আবোওয়াঃ ওয়েব পেজ : ঞেল আকানা নুন দিন আদিবাসী কো যাঁহায় যাঁহালেকা আপান দাড়ে আকোওয়াঃ যে যার সংগঠন পাহ্টা খন কো কৗমি আগুয়েৎ তাঁহেকানা। মেনখান নিত্ জাল এস.টি সার্টিফিকেট গটায় ছয়লাপঃ কান ঞেলতে আদিবাসী কো তালারে জুমিদ্ রেনাঃ নিশৗন ঞেলঃ গঃ কানা।
অনাবেগর দিনকে দিন আদিবাসী কো চেতান নানাহুনৗর নাহাচার বাড়হাও চালাঃ কানা। জানাম পৗরসিতে সেচেদ্ খন এহব কাতে সাঁওয়ার, হর-ডাহার, ঞু-দাঃ এমান এমান সুযুগ সুবিধা করেকো এড়ে অচঃ কানা। সংবিধানরে হক-অৗইদৗর তাঁহে কাতেহঁ যাঁহানা ঞাম লৗগিৎ আডি কাঠ-কয়লা রাপাঃ হোয়োঃ কানা সাঁওতে আচুর-বিহুরতে হেনস্থা ঞাম হোয়োঃ কান তাকোওয়া। এনহঁ মেৎ সামাংরে অ-আদিবাসী কো এস.টি সার্টিফিকেট ঞাম কাতে সানাম লেকানাঃ সুযুগ-সুবিধা কো ঞাম ইদিয়েদা- চেৎ ইস্কুল,কলেজ রে চেৎ মেডিকেল, ইঞ্জিনিয়ার রে ভর্তি লৗগিৎ সে চৗকরিরে।
নোওয়াকো নাহাচার রেনাঃ রড়দারাম আয়মা আদিবাসী সংগঠন পাহ্টা খনগে বিডিও,এসডিও,ডিএম কঠেন জেলা জেলা করে ডেপুটেশন হঁক এহব আকাদা। নোওয়া ইদিকাতে এম.এল.এ., এম.পি এমন চেৎ মুখিয়ৗমুন্ত্রী, রাজ্যপাল সাঁওতেহঁ অফিসিয়াল কৗমিহরা এহব আকানা।
নুন দিন নাহাচার আর নিশড়ৗও অচোওয়ান খৗতির আদিবাসী কোওয়াঃ মনে রেনাঃ দুঁগুদ্ দুগুদ্ জোলোঃ কান তাঁহে ভুরসি সেঁগেল অনা নিত্ সৗরদি সেঁগেল লেকা দৗউ দৗউ জোলোঃ কানা। সানাম টঠারেন সানাম আদিবাসীকো ফেক এস.টি. বিরুধরে মিৎ মনেতে জুমিদঃ কো এহব আকাদা। আর নোওয়া লৗইতে সানাম টঠারে জুমিদ্ বেনাও রাকাপ লৗগিৎ ওয়েস্টবেঙ্গল সিডিউল্ড ট্রাইব ওয়েলফেয়ার অ্যাসোসিয়েশন প্রচার এদায় আর লৗড়হৗই রেনাঃ দাড়ে কেটেজ্ লৗগিৎ জেলা কুমুট এ তেয়ার ইদিয়েদা।
বাঁকুড়া, মেদিনীপুর, ঝাড়গ্রাম তায়ম নিয়ৗবারদ গাপা ১৮ অক্টোবর পছিম বর্ধমান রেনাঃ শিবম ম্যারেজ হল(দুর্গাপুর-০৬) আর পুরুলিয়া জেলা রেনাঃ জেলা বিঞ্জান কেন্দ্র সোর মানস লজরে ওয়েস্টবেঙ্গল সিডিউল্ড ট্রাইব ওয়েলফেয়ার অ্যাসোসিয়েশন পাহ্টা খন মিৎ গাপাল আখড়া সাপ্ড়াও হোয় আকানা মেন্তে বাডায় আকানা। অনকাগে ১৯ অক্টোবর হিলোঃ উত্তর দিনাজপুর রায়গঞ্জ রেনাঃ মোহনবাটি হাই ইস্কুল রেহঁ।
সানাম গাপাল মারাও আখড়ারেগে আদিবাসী গাঁতাত রেন গৗখুড়ৗন ডাক্তর, ইঞ্জিনিয়ার, প্রফেসর, অফিসার, মাচেৎ এমান গম্কেকো সেটের তাঁহেন কো ঞেলঃ কানা। আর নোওয়াকো ঞেল কাতে গে অ্যাসোসিয়েশন রেন মানতান সভাপতি বালকরাম সরেন গম্কে লৗই আকাদা- ‘যুদি নংকা কাতে সানাম হড় বন জুমিদ্ দাড়েয়াঃআ এনখান আবো জিৎকারঃ গেয়াবন’।
.webp)
