 |
| প্রোডিউসর আর ডাইরেক্টর সাঁওতে যমুনা টুডু |
আবোওয়াঃ ওয়েব পেজ- পদ্মশ্রী হামেটিয়ৗ মানতানিয়ৗ যমুনা টুডু লৗইতে হিন্দী ফ্লিম শুটিং হররে মেনাঃআ মেন্তে ডগর বাডায় ঞাম এনা। বাডায় আকানা বাংমা যমুনা টুডু লৗইতে যাঁহা নোওয়া হিন্দীতে ফ্লিম তেয়ার লৗগিদঃ কানা অনা রেনাঃ ঞুতুম হঁ ‘যমুনা টুডু’ গে তাঁহেনা মেন্তে ফ্লিম রেন অনলিয়ৗ ধর্মেন্দ্র বাঘেল আবোরেন খবরিয়ৗয় বাডায় অচ আকাদেয়া।
বির-বুরু বাঞ্চাও রেন লৗউড়িয়ৗ যমুনা টুডুওয়াঃ বাপ্লা তায়ম নৗইহৗররে হেচ্কাতে চেৎ লেকারে চাড্রা বুরু হৗড়িয়ৗড় সাগেন রুওয়ৗড় এনা, খন এহব কাতে বির দারে আৎকির মাফিয়া ক সাঁও টক্কর এম কাতে জিৎকৗর এনায় পদ্মশ্রী। নোওয়াক সানামাঃ চিতৗর গে নোওয়া ফ্লিম রে তাঁহেনা মেন্তে বাডায় আকানা। আর নোওহাহঁ বাডায় আকানা যমুনা টুডুওয়াঃ মুড়ুৎ চৗরিত রে অভিনয়ায় হিন্দী ফ্লিম রেন ঞুতুমান অভিনেত্রী সোনাক্ষী সিনহা।
ভিলেজ টাকিজ ফ্লিম কোম্পানি প্রোডাক্সন তে, ডাইরেক্টর আর প্রোডিউসর সি.এল.প্রসাদ,কো-প্রোডিউসর হেমরাজ মীনা আর অনলিয়ৗ ধর্মেন্দ্র বাঘেল আঃ ননলতে নোওয়া ‘যমুনা টুডু’ ফ্লিম তেয়ারঃ কানা মেন্তে বাডায় আকানা। হলা ২৮ অক্টোবর হিলোঃ মুম্বাই খন ফ্লিম প্রোডাক্সন টিম রেন গৗখুড়িয়ৗ কো গটা চাকুলিয়ৗ আর ঘাটশিলা রেনাঃ নানাহুনৗর শুটিং প্লেস কো বাছনাও কেদা। আডি লগনগে শুটিং এহবঃ মেন্তেহঁ বাডায় আকানা। তেহেঞ ১২ টাড়াং অক্তে পুরৗ ফ্লিম প্রোডাক্সন টিম যমুনা টুডু ঠেন খন বিদৗয় হাতাও কাতে উডৗন গৗডিতে মুম্বাই সেন কো মঁহডায়েনা।
নঁতে আয়াঃ ঞুতুম তে নোওয়া হিন্দী ফ্লিম ‘যমুনা টুডু’ তেয়ারঃ কান খৗতির আডি রৗস্কৗ আর গরব এ আটকার আকাদা মানতানিয়ৗ টুডু। নোওয়া ফ্লিম ঞেল কাতে হাপেন আদিবাসী সমাজ রেন তিরলৗ কো সাঁওতে আর সমাজ করেন কোহঁ বির-বুরু বাঞ্চাও দহয় রেনাঃ উদ্গৗও কো ঞামা মেন্তে মানতানিয়ৗ টুডুয় লৗই সদর আকাদা।
.webp)
.webp)
