অনালেকাতেগে নিৎ পৗঠুওয়ৗকো-যুওয়ৗনকো সমাজ-সাঁওতা রেনাঃ আয়মা দায় দৗয়িক্ আঁগিভার গঃ কাতে সমাজ লৗইতেকো লৗড়হৗই কানা, আঁদোড় এদা, রড় এদা, নোওয়াদ মিৎ ভৗগি নিশৗন কানা মেন্তেহঁ আয়মা সমাজ দরদিয়ৗ কোকো লৗইএদা। চেদাঃ বাংমা ওনকো গেকো আগুদাড়েয়াঃআ যাঁহালেকান বনদল।
নিত্ ঞেলঃগঃ কানা পছিম বাংলা রেনাঃ অৗডি আয়মা কলেজ করেগে আদিবাসী কোওয়াঃ রাখা দহ জুড়ু রেহঁ বেশির ভাগ ঠাঁও রেগে অ-আদিবাসীকো অসৎ উপৗয় তেকো দখল এদা আর আসল আদিবাসী কগে লপং টুটি বৗরুজাং কাতেকো তাঁহেন কানা। একেন কলেজ রেনাঃ মেরিট লিস্ট সুমুং দ বাং, পছিম বাংলা রেনাঃ সানাম লেকান মেনেৎ PSC, SSC, NEET, JEE এমান হেপ্রাও বিনিড করেহঁ মিৎগে চিতৗর ঞেলঃগঃ কানা মেন্তে অভিযোগ কিন রাকাব্ আকাদা ভারত জাকাত সান্তাড় পৗঠুওয়ৗ গাঁওতা আর যুওয়ৗন মাডোওয়া।
বাডায় আকানা অৗডি দিন খনগে পৗঠুওয়ৗ গাঁওতা নানাহুনৗর নিউজ পোর্টাল করে নেঁহর জোহার তালাতে জাল সার্টিফিকেট লৗইতে বন্দেজ হাতাও রেনাঃ কাথা সরকার বাডায় অচ হুয় লেন রেহঁ নিৎ ধৗবিচ্ চেৎ বন্দেজ গে বায় হাতাও আকাদা মেন্তেহঁ গাঁওতা অভিযোগ এ আগুওয়াকাদা।
আর অনাতেগে বানার গাঁওতাহাঃ কুরুমুটুতে পৗঠূওয়ৗ-যুওয়ৗনকো জুমিৎ কাতে দিন দিনতে নংকান নিসড়ৗও অচকান বিরুধ্রে ঝাড়গ্রাম জেলা প্রশাসনিয়ৗ ঠেন জাল সার্টিফিকেট বিরুধ্রে অল-বেল তালাতে ডেপুটেশন এম কো চালাও লৗগিদঃ কানা।
অনা ঝাড়গ্রাম রেনাঃ ডেপুটেশন রে ‘যুওয়ৗন মাডোওয়া’ রেন সেক্রেটারী মহেন্দ্রনাথ সরেন আর ‘পৗঠুওয়ৗ গাঁওতা’ রেন পোয়লো সভাপতি সুশান্ত সরেন সাঁওতে আরহঁ আয়মা গাঁওতা চাচালাওয়ান কো সেটের তাঁহেনা মেন্তে বা্ডায় আকানা।
.webp)
