আবোওয়াঃ ওয়েব পেজ- হুদুড় দুর্গা ইদিকাতে নেশদ আডি আয়মা জায়গারে ভৗরি ভরম আতে উনুইহৗর আখড়া হুয় পারমেনা মেন্তে বা্ডায় আকানা। অকারেদ হুদুড় দুর্গা ঞুতুমতে মিৎ বেড়া রেনাঃ শহীদ বেদী বেনাও কাতে, অকারেদ মহিষাসুর সে হুদুড় দুর্গা আঃ চিতৗর সামাং কাতে, অকারেদ হুদুড় দুর্গা রেন মেড় (মুর্তি) বেনাও কাতে হুদুড় দুর্গা উনুইহৗর আখড়াকো সাপ্ড়াও লেদা আয়মা আদিবাসী সংগঠন সে গাঁওতাকো।
মেনখান নিত নোওয়াকো ঞেল কাতে আয়মা হড়াঃ মনেরে আডি মারাং কুক্লি রাকাব্ কানা- ‘হুদুড় দুর্গা আঃ কাথা অকাখন বাডায়েনা’? তেহেঞ খন গেল সেরমা মাড়াং সে লাহা আডি আয়মা হড়গে হুদুড় দুর্গা আঃ কাথা বাংকো বাডায় কান তাঁহে কানা। নিৎ কো লৗই এদা বাংমা হুদুড় দুর্গা দ খেড়োওয়াড় করেন আডি মারাং মিৎ বীর বান্টা সে রাজ এ তাঁহে কানা। উনি রাজ সাঁও আর্য কোওয়াঃ লৗড়হৗই হুয় লেনা তেখার তেখার। মেনখান অনা লৗড়হৗই রে আর্য কো উনি রাজ সাঁও বাংকো দাড়েয়াকানা। তায়মতে কাথায় আর্য কো আডি ছল-চৗতুরি কাতে মিৎ আডি মঁজ কুড়ি হপন, উনি রাজ সাঁও ক বাপলা কাদেয়া। আর উনি কুড়ি হপন গে কাথায় মিৎ দিন রাজা ঞু বুল অচ কাতেয় গচ্ কেদেয়া।
হুদুড় দুর্গা গচ্ অচয়েন ইনৗ তায়ম, আদ খেড়োওয়াড় কদ হায়! হায়! মেন্তে রাঃ রাঃ কো ধুরৗও এনা। উনি দিসৗতেকো হায়! হায় কেদা। নংকা লেকা আয়মা কাথাকো আঁজমঃ কানা। আরহঁ ক লৗই এদা বাংমা আয়নম-কাজর ঞুতুমান বারয়া খেড়ওয়াড় কুড়ি হপন আর্য কো আতকির লেৎ কিনৗ। উনকিন পাঁজা কাতে বাংকো ঞাম লেৎ কিনরে, আদ খেরোওয়াড় কো হায়! হায়! মেন্কাতে দিশম ক সাঁঘার লেদা। নংকান আথান কাথায় কাথা মেনাঃ আকাদা।
মেনখান নিৎ আয়মা হড়াঃ মচারেগে কুক্লি রাকাব্ কানা হুদুড় দুর্গা দ অকা রিনীচ্ রাজ, আর অকা জখেচ্ রেন রাজ এ তাঁহেকানা মেনেৎ অকা সাল, মৗহিৎ নোওয়া কাথাদ অকয়হঁ অকারেগে বাংকো লৗই এদা। নঁডে লৗই লৗক্তি কানা পুরান আর নাগাম দ যুদৗ গেয়া। হুদুড় দুর্গা বীর শহীদ লেকাতে সদরে হোয়োঃ খান নাগাম হৗটিঞ রে পাড়াঃ আয়, আর নাগাম খানগে প্রমান হোয়োঃ আ নাগাম রেয়াঃ ঐতিহাসিক উপাদান আতে। মেনখান নোওয়ারেনাঃ সৗবুদ্ অকারেগে বাং বাডায়ঃ কানা। কুক্লি রাকাব্ কানা তবে চেৎ টাঁডি কে টাঁডি হুদুড় দুর্গা লৗইতে একেন গুজব পাশনাও হোয়োঃ কানা?
নঁতে যাঁহা বাডায় আকানা দাঁসায় এহবদ গুরু আখড়ারে, যাঁহারে চেলা কো দুড়ুপ্ কাতে মান্তার কো চেদা,রান মুরগৗন কো চেদা, গুন মারা, নাশন মারা, বান মারা কো চেদা। আর গুরু রাচারে সুনুম সিঁদুর আঁড়গ কাতে আতো আতোকো দাঁড়ানা সে সাঁঘারা আর অনাগে অড়াঃ অড়াঃ ক সেটেরা। বাডায়ঃ আ যাঁহায় অড়াঃ রেকো বলনা অনারাচারে মাড়াং সুনুম সিঁদুর তেকো টিকৗগা আর অনা তায়মকো এনেজা। অনা বেগর গুরু গুরু কো ঞাপামা, চেলা চেলা কো ঞাপামা আর অঁডেকো জোহার জংঅ আ। অকয় তিনাঃ কয় ক ঞাম আকাদা সে আর যাঁহানা কো ঞাম আকাদা অনাকঁহ ক এপেমা। নঃঅয় যে দাঁসায় রেনাঃ নংকান অৗরিচৗলি মেনাঃআ। মেনখান অনাদ নিৎ অকা আখড়া রেগে বাং গাপাল মারাঃ কানা। নুনৗ গুরু কোওয়াঃ সেরেঞ সে কাথা তেহেঞ বাং গালচঃ কানা। জত খন হাহাড়াঃ রেনাঃ কাথাদ দাঁসায় রেয়া অকা সেরেঞরে, সে অড়হেঁ রে, সে বঁগা বুরুরে অকা ঠেনহঁ হুদুড় দুর্গা রেনাঃ কাথা বৗনুঃ আকাদা। এনতেরেহঁ আদম হড়দ হুদুড় দুর্গা ক উদুঃ লৗগিদঃ কানা দাঁসায় রে। নোওয়াতে তেহেঞ আয়মা হড়গেকো হাহাড়াঃগঃ কানা। দাঁসায় আলাদা জিনিস আর হুদুড় দুর্গা কৗহ্নি যাঁহাদ পুরান অনা যুদৗ গেয়া মেন্তে আয়মা হড় তালা খনগে কাথা রাকাব্ কানা। অনাতে দাঁসায়রে হুদুড় দুর্গা ঞুম কাতে সানামাঃ ক সলম লটমেদা মেন্তেহঁ আয়মা হড় কাথা কো রাকাব্ আকাদা। আরহঁ বাডায় আকানা নিৎ মা নোওয়ারে মারাং মারাং রাজআরি রেন হড় হঁক সেলেদঃ কানা। আর হিনৗ-নিয়ৗ এনেচ্-সেরেঞ কাতে হুদুড় দুর্গা উৎসব (পরব) গেক চৗলুয়েদা। দাঁসায় রেনাঃ যথাৎ মৗন দ বাং ঞেলঃ কানা। নোওয়া খন গে বাডায়ঃ কানা দারায় দিনরে সানতাড় সমাজ অকা সেন মঁহডাঃ কানা অনাগে আডি মারাং ভাবনাঃ রেনাঃ বিষয় দ।
নঁতে আরহঁ হুদুড় দুর্গা রেন মেড় বেনাও কাতে যাঁহা ভাবতে বঁগাবুরু (পূজাপাসা) এহব আকানা, এনখান নুন দিন আদিবাসী সান্তাড় কো প্রকৃতি পূজারী লেকাতে গরব কো আটকারেৎ তাঁহেকানা, নিত অনা গরব,অনা মৗন হাপেন আর তাঁহেনাতো ? আয়মা হড়াঃ কাথাগে রাকাব কানা বাং তাঁহেনা। চেদাসে বাডায় আকানা ধৗরতিরে মিৎ মাত্র আদিবাসী সানতাড় গে বির-বুরু-দারে ক বঁগাবুরুওয়াঃআ। নিৎ অনা জায়গারে আদম হড় যথাৎ নাগাম বাং বাডায় কাতে, মেড় আর পৌত্তোলিক বঁগাবুরু বেবস্থা আগুকাতে সানামাঃ কো সলম লটম এদা মেন্তে আয়মা হড় কো রড় এদা আর নোওয়া লৗইতে রড়দারাম রেনাঃ লৗক্তি মেনাঃআ মেন্তেহঁক লৗই সদর এদা।
.webp)
.webp)
